އެއީ ތަނަވަސް ޚިޔާލުގެ ބޭފުޅެކެވެ. ދުނިޔޭގެ ގިނަ ކަންކަމަށް ލޯ ހުޅުވިފައިވާ ބޭފުޅެކެވެ. ސަރުކާރަށް ދިގު މުއްދަތަކަށް ޚިދުމަތް ކުރައްވާފައިވާ ބޭފުޅެކެވެ. ސަރުކާރުގެ ޝަރަފުވެރި އެތައް މަޤާމުތަކެއް ފުރުއްވާފައިވާ ބޭފުޅެކެވެ. ކޮންމެ ރޮނގަކުންވެސް ކުރިއަށްވަޑައިގަންނަވަން ޖެހިލުންވުމެއް ނެތެވެ. ޚިޔާލާއި ފިކުރު ކޮންމެ ކަމަކަށްވެސް ހިންގާލައި، އެ ޚިޔާލުތަކާއި ޝުޢޫރުތައް އާންމުންނާ ހަމައަށް ގެެނެސްދެއްވައެވެ. ބައެއް ފަހަރު އެޚިޔާލުތަކުގެ ބޭނުން ވަރަށްވެސް ބޮޑެވެ. ބައެއް ފަހަރު އެފަދަ ޚިޔާލުތަކުގެ މައްޗަށް ބައެއްކަންކަން ކުރެވިފައިވެސް އެބަހުއްޓެވެ.
މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ރައީސްކަމާއި، ނާއިބު ރައީސްކަން ކުރެއްވި އަދި މިހާރުގެ ސެކްރެޓަރީ ޖެނެރަލް އަދްނާން ޙަލީމަކީ ވަރަށް ތަނަވަސް ޚިޔާލުތަކުގެ ބޭފުޅެކެވެ.
ތިނަދޫން މީހުން ބޭލިއިރު އެއީ އެންމެ 2 އަހަރުގެ ތުއްތު ކުއްޖެކެވެ. އަދްނާން ހަލީމް ވިދާޅުވާ ގޮތުން އޭނާގެ މަންމަ އެންމެ ފުރަތަމަ ވަޑައިގެންނެވީ ގއ. މާމެންދޫއަށެވެ. އެރަށުން ފަހުން އެ އަތޮޅު ވިލިނގިއްޔަށް ބަދަލުވިއެވެ. އެހެންނަމަވެސް ތަޢުލީމު އުނގަންނައިދިނުމަށްޓަކައި ތިނަދޫއަށް ފަހުން ދިޔަނަމަވެސް އެ އާއިލާއިން ވަޒަނެއްގެ ގޮތުގައި ބަަލަނީ ގއ.ވިލިނގިއްޔެވެ. މަންމައާއި ބައްޕަ ފަރާތު އާއިލާ އޮންނަނީ ތިނަދޫގައިކަމަށްވިޔަސް އަދްނާންމެންގެ ދިރިއުޅުން އޮތީ ވިލިނގިލީގައެވެ. ވަރަށް ކުޑަ އިރުއްސުރެ ވިލިނގިއްޔަށް ހިޖުރަކުރެއްވުމާއިއެކު އެރަށުގެ ރައްޔިތުންވެސް ވަނީ އެއީ އެރަށުގެ ދަރިއެއްކަމަށް ބަލައިގެންފައެވެ.
އެ ޒަމާނަކީ ވަކި ސަނަދެއް އޮވެގެންނޫނީ ވަޒީފާއަށް ވަދެވޭ ޒަމާނަކަށް ނުވާތީ ސަނަދު ހޯދުމަށްޓަކައި އެ މަރުހަލާ ކަނޑަައްތުކުރައްވަމުން ވަޑައިގެންނެވިއިރު އެއަށްވުރެ އިތުރަށް އުނގެނެންޖެހޭކަމަށް ފެނި، ވޮކޭޝަނަލް ޓްރެއިނިންގ ސެންޓަރާ ގުޅިގެން ޓެކްނިކަލް ދާއިރާއިން ތަމްރީނު ހާސިލް ކުރެއްވިއެވެ. ކިޔެވުމާއި، ފަންނީ ގޮތުންވެސް އިތުރަށް ތަރައްޤީވުމަށްޓަކައި ގިނަ މަސައްކަތްތަކެއް ކުރެއްވި އަދްނާން ހަލީމަކީ ތާނަ ވަރަށް ރީތިކޮށް ލިޔުއްވާ އަދި ދިވެހި ބަސް ވަރަށް ރަނގަޅަށް ދެނެވަޑައިގެން ހުންނެވި ބޭފުޅެކެވެ. އޭގައި އެންމެ އިސްދައުރެއް އަދާކުރައްވާފައިވަނީ ވަރަށް ޚާއްސަ ދެ ބޭފުޅެކެވެ. އެއްބޭފުޅަކީ ޢަދްނާނުގެ ބައްޕަ އަލްމަރްޙޫމު ޙަސަން ޙަލީމްގެ ދާރުލްއިޤާމާގެ ދެރަޙްމަތްތެރިން ކަމުގައިވާ އަލްމަރްޙޫމް އަބްދުލް ރަޙީމް އަބްދުލް މަޖީދެވެ. އަނެއް ބޭފުޅަކީ ދިވެހިބަހުގެ އުސްތާޛް އަބްދުއްﷲ ސޯދިގެވެ.
''ޢަރަބި އަދި އުރުދޫ ފޮތްތަކުން ބައްލަވައިގެން އެބޭފުޅުން ކިޔުއްވަމުން ގެންދެވީ ދިވެހި ބަހަށް ތަރުޖަމާކުރައްވައިގެން. ދެން އަޅުގަނޑު ޖެހެނީ އެ ވިދާޅުވާ އެއްޗެއް އެގޮތަށް ލިޔަން. އެގޮތަށް ލިޔުމުން، ދިވެހި ލިޔުމުގައި ކުރިއަރައިގެން ދިޔަ. ޢިބާރާތްތައް ކުރާގޮތްތައް ދަސްވަމުންދިޔަ. ފޮޅުވަތް އަޅައިގެން ލިޔަން ދަސްކޮށްދެއްވައި، މަޒުމޫނާއި، ނަމޫނާ ސިޓީތަކުން އުގަންނަވައި ދެއްވި. ކޮންމެ ދުވަހަކީވެސް ކިޔަވާ ދުވަހެއް.''
އަދްނާން ހަލީމަކީ ޒުވާނުންނާއި ގުޅޭ އަދި މަސައްކަތުގެ ތެރޭގައި އަބަދުވެސް ތަރައްޤީގެ ކަންތައްތަކުގައި އުޅުއްވަން ބޭނުންފުޅުވާ ބޭފުޅެކެވެ. ވީޓީސީގައި ފުރިހަމަ ކުރެއްވި ކޯސް ނިންމަވައި ސަރުކާރުގެ ވަޒީފާއެއްގެ ގޮތުގައި މާލޭ އިންޖީނުގެއިން ފުރުސަތު ލިބުމުން އެތަނުގައިވެސް ދުވަސްކޮޅަކަށް ހުންނެވުމަށްފަހު ނެންގެވި ކުޑަ ޗުއްޓީއަކީ އަދްނާން ހަލީމްގެ ދިރިއުޅުމަށް އައި އިންގިލާބެއްފަދަ ކަމެކެވެ.
''ވިލިނގިލީގައި ރަނގަޅު މަދަރުސާއެއް ނެތި އެތައް ދުވަހެއް ފަހުން އަލަށް މަދަރުސާއެއް އެރަށުގައި ސަރުކާރުން ބިނާކުރެއްވީ. ކޮމިއުނިޓީ ސްކޫލުގެ ނަމުގައި ބިނާކުރި އެތަން ހުޅުވަން ހަމަޖެހިފައި އޮތުމުން އެ ތާރީޚަށް ދާން ބޭނުންވީ ރަށަށް. އެެހެންވެ ޗުއްޓީއެއް ނަގަން ބޭނުންވީ. އެހެންނަމަވެސް ޗުއްޓީ ނުލިބުނު. ދެން އަމިއްލައަށް ޗުއްޓީއެއް ނެގިކަމަށް ބުނެ ސިޓީއެއް ލިޔެފައި ބާއްވާފައި ރަށަށް ދިޔައީ. އެ ރަސްމިއްޔާތުގައި ބައިވެރިވެވުނު. އެއީ ވަރަށްބޮޑު އުފަލެއް. އެކަމަކު ނެގި ޗުއްޓީގެ ސަބަބުން ސަރުކާރުގެ ބޮންޑުގެ ބާކީ މުއްދަތު ހަމަނުވާކަމަށް ބުނެ ދެ އަހަރު ދުވަހަށް ގޭގައި ބަންދުކުރީ''
ޗުއްޓީ ނަންގަވަން ޖެހުނު ސަބަބުތައް ކިޔައިދީ ރައީސުލްޖުމްހޫރިއްޔާއަށް ސިޓީއެއް ފޮނުއްވުމުން އަދްނާން ހަލީމް މިނިވަންވިއެވެ. ވިލިނގިލީގައި ހުޅުވި ކޮމިއުނިޓީ ސްކޫލުގައި މަސައްކަތްކުރާނެ ފުުރުސަތު ލިބިގެންދިޔައީ އޭގެ ދުވަސްތަކެއް ފަހުންނެވެ. އެތަނުގައި ސްކޫލުގެ ދަރިވަރުންނަށް ކިޔަވައިދިނުމާއި ސްކޫލުގެ ކަންކަން އިންތިޒާމުކުރުން ފަދަ ގިނަ މަސައްކަތްތަކެއް އޭރު ފުރަތަމަ ކުރެއްވީ ހިލޭ ސާބަހަށެވެ. އެތަނުގައި ހުންނަވައި ބޮޑެތި މީހުންނަށް ތަޢުލީމާ މަސައްކަތްތެރިކަން ކިޔަވައިދީ އަސާސީ ތަޢްލީމުގެ މަޝްރޫޢުހިންގައި އެކި އަތޮޅުތަކުގައި އަސާސީ ތަޢްލީމު އިމްތިހާނު ކުރައްވަން ލިބުނު ފުރުސަތަކީ އޭނާ މިހާރުވެސް އިއްޔެގެ ކަމެއްހެން ހަނދާނުގައި ހުރިކަންކަމެވެ.
ދުވަސްކޮޅަކުން އެޑިޔުކޭޝަން އޮފިސަރގެ މަޤާމު ހަމަޖެހި އެތަނަށް ޚިދުމަތްކުރައްވަމުން ގެންދަވަނިކޮށް އެޑިއުކޭޝަން މިނިސްޓްރީން އޮފަރއެއް ލިބިވަޑައިގަތެވެ.
ވޮކޭޝަނަލް ޓްރެއިނިންގ ސެންޓަރ- ވީޓީސީގެ އިންސްޓްރަކްޓަރ މިހާރު ކިޔާގޮތުންނަމަ ލެކްޗަރައެއްގެ ގޮތުން ލިބުނު މި ފުރުސަތުގެ ބޭނުން ކުރެއްވިނަމަވެސް މާލޭގައި ހުރުމުގެ މައްސަލައިގައި އެ ވަޒީފާދޫކޮށް ރަށަށް އަނެއްކާވެސް ވަޑައިގެންނެވިއެވެ. އެއީ އެދުވަސްވަރުވެސް ހައްޤުތައް ދިފާޢުކުރުމަށް ޙައްޤު ހޯދުމަށް ކުރެވުނު މަސައްކަތްތަކުގެ ނަތީޖާކަމަށް އަދްނާން ވިދާޅުވިއެވެ.
'' އެއްފަހަރު ވަޒީފާއިން ވަކިކޮށް ގޭގައި ބަންދު ކުރެއްވި، އަނެއްކާ ސަރުކާރުން ބޭނުންވެގެން ގެންނެވީމާ މާލޭގައި ހުންނާނޭ ގޮތެއް ހަމަޖައްސައިދޭން ޖެހޭނޭ ކަމަށް ވަކާލާތުކުރިން. އެކަން އެގޮތަށް ހަމަޖައްސަން ސަރުކާރުން ބޭނުން ނުވުމުން ވަޒީފާ ދޫކޮށްލައި ހުސްއަތާ ރަށަށްދިޔައީ. އެއީ އަމިއްލައަށް ހުންނާނޭ ތަނެއް ނެތިގެންވެސް ނޫން، އަޅުގަނޑު ބޭނުންވީ ވިޓީސީއަށް ބޭނުންވެގެން ރާއްޖެއިން ބޭރުންގެންނަ މީހުންނަށް ދޭ ޢިނާޔަތްތައް އަތޮޅުތަކުން ގެންދާ މީހުންނަށްވެސް ހަމަޖައްސަން''
ވަޒީފާ ދޫކުރައްވާ ރަށަށް ވަޑައިގެން އުޅުއްވަނިކޮށް ސަރުކާރުން އަތޮޅު އެކައުންޓުން ކުޑަކުޑަ މުސާރައެއް ދޭގޮތަށް ޕްރޮޖެކްޓްތަކާ ބެހޭ އެހީތެރިޔާގެ މަޤާމް ދެއްވިއެވެ. އެއީ އަތޮޅުގެ ތަރައްޤީގެ ވަރަށް ގިނަ މަސައްކަތް ކުރަން ޖެހޭ ވަޒީފާއެކެވެ. އެހެންކަމުން ޒުވާނުންގެ ތަރައްޤީއާއި ކުރިއެރުމަށް ގިނަ މަސައްކަތްތަކެއް ކުރައްވާ އަމިއްލަ ޖަމްޢިއްޔާއެއް އުފެއްދެވިއެވެ. އެދުވަސްވަރު އަތޮޅުވެރިޔާގެ ވާދައިގެ ތައްޓަށް ކުޅޭ ފުޓްބޯޅަ މުބާރާތަކީ ވަރަށް ފާހަގަކޮށްލެވޭ މުޅި ރާއްޖެއަށްވެސް މަޝްހޫރު މުބާރާތެކެވެ. ހަމަ އެދުވަސްވަރު ރަށުގެ ފަޅުފުންކުރުމުގެ މަަސައްކަތް ކުރިއަށްދިޔައެވެ. އެކަމުގައިވެސް ރައްޔިތުންނަށް، ޚާއްސަކޮށް މަސްވެރިންނަށް ބުރަ ނުޖެހޭނެހެން ކަންކަން އިންތިޒާމު ކޮށްގެން ރައްޔިތުން ގޮވައިގެން ކުރެއްވި މަސައްކަތަކީ މުޅި ރާއްޖެއަށްވެސް ނަމޫނާ މަސައްކަތެއްކަން ސަރުކާރަށް ފާހަގަކުރެވި އިޖްތިމާޢީ ޚިދުމަތުގެ ދާއިރާއިން ރައީސުލްޖުމްހޫރިއްޔާގެ މަޝްވަރާ މަޖިލީހުގެ މެންބަރުކަން ދެއްވިއެވެ.
ވިލިނގިލީ ރަށްކުރިއަރުވާ ކޮމިޓީގެ ސެކްރެޓަރީއެއްގެ ގޮތުންނާއި، ރައީސްގެ ގޮތުން ކުރެއްވި ޚިދުމަތްތަކާއި، ވިލިނގިއްޔަށާއި، ގ.އ އަށް ހޯއްދަވައިދެއްވި ފުރުސަތުތަކާއި ތަރައްޤީ ވަރަށްބޮޑު ކާމިޔާބެއްގެ ގޮތުގައި އަދްނާން ހަލީމް ފާހަގަކުރައްވައެެވެ. ވަކިން ޚާއްސަ ގޮތެއްގައި ކޫއްޑޫ ފިޝަރީޒް ކޮމްޕެލެކްސްއާއި، ވިލިނގިލީ އިންޖީނުގޭގެ މަޝްރޫޢުއާއި، ވިލިނގިލީ ބަދަރުގެ މަސައްކަތްތަކާއި، މުޅިއަތޮޅު ބަދަލުކޮށްލި ރާއްޖެތެރެ ތަރައްޤީ ކުރުމުގެ މަޝްރޫޢުއިން ގއ.އަތޮޅު ހޯދި ކާމިޔާބީ ފާހަގަ ކުރެއްވިއެވެ.
އޭގެ ފަހުންވެސް ސަރުކާރާއި ޚިޔާލުތަފާތުވުންތަކެއް ހުރުމާއިއެކު ލިބިލެއްވި ބައެއް ވަޒީފާތަކުން ވަކިކުރައްވާފައިވެއެވެ. އެހެންކަމުން އެދުވަސްވަރު އަތޮޅުގައި ހުރެގެން މެގަސްޕީޑްގެ އެޖެންޓްކަންކޮށް އަތޮޅަށް ރާޅާއަޅަން އަންނަ ފަތުރުވެރިންނަށް އެހީވެ އަދި އޭގެ ފަހުން ރިސޯޓްގެ ދާއިރާގައިވެސް މަތީ ފަންތީގައި މަސައްކަތްކޮށް އެދާއިރާއިން ގިނަ ތަޖުރިބާތަކެއް ހޯއްދެވިއެވެ. ކޮންސްޓްރަކްޝަން ކުންފުންޏެއްގައި ބައިވެރިވެ ކާމިޔާބު މަސައްކަތްތަކެއް ކުރައްވައި ވަރަށް ގިނަ ރަށްރަށުގައި މިސްކިތްތަކާއި އޮފީސް ޢިމާރާތްތައް ބިނާކުރެއްވި އަދްނާން ހަލީމްވަނީ އަތޮޅަށް ޚިދުމަތް ކުރެއްވުމަށްޓަކައި އަމިއްލައަށް ނުކުމެ ވަޑައިގެެން ކެމްޕެއިން ކުރައްވައިގެން ރައްޔިތުންގެ ޚާއްސަ މަޖިލީހުން ޖާގަ ހޯއްދަވާފައެެވެ. އެހެންކަމުން ޚާއްސަ މަޖިލީހުގައި ޤާނޫނު އަސާސީ އިސްލާހުކުރުމަށް ކުރި މަސައްކަތްތަކުގެ ތެރޭގައިވެސް ގިނަ މަސައްކަތްތަކެއް ކުރެއްވިއެވެ.
އަދްނާން ހަލީމަކީ ހަމައާއި އިންސާފަށް ވަކާލާތުކުރައްވާ ބޭފުޅަކަށްވުމާއިއެކު އިންސާފުހޯއްދެވުމަށް ކުރެއްވި މަސައްކަތާއިއެކު މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އުފެއްދެވުމުގައިވެސް އިސްދައުރެއް އަދާކުރެއްވިއެވެ. އަދްނާން ވިދާޅުވާގޮތުން އޭނާއަކީ އެ ޕާޓީ އުފެއްދެވުމަށް 10ވަނައަށް ސޮއިކުރެއްވި ފަރާތެވެ.
މިހާތަނަށް ކުރެވުނު މަސައްކަތްތަކުންވެސް އަދްނާން ހަލީމް ފާހަގަކުރައްވަނީ ގއ.އަތޮޅަށް ކުރެއްވުނު ޚިދުމަތްތަކެވެ. ރައްޔިތުންގެ ޚިދުމަތުގައި އެތަކެއް ދުވަހެއް ހޭދަކުރެއްވި އަދްނާން ހަލީމަށް އެންމެ ގިނަ ދުވަހު ހުރެވުނީ މަސީގައެވެ. ގޮންޖެހުން ބޮޑު ކޮންސްޓްރަކްޝަން ދާއިރާގައި އުޅުއްވާތާ މިހާރު 17 ވަރަކަށް އަހަރު ވަނީ ވެފައެވެ.
އަދާކުރެއްވި ބައެއް ވަޒީފާތައް:
ރާއްޖެ ތެރޭގެ ޚާއްސަ އެހީތެރިޔާ/ މިނިސްޓްރީ އޮފް އެޓޮލްސް އެޑްމިނިސްޓްރޭޝަން
ރައީސުލްޖުމްހޫރިއްޔާގެ މަޝްވަރާ މަޖިލީހުގެ މެންބަރުކަން
މެނޭޖަރ/ ތަރިވިލެޖް ޓޫރިސްޓް ރިސޯޓް
މެނޭޖިންގ ޑިރެކްޓަރ، އަލިހަވާސާ ކޮންސްޓްރަކްޝަން އެންޑް ކާޕެންޓްރީ ޕލ
ރައްޔިތުންގެ ޚާއްސަ މަޖިލީހުގެ ގއ. އަތޮޅުގެ މެންބަރުކަން
ރައްޔިތުންގެ މަޖިލީހުގެ ރައީސުލްޖުމްހޫރިއްޔާގެ މެންބަރުކަން
މަސީގެ ރައީސްކަން
ޗީފް އެގްޒެކެޓިވް އޮފިސަރ/ ޕޮލިޓެކްނިކް
ދައުލަތަށް 1979ވަނަ އަހަރުން ފެށިގެން ޚިދުމަތްކުރެއްވި އަދްނާން ހަލީމަށް ގިނަ ތަޖުރިބާތަކެއް ކުރެވިފައިވާއިރު ހަނދާނުން ފޮހެލަން ދަތި އެތައްކަމެއްވެސް ދިމާވެފައި އެބަހުއްޓެވެ. އެހެންނަމަވެސް އަދިވެސް ތަރައްޤީއާއި ގުޅުންހުރި އެއްވެސްކަމެއް ފެނިއްޖެނަމަ، އިވިއްޖެނަމަ ޒުވާން އުމުރެކޭ އެއްގޮތަށް މިހާރުވެސް ޖޯޝާއި ފޯރި އިތުރުވެގެންދެއެވެ. މިއީ ޤައުމަށް ބޭނުންވާފަދަ ދަރިންނެވެ. ޒުވާނުން ނަމޫނާއަކަަށް ބަލަންވީ މިފަދަ ބޭފުޅުން ގައުމަށް ކޮށްދެއްވަމުންދާ މަސައްކަތްތަކުންނެވެ.
