ކ.ކާށިދޫ ހަސީނާ އިސްމާޢީލް އާއި ޢަލީ ނަސީރު އަކީ ދަނޑުވެރިކަމަށް ޚާއްސަ ލޯތްބެއް އޮންނަ ދެމަފިރިންނެވެ. އާމްދަނީ ހޯދުމަށް ދެމަފިރިން އެކުގައި ކުރާ މަސައްކަތުން ރަނގަޅު އާމްދަނީ އެއް ދަނީ ލިބެމުންނެވެ. އުފަން ރަށުގައި އަމިއްލަ ބޯހިޔާވަހިކަމުގައި ހިތްހަމަޖެހިގެން ތިބެ މި ދެމަފިރިން ކުރާ މަސައްކަތުގެ ތަފްސީލަށް ބަލާލީމެވެ.
'ޒީޓައިމްސް' އަށް އިންޓަވިއުދެމުން ހަސީނާ ބުނީ ދަނޑުވެރިކަން ކުރާތާ މިހާރު 15 އަހަރުވެދާނެ ކަމަށެވެ. 6 ކުދިންގެ މަންމަ ބުނިގޮތުގައި ގޭގައި މިވަގުތު އެކަނި ދިރިއުޅެމުންދާ މި ދެމަފިރިންގެ ދުވަސް ފެށެނީ ފަތިސް ނަމާދަށްފަހު ދެމަފިރިން އެކުގައި ކާށި ހޮވަން ދިއުމާއި ހަމައިންނެވެ. އެއަށްފަހު ދަނޑުގައި މަސައްކަތްކުރުމަށްފަހު ގެއަށް ސައިބޯން އަންނަނީ ހެނދުނު 9 ޖަހާއިރު ކަމަށް ހަސީނާ ބުންޏެވެ.
ދަނޑުގައި އާންމުކޮށް ފަތްކޭލާއި ފަޅޯ ހެއްދުމުގެ މަސައްކަތްކުރަނީ ޢަލީ ނަސީރު އެވެ. 100x150 ފޫޓުގެ ބޮޑު ގޯތީގައި ހަސީނާ އެންމެގިނައިން ހައްދަމުން ދަނީ ކޮޕީފަތާއި މިރުހެވެ.
" 200 އެއްހާ ކޮޕީފަތް ގަސް ގޯތީގައި ހައްދާފަ ހުންނާނީ. ހަފްތާއަކު 700 ފަތް ކެނޑޭ. މާލެއާއި ރަށާއި ދެމެދު ދަތުރުކުރާ މީހުންނަށް އާންމުކޮށް ފަތްވިއްކަނީ. ރުފިޔާ އަކަށް ފަތެއް ވިކޭ. ކުރީގެ އަހަރުތަކުގައި ރޯދަމަހު 2 ރުފިޔާ އަށްވެސް ފަތެއް ވިއްކޭ. ރޯދަ މަސް ނިމެންދެން ހަފްތާއަކު އެއްފަހަރު ފަތްކެނޑޭނެ ކަމަށް މިބަލަނީ" ހަސީނާ ބުންޏެވެ.
މި ދެމަފިރިން ދަނީ ތޮޅި މިރުހާއި ގިތެޔޮމިރުސް ވެސް ހައްދަމުންނެވެ. ގޯތިތެރޭގައާއި ދަނޑުގައި 50 ވަރަކަށް މިރުސް ގަސް ހުރިއިރު، ބަލިޖެހިގެން ބައެއް ގަސް މަރުވެފައިވާކަން ވަނީ ފާހަގަކޮށްފައެވެ.
" މިރުސް ހައްދަނީ ވަރަށް ކުރާހިތްވާ ކަމެއްވީމަ. އެންމެ ހިތްވަރު އާލާވާއިރު ބަލިޖެހޭތީ ދެރައީ. އެންމެ އުފާވެރިވަގުތަކީ މާއަޅާ މިރުސް ނުކުންނަ ވަގުތު. މާއަޅާއިރު ގަހުގެ ފަތްތައް ގުރުޑުވެއްޖިއްޔާ ގަހުގެ ދުވަސް ދިޔައީ. އެއްފަހަރު މިރުސް ހެއްދި މީހަކު އަނެއްކާވެސް ހައްދާނެ" މިރުސް ހެއްދުމަށް ހުރި ފޯރި ހަސީނާގެ ވާހަކައިން ފާހަގަވިއެވެ.
ދަނޑުވެރިކަމުގެ މަސައްކަތުގައި މި ދެމަފިރިންނަށް ދިމާވާ އެންމެބޮޑު ގޮންޖެހުމަކީ ބަންގްލަދޭޝް މީހުން އިސްވެ ކާށިދޫގައި ދަނޑުވެރިކަން ކުރުމެވެ. "ފަޅު ގޯތީގައި އެ މީހުން ގަސް ހައްދަނީ. ހަތަރުހާސް ފަސްހާހެއްހާ ފަތް ހަފްތާއަކު ކަނޑާ ކަމަށް ވަނީ" އެހެންވުމުގެ ސަބަބުން ދިވެހިން ހައްދާ ބާވަތްތަކަށް ހަމަ އަގު ނުލިބޭ ފަހަރުވެސް އާދެއެވެ.
ހަސީނާ ދަނީ އެކި ވައްތަރުގެ މާ ގަސް ގޯތީގައި ހައްދައިގެން ވިއްކަމުންނެވެ. ބޯގަންވިލާ، ސައިމާ ފަދަ ގަސްތައް ހިމެނެއެވެ. ކުރިން ކަރާވެސް ހެއްދިއިރު ބަރަބޯ ހެއްދުމަށް ވެސް ދެމަފިރިން މަސައްކަތްކޮށްފައިވެއެވެ. އެކަމަކު އެކަން ކާމިޔާބު ނުވާ ކަމަށް ވަނީ ބުނެފައެވެ.
މި ދެމަފިރިން ވެސް ގަސް ހައްދަނީ ގަސް ކާނާ ބޭނުންކޮށްގެން ކަމުގައިވާއިރު، ގަސް ކާނާ އަށް ބޮޑު ޚަރަދެއް ކުރަންޖެހޭ ކަމަށް ހަސީނާ ފާހަގަކުރިއެވެ. ބޮޑު ޚަރަދަކާއި ބުރަ މަސައްކަތްކޮށްގެން ހެއްދި ބައެއް ގަސްތަކަށް ވިއްސާރައިގައި ގެއްލުން ލިބުން މިއީ ހިތްދަތި ތަޖުރިބާއެކެވެ. ކުޑަވަގުތުކޮޅެއްގެ ތެރޭގައި ބޮޑެތި ކެޔޮގަޑުތަކާއި ފަޅޯ ގަސްތައް ބިމާއި ހަމަވި މަންޒަރު ފެނުމުން ލޮލުން ކަރުނަހިލޭވަރުވެއެވެ. ދަނޑުވެރިކަމުގެ މަސައްކަތަކީ ކިހާ ބުރަމަސައްކަތެއްކަން އެނގޭނީ، ދިގު މުއްދަތަކަށް މެދުކެޑުމެއްނެތި އެ މަސައްކަތް ކުރާ ބަޔަކަށެވެ. ހަސީނާ ބުނިގޮތުގައި މިއީ މުރާލިވެގެން ނޫނީ ނުކުރެވޭނެ ކަމެކެވެ. 'ޒީޓައިމްސް' އިން އެދެނީ މި ދެމަފިރިންގެ މަސައްކަތުގައި އިތުރު ކުރިއެރުން ލިބުމަށެވެ.
