އަވައްޓެރި އިންޑިއާ އަށް ނަޒަރު ހިންގާލުމުން ފެންނަނީ ހިތްދަތި މަންޒަރުތަކެކެވެ. ނުރައްކާތެރި ކޮވިޑް ބަލީގެ ސަބަބުން ކޮންމެ ދުވަހަކު އެތައް ބަޔަކު މަރުވަމުންދާއިރު ސިއްޙީ ފަރުވާ އަށް ގިނަ އަދަދެއްގެ މީހުން ދަނީ ސަލާންޖަހަމުންނެވެ. ސިއްޙީ ހިދުމަތްދޭ ތަންތަން ފުރި އެންމެފަހުން އެހީތެރިވުމަށް ސިފައިންވެސް ވަނީ ހަރަކާތްތެރިވާން ފަށައިފައެވެ. މަގުތަކުން ފެންނަނީ މަރުވެ ކުނިވަމުންދާ ހަށިތަކެވެ. އަދިވެސް މިހާލަތަށް ލުޔެއްނުލިބި ދުވަހެއް ދުވަހަކަށް ދަނީ އިންޑިއާގެ ހާލަތު ގޯސްވަމުންނެވެ.
އިންޑިއާ އާއި އަޅާ ބަލާއިރު މި ކުޑަ ކުޑަ ދިވެހިރާއްޖެއަކީ ވަސީލަތުގެ ގޮތުންވެސް ތަނަވަސް ޤައުމެއް ނޫނެވެ. އިންޑިއާ މިހާރު އޮތް ހާލަތަށް ދިވެހިރާއްޖެ ވެއްޓިއްޖެނަމަ ދެންވާނީ ކިހިނެއްތޯ އަމިއްލައަށް ސުވާލުކޮށްލަމާ ހިނގާށެވެ. މި ބަލިމަޑުކަމުން ރައްޔިތުން ސަލާމަތްކުރެވޭނެ ފެންވަރު ދިވެހި ދައުލަތުގަ އެބަހުރިހެއްޔެވެ؟
ރާއްޖޭގެ ހާލަތަށް ބަލާއިރު، ކޮވިޑްޖެހިގެން ހާލުބޮޑުވާ މީހުންނަށް ފަރުވާދިނުމަށް ދަރުމަވަންތަ ހޮސްޕިޓަލުގައި ހާއްސަކޮށްފައި ހުރި އައިސީޔޫ (ޑީއެޗް-11) ފުރިފައިވާ ކަމަށް ހެލްތު އިމަޖެންސީ އޮޕަރޭޝަން ސެންޓަރުން ރޭގަ ބޭއްވި ނޫސްވެރިންގެ ބައްދަލުވުމުގައި ވަނީ ބުނެފައެވެ. އައިސީޔޫގައި ކޮވިޑްބަލީގެ 9 މީހަކު އެޑްމިޓްކޮފައިވާއިރު، އޭގެތެރެއިން ހަމީހަކު އޮތީ ވެންޓިލޭޓަރުގައެވެ.
އެތެރެހަށީގެ ހާއްސަ ޑރ.މުހައްމަދު އަލީ ވިދާޅުވެފައިވަނީ ކޮވިޑްބަލީގައި ނާޒުކް ހާލަތަކަށް ދާ މީހުންގެ އަދަދު އިތުރުވެފައިވާ ކަމަށެވެ. ހާލުބޮޑުވެ ވެންޓިލޭޓަރަށް ލާ މީހުން ވެންޓިލޭޓަރުގައި ބާއްވަންޖެހޭނީ ކިހާ ދުވަހަކަށް ކަން ނޭނގޭ އިރު އުފެދޭ ސުވާލަކީ ގިނަ އަދަދެއްގެ މީހުން އައިސީޔޫގައި އެޑްމިޓްކޮށްގެން ފަރުވާ ދޭން ޖެހިއްޖެނަމަ އެފަރުވާ ދޭނީ ކިހިނެއްބާއެވެ.
" ގިނަ ބަލި މީހުންތަކެއް މިހާ ހަމައަށް ގޮސްފިނަމަ އަޅުގަނޑުމެންގެ ކެޕޭސިޓީ އެކްސީޑްވެގެން ހިނގައިދާނެ. ކޮވިޑް ބަލީގައި ހާލު ބޮޑުވާ މީހުން ބަލަހައްޓަން އިތުރަށް ނަރުހުން ބޭނުންވޭ. ގިނަ އަދަދެއްގެ ބަލިމީހުން އެގޮތަށް ބަލަހައްޓަން ޖެހިއްޖެނަމަ ވަސީލަތްތައް ހުސްވެދާނެ. އިންޑިއާ އިން އެފެންނަނީ އޭގެ މިސާލެއް" ޑރ.މުހައްމަދު އަލީގެ މިވާހަކައިން ވެސް ނުރައްކާތެރިކަން ގޮސްފައިވާ މިންވަރު ވަރަށް ރަނގަޅަށް އެގިގެންދެއެވެ.
އިއްޔެ އެކަނި ރާއްޖެއިން 601 މީހުން ކޮވިޑަށް ޕޮޒިޓިވްވިއިރު، މިހާރުވެސް މިބަލިޖެހިފައިވާ 6508 މީހުން އެބަތިއްބެވެ. އަދި 181 މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާދެމުންދާއިރު 74 މީހުން މިހާތަނަށް ވަނީ މަރުވެފައެވެ. ރާއްޖޭގެ ހާލަތު ދުވަހެއް ދުވަހަކަށް ގޯސްވަމުންދަނީ ކޮވިޑް ހުއްޓުވުމަށް ހަރުދަނާ ފިޔަވަޅުތަކެއް ސަރުކާރުން އަޅައިފައިނުވާތީ ކަމަށް ބައެއް މީހުން ދަނީ ބުނަމުންނެވެ. އޭޕްރީލް 10ގައި ބޭއްވުނު ލޯކަލް ކައުންސިލް އިންތިޚާބާ ދިމާކޮށް މާބޮޑަށް ދޫދިނުމުން ހާލަތު ގޯސްވީ ކަމަށް ބުނާ މީހުން ވެސް އެބަތިއްބެވެ. މިގޮތުން ޕޮޒިޓިވްވި މީހުން އިންތިޚާބުގައި ވޯޓުދޭންދިޔައިރު އެމީހުން ވަކިކުރަން އެނގޭނެ ގޮތެއް ނެތުން މިއީ ބަލިފެތުރެން ދިމާވި އެއްސަބަބު ކަމަށް ބައެއް މީހުންދެކެއެވެ. އަދި ކަރަންޓީނުނުވެ މާލެއިން ރަށްރަށަށް ވަކިމުއްދަތަކަށް ދެވޭގޮތަށް އުސޫލު ބަދަލުކުރިކުރުން ވެސް ބައެއް މީހުން ދަނީ ކުއްވެރިކުރަމުންނެވެ.
އެކަމަކު ވިސްނަންވީ ކޮންމެ ސަބަބަކާއިހުރެ ކަމުގައިވިއަސް ރާއްޖޭގެ ހާލަތު ގޯސްވެ އަތްނުފޯރާފަށަން އަރަމުންދާކަމެވެ. އެކިރަށްރަށުގައި މިބަލި މިހާރު މިވަނީ ފެތުރެން ފަށައިފައެވެ. މިބިޔަ ރާޅުގެ ދަށުގައިވެ އިންޑިއާއަށް ވަމުންދާގޮތް ވާން ނޭދޭނަމަ ސަރުކާރުން މިހާރު އަޅާފައިހުރި ފިޔަވަޅުތައް ހަރުދަނާކުރަންޖެހޭކަމަށް ބައެއް ޑޮކްޓަރުން ޤަބޫލުކުރައްވައެވެ. ރޭގަ ބޭއްވި ނޫސްވެރިންގެ ބައްދަލްވުމުގައި ޑރ.ނަޒްލާ މުސްތަފާ ވެސް ވަނީ ކޮވިޑް19 ކޮންޓްރޯލްކުރުމަށް އަޅާ ފިޔަވަޅެއްގެ ގޮތުން ޑޮކްޓަރުން ލަފާ ދެނީ މިހާރަށްވުރެ ފިޔަވަޅުތައް ވަރުގަދަކުރަން ކަމަށް ވިދާޅުވެފައެވެ. އެހެންނަމަވެސް އެވިދާޅުވިގޮތަށް ބަދަލުގެންނަ މަންޒަރެއް އަދި ނުފެނެއެވެ. އަލުން ލޮކްޑައުންއަކަށް ދާންޖެހިއްޖެނަމަ ރައްޔިތުންނަށް ލިބޭނެ ގެއްލުން ބޮޑުކަމަށް ޤަބޫލުކުރާ މީހުންވެސް އެބަތިއްބެވެ.
ކޮވިޑް ހުއްޓުވަން އާންމުންނަށް ކުރެވެން އޮތީ ފަރުދީ ޒިންމާ އަދާކުރުމެވެ. އަޅުގަނޑުމެންނަށް ކުރެވެން އޮތް މަސައްކަތެއް ކުރަމާ ހިނގާށެވެ. އެހެންނޫނީ ސިއްޙީ މާހިރުން ވިދާޅުވަމުންދާ ގޮތަށް ހޮސްޕިޓަލުތައް ފުރި ހާލުބޮޑުވާ މީހުންނަށް ފަރުވާ ނުދެވިއްޖެނަމަ އިންޑިއާ އަށް ވަމުންއެދާގޮތް ރާއްޖެއަށް ދިމާވުން އެކަށީގެންވެއެވެ.
