ރާއްޖޭގެ ކޮވިޑް 19ގެ ފާއިތުވި 24 ގަޑިއިރުގެ އަދަދުތަކަށް ބަލާއިރު 590 މީހުން ވަނީ ޕޮޒިޓިވް ވެފައެވެ. އޭގެ ތެރެއިން 439 މީހުންނަކީ މާލެ ސަރަހައްދުން ޕޮޒިޓިވް މީހުންނެވެ. އަތޮޅުތެރެއިން މީހުން ދިރިއުޅޭ ރަށްތަކުން ޕޮޒިޓިވްވީ 141 މީހުންނެވެ. ދެން ހިމެނެނީ ރިސޯޓުތަކުން 9 މީހުންނާއި ސަފާރީއަކުން ޕޮޒިޓިވްވި މީހެކެވެ.
ރާއްޖޭގައި ކޮވިޑް ބަލި ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތައް މަޑުމަޑުން ހަނދާން ނެތެމުން ދަނިކޮށް ޤައުމަށް ސިހުން ގެނުވީ އަދަދުތައް 700 އިން މައްޗަށް އަރައިގެންދިއުމުންނެވެ. މިމަހު 6 ވަނަ ދުވަހު ކޮވިޑް ބައްޔަށް ފަރުވާ ހޯދަމުން ދިޔަ 6 މީހަކު ވަނީ ނިޔާވެފައެވެ.
ކުއްލިއަކަށް އަދަދުތައް މައްޗަށް އަރައިގެން ގޮސް 48 ގަޑި އިރުގެތެރޭގައި 9 މީހަކު ކޮވިޑް ބަލީގައި ނިޔާވުމުން ދެން ފެނިގެންދިޔައީ އަނެއްކާވެސް އެޗްޕީއޭއިން ކުރިން ލުއިދިން ފިޔަވަޅުތަކަށް ވާން ކޮށްލިތަނެވެ.
ރޭގަނޑު 21:00 އިން ފެށިގެން ފަތިހު 4:00 އަށް ދުއްވާ އެއްޗެހި ދުއްވުމާއި ކޮންމެހެން ބޭރުގައި އުޅެންޖެހޭފަދަ ހާލަތެއްނެތި ބޭރުގައި ނޫޅުމަށާއި ގޭގެއަށް ޒިޔާރަތް ނުކުރުމާއި ބޭރުގައި އުޅޭއިރު ރަނގަޅަށް މާސްކު އެޅުމާއި ގިނަގިނައިން އަތްދޮވުން ފަދަ ކަންކަންކަމަށް ސަމާލުކަން ދިނުމަށް އަނެއްކާވެސް މިވަނީ އިތުރަށް ސަމާލުވާން ޖެހިފައެވެ.
ފާއިތުވި ހަފްތާގައި ރާއްޖޭގައި ކޮވިޑްގެ ހާލަތު މީގެ ކުރިން ގޯސް ނުވާހާ މިންވަރަށް ގޯސްވެފައިވާއިރު ހިތާމައަކީ ބަލީގައި އެޑްމިޓް ކުރާ ފަރާތްތަކުގެ ތެރޭގައި ވެކްސިން ނުޖަހާ ފަރާތްތައް ހިމެނޭކަމެވެ. އަދި ވެކްސިން ޖެހުމުގެ ބޭނުމެއް ނެތްކަމަށް ބުނެ ބައެއްމީހުން ދައްކާ ވާހަކަތަކެވެ. ވެކްސިން ޖެހިއަސް ބަލިޖެހޭ މީހުންގެ އަދަދު ދަށަށް ނުދާކަމަށް ބުނެ ދައްކަންފެށި ވާހަކަތަކެވެ.
ހެލްތް އިމަޖެންސީ އޮަޕަރޭޝަން ސެންޓަރުގައި ރޭގެވަގުތެއްގައި ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕް (ޓެގް) ގެ މެންބަރު ޑރ. އަހްމަދު ޝަހީދު ވިދާޅުވީ ރާއްޖޭގައި ކޮވިޑަށް މިދޭ ވެކްސިނަށް އެލިޖިބަލް މީހުންގެ ތެެރެއިން އެއްވެސް ވެކްސިނެއް ނުޖަހާ މީހުން އަދިވެސް އެބަތިބި ކަމަށެވެ.
21 ފެބުރުއަރީ އިން ފެށިގެން 25 އޭޕްރީލް އާއި ހަމައަށް ހެދި ޑޭޓާ އޭނަލިސިސް އަކުން ދައްކާގޮތުގައި، އައިސީޔޫގައި އެޑްމިޓް ކޮށްގެން ފަރުވާދިން މީހުންގެ ތެރެއިން ގާތްގަނޑަކަށް 70 އިންސައްތަ މީހުންނަކީ ވެކްސިން ނުދޭ މީހުން ކަމަށް ޑޮކްޓަރު ވިދާޅުވިއެވެ.
ވެކްސިން ޖެހުމުގެ ސަބަބުން ބަލި ހާލަތު ކުޑަކޮށްދޭ ކަމަށް ތަހްލީލުތަކުން މިހާތަނަށް ދައްކާފައިވާއިރު މިއީ އަދި ރިވައިސް ކުރަންޖެހޭ ތަހްލީލްތަކެއް ކަމަށް ޑޮކްޓަރ ފާހަގަ ކުރެއްވިއެވެ. އަދި ވެކްސިންގެ ކާމިޔާބުކަން ދެނެގަތުމަށް ދިތާސާތައް ހަދަމުންދާއިރު ވެކްސިން ނުޖަހާ ބައްޔަށް ހުށަހެޅެމުންދާ ފަރާތްތަކުން ކޮވިޑަކީ އާދައިގެ ރޯގާއެއްކަމުގައި ދެކިގެންވާކަށްނެތެވެ. ބައްޔަށް ހުށަހެޅުމުގެ ކުރިން ވެކްސިންގެ ދެ ޑޯޒް ފުރިހަމަ ކޮށްފައިވާނަމަ ބަލި ބޮޑުވުމުގެ ފުރުސަތުކުޑަވެ ބަލީގެ ސަބަބުން ލިބޭ ގެއްލުންތައް އެތައް ގުނައެއް ކުޑަކޮށްދޭ ކަމަށް ސިއްހީ މާހިރުން އެ ވިދާޅުވަނީ ބަލިމީހުން ތަހަންމަލު ކުރަމުންދާ އަލާމާތްތަކަށް ބެލުމަށްފަހުގައެވެ.
އެހެންކަމުން ތިމާ އަކީ ބަލި ހިފައިގެންދާ މީހާއަށް ވުމުގެ ބަދަލުގައި ތިމާއަކީ ވެސްކިން ޖަހައިގެން ބަލިން ރައްކާތެރިވާ މީހާއަށް ވަމާތޯ އެވެ. ވެކްސިން ނުޖަހާ މީހުންގެ އިތުރުން ހެލްތް އިމަޖެންސީ އޮޕަރޭޝަން ސެންޓަރުން ކަންބޮޑުވުން ފާޅުކުރާ އަނެއް ކަމަކީ ބައްޔަށް ހުށަހެޅޭ ކުޑަކުދިންގެ އަދަދު ދުވަހުން ދުވަހަށް އިތުރުވުމެވެ.
ކުޑަކުދިން ގޮވައިގެން ޕާކުތަކާއި ޕާޓީތަކާއި ރޯދަވީލުންތަކަށްވެސް ބެލެނިވެރިންދެއެވެ. އާއިލާ އާއި ރައްޓެހިން ބާއްވާ މިފަދަ އެއްވުންތަކުން އެތައްބަޔަކު ކޮވިޑަށް ޕޮޒިޓިވްވެގެންދާއިރު ކޮންމެ ހަފްތާއަކު އެތައް ބައިވަރު ކުދިންނަކަށް ބަލި ޖެހިގެންދާތީ ޑޮކްޓަރުން އަންނަނީ ކަންބޮޑުވުން ފާޅުކުރަމުންނެވެ. ކުޑަކުދިން ބޭރަށް ނުގެންދިއުމަށާއި، ބަލިން ރައްކާތެރިކުރުމަށް ހާއްސަ ސަމާލުކަމެއް ދޭން ވެއްޖެއެވެ.
އަދި 18 އަހަރުން ދަށުގެ ކުދިންނަށް ދޭނެ ވެކްސިންއެއް ލިބިފައިނުވާއިރު ކޮވިޑުން ރައްކާތެރިކުރުމަށް ކުޑަކުދިންނަށް މާސްކު އެޅުމާއި ގައިދުރުކަން ބެހެއްޓުމާއި އަތްދޮވުން ފަދަ ރައްކާތެރިކަމުގެ ފިޔަވަޅުތައް އަބަދުވެސް ހަނދާންކޮށްދިނުން މުހިންމެވެ.
އެންމެ ހާއްސަ އިސްކަމެއް ދޭންވީ ތުއްތުކުދިންނަށް ގަވާއިދުން ދޭންވާ ވެކްސިންތައް ދިނުމަށެވެ. ވެކްސިންއާ ދެކޮޅު ޖީލެއް ބިނާ ކޮށްފިނަމަ މާދަމާ އެކުދިން ބޮޑެތިވެގެން އަންނައިރު ކޮވިޑްފަދަ އާލަމީ ވަބާއަކުން ރައްކާތެރިވުމަށް އުފައްދާ ވެކްސިނަކަށް އާއެކޭ ބުނަން ދެކޮޅު ހަދާފާނެއެވެ.
