ރައްޔިތުންގެ މަޖިލީހުގެ ގދ.އަތޮޅާއި ގައްދޫ ދާއިރާގެ މެންބަރުކަން ކުރެއްވި ޒާހިރު އާދަމް (ގައްދޫ ޒާހިރު) ރޭގެ ވަގުތެއްގައި އަވަހާރަވި ޚަބަރާއިއެކު ސޯޝަލް މީޑިއާއިން ފެނިގެން ދިޔައީ ޒާހިރު އާދަމްގެ ޚިދުމަތްތައް ފާހަގަކޮށް ލިޔެފައިވާ ތަޢުޒިޔާގެ މެސެޖުތަކެވެ.
މަޢުލޫމާތު ލިބިފައިވާ ގޮތުގައި އުމުރުން 74 އަހަރުގެ ޒާހިރު އާދަމް އަވަހާރަވީ ކޮވިޑްބަލީގެ ފަރުވާއަށްފަހު ގޭގައި ހުންނަވަނިކޮށެވެ. އަވަހާރަވިއިރު ދިރިއުޅުއްވަމުން ގެންދެވީ މާލޭގައެވެ. ކަށު ނަމާދުކުރުން އޮތީ ރޭގެ ދަންވަރު 1:15 ގައި ހުޅުމާލެ ސަހަރާގައެވެ.
ގައްދޫގެ ކުރީގެ ކަތީބު އަހްމަދު ސަޢީދު ސިފަކުރެއްވިގޮތުގައި ޒާހިރު އާދަމް އަކީ ގައްދޫގެ ރަނގަޅު ޢާއިލާއަކުން ވަޑައިގެންނެވި ވަރަށް އިޚްލާސްތެރި ދުރުވިސްނޭ ލަފާދާރު ބޭފުޅެކެވެ.
" ޒާހިރު އާދަމް އަކީ ގައްދޫގެ ރައްޔިތުންގެތެރެއިން ވަކިމީހެއް ނުބަލައި މަދަދަށް އެދޭ ކޮންމެ މީހަކަށް، އެމީހަކު އެދޭކަމެއް ފުއްދަވައިދެއްވާ، އަދި އެންމެންނާ ވަރަށް އެކުވެރިކޮށް އުޅުއްވި ބޭފުޅެއް. ވަރަށް ވަރުގަދަ ޝަހުސިއްޔަތެއް. ޚާއްސަކޮށް ބަލިމަޑުކަމެއް ކުރިމަތިވެއްޖިއްޔާ ވެސް އެހީތެރިކަން ފޯރުކޮށްދެއްވާ ބޭފުޅެއް"
އަދި އުމުރުން ދުވަސްވީ މީހުންނާއި ނުކުޅެދޭ މީހުންނަށްވެސް ދާއިމީކޮށް އެހީތެރިކަން ފޯރުކޮށްދެއްވި ބޭފުޅެއްކަމަށާއި، ނިމިގެންދިޔަ ރަމަޟާންމަހުގައިވެސް އެހީތެރިކަން ފޯރުކޮށްދެއްވިކަމަށް އަހްމަދު ސަޢީދު ވަނީ ވިދާޅުވެފައެވެ.
ޢުމްރާނީ ތަރައްޤީއަށް ބަލާއިރު ވެސް ޒާހިރު އާދަމް އަކީ ފާހަގަކޮށްލެވޭ އެހީތެރިކަމެއް ފޯރުކޮށްދެއްވި ބޭފުޅެކެވެ.
"ޒާހިރު އާދަމްގެ އަމިއްލަ ޚަރަދުގައި އިމާރާތްކުރައްވަމުން ގެންދަވާ ވަރަށްބޮޑު 2 މިސްކިތެއް ރަށުގެ ދެއަވަށުގައި އެބަހުރި. 1980ގެ އަހަރުތަކުގެތެރޭގައި ގައްދޫ ރައްޔިތުން ކަރަންޓްގެ އެއްވެސް ޚިދުމަތެއް ނުލިބިތިއްބައި ޒާހިރު އާދަމް އަމިއްލައަށް ޖަނަރޭޓަރު ގައްދޫއަށް ގެނެސްގެން އަމިއްލަ ގޯތީގައި އިންޖީނުގެއެއް ހައްދަވައި ކަރަންޓުގެ ޚިދުމަތް ރައްޔިތުންނަށް ފޯރުކޮށްދެއްވި. ހެލްތް ސެންޓަރާއި ގދ. އަތޮޅު މަދަރުސާ އަށް އެހީތެރިކަން ފޯރުކޮށްދެއްވި" ތަފްސީލް ދެއްވަމުން އަހްމަދު ސަޢީދު ވިދާޅުވިއެވެ.
ގައްދޫގެ ތަރައްޤީއާއި ރައްޔިތުންގެ ކުރިއެރުމަށް ގިނަގުނަ އެހީތެރިކަމެއް ފޯރުކޮށްދެއްވި ޒާހިރު އާދަމް އަކީ ގައްދޫ ރައްޔިތުންގެ އެންމެގާތް ރައްޔިތުންގެ 'ޒާހިރުބެ'ގެ ގޮތުގައި ގައްދޫގެ ރައްޔިތުން ފާހަގަކުރެއެވެ.
ރިސޯޓް އަދި ސަފާރީ ވިޔަފާރި ފުޅާދާއިރާއެއްގައި ކުރެއްވި ޒާހިރު އާދަމް އަކީ ދެކިޑްނީ ފެއިލްވުމާއިގުޅިގެން ކިޑްނީޓްރާންސްޕްލާންޓް ހައްދަވާފައިވާ ބޭފުޅެކެވެ. އޭގެފަހުން ސިޔާސީ ހަރަކާތްތަކުގައި ކުރިން އުޅުއްވިގޮތަށް ހަރަކާތްތެރިކޮށް އުޅުއްވި މަންޒަރެއް ނުފެނެއެވެ. އެމްޑީޕީގެ މެންބަރެއްގެ ގޮތުގައި ސިޔާސީ ދާއިރާގައި ވަރަށް ހަރަކާތްތެރިކޮށް ކުރިން ވަނީ މަސައްކަތް ކުރައްވާފައެވެ.
ޒާހިރު އާދަމް ވަނީ 27 ފެބުރުއަރީ 2005 އިން 27 މޭ 2009ގެ ނިޔަލަށް ރައްޔިތުންގެ މަޖިލީހުގެ ގދ.އަތޮޅުގެ މެންބަރުކަން ކުރައްވާފައެވެ. އަދި 28 މޭ 2009 އިން 27 މޭ 2014ގެ ނިޔަލަށް ގައްދޫ ދާއިރާގެ މެންބަރުކަން ވަނީ ކުރައްވާފައެވެ. ފެހި ޤާނޫނު އަސާސީ އެކުލަވައިލި ރައްޔިތުންގެ ޚާއްސަ މަޖިލީހުގެ މެންބަރުކަން ޒާހިރު އާދަމް އަދާކުރެއްވީ 28 ފެބުރުއަރީ 2005 އިން 26 ޖޫން 2008ގެ ނިޔަލަށެވެ.
