އައްޑޫ ސިޓީގައި ހިންގާ ފްލައިން ސްކޫލު މިހާރު ހިންގަމުން ގެންދަނީ ސްރީލަންކާގެ އޭޝިއަން އެކަޑަމީ އޮފް އެރޮނޮޓިކްސް (އޭއޭއޭ) ކުންފުނިންނެވެ. ފްލައިން ސްކޫލުގެ ދަރިވަރުންގެ ކަންބޮޑުވުންތަކުގެ ވާހަކަ މީޑިއާގައި ވަރަށްގިނައިން ދެކެވެއެވެ. އެ ކަންބޮޑުވުންތަކަށް ހައްލު ހޯދުމުގެ މަސައްކަތް އެ ސްކޫލުގެ އާ ޖެނެރަލް މެނޭޖަރު މުހައްމަދު ފަޒީލު ރަޝީދު ގެންދަވަނީ ކުރައްވަމުންނެވެ.
'ޒީޓައިމްސް' އަށް ދެއްވި އިންޓަވިއުގައި ފަޒީލު ވިދާޅުވީ މިހާރު އޮތް ހާލަތުން ދަރިވަރުންނަށް އެންމެބޮޑު ފައިދާއެއް ކުރާނީ ރާއްޖޭގެ ކޮލެޖެއްގެ ދަށުން މި ސްކޫލު ހިންގާ ގޮތަށް ހަމަޖެހިގެންކަމަށެވެ.
" 2 ކޮލެޖަކުން ޕްރޮޕޯސަލް ހުށަހަޅައިގެން 1 ކޮލެޖާއެކު ވަރަށްބޮޑަށް މިދަނީ މަޝްވަރާކުރަމުން. ފައިނަލްކުރުމުގެ މަރުހަލާ ކުރިއަށް ދަނީ. މިބަލަނީ ކުރިއަށް އޮތް އެއްމަސް ދުވަސްތެރޭ ފްލައިން ސްކޫލުގެ ހިންގުމުގެ ޒިންމާ އެކޮލެޖުގެ ދަށަށް ބަދަލުކުރެވި މަސައްކަތް ކުރިއަށްގެންދަން ފެށޭނެކަމަށް. ދިވެހި ކޮލެޖަކަށް ހިންގަންދިނުމުން ރާއްޖޭގައި މިކަން އެދެވޭގޮތެއްގައި ކުރިއަށްގެންދެވޭނެ ގޮތެއް ވާނެކަމަށް ދެކެން" ފްލައިން ސްކޫލުގެ ޖެނެރަލް މެނޭޖަރުގެ މަޤާމާއި މިއަހަރު ޖެނުއަރީމަހު ހަވާލުވި ފަޒީލު ވިދާޅުވިއެވެ.
އަދި އެގްރިމެންޓްގައި ސޮއި ނުކުރެވޭތީ ރާއްޖެއިން ހަވާލުވާ ކޮލެޖުގެ ނަން ފަޒީލު ވިދާޅެއް ނުވެއެވެ. އެހެންނަމަވެސް 'ޒީޓައިމްސް' އަށް މަޢުލޫމާތު ލިބިފައިވާގޮތުގައި ފްލައިން ސްކޫލު ހިންގުމުގެ މަޝްވަރާ ކުރަމުންދަނީ އެވިޑް ކޮލެޖާއި އެކީގައެވެ. އެވިޑް ކޮލެޖުންވެސް މިވަގުތު އިތުރު މަޢުލޫމާތު ހާމައެއް ނުކުރެއެވެ.
ފްލައިން ސްކޫލުގެ ދަރިވަރުންގެ އެންމެބޮޑު ކަންބޮޑުވުމަކީ ސިލަބަސް ބަދަލުވެ އާ ސިލަބަހާއި އެއްގޮތަށް އެގްޒާމް ހަދަންޖެހުމެވެ. އަދި ފްލައި ނުކުރެވި ކޯސް ނުނިމި ގިނަދުވަސްވުން އެއީވެސް ކަންބޮޑުވުމެކެވެ. މިމައްސަލައަށް ހައްލު ހޯދުމަށް ކުރާ މަސައްކަތްތަކާއި ގުޅޭގޮތުން ފަޒީލު ވިދާޅުވީ، 173 ދަރިވަރުން މިހާރު ތިބިއިރު އޭގެތެރޭގައި ހިމެނޭ ބައެއް ދަރިވަރުންނަކީ އެގްޒާމް ނިންމާފަ ފްލައި ކުރުމަށް ތައްޔާރުވެފައިތިބި 68 ދަރިވަރުންނާއި ސިލަބަސްގެ މައްސަލަޖެހިފައިވާ 75 ދަރިވަރުން ކަމަށެވެ. ފްލައިން ސްކޫލުން ކިޔަވާ ދަރިވަރުން 18 މަސް ދުވަސްތެރޭ އެގްޒާމް ނިންމާ 24 މަސް ދުވަސްތެރޭ ޕްރޮގްރާމް އެކީގައި ނިންމަންޖެހޭ ކަމަށް ވެސް ވިދާޅުވިއެވެ.
" ފްލައިން ނުކުރެވި ވަކިމުއްދަތަކަށްވުރެ ލަސްވާ ދަރިވަރުން މުޅި ކޯސް އަލުން ފަށަންޖެހޭ. އޭގެ ބަދަލުގައި އެ ދަރިވަރުންނަށް މުއްދަތެއް އިތުރަށް ދޭގޮތަށް ޔޫކޭ އާއި ރާއްޖޭގެ ސިވިލް އޭވިއޭޝަން ގުޅިގެން ވަނީ ހަމަޖެހިފައި"
ކޮވިޑްގެ ހާލަތާއި ގުޅިގެން ފްލައިން ސްކޫލުން ދަރިވަރުންނަށް ފޯރުކޮށްދޭންޖެހޭ ކަންތައްތަކަށް ލަސްވުމެއް އައިކަން ފާހަގަކުރަމުން ފަޒީލު ވިދާޅުވީ 14 އެއާކްރާފްޓް އޮންނައިރު ހުރިހާ އެއާކްރާފްޓެއް މިވަގުތު ހުރީ ގްރައުންޑްވެފައި ކަމަށެވެ.
" ގްރައުންޑްވެފަހުރި އެއާކްރާފްޓް ތަކަކީ މެއިންޓެނެންސް ކުރިއަށްގެންދަންޖެހޭ އެއްޗެހި. އެ އެއާކްރާފްޓްތަކަށް ބޭނުންވާ ސްޕެއާޕާޓްސް ގަންނަން ޑޮލަރު ނުލިބިގެން ދުވަސްތަކެއްދިޔަ. ސިވިލް އޭވިއޭޝަނާއި ރައީސް އޮފީހާއި ވާހަކަ ދައްކައިގެން 3 މަހެއްހާ ދުވަހުން ޑޮލަރު ލިބޭގޮތްވީ. 90 އިންސައްތަ ސްޕެއާޕާޓްސް އަށް އޯޑަރު ކުރެވި އަދި ގެނެވިފަހުރި ސްޕެއާޕާޓްސް އިން 3 އެއާކްރާފްޓް އިން ފްލައިކުރެވެން ފެށޭނެ"
ކޮވިޑްގެ ހާލަތުގައިވެސް 5 ދަރިވަރެއް ކޯސް ފުރިހަމަކުރުމުން ލައިސަންސް ދީފައިވާ ކަމަށް ފަޒީލު ވިދާޅުވިއެވެ. އަދި މީގެތެރެއިން 2 ދަރިވަރަކަށް މިހާރު ވަޒީފާވެސް ވަނީ ހަމަޖެހިފައެވެ. 2010ވަނަ އަހަރު ހުޅުވި މި ސްކޫލުން މިހާތަނަށް 200 މީހުން ތަމްރީންވެ ލައިސަންސް ދޫކޮށްފައިވާއިރު ފަޒީލުގެ އުންމީދަކީ ތަމްރީންތައް މެދުކެޑިފައިވާ ދަރިވަރުންނަށް ކޯސް ފުރިހަމަކުރެވޭނެގޮތް ވީހާވެސް އަވަހަކަށް މަގުފަހިވެގެންދިޔުމެވެ.
ޕައިލެޓަކަށް ވުމަށް އައްޑޫ ފްލައިން ސްކޫލުން ކޯސް ފުރިހަމަ ކުރުމަށް 850،000 ރުފިޔާ ކޮންމެ ކުއްޖަކު ދޭންޖެހެއެވެ. ފްލައިން ސްކޫލުގެ ދަރިވަރުންނަށް ކޯސް ފުރިހަމަ ނުކުރެވި ދިގުދެމިގެން ދިއުމާއި ގުޅިގެން ރައީސް އިބްރާހިމް މުހައްމަދު ޞާލިހު ވަނީ ފްލައިން ސްކޫލުގެ ހެޑްއޮފް ޕައިލެޓް ޓްރެއިނިންގ އާއި އެކައުންޓަބަލް މެނޭޖަރާއިމެދު ފިޔަވަޅު އެޅުމަށް ސިވިލް އޭވިއޭޝަނަށް އަންގަވާފައެވެ. އަދި މިކަމުގައި މިނިވަން އޮޑިޓެއް ހަދައި ސިވިލް އޭވިއޭޝަންގެ އިހުމާލެއްވާނަމަ އިހުމާލުވި ފަރާތްތަކާއި މެދު ފިޔަވަޅު އަޅަންވެސް ރައީސް އަންގަވާފައިވެއެވެ. މީގެއިތުރުން ބީ.އެމް.އެލް އިން ލޯނުނަގާފައިވާ ދަރިވަރުންގެ ލޯނު މިނިސްޓްރީ އޮފް ހަޔަރ އެޑިޔުކޭޝަނުން ދޫކުރާ ލޯނުތަކަށް ބަދަލުކުރުމަށްވެސް އަންގަވާފައިވެއެވެ. އަދި މި ސްކޫލުގެ ހެޑް އޮފް ޓްރެއިނިންގ މަޤާމްގައި ހުރި ސުރަންޖަން ޑިސިލްވާ އެ މަޤާމުގައި ހުރުމަށް ސިވިލް އޭވިއޭޝަން އޮތޯރިޓީއިން ދޫކޮށްފައިވާ ހުއްދަ އަތުލުމަށް ނިންމާފައިވާ ކަމަށް ޓްރާންސްޕޯޓް މިނިސްޓްރީން މި މަހުގެ 22ވަނަ ދުވަހު ނެރުނު ބަޔާނެއްގައި ބުނެފައިވެއެވެ.
