އައްޝައިޚާ މަރްޔަމް ޝަބާނާ އަކީ ދީނީ ޢިލްމު ފޯރުކޮށްދެއްވުމަށް ތަފާތު މަސައްކަތްތައް ކުރައްވަމުން ގެންދަވާ ފާހަގަކޮށްލެވޭ ކަނބަލެކެވެ. މިގޮތުން ޝަބާނާގެ ނަން ރޭޑިއޯ ޕްރޮގްރާމްތަކުން ވެސް އަޑުއިވެއެވެ. ރަށްރަށުގައި ދަރުސް ދިނުމުގެ އިތުރަށް ޓީވީ ޕްރޮގްރާމް މެދުވެރިކޮށް މަޢުލޫމާތު ފޯރުކޮށްދިނުމަކީވެސް ޝަބާނާ މިދާއިރާއިން ކުރައްވަމުން ގެންދަވާ މަސައްކަތްތަކެކެވެ. އަދި 'ޒީޓައިމްސް' މެދުވެރިކޮށް ދީނީ ހޭލުންތެރިކަން އިތުރުކުރުމަށް ޝަބާނާ ގެންދަވަނީ ތަފާތު މަޢުޟޫތަކަށް ރިޕޯޓް ލިޔުއްވަމުންނެވެ. ދީނީ ޢިލްމު ފަތުރަން މިހުރިހާ މަސައްކަތެއްވެސް ކުރައްވަނީ ހިލޭ ސާބަހަށެވެ.
އައްޝައިޚާ މަރްޔަމް ޝަބާނާ
މަދަރުސަތުލް ޢަރަބިއްޔަތުލް އިސްލާމިއްޔާއިން ގްރޭޑް 7 ނިންމުމަށްފަހު ގްރޭޑް 8 އިން 12 އަށް ކިޔެވީ މައުހަދުއް ދިރާސާތުލް އިސްލާމިއްޔާއިންނެވެ. މިސްރުގެ އަލްއަޒުހަރު ޔުނިވަރސިޓީއިން ޑިގްރީ ނިންމުމަށްފަހު، މާސްޓަރސް ފުރިހަމަ ކުރެއްވީ މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީ އިންނެވެ.
ދާއިރާއަށް ޝައުގުވެރިވީ ކިހިނެއް؟
ޝަބާނާ ވިދާޅުވިގޮތުގައި އޭނާގެ މައިންބަފައިން ބޭނުންވީ ދަރިންނަށް ދީނީ ތަޢުލީމު ޙާޞިލުކޮށްދިނުމަށެވެ.
" މަންމަމެންގެ ދަރިންނަށް ދީނީ ތަޢުލީމު ޙާޞިލުކޮށް ދިނުމުގެ ބޭނުމުގައި އަމީނިއްޔާ ސްކޫލުގެ ގްރޭޑް 5 ނިމުމުން، އަމީނިއްޔާ އިން ކަނޑާލައިފައި މަދުރަސަތުލް ޢަރަބިއްޔާއަށް ވެއްދި. އޭރު ވަކި ދާއިރާއަކުން ކިޔަވަން ޝައުގުވެރިކަމެއް ނެތް. އަބަދުވެސް ތަޢުލީމީ ގޮތުން ކުރިއަރައި ދިއުމަށް ލޯބި ކުރިން. މިހާރު މި ދާއިރާއިން ތަޢުލީމު ޙާޞިލު ކުރެވުނީތީ އުފާ ކުރަން. އަދި ޢަރަބި ބަސް އެނގޭތީ އެކަމަށް ޙަމްދު ކުރަން" ޝަބާނާ ވިދާޅުވިއެވެ.
މައިންބަފައިންގެ އެ ނިންމެވުމަކީ އެންމެ ރަނގަޅު ނިންމެވުން ކަމަށް ޤަބޫލުކުރައްވާ ޝަބާނާ ވިދާޅުވީ، މިދާއިރާއިން އިތުރަށް ޢިލްމު ހޯދުމަށް މަސައްކަތްކުރަނީ މިކަމަށް އޮންނަ ލޯތްބެއްގެ ސަބަބުން ކަމަށެވެ.
ދިމާވި ގޮންޖެހުން
ޑިގްރީއަށް ކިޔެވީ ވަރަށް ބުރަ މަސައްކަތުން ކަމަށް ފާހަގަކުރެއްވިއެވެ. ސަބަބަކަށްވީ މައިންބަފައިންނާއި ދުރުގައި ޢާއިލާއާ ދުރުގައި ކިޔަވަންގޮސް ހުރިއިރު ފުރަތަމަ ދަރިފުޅަށް ބަލިވެއިނުމުގެ ސަބަބުން ކިޔެވުމަށް ވަރަށް ބުރަމަސައްކަތެއް ކުރަންޖެހުމެވެ.
" އޭރު ކިޔަވަނީ ކިޔަވާހިތްވާ ވަގުތެއްގައެއް ނޫން. ވަގުތު ލިބުނީމަ ކިޔަވަނީ. އޭރު ބައެއް ރައްޓެހިން ބުނި ދެން ކިޔެވުން ހުއްޓާލަންވީނޫންހޭ. ދަރިއަކު ގޮވައިގެން ކިޔަވާނީ ކިހިނެތްހޭ. ކިޔަވަން ލިބުނު ފުރުސަތު ދޫކުރަން ބޭނުން ނުވުމުގެ ސަބަބުން ކުރިއަށް ގެންދިޔައީ" 2 ކުދިންގެ މަންމައެއް ކަމުގައިވާ ޝަބާނާ ވިދާޅުވިއެވެ.
ޝަބާނާ އަށް ދިމާވި އެންމެބޮޑު ގޮންޖެހުންވެސް ވަނީ ހިއްސާކުރައްވާފައެވެ.
" ޑިގްރީ ޙާޞިލު ކުރުމަށް އަޒްހަރަށް ދިޔައީ އިސްލާމީ ޝަރީޢާގެ ދާއިރާއިން. ނަމަވެސް އަޒްހަރުގައި ހަމަޖެހުނު ކޯހަކީ ބިޒިނަސް. ވަރަށް ދެރަވި. އެއީ ކިޔެވުމުގެ އަހަރެއް ގެއްލިގެންދާނެތީ. އެފަހަރު އަޒްހަރަށް ކިޔަވަން ދިޔަ 4 ކުދިންނަށް އެކަމާ ކުރިމަތިވި. ކިޔަވަން ދިޔަ ދާއިރާ ނޫން އެހެން ދާއިރާއަކަށް ކޯސް ހަމަޖެހި ނަން ނިކުމެފައި އޮތީ އެހެން ފެކަލްޓީއަކަށް. ހިތްވަރު ދޫނުކޮށް ކިޔަވަން ބޭނުންވާ ދާއިރާއިން ކޯސް ހަމަޖެހޭތޯ އޭރު ދިވެހި ކުދިންނާއި ހަވާލުވެ ހުންނަ މީހާގެ އެހީތެރިކަމާއެކު މަސައްކަތްކުރިން. ވަރަށް މަސައްކަތުން ހަމަޖެހުނީ 2 އަހަރު ފަހުން. 2 އަހަރުގެ ކިޔެވުން ބޭކާރުވެގެންދިޔަ. ކިޔަވަން ބޭނުންވި ދާއިރާއިން ކިޔެވުމުގެ ފުރުސަތު ހޯދައިގެން މާތްﷲގެ ވާގިފުޅާއެކު ކިޔަވައި ނިންމާލީ"
އަދާކުރެއްވި ވަޒީފާތައް
ސްކޫލުގައި އުޅެމުންވެސް ކުދިންނަށް ޤުރުއާން ކިޔަވައިދެއްވި ޝަބާނާ ވަނީ ޖަސްޓިސް މިނިސްޓްރީގެ އިތުރުން އިސްލާމިކް މިނިސްޓްރީގައިވެސް ވަޒީފާ އަދާކުރައްވާފައެވެ. ފިޤްހު އެކަޑަމީގެ މެންބަރުކަންވެސް ވަނީ ކުރައްވާފައެވެ. އަދި ޝަރީޢާ ކައުންސިލްތަކުގައި ވަނީ މަސައްކަތް ކުރައްވާފައެވެ.
- މޯލްޑިވްސް ޙައްޖު ކޯޕަރޭޝަންގެ ޝަރީޢާ ކައުންސިލްކަމުގެ މެންބަރުކަން 2014 އިން 2020 އަށް
- ސީ.އެމް.ޑީ.އޭގެ ކައުންސިލް މެމްބަރުކަން 2015 އިން 2019 އަށް
- ލިޓަސް އޮޓޯ މޮބައިލްސްގެ ކައުންސިލް މެމްބަރުކަން 2016 އިން ފެށިގެން ދަނީ ކުރައްވަމުން.
މިހާރުވެސް ޝަބާނާ ގެންދަވަނީ އިސްލާމިކް މިނިސްޓްރީއާއި ގުޅިގެން ޖަލުގައި ތިބޭ އަންހެން ގައިދީންނަށް އޮންލައިންކޮށް ކިޔަވައި ދިނުމުގެ ޕްރޮގްރާމެއް ހިންގަވަމުންނެވެ.
ލިޔުންތެރިއެއް
އިސްލާމިކް މިނިސްޓްރީ އިން ނެރުނު 'ދީނުގެ މަގު' މަޖައްލާގެ އިތުރުން 'ދި އިސްލާމް' ވެބްސައިޓަށް ވެސް އާޓިކަލް ލިޔުއްވައިފައިވާ ޝަބާނާގެ ލިޔުންތެރިކަމުގައި އެންމެ ބޮޑަށް ފާހަގަކޮށްލެވެނީ ފޯރުކޮށްދޭން ބޭނުންވާ މެސެޖު އާންމު މީހާއަށްވެސް ފަސޭހައިން އެގޭނެގޮތަށް ޚުލާސާކޮށް ލިޔާތީއެވެ.
" އަންހެނުންނަށް ޚާއްޞަ ފޮތެއް ތައްޔާރު ކުރުމުގެ މަސައްކަތް ކުރިއަށް ގެންދަން. ސަބަބަކީ ރާއްޖޭގައި އަންހެނުންގެ މައްސަލަތަކަށް ޚާއްޞަ ފޮތް ނެރެފައި ނުހުންނާތީ އެކަމުގެ މުހިންމު ކަމުގެ ސަބަބުން"
އާންމުންނާއި ހަމައަށް މިފޮތް ފޯރުކޮށްދޭނެ ގޮތެއް ނިންމާނީ ފޮތުގެ މަސައްކަތް ނިމުމުން ކަމަށް ޝަބާނާ ވިދާޅުވިއެވެ.
ނިންމުން
ދިވެހިރާއްޖޭގައި ތިބި މަދު އަންހެން ދީނީ ޢިލްމުވެރިންގެ ތެރެއިން ފާހަގަކޮށްލެވޭ ޝަބާނާ ވިދާޅުވީ މިދާއިރާއަކީ އަންހެން ކަނބަލުން ނިކުންނަށް ވަރަށް މުހިންމު ދާއިރާއެއް ކަމަށެވެ.
" ސަބަބަކީ މި ދާޢިރާގައި އަންހެން ކަނބަލުން މަދުވުމާއި އަންހެނުނާއި ގުޅުންހުރި ކަންކަމުގައި ސުވާލު ކުރަން ބޭނުންވަނީ އަންހެން ކަނބަލުންނާއި ކަމުގައިވުމުން. އަދި އަންހެނުންނަށް އަންހެނެއް ކައިރީގައި ސުވާލު ކުރުމަށް ފަސޭހަވުމުން. މީގެ އިތުރުންވެސް ޖީލެއް ބިނާ ކުރުމުގެ އެންމެ މުހިންމު ދައުރެއް އަދާކުރާ ބަޔަކީ އަންހެނުން. ރަނގަޅު ޖީލެއް ބިނާ ކުރުމަށް އޮތް މަގަކީ ޝަރުޢީ ދާއިރާއިން މައިން ތަޢުލީމު ޙާޞިލު ކުރުން" ޝަބާނާ ވިދާޅުވިއެވެ.
އިންޓަވިއު ނިންމާލަމުން ވިދާޅުވީ މިހާތަނަށް ކުރެވުނު އެންމެ ޚާއްސަ އެއް މަސައްކަތަކީ ދިވެހިރާއްޖޭގައި އުފައްދާ މަހުގެ ބާވަތްތަކަށް ޙަލާލު ސެޓިފިކެޓް ދޫކުރުމުގެ މަސައްކަތް ކުރިއިރު، އެކަމަށް ޤަވާއިދު ތައްޔާރުކުރުމުގެ މަސައްކަތުގައި އިސްލާމިކް މިނިސްޓްރީގެ ފަރާތުން ތަމްސީލު ކުރުން ކަމަށެވެ.
