އުމުރުން 9 މަހުގެ ޔޫސުފު ގެ ބޯ ހުންނަންޖެހޭ ވަރަށްވުރެ ބޮޑުވަމުންދާތީ ދެވަނަ ފަހަރަށް އޮޕަރޭޝަން ކުރީ މިއަހަރުގެ ފެބުރުއަރީ މަހުގެ 7 ވަނަ ދުވަހުގައެވެ. ޑރ. އަލީ ނިޔާފު ކުރެއްވި އޮޕަރޭޝަން އާއި ގުޅޭގޮތުން ޢާއިލާ އިން މަޢުލޫމާތު ދީފައިވަނީ އޮޕަރޭޝަނަށްފަހު ޔޫސުފުގެ ބޮލުގެ ސައިޒު މަޑުމަޑުން ކުޑަވާނެ ކަމަށް ޑޮކްޓަރު ވިދާޅުވެފައިވާ ކަމަށެވެ.

ޑޮކްޓަރު ވިދާޅުވިގޮތަށް ފުރަތަމަ ދިޔައީ ޔޫސުފުގެ ބޮލުގެ ސައިޒު ކުޑަވަމުންނެވެ. އެހެންނަމަވެސް އަނެއްކާވެސް ބޯ ބޮޑުވަމުން ދާކަން ޢާއިލާއަށް ފާހަގަވީ މިދިޔަ އޭޕްރީލްމަހު ބޮލުގެ ވަށަމިން ބެލުމުންނެވެ. ޔޫސުފުގެ މަންމަ ޢާއިޝަތު އާސިދާ އާއި ބައްޕަ ޙާމިދު މުޙައްމަދު މިވަގުތު ތިބީ އޭޑީކޭ ހޮސްޕިޓަލުގައެވެ. ޔޫސުފުގެ ބޮލުގެ ތިންވަނަ އޮޕަރޭޝަން އިއްޔެގެ ވަގުތެއްގައި ވަނީ ކޮށްފައެވެ.

" އޮޕަރޭޝަނަށްފަހު އަޅުގަނޑުމެން އެއިރު ރަށަށް ދިޔުމުގެ ކުރިން ބޮލުގެ ވަށަމިން ބެލިއިރު ހުރީ 54 ސެންޓިމީޓަރަށް ކުޑަވެފައި. ދެވަނަ އޮޕަރޭޝަންގެ ކުރިން ހުރީ 56 ސެންޓިމީޓަރުގައި. އެކަމަކު މިހާރު އަނެއްކާ 55.6 ސެންޓިމީޓަރުގައި ބޮލުގެ ވަށަމިން ހުރީ. ކޮންމެ މަހަކުވެސް ދަރިފުޅު ކިރަންގޮސް ބޮލުގެ ވަށަމިން ބަލަމުންދިޔައީ" އާސިދާ ކިޔައިދިނެވެ.

Advertisement

ދުވާފަރުގައި ދިރިއުޅެމުންދިޔަ ޔޫސުފުގެ ޢާއިލާއިން މަޢުލޫމާތު ދިންގޮތުގައި ޑޮކްޓަރު ބުނެފައިވަނީ ހޮޑުލުން އެއީ މައްސަލައެއް ކަމަށާއި ހޮޑުނުލާ ކަމުގައިވާނަމަ ސައިޒު ކުޑަވަމުންދާނެ ކަމަށެވެ.

" ފެބުރުއަރީގެ އޮޕަރޭޝަނަށްފަހު ޔޫސުފު ހޮޑުނުލާ. ހޮޑުލާ ކޮންމެފަހަރަކު ބޮލުގެ ސައިޒު ބޮޑުވާނެ ކަމަށް ބުނި. އަނެއްކާ ވަރަށްބޮޑަށް ހޮޑުލާންފެށީ ހަފްތާއެއްހާ ދުވަސްކުރިން. އެހެންވެ ޑޮކްޓަރާއި މަޢުލޫމާތު ހިއްސާކުރުމުން ބުނީ ވީހާއަވަހަކަށް އޭޑީކޭ އަށް އަންނަން. މިފަހަރުވެސް ކަންފަތް ކައިރިން ލައްވާފަހުރި ހޮޅި ކުރިއަށްވުރެ ދިގުކުރީ. ފެން ދައުރުކުރަންޖެހޭ ވަރަށް ނުކުރާތީ ދިމާވިގޮތެއްކަމުގައި ވަނީ" އާސިދާ ބުންޏެވެ. 

ޔޫސުފަކީ ދުވަސްނުފުރާ 7 މަހުގައި ސިޒޭރިއަން ހަދައިގެން ނެގި ކުއްޖެކެވެ. 2020ވަނަ އަހަރު އޮގަސްޓް މަހުގައި އުފަންވި ޔޫސުފަކީ އުފަންވިއިރު އެއްވެސް ހަރަކާތެއް ނެތުމުގެ ސަބަބުން ސަލާމަތްވާނެ ކަމުގެ އުންމީދު ކުރެވުނު ކުއްޖެއް ނޫނެވެ. ފުރަތަމަ މަހުގައިވެސް 8 ފަހަރު ލޭއަޅަން ޖެހުނުއިރު ބޭބީ ނާސަރީގައިވެސް ދޮޅުމަސް ދުވަސް އެއިރު ފަރުވާދިން ކަމަށް ޢާއިލާއިން ވަނީ މަޢުލޫމާތު ދީފައެވެ.

" ޔޫސުފުގެ ބޮލުގެ މައްސަލައެއް އުޅޭކަން ފާހަގަވީ އުމުރުން ފުރަތަމަ މަހުގައި. އެފަހަރު އޮޕަރޭޝަންކޮށް ބޮލުގައި ލެއްވި ހޮޅިކޮޅުން ފެން ބޭރުކުރަމުން ދިޔައީ ސިރިންޖުން. އެގޮތަށް ފެން ބޭރުކުރިއަސް އާދަޔާ ޚިލާފަށް ބޯ ބޮޑުވަމުން ދިޔުމުން ބޮލުން ފެން ދައުރުކުރާނެ ގޮތަށް 2 ވަނަ ފަހަރު އޮޕަރޭޝަން ކޮށްފައި ބޮލުގައި ހޮޅި ލެއްވީ. އަދި އެއިރު ބަނޑަށްވެސް ހޮޅިކޮޅެއް ލައްވާފައި ހުރި. ބަނޑުގައިލެއްވި ހޮޅި ހުރީ އެގޮތަށް ބަހައްޓާފައި" ޢާއިލާއިން މަޢުލޫމާތު ދީފައިވެއެވެ.

ޔޫސުފާއި ގުޅޭގޮތުން ޒީޓައިމްސް އިން މިއަހަރުގެ ފެބުރުއަރީމަހު ރިޕޯޓެއް ގެނެސްދިނުމާއި އެކު ޢާންމުންގެ ވަރަށްބޮޑު އެހީތެރިކަމެއް ޢާއިލާއަށް ލިބިގެންދިޔައެވެ. ޢާއިލާއިން އެދެނީ ޔޫސުފަށް އަވަސް ޝިފާއެއް ލިބޭތޯ ހެޔޮ ދުޢާ ކޮށްދިނުމަށެވެ.