ކޮވިޑްބަލީގައި ނިޔާވެފައިވާ އުމުރުން 10 އަހަރުގެ ފާތިމަތު މިޝްކާ މުޙައްމަދަށް ސިއްޙީ ޚިދުމަތް ފޯރުކޮށްދިނުމުގައި ހެލްތް އެމަޖެންސީ އޮޕަރޭޝަން ސެންޓަރުން އަމަލުކޮށްފައިވާ ގޮތް ދެނެގަތުމަށް އެއްކުރެވުނު މަޢުލޫމާތު މިނިސްޓްރީ އޮފް ހެލްތުން ޢާންމުކުރިއިރު، މިކަމުގައި އިހުމާލުވި މިންވަރު ވަރަށް ބޮޑަށް ވަނީ ހާމަވެފައެވެ.
އިހުމާލުވި ކަންތައްތައް
ކޮވިޑް 19 އަށް ފައްސިވެފައިވާ 15 އަހަރުން ދަށުގެ ހުރިހާ ކުޑަކުދިންނަށް ކެއަރ ކްލަސްޓަރ އިން ހާލުބެލުމަށް ގުޅަންޖެހޭއިރު މިޝްކާގެ ހާލު ބެލުމަށް ބެލެނިވެރިޔާ އަށް ދެދުވަހު ގުޅާފައިނުވާކަމަށް ރިވިއު ރިޕޯޓުގައިވެއެވެ.
މިދިޔަ މަހުގެ 31 ވަނަ ދުވަހުގެ ރޭ މިޝްކާގެ ކޭސްގައި ކަންހިނގާފައިވާ ގޮތް ކަމަށްބުނެ ހެލްތް މިނިސްޓްރީއިން ނެރުނު ރިވިއުގައި ބުނެފައިވަނީ އެރޭ 21:06 ގައި ކުއްޖާގެ ހާލަތު ގޯސްވުމާއި ގުޅިގެން ބެލެނިވެރިޔާ ކޯލް ސެންޓަރަށް ގުޅާފައިވާ ކަމަށެވެ. " ކުއްޖާގެ ހާލު ގޯސްވާހެން ހީވާކަމަށާއި ނޭވާލާން އުނދަގޫވެ އަތްތަޅުވާ ހަދާކަމަށް ބުނެ، ވީހާވެސް އަވަހަކަށް ޑޮކްޓަރަށް ދައްކަން ބޭނުންވާކަމަށް ބުނެފައިވޭ. މިމަޢުލޫމާތާ ގުޅިގެން ޑީއެމްއާރުޓީގެ ޑޮކްޓަރެއް 21:53ގައި ބެލެނިވެރިޔާއަށް ގުޅަން މަސައްކަތް ކުރިނަމަވެސް އެވަގުތު ގުޅިފައި ނުވޭ. އަދި މަޢުލޫމާތު ޝީޓަށް 'އެޓެންޑަޑް' ކަމަށް ޑީއެމްއާރުޓީއިން އަޅާފައިވޭ" ބެލެނިވެރިޔާއާއި ނުގުޅެނީސް އެޓެންޑަޑް ކަމަށް ޖެހުން މިއީވެސް މި ރިވިއުއިން ފާހަގަކުރެވުނު މައްސަލައެކެވެ.
ޑޮކްޓަރު ކުރި ކޯލް މިސްވެފައިވާތީ 22:06ގައި ބެލިނިވެރިޔާ ގުޅުމުން ޑީއެމްއާރުޓީގެ ޑޮކްޓަރު އަލުން ބެލެނިވެރިޔާއަށް ގުޅާފައިވަނީ 22:33ގައެވެ.
" މިއީ ކޮވިޑް ކޭސްއެއްކަމާއި، 1 ދުވަސްވަންދެން ނޭވާލާން އުދަގޫވާކަމާއި 2ދުވަސް ވަންދެން ހިކި ކެއްސުން ކެއްސާފައިވާކަމާއި، 6 ދުވަސް ވަންދެން ހުން އަންނަ ކަމާއި، އަދި ޚާއްސަ އެހީއަށް ބޭނުންވާ ކުއްޖެއްކަމާއި، ކުއްޖާގެ ބަލިޙާލަތުގެ ސަބަބުން ކުއްޖާއަށް ވާ އުނދަގޫ އަމިއްލައަށް ކިޔައިނުދެވޭކަމުގެ މަޢުލޫމާތު ބެލެނިވެރިޔާ ދީފައިވާ ކަމަށް ޑޮކްޓަރު ނޯޓްކޮށްފައިވޭ. އެމްބިއުލާންސް އެކްޓިވޭޓް ކުރުމަށް ކަނޑައަޅައިފައިވާ ދެ ކްލަސްޓަރ ކަމުގައިވާ ޑީއެމްއާރުޓީއާއި ސީމެޓަށް މިމަޢުލޫމާތު ހިއްސާކުރެވިފައިވީނަމަވެސް އެމްބިއުލާންސް ދާން އަންގާފައިނުވޭ"
23:16 އިން 23:33 އަށް އިތުރު 5 ފަހަރަށް ކޯލް ސެންޓަރަށް ބެލެނިވެރިން ގުޅައިފައިވާއިރު މިތަނުން އެއް ކޯލުގައި ކުއްޖާގެ ހާލު ދަށްވަމުންދާކަމާއި ހޭނެތި ނޭފަތުން ލޭ އަންނަކަމަށް ބެލެނިވެރިޔާ ބުނެފައިވާކަމަށް ރިވިއުގައި ފާހަގަކޮށްފައިވެއެވެ.
" މި ކޯލްތަކުގައި ކުއްޖާ ބަލާ ފޮނުވާނެކަމަށް ބުނެފައިވާކަމަށާއި، އެމްބިއުލާންސް އައުން ލަސްކަމަށް ބެލެނިވެރިޔާ ބުނެފައިވޭ. އަދި އެމްބިއުލާންސް ފޮނުވިފައިވާކަމަށް ކޯލް ސެންޓަރުގެ ފަރާތުން ބުނެފައިވީނަމަވެސް އެމްބިއުލާންސް އެކްޓިވޭޓްކޮށްފައިނުވޭ. އެމްބިއުލާންސް ލަސްވެގެން ދަރުބާރުގެއަށް ބެލެނިވެރިޔާގެ ފަރާތުން މީހަކު އައިސް 23:27ގައި އަންގާފައިވޭ. އެއަށްފަހު 23:32 ގައި އެމްބިއުލާންސް އެއް ބޭނުންވާކަމަށް އެޗްއީއޯސީގެ ފެސިލިޓީ މެނޭޖްމަންޓް ކްލަސްޓަރ އިން އީއެމްއެސް އަށް އަންގާފައިވޭ. 23:38ގައި އެމްބިއުލާންސް އެގެއަށް ދިޔައިރު ކުއްޖާގެ ހަރަކާތެއް ނެތް. ވަގުތުން ސީޕީއާރު ފެށި. 23:42ގައި ކުއްޖާވަނީ އައިޖީއެމްއެޗް އީއާރަށް ގެންދެވިފައި" ހެލްތް މިނިސްޓްރީގެ ރިވިއުގައިވެއެވެ.
އިހުމާލުވި ފަރާތްތަކަށް ފިޔަވަޅުއެޅިކަމެއް އެނގެން ނެތް
ސިއްޙީ ޚިދުމަތް ފޯރުކޮށްދިނުމުގައި މިއީ އިމަރޖެންސީ ހާލަތެއްކަމުގައި ބެލިފައިނެތުމުގެ އިތުރަށް އެފަދަ ހާލަތެއްގައި އަމަލުކުރަންޖެހޭ ގޮތަށް އަމަލުކޮށްފައި ނެތްކަމަށް ހެލްތް މިނިސްޓްރީގެ ރިވިއު ރިޕޯޓުގައި ވަރަށް ސާފުކޮށް އެވަނީ ބުނެފައެވެ. އަދި އެމްބިއުލާންސް އެކްޓިވޭޓްނުކުރެވި (ނުފޮނުވާ) 2 ގަޑިއިރާއި 26 މިނެޓް ހޭދަވެފައިވާކަމަށް ރިޕޯޓުގައި ބުނެފައިވާއިރު މިފަދަ ހާދިސާއަކާއި ގުޅިގެން އިހުމާލުވި ފަރާތްތަކަށް ފިޔަވަޅުނައަޅާ ލަސްވަމުން ދިޔުމަކީ އާންމުންގެ ކަންބޮޑުވުމެކެވެ.
އެހެންނަމަވެސް ހެލްތް މިނިސްޓްރީގެ ރިޕޯޓުގައި ވަނީ މިފަދަ ހާދިސާއެއް ތަކުރާރުވިޔަ ނުދިނުމަށް އެޗްއީއޯސީގެ މެޑިކަލް އިމަރޖެންސީ ރެސްޕޮންސް މިހާރު ހިނގަމުންދާގޮތަށް ބަދަލު ގެނައުމަށް ނިންމާ އެކަންތައްތައް ފާހަނގަކޮށްފައެވެ. އަދި ރިވިއުއަށް ބެލުމަށްފަހު އަޅަންޖެހޭ އެންމެހައި ފިޔަވަޅުތައް މިނިސްޓްރީއިން އަޅާނެ ކަމަށް ބުނެފައިވާއިރު އެފިޔަވަޅުތަކަކީ ކޮބައިކަން ޢާންމުކޮށް އެނގެން އެބަޖެހެއެވެ.
މިފަދަ ކޮންމެ މަރަކީ ވަރަށްބޮޑު އިހުމާލެކެވެ. މިފަދަ ކަންތައްތައް ތަކުރާރުނުވާނެ ގޮތަކަށް ދުރު މުސްތަޤުބަލަކަށް ވިސްނައިގެން ބަދަލުތަކެއް ގެންނަން އެބަޖެހެއެވެ. އަދި އިހުމާލުވި ފަރާތްތަކަށް ހައްޤު އަދަބު ލިބެންޖެހެއެވެ. މިމައްސަލައިގައި އެއްވެސް މީހަކަށް ފިޔަވަޅު އަޅައިފައިވޭތޯ ބެލުމަށް ތަރުޖަމާން މަބުރޫކު އަޒީޒަށް، 'ޒީޓައިމްސް' އިން ފޮނުވި މެސެޖަށް ޖަވާބެއް ނުލިބެއެވެ.
