އުމުރުން 30 އަހަރުގެ އައިޝަތު ހިދާޔާ (ހިޑީ) ލޯބިވާ ކޮއްކޮއަށް ކިޑްނީ ހަދިޔާކުރީ 2019ވަނަ އަހަރު ޖޫންމަހުގަ އެވެ. ފުރަތަމަ ފަހަރަށް އެވާހަކަ ހިޑީ މިވަނީ ހިއްސާކޮށްފައެވެ. ކުރިން ބައެއް ރައްޓެހިންނަށްވެސް ނޭގިއޮތް މިކަން 'ޒީޓައިމްސް' އާއި ހިޑީ ހިއްސާކުރީ ވަރަށް މަތިވެރި މަޤްސަދެއްގައެވެ.

ހިޑީގެ ކޮއްކޮ އަބުދުﷲ މުހައްމަދު ޝަރީފުގެ ކިޑްނީގަ މައްސަލައެއް އުޅޭކަން އާއިލާއަށް އެނގުނީ 2012 ހިސާބުގައެވެ. އެއިރު އޭނާ އަށް ވަނީ ކްރޯނިކް ކިޑްނީ ޑިޒީސް (ސީ.ކޭ.ޑީ) ގެ މައްސަލައާއި ކުރިމަތިލާންޖެހިފައެވެ. ކޮއްކޮގެ 2 ކިޑްނީ ކުޑަވުމުގެ ސަބަބުން ބަޔޮޕްސީވެސް ނެހެދުނު ކަމަށް ހިޑީވަނީ ބުނެފައެވެ. އެހެންނަމަވެސް ރާއްޖެއިން ޑައެލިސިސް ހަދާފައެއްނުވެއެވެ.

ހިޑީގެ ކިޑްނީ ކޮއްކޮއަށް ހަދިޔާކުރުން މިއީ ކިހިނެއް ނިންމިކަމެއްތޯ އެހުމުން ބުނީ ކޮއްކޮއަށް ކިޑްނީ ހަދިޔާ ކުރަން ފުރަތަމަ އުޅުނީ ބައްޕަ ކަމުގައެވެ.

Advertisement

"ބައްޕައާއި މަންމަގެ ތިބެނީ 3 ކުދިން. މަންމަގެ އަދި އިތުރު އެއްކުއްޖަކު ހުންނާނެ. މީގަ ތިންއަހަރެއްހާ ދުވަސްކުރިން ބައްޕަގެ ކިޑްނީގައި ޓިއުމަރެއް ހުރިކަން އެނގުނު. އޯޕަން ސާޖަރީއެއް ކުރުމަށްފަހު ޓިއުމަރުނެގީ ބައްޕަގެ. އެހެންވެ ބައްޕައަށް ކިޑްނީ ހަދިޔާ ނުކުރެވުނީ"

ހިޑީގެ ބައްޕައަށްފަހު ދެން ކިޑްނީ ހަދިޔާ ކުރަން މަސައްކަތް ކުރީ މަންމައެވެ. އެހެންނަމަވެސް ހިޑީގެ މަންމަ އަކީ ބްލަޑް ޕްރެޝަރ އަށް ބޭސް ކާ މީހަކަށްވާތީ ޑޮކްޓަރުގެ ލަފާގެމަތިން މަންމައަށް ކިޑްނީ ދެވޭގޮތް ނުވީއެވެ. އަދި ހިޑީގެ ކުޑައަށް ހުރި އަންހެން ކޮއްކޮ އެއިރު ބަނޑުބޮޑުވުމުން ކިޑްނީ ހަދިޔާކުރަން އާއިލާގައި ބާކީތިބީ އެއްބަޑު ބޭބެ އާއި ހިޑީ އެކަންޏެވެ.

" މަންމަ ގުޅާފަ ބުނީ ކިޑްނީ ހަދިޔާކުރަން ޓެސްޓުހަދަން. ބޭބެ އާއި ދެމީހުން ހުރިހާ ޓެސްޓުތަކެއް ހަދަންފެށީ. 2018ވަނަ އަހަރު ހުރިހާ ޓެސްޓުތަކެއް ހަދައިގެން ހިޑީގެ އެއްވެސް ސިއްޙީ މައްސަލައެއް ނެތީމަ ކިޑްނީ ހަދިޔާކުރަން ނިންމީ. އަސްލު އާއެކޭ ބުނިއިރު ނޭނގޭ އެކަމާގުޅޭގޮތުން އެއްވެސް މަޢުލޫމާތެއް. އެއަށްފަހު ކުޑަކޮށް ރިސާރޗް ކޮށްލިން މިއީ ކިހާވަރެއްގެ ކަމެއްތޯބަލަން. ނޭނގޭ ވަރަށްގިނަ ކަންކަން އެނގުނު. ކިޑްނީ ހަދިޔާ ކުރުމަކީ މައްސަލައެއް ނޫންކަމާއި އެކަމުން އަޅުގަނޑަށް ލިބޭނެ ގެއްލުމެއް ނެތްކަން އެނގުނު" ހިޑީގެ ހަޔާތުގައި ނިންމި އެންމެބޮޑު އެއް ނިންމުމާއި ގުޅޭގޮތުން ބުންޏެވެ. 

ކިޑްނީ ޓްރާންސްޕްލާންޓް ކުރުމަށް މި އާއިލާއަށް އިންޑިއާ އަށް ފުރޭވަރުވީ 2019ވަނަ އަހަރު ފެބުރުވަރީ މަހުގައެވެ. ދެމީހުންގެ އޮޕަރޭޝަން އެން.ޔޫ ހޮސްޕިޓަލުގައި ކުރެވުނީ ޖޫން 10 ވަނަ ދުވަހުގައެވެ. ކިޑްނީ ޓްރާންސްޕްލާންޓަށް ކުރި އޯޕަން ސާޖަރީއަށް ފަހު 5 ދުވަސް ފަހުން ހިޑީ ވަނީ ގެއަށް ދޫކޮށްލާފައެވެ. އަދި ހޮސްޕިޓަލުން ދޫކުރީ ގިނައިން ހިނގުމަށް އިރުޝާދު ދިނުމަށް ފަހުގައި ކަމަށް ވަނީ ބުނެފައެވެ.

ހިޑީ ގެއަށް ފޮނުވާލިއަސް އޭނާގެ ކޮއްކޮ ހޮސްޕިޓަލްއިން ދޫކުރީ މަހެއްހާ ދުވަސް ވާން ކައިރިވެފައިވަނިކޮށެވެ. ހިޑީ ބުނީ ފުރަތަމަކޮޅު ބުރަކަށީގައި ރިއްސާވަރުން ނުނިދުނަސް ފަހުން ގިނައިން ހިނގުމުން ތަދު ރަނގަޅުވިކަމަށެވެ. އޮޕަރޭޝަން ކުރިތާ އެއްމަސްފަހުން ހިޑީ މާލެއައި ކަމުގައިވިއަސް ހިޑީގެ ކޮއްކޮއާއި އާއިލާގެ އެހެން މެންބަރުންނަށް މާލެ އާދެވޭވަރުވީ 3 މަސް ދުވަސް ފަހުންނެވެ.

މޯލްޑިވްސް ޕޯސްޓް އޮފީހުގައި ވަޒީފާ އަދާކުރާ ހިޑީ އިންޑިއާގައި ހޭދަވީ 5 މަހަށްވުރެ ގިނަ ދުވަހު އޮފީހުންނާއި، އާއިލާއާއި، ގާތް ރައްޓެހިން ދިން އެއްބާރުލުން ވަނީ އުފަލާއިއެކު ފާހަގަކޮށްފައެވެ. އޮޕަރޭޝަންކުރިތާ 2 މަސްދުވަހުން އެނބުރި ވަޒީފާއަށް ހިޑީ ނުކުންނަންފެށިއިރު، އިންޑިއާގައި ހޭދަވި މުއްދަތުގައި ހިޑީގެ ހުރި ހަމައެކަނި ދަރިފުޅު އިސްމާއިލް އަޝްހަމް އަހުމަދު ބަލައިދިނީ ދަރިފުޅުގެ ބައްޕައާއި ބައްޕަ ފަރާތުގެ އާއިލާއިންނެވެ.

އާސަންދައިން ބޭހުގެ ހުރިހާ ހަރަދެއް ހަމަޖެއްސިއިރު އިންޑިއާގައި ހޭދަވި މުއްދަތުގައި އިތުރު ހަރަދުތައް ހަމަޖެއްސީ އެންސްޕާއިންނާއި، ޒަކާތު ފަންޑުގެ އިތުރުން އާއިލާއިންނާއި ގާތް ރައްޓެހިންގެ އެހީތެރިކަމާއި އެކުގައެވެ. އޮޕަރޭޝަންކުރިތާ މިއަދަށް ދެއަހަރުވެފައިވާއިރު، ދިރިއުޅުމަށް ހަމައެކަނި އައި ބަދަލަކީ އެނާރޖީ ޑްރިންކްސް ނުބޮވުންކަމަށް ހެވިލާފައި ވަނީ ބުނެފައެވެ. މާލެ އައިތާ އެއްމަސްތެރޭގައި ސައިކަލްވެސް އަމިއްލައަށް ދުއްވަންފެށި ހިޑީގެ ކެއުންވެސް ކުރިއެކޭ އެއްގޮތް ކަމަށް ވަނީ ބުނެފައެވެ.

" ވަރަށް އުފާވޭ ކިޑްނީ ހަދިޔާ ކުރެވުނީމަ. ލަކުނު ފެންނަ ކޮންމެފަހަރަކު ވަރަށްބޮޑު ހިތްހަމަޖެހުމެއް ލިބޭ. އެއީ ކޮއްކޮގެ ފުރާނަ ސަލާމަތް ކޮށްދިނުމަށް އެހީތެރިވެދެވުނު ކަމުގެ އިހްސާސްކުރެވޭތީ އަދި އެކަމާ ވަރަށް ފަޚުރުވެރިވޭ" ހިޑީ އުފަލާއިއެކު ފާހަގަކުރިއެވެ.

މިއަދުވެސް ގިނަ އަދަދެއްގެ ދިވެހިން ކިޑްނީގެ ތަފާތު ބަލިތަކުގައި ދުވަސްތައް ހޭދަކުރަމުންދާއިރު، ހިޑީގެ ވެސް އެންމެބޮޑު ކަންބޮޑުވުމަކީ، ކިޑްނީ ހަދިޔާކުރުމަށް ބައެއް މީހުން ޖެހިލުންވާތީއެވެ.

" ބައެއް މީހުން ހީކުރަނީ ކިޑްނީ ދޭ މީހާއަކީ މުޅި އުމުރަށް ބަލި މީހެކޭ. އެހެންވެ އަސްލު ގިނަ މީހުން އަދިވެސް ޖެހިލުންވޭ ކިޑްނީ ހަދިޔާކުރަން. އެކަމަކު އެއީ ކުއްހީއެއް. ކިތައް މީހުންތޯ ދުނިޔެއަށް އުފަންވާއިރު އެންމެ ކިޑްނީއެއްގައި އުފަންވަނީ. އެއް ކިޑްނީގައި އުޅުނަސް އާދައިގެ ދިރިއުޅުމެއްގައި އުޅެވިދާނެ. ކިޑްނީ ހަދިޔާ ކުރަން ބޭނުންވެ ޖެހިލުންވާ މީހުންނަށް ބުނެލާނީ ތިމާޔާހެދި އަނެކާގެ ފުރާނަ ސަލާމަތްކުރަން ޖެހިލުން ނުވާށޭ"

ހިޑީގެ ދިރިއުޅުމުގެ މިވާހަކަތައް ފުރަތަމަ ފަހަރަށް ނޫހެއްގައި ހިއްސާ މިކުރީ ބޭނުންޖެހިފައިވާ މީހަކަށް ކިޑްނީ ހަދިޔާ ކުރުމަކީ ލިބޭ ހިތްހަމަޖެހުމެއްކަން އަންގައިދިނުމަށެވެ.