އުމުރަކީ އެންމެ 4 އަހަރާއި 2 މަހެވެ. އެކަމަކު ދިވެހި އަދި އިނގިރޭސި ބަހުން ލިޔެފަ ހުންނަ ފޮތްތައް ފަރިތަކަމާއި އެކު ކިޔަން އެނގެއެވެ. ހިސާބުގެ އަދަދުތައް އެއްހާހުން މައްޗަށް ގުނަން އެނގެއެވެ. ކުރެހުމަށް މޮޅެވެ. ދެއަތުން ފަރިތަކަމާއި އެކު ލިޔަން އެނގެއެވެ. މަދަހަ އަދި ލަވަކިޔައެވެ. ތަފާތު ގައުމުތަކުގެ ގައުމީ ސަލާމް ކިޔައެވެ. 30 ގައުމެއްގެ ދިދަ ދައްކާލުމުން އެގައުމުގެ ނަން ބުނެލައެވެ. މިއުޒިކް ނޯޓްގެ ސިމްބަލް ދައްކާލުމުން އޭގެ ނަންތައް ކިޔާލައެވެ. އަދި މިހާތަނަށް 23 ކުރުސޫރަތް ހިތުދަސްކޮށްފައިވާ ކަމަށް އާއިލާއިން ވަނީ މަޢުލޫމާތުދީފައެވެ. މިހުރިހާ މަންޒަރެއްކަހަލަ ގޮތަކަށް މަކީނާ ނައުޝީން އަލީ (ނޮއްޗި)ގެ މަންމަ ގެ ސޯޝަލް މީޑިއާ އެކައުންޓްތަކުން ދަނީ ފެންނަމުންނެވެ.

ސްކިލް ޓްރެއިނިންގ ސެންޓަރ ގެ ފައުންޑަރ ދިމްނާ ފާކިރު (ދިމީ) އަދި އެމްއެންޑީއެފް ލެފްޓިނެންޓް ކާނަލް އަލިމަނިކް (ދާރީ)ގެ ދަރިފުޅު ނައުޝީންގެ މި ޚާއްސަ ކަންތައްތަކަށް މިރިޕޯޓްގައި ބަލާލާނަމެވެ. އިންޓަވިއު ނެގުމަށް ޒީޓައިމްސް އިން ނައުޝީން އާއި ވާހަކަދައްކާލުމުން ވެސް މިއީ އާދަޔާ ހިލާފަށް މައުލޫމާތު މުއްސަދި ކުއްޖެއްކަން ފާހަގަކުރެވުނެވެ. މިގޮތުން ޕްލެނެޓްތަކުގެ ނަންތައް ކިޔާލަން އެދުމުންވެސް ހިތުން ކިޔާލިއެވެ. އަދި ބައެއް ބަސްތައް ބުނެލުމުން ވަގުތުން 'ސްޕެލިންގް' ކިޔާލާ ކުރި ސުވާލުތަކަށް އެ ލޯބިއަޑުން ޖަވާބުދިނެވެ.

ފޮތް ކިޔަން ފެށުނީ ކިހިނެއް؟

Advertisement

އެންމެ ފުރަތަމަ ފޮތެއް ދިނީ ނައުޝީންގެ އުމުރުން 3 މަހުގައި ކަމަށާއި އެހާހިސާބުން ކުޅޭ އެއްޗެއްސަށްވުރެ ބޮޑަށް ފޮތަށް ޝައުގުވެރިކަން ހުންނަކަން އާއިލާ އިން ވަނީ ފާހަގަކޮށްފައެވެ.

" އެހެންވެ އެންމެ ކުޑައިރު ފޮތިފޮތްތައް ހޯދަންފެށީ. އަދި ދިވެހިބަހުން ފޮތި ފޮތްތައް ނުހުންނާތީ ފޮތިފޮތެއް ތައްޔާރުކުރީ. ނައުޝީން އުމުރުން 7 މަހުގައި ފޮތުގައި ހުންނަ ނަމްބަރުތައް، ބައްޓަންތައް، ކުލަތައް އަދި ބަސްތައް އަހާލުމުން ދައްކާ އަދި އަޑުލައްވާ ކިޔަން މަސައްކަތްކުރާކަން ފާހަގަވި. ކާންދޭން އިންނައިރު ވެސް އިންނާނެ އެއްފޮތް ނަގާފައި އަނެއް ފޮތް ނަގާފައި ފޮތާއި ކުޅެން." ނައުޝީންގެ މަންމަ މައުލޫމާތު ދިނެވެ.

ފޮތަށާއި ދިވެހި އަކުރުތަކަށް ޝައުގުވެރިކަން ފާޅުކުރިވަރުން ނައުޝީންގެ މައިންބަފައިން ވަނީ ހަށަނަރަ ފޮތި ފޮތާއި އަކުރުބޯޑު އަދި އަކުރުކުނާ ވެސް ދިވެހިން ތައްޔާރުކޮށްފައެވެ. މިގޮތުން 'ނިނީ ނަލަމަޑި އާއި ސިނީ ސިންގާ' ފޮތާއި އަދި 'މާމަ ބޮލަށް ބަދިގެ ބަން' ހިމެނެއެވެ. ނައުޝީން ފަރިތަކަމާއި އެކު ފޮތް ކިޔަން ފެށިގޮތްވެސް ދިމީ ވަނީ ހިއްސާކޮށްފައެވެ.

"3 އަހަރުވީއިރު އަމިއްލައަށް ކިޔަންފަށައިފި ފޮތްތައް. ފޮތް ކިޔަން ބޭނުންވީމަ ބުނާނެ 'ކަމް ޓު މަންމާ' މިހެން ކިޔާފަ އަންނާނެ ފޮތް ބޮނޑިއެއް ހިފައިގެން. އޭގަ ހުރެދާނެ 20 ފޮތްވެސް 50 ފޮތްވެސް. އެހުރިހާ ފޮތެއް އަޅުގަނޑުލައްވާ ކިޔުއްވާނެ. އަދި ބުނާނީވެސް 'އޯލްދަ ދިވެހި ބުކްސް'. 'އޯލްދަ އިންގްލިޝް ބުކްސް' މިހެން. އެގޮތަށް ފޮތް ކިޔައިދެމުންގޮސް އަމިއްލައަށް ފަރިތަކޮށް ކިޔަންފެށީ ފޮތްތައް. މިގޮތަށް މިހާރު އެކަނި އިނދެދާނެ ފޮތް ކިޔަން ކިތަންމެ ގިނަ އިރެއްވަންދެންވެސް. އެހެން އިނދެ އާންމުކޮށް ދެގަޑިއިރު ތެރޭގައި ނައުޝީންގެ އުމުރާއި ގުޅޭ 50 ފޮތްވެސް ކިޔާލަފާނެ. މިހާރު އެންމެ ގިނައިން ކިޔަނީ 'ޕީޓް ދަ ކެޓް' ސީރީޒް ގެ ފޮތްތައް. 30 މިނިޓްތެރޭގައި 11 އޭގެ ފޮތް ކިޔާލި އަދި އެދުވަހު އަޅުގަނޑުމެން އެކަން ފާހަގަވެސް ކުރިން. ސަބަބަކީ އެއީ ގްރޭޑް 1 އަދި ގްރޭޑް 2 ގެ ލެވެލްގެ ފޮތްތަކަށް ވީމަ. އަޅުގަނޑުމެންވެސް ވަރަށް އުފާވި ގިނަ އަދަދެއްގެ ފޮތް އަމިއްލައަށް ބޭނުންވެގެން ކިޔާލީމަ. އެއީ އެފޮތްތަކަކީ ގާތްގަނޑަކަށް 20 ސަފްހާގެ ފޮތް. ކޮންމެ ސަފްހާއެއްގައިވެސް 10 ބަހާއި 25 ބަހާއި ދޭތެރޭ ހުންނާނެ" އުފަލާއިއެކު ދިމީ ބުންޏެވެ.

ޔުނިސެފް މޯލްޑިވްސްގެ ވާހަކައިގެ ދުނިޔޭގައި ވެސް ބައިވެރިވެފައިވާ ނައުޝީން އަމިއްލައަށް ބޭނުންވެގެން އެހާގިނަ އަދަދެއްގެ ފޮތް ކިޔުމުން އާއިލާއިން ވަނީ އެންމެ ބޭނުންވާގޮތަށް 'ވީ ނީޑް ދަ ޕޫކޭކެއް' ވެސް ފަޅައިފައެވެ. އެއްދުވަހުން އަނެއް ދުވަހަށް ކިޔާ ފޮތްތަކުގެ އަދަދު އިތުރުވަމުންދާއިރު ނައުޝީން އަށް ޚާއްސަ ފޮތްތަކުގެ ގޮތުގައި މިހާރުވެސް 585 ފޮތް ގެންގުޅޭކަން ފާހަގަކުރަމުން ދިމީ ބުނީ މިހުރިހާ ފޮތެއްވެސް މިއީ ނައުޝީން ކިޔާފައިހުރި ފޮތްކަމަށެވެ. ފޮތަށް އިތުރަށް ޝައުގުވެރިކަން އުފެއްދުމަށް ފޮތާއިގުޅޭ ހެދުން އަދި ބެކްގްރައުންޑް ހަދައި އެއާގުޅޭ ސޮފްޓް ޓޯއިސް ހޯދުމަކީ ފެށުނީއްސުރެ އާއިލާއިން ކުރަމުން އަންނަކަމެކެވެ.

ނައުޝީން އަށް ކުޑައިރުއްސުރެ ކިޔައިދެމުން އައީ 'ޕޮނިކްސް' ބޭނުންކޮށްގެންނެވެ. 'ހަށަނަރަ ދިވެހި އަޑު' މިއީ ދިވެހިން އަކުރު އަދި ފިލި ދަސްކުރަން ނައުޝީންއަށް ތައްޔާރުކުރި ލަވަތަކެކެވެ. ފޭސްބުކް ޕޭޖް "ނައުޝީން ބުކްސް އެންޑް ޓޯއިސް" އުފައްދައިފައިވަނީ ވެސް ނައުޝީން އާއި ގުޅުވައިގެން އޭނާގެ މައިންބަފައިންނެވެ. ކެންގަރޫ ކިޑްސްގެ ނާސަރީގައި ނައުޝީން ކިޔަވަމުންދާއިރު ޕްލޭސްކޫލުގައި ކިޔެވިއިރު ނައުޝީންގެ ފުރަތަމަ ޓީޗަރު ފާތިމަތު ނަފްޝާ (ނަފޫ ޓީޗަރ) ދެކޭގޮތްވެސް ބަލައިލީމެވެ.

ނައުޝީންގެ މަންމަ ދިމީ ފާހަގަކުރިގޮތުގައި ރާއްޖެއިން ބޭރަށް ދަތުރުކުރާއިރުވެސް ނައުޝީން ދަނީ އެންމެ ބޭނުންވާ ފޮތްތައް ހިފައިގެންނެވެ.

"ޕްލޭ ސްކޫލަށް ގެންދިޔަ އިރުވެސް ފޮތެއް ހިފައިގެންދާނީ. އޭރު އެންމެ ކިޔާހިތްވާނީ އޮޕޮސިޓްސް ބުކް. ވަރަށް ހަނދާންވޭ އަބަދުވެސް ދަތުރު ކުރާއިރު ނައުޝީންގެ ބެކްޕެކް ޕެކްކުރަން ދެނީ ނައުޝީން އަތަށް. އޭގައި ހުންނާނީ ހުސް ފޮތް. ނައުޝީން އިންނާނީ އެއާޕޯޓް ތެރޭވެސް ސްޓްރޮލަރގަ ފޮތް ކިޔަން. އަދި ރެސްޓޯރެންޓަކަށް ދިޔަޔަސް އަޅުގަނޑުމެންދަނީ ފޮތް ހިފައިގެން. ސްކްރީން ނުދައްކަން." ދިމީ ބުންޏެވެ.

މިހާތަނަށް 23 ސޫރަތް ވަނީ ހިތުދަސްކޮށްފައި

ނައުޝީން އަށް އަބަދުވެސް ދިޔައީ ޤުރުއާން އަޑު އިއްވަމުން ކަމަށާއި، މިގޮތުން މަރްޔަމް މަސްއޫދާއި ފާތިމާ މަސްއޫދު ޤުރުއާން ކިޔަވާއަޑު އިއްވި ކަމަށް ދިމީ ވަނީ ފާހަގަކޮށްފައެވެ.

" ކާރު ދުއްވަން ދާއިރުވެސް ނައުޝީން އިންނާނީ ފޮތެއް ހިފައިގެން ނޫނީ ކިޔައިދޭނެ ޤުރުއާން ސޫރަތްތައް. އެއްއާޔަތް އަޅުގަނޑު ކީމަ އަނެއް އާޔަތް ނައުޝީން ކިޔާނެ. މިގޮތަށް 2 އަހަރު ވީއިރު 10 ސޫރަތް ދަސްކުރީ. އަޑުދަށުން ޤުރުއާނުގެ ސޫރަތްތައް ކިޔައިދީ ދަސްކޮށްދެމުން މިއަންނަނީ. މިހާރު ދަސްކުރަމުން ދަނީ 24ވަނަ ސޫރަތް" ކުޑައިރު ޤުރުއާން މުބާރާތްތަކުން ވިދާލި މަންމައެކޭ އެއްގޮތަށް ދަރިފުޅުވެސް ޤުރުއާނުގެ އިލްމަށް މޮޅުކުރުން މިއީ ދިމީ ދެކޭ ހުވަފެނެކެވެ. އަމާޒަކީ މަޖުބޫރުނުކޮށް ނައުޝީން ގަޔާވާގޮތަކަށް ޤުރުއާން ހިތުދަސްކޮށްދިނުމެވެ.

" އަޅުގަނޑުމެންގޭގައި އިތުރު ކުޑަކުއްޖެއް ނުހުރޭ. ނައުޝީން ގެންގުޅޭނެ ވަރަށް ގިނަ ސޮފްޓް ޓޯއިސް. އަދި އެ އެއްޗެއްސަށް ކާންދީ ހަދާނެ. ވަރަށް ތުއްތު އިރުވެސް ޤުރުއާން ކުލާހެއްގޮތަށް އެކި ސޮފްޓް ޓޯއިސްތައް އަތުރާފަ ބަހައްޓަނީ. ކޮންމެ ޓޯއިއެއްގެ ޓަރން ގަ މަންމަ ކިޔަނީ ދަސްކޮށްދޭން ބޭނުންވާ ސޫރަތް. މިގޮތަށް 10 ވަރަކަށް ޓޯއިސް ވެސް ނައުޝީން ނަގާފާނެ. އެހެންވެއްޖެއްޔާ 10 ފަހަރު މަންމަ ޖެހޭނެ އެ ޓޯއިއެއް ކިޔާކަމަށް ހަދާފަ އެސޫރަތް ކިޔަން. އަދި ނައުޝީން އިންނާނެ އަޑު އަހަން. ނައުޝީންގެ ޓަރން ޖެހޭއިރު އެސޫރަތް ރަނގަޅަށް ކިޔާލާ ގިނަ ފަހަރު. މިގޮތަށްވެސް ދަސްކޮށް ދިނިން. މިއީ އުމުރުން 1 އަހަރުގައި ދަސްކޮށްދޭން ފެށިގޮތް. މިހާރު ހަތިމް ނަގައިގެން ކުރު ސޫރަތްތައް ކިޔަން އުޅޭނީ އަދި ބަގަރާ ސޫރަތްވެސް ވަރަށް ބޮޑުބައި ހިތުން ދަސްކޮށްފި. ޤުރުއާން ބަލައިގެން ކިޔަން އަދި އަކުރުތައް ލިޔަންވެސް އެގޭ. ދިމީ ހުންނަނީ ހަތިމުގައި ގިނައިން ތަކުރާރުވާ ބަސްތަކުގެ ފްލޭޝްކާޑް، ފޯމް އަކުރު، ފެލްޓް އަކުރު ހަދާފަ. އިނގިރޭސި، ދިވެހިބަސް ދަސްކޮށްދިންގޮތަށް ޤުރުއާން ވެސް ދަސްކޮށްދިނީ ހަމަ ގޭގައި" ދަސްކޮށްދިން ގޮތުގެ ތަފްސީލް ދިމީ ދިނެވެ.

ޤުރުއާނަށް އަދި ދީނަށް ލޯބިޖެއްސުމަށް ބަންގި އަޑު އިއްވުމާއި ކުޑަކުދިން ކިޔަވާފަ ހުންނަ ވީޑިއޯ ދެއްކުމުގެ އިތުރުން މިސްކިތްތަކުގެ ފޮޓޯވެސް ދައްކައެވެ.

" ނައުޝީން ވަރަށް ތުއްތުއިރުވެސް ބުނާނެ "މިސްކިތް ބަލަން ދާން" އަޅުގަނޑުމެން މާލޭގައި އަދި ހުޅުމާލޭގައި ހުންނަ މިސްކިތްތައް ދައްކަން. ވަރަށް އުފާވާނެ ގެފުޅުގެ ފޮޓޯ ފެނުނީމަ. ނައުޝީން އަށް މިދިޔަ ލޮކްޑައުންގައި ސަޕްރައިޒް އަކަށް ދޮންބެ އާއި މަންމަ 'މޮސްކް ބެކްގްރައުންޑެއް' ހަދައިދިނީމަ ވަރަށް އުފާވި. އަދި އެ ބެކްގްރައުންޑް ކުރިމަތީގައި އިނދެ ވަރަށް ކިޔަވާހިތްވެސް ވާނެ. މީގެ އިތުރުން 'ޤުރުއާން ސްޓޯރީސް ފޮރ ކިޑްސް' މިފޮތްވެސް މިއީ ނައުޝީން ވަރަށް ކިޔާ ހިތްވާފޮތެއް" ދިމީ ފާހަގަކުރިއެވެ.

މިހާތަނަށް ނައުޝީން ބައިވެރިވެފައިވަނީ ޑރ. މުހައްމަދު ޝަހީމް އަލީ ސައީދުގެ ޤުރުއާން ޗެލެންޖް އަދި ކެންގަރޫ ކިޑްސް ޤުރުއާން ފެސްޓިވަލްގައެވެ. ޑރ. ޝަހީމްގެ ޤުރުއާން ޗެލެންޖުގައި ބައިވެރިވީ އުމުރުން 2 އަހަރުގައެވެ. ނައުޝީން އެންމެ ކިޔާހިތްވާ ސޫރަތަކީ ފާތިހާ ސޫރަތެވެ.

" ދަސްވެފައިވާ ކޮންމެ ސޫރަތެއްގެވެސް ނަން ބުނުމުން އެސޫރަތް ކިޔާލާނެ. އުމުރުން 2 އަހަރުގައި މަރްޔަމް މަސްއޫދުގެ ބެލެނިވެރިންނަށް ނައުޝީންގެ ޤުރުޢާން ވީޑިއޯތައް ފޮނުވިން. ވަރަށް އުފާވި ތަޢުރީފްކޮށް ދުޢާ ދެންނެވުމުން. ނައުޝީން ކިޔާނީ މަރްޔަމް ޓީޗަރ އަދި ފާތިމާ މަސްއޫދަށް ވެގެން ބައެއް ފަހަރު ކިޔަވަން އިންނާނެ." ދިމީ ބުންޏެވެ.

ނިންމުން

ނައުޝީން އަށް އެންމެ ކަމުދާ ލިޔުންތެރިންނަކީ ލޯބިވާ މަންމަ އާއި، ޖޭމްސް ޑީންގެ އިތުރުން އެރިކް ކަރލް އެވެ. އެންމެ ކަމުދާ ކުޅޭ އެއްޗަކީ ކަލްކިއުލޭޓަރެވެ. ކަލްކިޔުލޭޝަން ހެދުމަށްވެސް މޮޅު ނައުޝީން އެންމެ ކިޔާ ހިތްވަނީ 'މާމަ ބޮލަށް ބަދިގެ ބަން' މިފޮތް ކަމަށް ވަނީ ބުނެފައެވެ. މިއީ ނައުޝީން އަށް ޚާއްސަކޮށްގެން އަދި އާންމުންނަށް ލިބެން ހުންނަގޮތަށް ގެނެސްދިނުމަށް އެ އާއިލާއިން ތައްޔާރުކުރި ފޮތެކެވެ. ކަޅުކުލައަށް ލޯބި ކުރާ ނައުޝީން ބުނީ އެންމެ ކާހިތްވާ ޗޮކްލެޓަކީ މާރސް ޗޮކްލެޓް ކަމަށެވެ.

ބޮޑުވެގެން ޑޮކްޓަރަކަށް ވާން ބޭނުންވާ ނައުޝީން ގެ ރީތި ކުރެހުންތަކުން ވަނީ އެ އާއިލާ ދިރިއުޅޭ ގޭގެ ފާރު ޒީނަތްތެރިކޮށްފައެވެ. އަދި މިހާރު ތައްޔާރުކުރަމުންދާ ފޮތުގައި ނައުޝީންގެ ކުރެހުންތައް ހިމެނުމަށް ވަނީ ނިންމައިފައެވެ. އެންމެފަހުން ނައުޝީން ކުރަހާފައިވަނީ ނައުޝީންގެ ބައްޕަގެ އުފަންދުވަހުގައި ކޭކުގައި ޖަހަން ތަސްވީރެކެވެ. މިއީ ބައްޕަޔާ ގިނަދުވަސްތަކެއްވަންދެން ދިމާނުވާތީ ޕާކަށް ދާން ބޭނުންވާކަން ދައްކުވައިދޭ ވަރަށް ފުރިހަމަ ތަސްވީރެކެވެ. ދެއަތުންވެސް ކުރަހާ ކުލަޖައްސަން ފަރިތަ ނައުޝީން އެންމެކުރަހާހިތްވަނީ މިޔަރުގެ ފޮޓޯ އެވެ. ނައުޝީން ވަނީ އެމްއެންޑީއެފް އަދި ސްކިލް ޓްރެއިނިންގ ސެންޓަރގ ވީޑިއޯ ލަވަތަކަކުން ވެސް ފެނިފައެވެ.

ނައުޝީން އަކީ އުމުރުން 3 މަހުން ފެށިގެން ގަވާއިދުން ޕާކަށާއި މޫދުކައިރީ ދޮންވެލިގަޑަށް ގެންދާ ކުއްޖެކެވެ. ގޭތެރޭގައި ވެސް ނައުޝީން ބޭނުންވާގޮތަށް ކުޅިވަރު ކުޅެވޭނެ ގޮތަށް ކަންތައްތައް އިންތިޒާމް ކުރުމަށް އާއިލާއިން އިސްކަންދޭކަމަށް ވަނީ ފާހަގަކޮށްފައެވެ. މިގޮތުން ނައުޝީން އަށް ކިޔަވައިދެނީ ކުޅިވަރުގެތެރެއިން މަޖުބޫރުނުކޮށް ކަމަށް ދިމީ ފާހަގަކުރިއެވެ. އިންޓަވިއު ނިންމާލަމުން ދިމީ ވަނީ މަންމައިންނަށް ހާއްސަ މެސެޖެއް ދީފައެވެ. މިގޮތުން ދިވެހިރާއްޖޭގައި ވަރަށް ހުނަރުވެރި ކުދިން އެބަތިބިކަމަށާއި، ކުދިންގެ ހުނަރު ދެނެގަނެ އެކުދިން އެންމެ ގަޔާވާ ކަންތަކުން ކުރިއަށްގެންދަން މަސައްކަތްކުރުމަކީ ވަރަށް މުހިންމު ކަމެއްކަމަށް ފާހަގަކުރިއެވެ.