ތުނޑުކުނާ ވިޔުމަކީ ވަރަށް ޚާއްސަ ހުނަރެކެވެ. ތުނޑުކުނާ ވިޔުމަށް އެންމެ މަޝްހޫރު ރަށް ކަމުގައިވާ ގދ.ގައްދޫ އަށް އުފަން ޢާއިޝަތު ވަލީދާ (ޢާއިޝާ) އަކީ ވެސް ފާހަގަކޮށްލެވޭ މަސައްކަތެއް ކުރަމުންދާ ހުނަރުވެރި ޒުވާނެކެވެ. އަމިއްލަ އަތުން ފަހައިގެން ތައްޔާރު ކުރަމުން އަންނަ ފާރުގައި ހަރުކުރެވޭ (ވޯލްހޭންގަރ) ބާވަތްތަކުގެ ތެރޭގައި ހިމެނޭ ކައިވެނީގެ ރަން، ފެމިލީ ޕޯރޓްރެއިޓްސް، އެނިވަރސަރީ/ ބަރތްޑޭ ގިފްޓްސް ވަރަށް ތަފާތެވެ. އަދި އެމްބްރޮއިޑެރީ ހުނަރު ފުރިހަމައަށް ފެނިގެންދާ މިމަސައްކަތް އެހާމެ ރީއްޗެވެ.
މަސައްކަތުގެ ފެށުން
'ޒީޓައިމްސް' އަށް މައުލޫމާތު ދެމުން ޢާއިޝާ ވަނީ މިމަސައްކަތް ފެށުނުގޮތް ކިޔައިދީފައެވެ.
" އަސްލު މިކަމަކީ އަޅުގަނޑު އަމިއްލައަށް އާމްދަނީއެއް ހޯދުމަށް ވިސްނަމުން ދަނިކޮށް ލިބުނު ޚިޔާލެއް. އަޅުގަނޑު މިހާރު ބެޗްލާރސް ޑިގްރީއަށް ކިޔަވަމުންދާތީ ކިޔެވުމުގެ ވަގުތުތައް އޮންނަ ގޮތުން ވަޒީފާއެއް ހޯދަން ވަރަށް ދަތިކަމަކަށްވެފަ އޮތީ، އެހެންވެ ގޭގައި ހުރެގެން ކުރެވޭނެ މަސައްކަތަކަށް މިކަން ވާތީ މި މަސައްކަތް ފެށީ. ދެ ހަފްތާވަރު ގޫގުލް ސާރޗް ކޮށްގެން ބެލުމަށްފަހު ޕްރެކްޓިސްއަށް އެއްޗިހި ހަދަން ފަށައިފިން" ޢާއިޝާ ކިޔައިދިނެވެ.
ދަސްކުރީ ކިހިނެއް؟
ތިނޯހާއި ބަރަނި ބޭނުންކޮށްގެން އަތުން ހެދުން ފެހުމަކީ ކުޑައިރުއްސުރެ ޢާއިޝާ އަށް ލިބިފައިވާ ހުނަރެކެވެ. ގުރޭޑް 6 ގައި ކިޔެވިއިރު އޭރު ޕީ.އޭ ގަޑި އަކީ އަތްތެރި މަސައްކަތް ދަސްކޮށްދޭ ގަޑިއެކެވެ.
" އަޅުގަނޑުމެންނަށް ކިޔަވައި ދެއްވީ އިސްމާޢީލް ޢަލީ ސަރ، އެ ސަރ މިގޮތަށް ފަހަން ދަސްކޮށްދިނީ. ކުޑަ ކުޑަ ހެދުންވެސް އަޅުގަނޑުމެން އަތުން ތައްޔާރުކުރިން. އޭރު ދަސްވެފަ ހުރި ވަރަށް ބޮޑަށް އަތުން ފަހަން. ދެން ޔޫޓިއުބް ބަލައިގެން އިތުރަށް ކުރިއަށް މިދަނީ، އަދިވެސް ދަސްކުރަމުން މިދަނީ"
އެންމެ ޑިމާންޑް ބޮޑު ޑިޒައިންތައް
ޢާއިޝާ ގެ އުފެއްދުންތަކުގެ އަގު އުޅެނީ 300 ރުފިޔާ އާއި 2000 ރުފިޔާ ދެމެދުގައެވެ. ފުޅާދާއިރާއެއްގައި ރޯޒް.އެމްވީ ނަމުގައި ފޭސްބުކް، އިންސްޓަގްރާމް އަދި ޓިކްޓޮކް މެދުވެރިކޮށް މި ވިޔަފާރި ކުރިއަށްގެންދާއިރު ޑެލިވަރީ ކޮށްދެނީ މާލެ ސަރަހައްދުގެ ގެތަކަށެވެ. އަދި ބޯޓުތަކަށްވެސް ގެންގޮސްދޭ ކަމަށް ވަނީ ބުނެފައެވެ.
" އަގުތައް ހަދާފަ ހުންނާނީ ހޫޕްސް ގެ ސައިޒް އިން. އެއީ ހޫޕް ބޮޑުވާވަރަކަށް އެ ގަންނަން ލިބޭ އަގުވެސް ބޮޑުވޭ. ސީދާ މި ޑިޒައިންގެ ހޫޕްސް ލިބުން ވަރަށް އުދަނގޫވޭ، މާލެ އިން މި ހޫޕްސް ހޯދަން ވަރަށް އުދަނގޫކަމަކަށް ވެފަ އޮންނަނީ. އެހެންވެ މިހާރު ބޭރުން މި މަސައްކަތަށް ބޭނުންވާ ސާމާނު ގެންނަނީ، މި ދުވަސް ކޮޅުގެ ގޮތުން ބޭރުންވެސް މި އެއްޗިހި ލިބުމުގެ ދަތިތަކެއް އެބަހުރި. ނަމަވެސް ހުރިހާ ކަސްޓަމަރުންނަށްވެސް މި ޑިޒައިންގެ ހޫޕްގަ އެއްޗިހި ހަދައިދެވޭތޯ ބަލަން. އެއީ އެންމެނަށްވެސް ފެންނަން ހުންނަ ތަންތާގަ މި އެއްޗިހި އަޅުވާފަ އޮންނަނީ، މި ޑިޒައިންގަ ހެދީމަ ބަލާލަންވެސް ވަރަށްރީތި"
އެންމެ ޑިމާންޑް ބޮޑީ ކޮން ޑިޒައިނަކަށްތޯ ސުވާލުކުރުމުން ޢާއިޝާ ބުނީ އެންމެގިނައިން އޯޑަރު ލިބެނީ އެނިވަރސަރީ އާއި ޕޯޓްރައިޓްސް ހެދުމަށް ކަމަށެވެ. ގިނަ އަދަދެއްގެ އޯޑަރު ލިބޭއިރު އެހުރިހާ އޯޑަރެއް ޢާއިޝާއެއް ނުނަގައެވެ.
" ވަރަށް ފުލްވެފަ އޮންނަނީ ކޮންމެ މަހަކުވެސް، އަޅުގަނޑު މިހާރު އޯރޑަރުތައް ނަގަނީ ކޮންމެ މަހަކުވެސް އެއްވަނަ ދުވަހު އެ މަހެއްގެ އޯރޑަރ ތައް. އެއީ ހަމަ އާއްމުކޮށް ހުރިހާ ކަސްޓަމަރުންވެސް ބޭނުންވަނީ ވަކި ދުވަހަކަށް ނިންމަން. އެހެންވެ މަސްތަކަށް ވަކި ވަކިން އޯޑަރު ނެގީމަ އޮޅުން ނާރާ އަޅުގަނޑަށް ނިންމަން ފަސޭހަ ވެގެންދޭ. الحمد لله މިމަސަތްކަތުން ހަމަ ރަނގަޅު އާމްދަނީއެއް ލިބޭ. ވަރަށް ހިންހަމަޖެހޭ"
ގޮންޖެހުން
ޢާއިޝާ އަކީ މޯލްޑިވްސް އިސްލާމިކް ޔުނިވަރސިޓީގެ މުވައްޒަފެކެވެ. ކިޔަވަމުން ވަޒީފާ އަދާކުރަމުން މި މަސައްކަތް އިތުރަށް ފުޅާކުރުމަކީ ކުރިމަތިވާ ގޮންޖެހުމެކެވެ.
" އެންމެ ބޮޑު ގޮންޖެހުމަކީ ވަގުތު މަދުވުން. އަޅުގަނޑު މިސައްކަތް ކުރަން ފެށިތަނާ ވަޒީފާ ހަމަޖެހުނީ"
އިތުރަށް ކުރިއަށްދާން ވިސްނާގޮތް
ޢާއިޝާ ފާހަގަކުރިގޮތުގައި ހެދުމުގައި އެމްބްރޮއިޑެރީ ހެދުމަށް ވަރަށްގިނަ މީހުން މިހާރުވެސް ދަނީ މެސެޖު ކުރަމުންނެވެ. އެހެންނަމަވެސް އެވަރަށް ވަގުތު ނުލިބޭތީ އެ މަސައްކަތް އަދި ވަނީ ނުފެށިފައެވެ.
" އަޅުގަނޑު ވަރަށް ބޭނުންވޭ އެމްބްރޮއިޑެރީ ހެދުން ޑިޒައިން ކުރަން. އަޅުގަނޑު ފަހާ މީހަކަށް ވާތީ އާއި ވެސް އެކު އެއީ ވަރަށް ޝައުގުވެރިވާ ކަމެއް. ތަފާތު އެމްބްރޮއިޑެރީ ޑިޒައިންތަކަށް ހެދުން ފަރުމާކޮށް ރޯޒަސް އެމްބްރޮއިޑެރީ ނަމުގައި ކުރިއަށް އޮތްތާގައި ފެނިގެންދިއުމަކީ ކުރެވޭ އުންމީދެއް"
ނިންމުން
އަތުން ފަހައިގެން މިފަދަ ގޮތަކަށް އެއްޗެހި ތައްޔާރުކުރުމަކީ އެކަމަށް ވަރަށް ވަގުތު ހޭދަވާނެ ކަމެކެވެ. ސޯޝަލް މީޑިއާ ޕޭޖުތަކުން ޢާއިޝާގެ މިމަސައްކަތުގެ ފުރިހަމަކަން ވަރަށް ރީއްޗަށް ފެންނަން އެބަހުއްޓެވެ. މިދިޔަ އަހަރު ފަހުކޮޅު ފެށި މިމަސައްކަތުގައި އެންމެ ބޮޑަށް އެހީތެރިވެދެނީ ފިރިމީހާ ޖުނައިދު މުޙައްމަދު ކަމަށް އުފަލާއިއެކު ޢާއިޝާ ވަނީ ފާހަގަކޮށްފައެވެ. އަދި އާއިލާ އާއި ކުލާސް ކުދިންގެ އިތުރުން އެކުވެރިންގެ ފަރާތުން ލިބޭ ހިތްވަރު ވަނީ ފާހަގަކޮށްފައެވެ.
" ބުނޭ ވަރަށް ރަނގަޅު މަސައްކަތެކޭ. ޢާއިޝާ ވަރަށް ހިތްވަރު ގަދައޭ. އަޅުގަނޑު މިހާ ބުރަކޮށް މަސައްކަތް ކުރާކަމުގެ އެންމެ ބޮޑު އިންސްޕިރޭޝަން އަކީ އެމީހުން އެދޭ ހިތްވަރު" އުފަލާއިއެކު ފާހަގަކުރިއެވެ.
ކިޔުންތެރިންގެ ހިޔާލު
ޒީނާ ތިޔަ ކުރައްވާ މަސައްކަތަށް ސާބަސް ދެން. ކުރިއަށް ވަޑައިގަންނަވާ. ތި މަސައްކަތުގައި ބަރަކާތްލައްވާށި
ކޮމެންޓްސް ބަންދުކުރެވިފައި