ކުޑަކުދިންނަށް ޖެހޭ ނުރައްކާތެރި ބައްޔެއް ކަމުގައިވާ 'މަލްޓި ސިސްޓަމް އިންފްލެމޭޓްރީ ސިންޑްރަމް' (މިސްކް) ނަމަކަށް ކިޔާ މިބަލި ޖެހިފައިވާ 7 ކުދިން ރާއްޖެއިން ފެނިފައިވާކަމަށް އައިޖީއެމްއެޗް ގެ ކުޑަކުދިންގެ ޑޮކްޓަރު އަދި މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމިއުނައިޒޭޝަންގެ ޗެއާޕަސަން އަހުމަދު ފައިސަލް ވަނީ ވިދާޅުވެފައެވެ.
'ޒީޓައިމްސް' އަށް މިއަދު ހެދުނު ދެއްވި އިންޓަވިއުގައި ޑރ.ފައިސަލް ވިދާޅުވީ ބަލިޖެހުނު 7 ކުދިންނަކީ ވެސް އައިޖީއެމްއެޗް އަދި އޭޑީކޭގެ އިތުރުން ޓްރީޓޮޕް ހޮސްޕިޓަލަށް ޑޮކްޓަރަށް ދެއްކި ކުދިން ކަމަށެވެ. މިކުދިންގެ ތެރޭގައި ކޮވިޑްޖެހުނު ކަމުގައިވިއަސް ކޮވިޑްބަލީގެ މާބޮޑު އަލާމާތެއް ނުފެންނަކުދިން ހިމެނޭ ކަމަށް ވިދާޅުވިއެވެ.
ބަލީގެ އަލާމާތްތައް
" މީގެތެރެއިން 4 ކުއްޖަކަށް އައިޖީއެމްއެޗް އަދި ޓްރީޓޮޕްގެ އައިސީޔޫގައި ދަނީ ފަރުވާދެމުން. މިސްކް ބަލިޖެހެނީ ކޮވިޑަށް ޕޮޒިޓިވްވެގެން އުޅޭއިރުގައާއި ކޮވިޑްބަލި ރަނގަޅުވުމަށްފަހު. ކޮވިޑް ބަލިޖެހި 2 ހަފްތާފަހުން މިސްކް ބަލިޖެހުނު ކުދިންވެސް އެބައުޅޭ. ބަލީގެ އަލާމާތްތަކުގެ ތެރޭގައި ގަދައަށް ހުންއައުމާއި، ގައިގައި ރިއްސާ ހޮޑުލުން ހިމެނޭ. އަދި ލޭގެ ޕްރެޝަރ ދަށްވުންފަދަ އަލާމާތްތައް ދަނީ ފެންނަމުން" ޑރ.ފައިސަލް ވިދާޅުވިއެވެ.
އަދި ހަށިގަނޑުގެ އެކި ތަންތަން ވަރަށް ބޮޑަށް ރަތްވެ، ދުޅަވުމުގެ އިތުރުން ހަންފޮޅި ބިހިނެގުން ވެސް މިއީ މިސްކް ބަލީގެ އަލާމާތްތަކެއް ކަމަށް ވަނީ ވިދާޅުވެފައެވެ.
ޑޮކްޓަރު އިތުރަށް ވިދާޅުވީ މިބަލި ޖެހުމުން ހަށިގަނޑުގެ ދެ ސިސްޓަމަށްވުރެ ގިނަ ސިސްޓަމަށް އަސަރު ކުރާ ކަމަށެވެ.
" މިސާލަކަށް ހަށިގަނޑުގެ ސިސްޓަމްތަކުގެ ތެރޭގައި ހިމެނޭ ކިޑްނީ، ހިތް، ސިކުނޑި، ފުއްޕާމޭ އަށް އަސަރުކުރޭ. އެންމެ ގިނައިން މިހާތަނަށް ފެނުނީ ލޯ ރަތްވެ ހަންގަނޑަށް އަސަރުކޮށްފައި ހުރިތަން"
ފަރުވާދެވެން އެބަހުރިތަ؟
މިސްކް ބައްޔަށް ބޭނުންކުރާ ބޭސް ރަށްރަށުގެ ހޮސްޕިޓަލުތަކުން ލިބެން އެބަހުރިތޯ ދެންނެވި ސުވާލަށް ޖަވާބުދެއްވަމުން ޑރ.ފައިސަލް ވިދާޅުވީ ބައްޔަށް ފަރުވާ ދިނުމުގައި ބޭނުންކުރާ އެކައްޗަކީ އޮކްސިޖަން ކަމަށެވެ. ބައްޔަށް ބޭނުންކުރާ ބޭހަކީ އަގުބޮޑު މަދުން ބޭނުންކުރާ ބޭހަކަށްވާތީ އެބޭސް ގިނަ ތަންތަނުން ލިބެން ނުހުރެދާނެ ކަމަށެވެ. އެހެންވުމުން އެބޭސް ހޮސްޕިޓަލުތަކުން ލިބޭނެ އިންތިޒާމް ޖެހޭނީ ހަމަޖައްސަން ކަމުގައި ފާހަގަކުރެއްވިއެވެ.
ސަމާލުކަންދޭންވީ ކަންތައްތައް
ރާއްޖެއިން މިހާތަނަށް މިސްކް ބަލި ޖެހިފައިވަނީ 3 އަހަރާއި 10 އަހަރާއި ދެމެދުގެ އުމުރުގެ ކުދިންނަށް ކަމުގައިވިއަސް މިއީ ކޮންމެ ކުއްޖަކަށްވެސް ޖެހިދާނެ ބައްޔެއްކަމަށް ވިސްނައިގެން ސަމާލުވުމަށް ޑރ. ފައިސަލް ވިދާޅުވިއެވެ. އަދި މިސްކް ބަލީގެ އަލާމާތެއް ފެނި ނުވަތަ ހުންއައިސް 3 ދުވަހަށް ވުރެ ގިނަ ދުވަސް ވެއްޖެނަމަ ވީހާ އަވަހަކަށް ޑޮކްޓަރަކަށް ދެއްކުމަށް ވެސް ލަފާދެއްވިއެވެ.
މިއީ ނުރައްކާތެރި ބައްޔެއް ކަމަށާއި މިބަލި ޖެހެނީ ކޮވިޑް ބަލީގެ ސަބަބުން ކަމުގައިވާތީ، މިހާރަށްވުރެ ބޮޑަށް ކޮވިޑްބަލިން ކުޑަކުދިން ސަލާމަތްކުރުމަށް ޚާއްސަ ސަމާލުކަމެއް ދިނުމަށް ޑރ. ފައިސަލް ވަނީ އިލްތިމާސްކުރައްވާފައެވެ. މިސްކް ބަލި ރާއްޖެއިން މިފެނުނީ ކޮވިޑްގެ އާރާޅަށްފަހު ވޭތުވެދިޔަ މަހެއްހާ ދުވަސްތެރޭގައެވެ.
