ޤަޟާޤަދަރަށް އީމާންވާ މީހަކު އޭނާގެ ހަޔާތް ހޭދަކުރަމުންދާނީ ހިތްހަމަޖެހުމާ އެކުގައެވެ. ފިތުނައިގެ ސަބަބުން އެފަދަ މީހަކު ބަލިކަށިވެގެން ނުދާނެއެވެ. މިންވަރަށް އީމާންވުމުގެ ސަބަބުން އަޅާ އަށް ސުވަރުގެ ވަނުމަށް މަގު ފަހިވެގެންދާނެއެވެ. މާތްﷲ އާއި އެކަލާންގެ ރަސޫލާ އަންގަވާފައިވާ ގޮތަށް އީމާންވެ އަޤީދާ ވަރުގަދަކޮށްފި މީހާގެ ހަށިގަނޑާއި ގުނަވަންތަކުން އެކަން ފައުޅުވެގެންދާނެއެވެ.
މާތްﷲ އީ ހުރިހާ ކަމެއް އައްސަވާ އަދި ބައްލަވާ ވޮޑިގެންވާ ކަލާންގެކަން އަބަދުމެ ހަނދާންކުރުމަކީ ނަފުސުތަކަށް ހިތްހަމަޖެހުން ލިބިގެންދާނެކަމެކެވެ. ހުރިހާކަމެއް މެދުވެރިވެގެންދަނީ މާތްﷲ ޢިލްމުފުޅާއި އެކަލާންގެ އިރާދަފުޅުންކަން އިޢުތިޤާދުކުރާ ބަޔަކު ބިރުގަނެ، ހިތްނުތަނަވަސްވެ މާޔޫސްވާކަށް ނުޖެހޭނެއެވެ. އީމާންކަން ހަރުދަނާވެ ތާޒާވުމަކީ ހިތުގެ ސާބިތުކަން ވަރުގަދަވެ ޙަޔާތަށް އާރޯކަން ލިބި އަމާންކަމާއި އުފާވެރިކަން ވެރިވެގެންދާ ކަމެކެވެ.
މި ކައުނުގައި ހިނގާ ހުރިހާކަމެއް ހިނގަނީ މާތްﷲ ގެ އިރާދަފުޅުގެ މަތިން ކަމަށާއި، އަޅުތަކުން ކިތަންމެ މޮޅަށް ކިތަންމެ ވަރަކަށް ކަންތައް ރޭވިކަމުގައި ވިޔަސް އެކަމެއް މާތްﷲ އިރާދަފުޅުގެ މަތިން މެނުވީ ނުހިނގާނެއެވެ.
އިސްލާމީ ޝަރީޢަތުގައި ވާގޮތަށް ޙަރާމްކަންތައް ޙަރާމްކަމުގައި ބަލައިގަންނަން ޖެހޭނެއެވެ. ޙަލާލުކަންތައް ޙަލާލު ކަންތައް ކަމުގައި ބަލައިގަންނަން ޖެހޭނެއެވެ. ހިތުގައި މާތްﷲ ގެ އަދުލުވެރިކަމާ މެދު އެއްވެސް ޝައްކެއް އުފެދިގެން ނުވާނެއެވެ. މުސްލިމުން ޔަޤީންކުރަންވީ ކަމަކީ މާތްﷲ ގެ ދީނަށް ނަސްރު ލިބިގެންދާނެ ކަމެވެ. އާޚިރަތުގައި ބާއްޖަވެރިކަން ލިބިގެންދާނީ މުއުމިނުންނަށް ކަމެވެ. އަބަދުވެސް އުއްމަތުގެ ބަޔަކު ޙައްޤުގޮތުގައި ދެމިތިބޭނެކަމެވެ. ޤިޔާމަތާ ޖެހެންދެން ވެސް އެމީހުން ދެރަކޮށްލައި ނިކަމެތިކޮށްލެވޭނެ ބަޔަކު ނާންނާނެކަމެވެ. އަދި މާތްﷲ ވަނީ ދިމާވާ މުޞީބާތްތަކުން ކެތްތެރިވުމަށް އަމުރު ކުރައްވާފައެވެ. އިމްތިޙާނުން ކާމިޔާބު ލިބޭނީ ޤަޟާޤަދަރަށް ރުހިގެން ތިބޭ ކެތްތެރިންނަށް ކަން ވަނީ ބަޔާންކުރައްވާފައެވެ.
މަޢުލޫމާތު: ހުކުރު ޚުތުބާ
