ދުނިޔޭގައިވާ މަހްލޫގުންގެ ތެރެއިން ހިންޏަކީ މިސާލެއްނެތްފަދަ އަޖައިބުކުރަނިވި މަހްލޫގެކެވެ. ބައިބަޔަށް އެއްކޮށް ދިރިއުޅޭ މިކުދިކުދި ދިރޭ ތަކެތި ގިނައިން ފެންނަނީ އެތަކެއްޗަށް ބޭނުންވާ ކާނާތައް ހޯދުމުގައި އަވަދިނެތި މަސައްކަތް ކުރާތަނެވެ. ވަރަށް ގިނަހުރަސްތައް ގިރާކުރުމަށްފަހު ވެސް، ކާބޯތަކެތި ހޯދުމަށް ބުރަމަސައްކަތްކޮށް ހިނިތައް އުޅޭ އާދަޔާ ހިލާފް ދިރިއުޅުމަކީ އެކަން ދެކޭ ބަޔަކަށް ހައިރާންކަން ގެނެސްދޭފަދަ ދިރިއުޅުމެކެވެ.

ހިނީގެ އާއިލާގެ ތަފާތު 12،400 ވައްތަރެއް މިހާތަނަށް ސައިންސްވެރިންވަނީ ހޯދާފަ އެވެ. ސައިންސްވެރިން ލަފާކުރާގޮތުން، ދުނިޔޭގެ އެންމެ ގިނަވައްތަރުގެ ޖަނަވާރު އުޅޭ ސައުތު އެމެރިކާގެ އެމެޒަން ޖަންގަލީގައި ދިރިއުޅޭ ހުރިހާ ޖަނަވާރުންގެ ބަރުދަނުގެ 30 އިންސައްތައިގައި ހިމެނޭނީ ހިންޏެވެ. އަދި ބައެއް ތަޖުރިބާކާރުން ލަފާކުރާގޮތުގައި، ދުނިޔޭގައި އެކުލެވޭ ދިރުމުގެ 10 އިންސައްތައަކީ ވެސް ހިންޏެވެ.

ހިންޏާއި މެދު ގިނަ މީހުން ދެކެނީ އެއީ އުނދަގޫ ކުރާ ނުވަތަ އިންސާނުންނަށް ގެއްލުންދޭ ދިރޭތަކެތީގެ ގޮތުގަ އެވެ. އެހެންނަމަވެސް ހިންޏަކީ، ގަސްތަކުގައި އަޅާފަންޏާއި، ލަކުޑި ހަލާކުކުރާ  ތަފާތު  ދިރޭ ތަކެތި ނައްތާލުމަށް ވަރަށް ބޮޑަށް އެހީވެދޭ އެއްޗެކެވެ. އެހެންކަމުން، ހިނިތައް ބޭނުންކޮށްގެން ތަފާތު ވައްތަރުގެ ގަސްތައް ހިމާޔަތްކުރުމަށްޓަކައި ދުނިޔޭގެ އެކިހިސާބުތަގައި މީހުން މަސައްކަތްކޮށް އުޅެ އެވެ. މިސާލަކަށް، ހިނީގެ އާއިލާގެ ތެރޭގައި ހިމެނޭ ލަކުޑީގައި ދިރިއުޅޭ ހިނީގެ އެންމެ ބައިގަނޑަކުން، ދުވާލަކަށް 50000 އާއި 100000 އާއި ދެމެދުގެ ސޫފި ނައްތާލައެވެ. އެހެންކަމުން ހިންޏަކީ އެމީހުން ދިރިއުޅޭ މާހައުލުގައި ވަރަށް މުހިންމު ރޯލެއް އަދާކުރާ އެއްޗެކެވެ.

Advertisement

ހިނި އެންމެ މަޝްހޫރުވެފައިވަނީ އޭތީގެ ސަލާމަތައްޓަކައި ބޭނުންކުރާ "ހަތިޔާރު" ތަކުގެ ސަބަބުންނެވެ. ހިންޏަކީ ކަށިކޮށްޕުމުގެ އިތުރުން ދަތްއަޅާވެސް އެއްޗެކެވެ. ބައެއް ހިނި ދަތްއެޅުމަށްފަހު ދަތްއެޅިހިސާބަށް ބާރުގަދަ އެސިޑުގެ ބާވަތެއް ފޮނުވާލައެވެ. އަދި ބައެއް ވައްތަރުގެ ހިނި މިފަދަ އެސިޑް ގޭސް ގޮތުގައި ފަޒާގެ ތެރެއަށް ދޫކޮށްލައެވެ. މީގެ ސަބަބުން ކައިރީގައި ތިބޭ އެހެން ދިރޭތަކެތީގެ ނޭވާހާސްކުރުވައެވެ.

ހަމަލާތައް ދިނުމުގައި އެއްބައި ހިނިތައް ކުޅަދާނައިރު، އަނެއްބައި ހިނިތަކަކީ، ކެއުމަށްޓަކައި ގޮވާންކުރުމުގައިވެސް އަރާތިބި ބަޔެކެވެ. މިގޮތުން، ވަރަށް ގިނަވައްތަރުގެ ހިންޏަކީ، ތަރުކާރީގައި ހިމެނޭ އޮށްތައް ރައްކާކުރުމަށް ކުޅަދާނަ ބަޔެކެވެ. މިސާލަކަށް ސައުތް އެމެރިކާގައި ދިރިއުޅޭ ހިނީގެ އެއްވައްތަރަކީ، ފަތްޕިލާވެލި ހަފާ ކުދި ކުރުމަށްފަހު އެތަކެތި އެއްތަނަކަށް ޖަމާ ކުރުމަށްފަހު އޭގެ ތެރޭގައި ހަންޑިކުޑައިގެ ބާވަތްތައް ގޮވާންކުރުމަށްވެސް ވަރަށް ކުޅަދާނަ ބައެކެވެ.

ސައިޒުގެ ގޮތުން ކިތަންމެ ކުޑަނަމަވެސް، ހިންޏަކީ ވަރަށް ބާރުގަދަވެސް ސޫއްޕެކެވެ. މިގޮތުން، އެމީހުންގެ ބަރުދަނަށްވުރެ 50 އިންސައްތަ ބަރު އެއްޗެހިތައް އެއްތަނުން އަނެއްތަނަށް ހިނިގެންދައެވެ. ހިންޏަކީ އެމީހުންގެ ބައިގަނޑުގައި ހިމެނޭ އެހެނިހެން ހިނިތައް ބައެއް ފަހަރު ހިނީގެ ދަތްގަނޑުމައްޗަށް އަރުވައިގެން ދަތުރުކުރާ އެއްޗެއްވެސް މެއެވެ.

އަހަރެމެންނަށް ހީވެފައި އޮންނަނީ ދިރޭތަކެތި އޮޅުކޮށްގެން ގެންގުޅުމަކީ އިންސާނުންނަށް އެކަނި ކުރެވޭނެ ކަމެއް ކަމަށެވެ. އިންސާނުން ބަކަރިއާއި ގެރި ފަދަ ޖަނަވާރު ގެންގުޅޭ ފަދައިން ހިންޏަކީވެސް އެހެނިހެން ދިރޭތަކެތި އޮޅުކޮށްގެން ގެންގުޅޭ އެއްޗެކެވެ. އަދި އިންސާނުންނެކޭ އެއްފަދައިން، ހިންޏަކީ އެމީހުން ގެންގުޅޭ ދިރޭތަކެތި ހިމާޔަތްކޮށް އެތަކެތި އުޅޭނެ ތަންތަންވެސް ހަދައިދޭ ބަޔެކެވެ.

މަތީގައި ބަޔާން ކުރެވުނު ހުރިހާ ސިފަތަކުގެ ތެރެއިންވެސް ހިނީގެ އެންމެ ހައިރާން ކުރަނިވި އެއްސިފައަކީ، އެސޮރުމެންގެ އިމާރާތްކުރުމުގެ ހުނަރެވެ. ހިނީގެ މިހުނަރަކީ ސައިންސްވެރިންވެސް ހައިރާންކޮށްލިފަދަ އާދަޔާހިލާފް ހުނަރެކެވެ. ބިމުގެ އަޑީގައި ދިރިއުޅޭ ހިންޏަކީ އެމީހުންގެ އަމިއްލަ މަސައްކަތުން، ބިމުގެ އަޑިއަށް ވައިދަތުރު ކުރާނެ ފަދަ ނިޒާމްތައް (ނުވަތަ އެއާކަންޑިޝަން ސިސްޓަމް) ހަދައިގެން ދިރިއުޅޭ ހިނިތަކެކެވެ. އަދި މިނިޒާމުގެ ސަބަބުން، ޅަހިންޏަށް ކާންދިނުމަށްޓަކައި ބިމުގެ އަޑީގައި ހިނިތައް ހައްދާ ހަންޑި ކުޑަފަދަ ތަކެއްޗަށް ވައިލިބެއެވެ.

ހިންޏަކީ ބުރިބުރިއަށް ތަންތަން އިމާރާތްކުރާ އެއްޗެއްކަން މީގެކުރިން ވަނީ ހޯދިފައެވެ. މިގޮތުން ދާދި ފަހުން، ހިނިތައް މިމަސައްކަތް ކުރާގޮތް އާޖެންޓީނާގެ ސައިންސްވެރިންގެ ޓީމަކުން ވަނީ ހާމަކޮށްފައެވެ. މިގޮތުން ވިނަތައް ކޮށާ ހިނީގެ ބައިގަނޑެއް ލެބޯޓްރީއަކަށް ގެންދިޔުމަށްފަހު، މަށްޓާއި، ހިމުން ވެއްޔާއި އަދި އެއަށްވުރެ ބޮޑެތި ވެލިތައް ހިންޏާއި ހަމައަށް ފޯރުކޮށް ދިނެވެ. އަދި ވާރޭހެން ސިފަވާނެފަދަ ގޮތަކަށް އެތަނަށް ފެންއޮހޭ ގޮތްވެސް ސައިންސްވެރިން ހެދިއެވެ. މިމާހައުލުގައި ހިނިތައް ބިނާ ކުރުމުގެ މަސައްކަތް ފެށިއެވެ. އަދި ހިނިތައް އެއްބިނާ ހަދާނިމުމުން، ސައިންސްވެރިން ވަނީ މައިކްރޮސްކޯޕެއްގެ އެހީގައި ހިނީގެ މަސައްކަތް ބަލާ ދިރާސާ ކޮށްފައެވެ. މިގޮތުން، ހިނިތައް އިމާރާތްކޮށްފައިވަނީ، ވެލިފުކިތަކުންނާއި، މަށި ފެނާ އެއްކޮށްގެން ކުދި ކުދި ބޯޅަތައް ހަދައިގެން އެއަތުރައިގެން ކަމަށް ސައިންސްވެރިންނަށް ފާހަގަ ކުރެވުނެވެ. އަދި މަށި ބޯޅަތައް ހިނިތައް ހަދާފައިވަނީ، އެމީހުންގެ އަނގައިންނެވެ. މިގޮތަށް ތައްޔާރު ކުރެވޭ އިމާރާތްތަކުގެ އެއްވެސް ތަނެއް ހަލާކުވެއްޖެނަމަ، ހިނިތައް ހަލާކުވިބައި ނެގުމަށްފަހު، އަލުން މަރާމާތުކުރަން ފަށައެވެ. މިދިރާސާއިން ހާމަވިގޮތުގައި ބިމުގެ އަޑީގައި ދިރިއުޅޭ ހިނިތައް އިމާރާތްކޮށްފައިވާ ތަންތަނަކީ އެތަކެތީގެ އަމިއްލަ މަސައްކަތުން ހަދާފައިވާ ތަންތަންކަން ދޭހަވެއެވެ.

ކޮންމެއަކަސް، ބިމުގެ އަޑީގައި، ކަނުއަނދިރީގައި ހިނިތައްކުރާ ބުރަމަސައްކަތްތަކާއި މެދު ވިސްނާލިކޮންމެ މީހަކުވެސް ހައިރާންވާނެއެވެ. ހިންޏަކީ ގޮވާންކޮށް އެހެނިހެން ދިރޭތަކެތި ގެންގުޅެ، އަދި ކުދި ހިނިތައް ބަލައި މިހުރިހާ ކަމެއް ކަނުއަނދިރީގައި އެއްވެސް އަލިކަމެއް ނެތި ބުރަމަސައްކަތް ކުރުމަށް ކުޅަދާނަ ބަޔެކެވެ.

ނޯޓް: މިއީ ޕްރޮފެސަރ ޑރ.ހަސަން އުގެއިލް ލިޔުއްވައިފައިވާ އަދި ހަވީރުގައި ޝާއިޢުކޮށްފައިވާ ލިޔުމެކެވެ.