ވަކިފޫ ނުވަތަ ލޯންގް ޕެޕާރ އަކީ އަޅުގަނޑުމެން ދުފަން ބޭނުންކުރާ ބިލަތް ހެދޭގޮތަށް ވެލެއްގޮތަށް ހެދޭ ބާވަތެއްގެ ގަހެކެވެ. ފަތްތަކުގެ ދިގުމިނުގައި އާންމު ގޮތެއްގައި 5- 10 ސެންޓިމީޓަރު ހުންނައިރު ބިލަތްމަލާ ވައްތަރު ގޮތަކަށް ހުންނަ ވަކިފޫ ގަސް ހެދެނީ އާންމުގޮތެއްގައި 13 ފޫޓުގެ ދިގުމިނަށެވެ.
އަވައްޓެރި އިންޑިއާގައި މި ބާވަތުގެ ގަސް ހައްދަން ފަށަނީ ވާރޭވެހޭ މޫސުމާއި ދިމާކޮށެވެ. މިބާވަތުގެ ގަސް ހެއްދުމަށް ވަކިވައްތަރެއްގެ ގަސްކާނާއެއް ބޭނުމެއް ނުކުރެއެވެ.
ގަސް އިންދުމަށްފަހު އެންމެ ފުރަތަމަ ފަހަރު މާއަޅަން ހަމަސްދުވަހުގެ މުއްދަތެއް ނަގާއިރު ވަކިފޫ ކެނޑުމަށް 18 މަސްދުވަހުގެ މުއްދަތެއް ނަގައެވެ. މިބާވަތުގެ ގަހުގެ ވަކިފޫއަޅާ އުމުރަކީ އާންމު ގޮތެއްގައި 4 އަހަރާއި 5 އަހަރާ ދެމެދުގެ މުއްދަތެއް ނަމަވެސް މިގަހުގެ މުލުގެ ބޭނުމުގައި ދިގުމުއްދަތަކަށް މިގަސް ހައްދާކަމަށްވެއެވެ. އެއަށްފަހު އިންދަނީ މުޅިން އައު ގަސްތަކެކެވެ. ވަކިފޫ ހަރުވުމުން ކެނޑުމަށްފަހު އަވިން ހިއްކާލުމުން އަޅިކުލައަކަށް ބަދަލުވެއެވެ.
ސިއްޙީ ބައެއް ފައިދާތައް
މި ގަހުގެ ހިއްކާފައި ހުންނަ މޫ އަދި ވަކިފޫ ބޭނުންކޮށްގެން ބައެއްކަހަލަ ހަކީމީ ބޭސް އުފައްދާ ބޭނުންކުރަމުންދެއެވެ. އެގޮތުން އާންމުކޮށް ގައިގެ ތަންތަނަށްއަރާ ތަދުތަކަށާއި އާތުރައިޓިސް ބަލި ހުންނަ މީހުންނާއި، ރޯގާޖެހި ކެއްސާ ކިނބިހި އެޅުމާއި ނޭވާހިއްލުން ފަދަ ބަލިތަކުގެ ފަރުވާއަށް ވަކިފޫ ޕައުޑަރ ބޭނުންކުރާކަމަށްވެއެވެ. އެގޮތުން މާމުޔާއެކުވެސް ބޭނުންކުރެވިދާނެއެވެ.
އިންޑިއާގެ ގިނަ ހިސާބުތަކުގައި ދިރިއުޅޭ މީހުން ބަނޑުހަރުވުމުން ވަކިފޫ ޕައުޑަރ ކާއެއްޗެއްސަށް އަޅައިގެން ބޭނުން ކުރުމުން ބަނޑުހަރުވުމުގެ އުނދަގުލަށް ލުއިތަކެއް ލިބިގެންދާކަމަށްވެއެވެ. ރޯގާޖެހި ނޭފަތްބެދި ބޮލުގައި ރިއްސާ ނޭފަތުން ފެންފައިބާނަމަ ވަކިފޫ އަންދާލުމަށްފަހު އޭގެ ދުން ނޭފަތުން ދަމާލުމުން ރޯގާއަށް ހައްލެއް ލިބގެންދާނެކަމަށްވެއެވެ. އަދި ހަށިގަނޑުގެ ބަރުދަން ލުއިކުރުމަށްވެސް ވަކިފޫ ބޭނުންކުރާކަމަށްވެއެވެ.
