ހުޅުމާލޭ ބީޗުގައި ހިންގަމުން އަންނަ 'ވައިޓް ބީޗް ވޯޓަރ ސްޕޯޓްސް' އަކީ އެއްތަނަކުން މޫދު ކުޅިވަރާއި ގުޅޭ ހުރިހާ ޚިދުމަތެއް ލިބެންހުރި ތަނެކެވެ. 'ޒީޓައިމްސް' އިން 'ވައިޓް ބީޗް' އަށް ދިޔައިރު ފެނިގެން ދިޔައީ ވަށައިގެން އަތުރާލާފައި ހުރި މޫދު ކުޅިވަރާއި ގުޅުންހުރި ތަފާތު ތަކެއްޗެވެ. ޒުވާން އަންހެނަކު ވަރަށް ހަރަކާތްތެރިކޮށް އެތަނުގައި މަސައްކަތް ކުރަމުން ދިޔައިރު ދެން ފެނުނީ 'ވައިޓް ބީޗް' އުފެދުމުގެ ފަހަތުގައި ހުރި ހިތްވަރުގަދަ ޒުވާނާ ހުސައިން ފައިރޫޒް އެވެ.
ޚިދުމަތް ދޭން ފެށުނުގޮތް
ތަފާތު އެކި ދާއިރާތަކުގައި މަސައްކަތް ކުރުމަށްފަހު، 'ވައިޓް ބީޗް' ހުޅުވުނު ގޮތާއި، އެތަނުން ދޭ ޚިދުމަތްތަކުގެ ތަފްސީލް ފައިރޫޒް ވަނީ ކިޔައިދީފަ އެވެ. ޅ.ހިންނަވަރަށް އުފަން މި ޒުވާނާ ބުނިގޮތުގައި 'ވައިޓް ބީޗް' ހުޅުވައިގެން މަސައްކަތް ކުރަމުން އަންނަނީ 2020 ވަނަ އަހަރުން ފެށިގެންނެވެ.
" މިއީ ވޭތުވެދިޔަ 5 ވަރަކަށް އަހަރު މިދާއިރާގެ ވަރަށްގިނަ މީހުން ކުރި ފައިޓެއް. އެންމެ ފަހުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިބިން މިމަސައްކަތަށް ދޫކުރީ. އެޗްޑީސީ އާއި އެކު އެގްރިމެންޓެއްގެ ދަށުން މަސައްކަތް ކުރަމުން އައީ. ހުޅުމާލެ އަށް ގެސްޓުން ނައަންނާނެ ދޯ ހަމައެކަނި ހޮޓަލުގައި ތިބެފަ ދާން. އެމީހުންގެ އަސާސީ ބޭނުމެއްތާ ވޯޓަރ ސްޕޯޓްސް މިއީ." ފައިރޫޒު
މި ވިޔަފާރި ފެށުމަށް ދިމާވި ގޮންޖެހުމަކީ، ބެންކަށް ގޮސް ލޯނެއް ނެގޭނެ ގޮތެއް އެއިރު ނެތުން ކަމަށް ވަނީ ބުނެފައެވެ.
" ފްރީލާންސް ކޮށް އަމިއްލަ ވިޔަފާރި ފަށާ މީހުންނަށް ނެތް ފުރުސަތެއް. ފުރަތަމަ ފަށައިގަންނައިރު ނީންނާނެތާ މުސާރަ ގަވާއިދުން ޖަމާވެފަ. ލޯނު ލިބޭނެ ގޮތެއް ނެތުން އެއީ ވަރަށްބޮޑު ގޮންޖެހުމެއް."
ގާތް 2 ރަހުމަތްތެރިއެއްގެ ވަރަށްބޮޑު އެހީތެރިކަމަކާއި އެކު ފެށި ވިޔަފާރީގައި ފައިރޫޒް އާއި އެކު 5 މީހަކު ދަނީ ޓީމެއްގެ ގޮތުގައި މަސައްކަތް ކުރަމުންނެވެ.
ލިބެން ހުރި ޚިދުމަތްތައް
ސްނޯކްލިންގ، ޑޯލްފިންގ ބެލުމަށް ކުރާ ދަތުރު، ސޭންޑް ބޭންކް ދަތުރު، ޑައިވިންގ ފަދަ މޫދު ކުޅިވަރާއި ގުޅުންހުރި ހުރިހާ ކަމެއް ކުރެވޭނެ އިންތިޒާމު ވަނީ ހަމަޖެހިފައި ކަމަށް ފައިރޫޒު ވަނީ ފާހަގަކޮށްފަ އެވެ.
ޒުވާނުންނަށް އޮތް ފުރުސަތު
މޫދު ކުޅިވަރު ދަސްކުރަން ބޭނުން ކޮންމެ ކުއްޖަކަށް އެމަސައްކަތް ދަސްކޮށްދޭނެ ކަމަށާއި، މިހާރު ވެސް ސްކޫލުގައި ކިޔަވަމުން އަންނަ 3 ކުއްޖަކު ދަސްކުރަން އަންނަ ކަމަށް ވަނީ ބުނެފައެވެ.
" އަހަރެމެންނަށް އެނގޭ ހުރިހާ އެއްޗެއް ދަސްކޮށްދޭނަން. އެކަމަކު އަންނަންވާނީ މިކަމަށް ލޯބިހުރެގެން ދަސްކުރަން ބޭނުންވެގެން. މީހުން މިކަން ކުރާތަން ފެނިގެން އައިސް 2 ދުވަހަކު އުޅެލާފަ ދިޔައިމަ ނުވާނެ މިކަން.." ފައިރޫޒު ބުންޏެވެ.
މީގެ އިތުރުން މިދާއިރާގައި މަސައްކަތް ކުރަން ބޭނުންވާ އަންހެނުންނަށް ވެސް އެފުރުސަތު އެބައޮތް ކަމަށް ވަނީ ބުނެފައެވެ.
ދިވެހިންނާއި ފަތުރުވެރިންނަށް ތަފާތު ޕެކޭޖްތަކެއް
'ވައިޓް ބީޗް' އިން ޚިދުމަތް ހޯދާ މީހުންގެ ތެރޭގައި އެކި އުމުރުގެ ދިވެހިންނާއި ފަތުރުވެރިން ހިމެނެއެވެ. ދިވެހިންނަށް ވަނީ ތަފާތު ޕެކޭޖްތަކެއް ޚާއްސަ ކޮށްފައެވެ.
" ޓޫރިސްޓުންނަށް އަގު ކިޔަނީ މީހަކަށް ވަކިވަރެއް. ދިވެހިންނަށް އަގު ކިޔަނީ މީހަކަށް އަގު ކިޔުމުގެ ބަދަލުގައި އެކުރާ ދަތުރަކަށް ނުވަތަ އެގުރޫޕަކުން ހޯދާ ޚިދުމަތަކަށް ވަކިވަރެއް."
ޚިދުމަތް ހޯދުމަށް އަންނަ ޚާއްސަ އެހީތެރިކަމެއް ބޭނުންވާ މީހުންނަށް އެމީހަކު ބޭނުންވާފަދަ ޚިދުމަތް ފޯރުކޮށްދިނުމަކީ މިތަނުން އިސްކަންދޭ ކަމެއް ކަމަށް ވަނީ ބުނެފައެވެ.
ނިންމުން
ކޮވިޑާއި ގުޅިގެން މިވިޔަފާރި އަށް ވެސް ބޮޑު އަސަރެއް ކުރިއިރު، މިހާރު ދަނީ ވިޔަފާރި ރަނގަޅުވަމުންނެވެ. އިންޑިއާގެ ގިނަ އަދަދެއްގެ ފަތުރުވެރިން ހުޅުމާލޭގެ ހޮޓާތަކުގައި މިހާރުވެސް ތިބިއިރު، ފައިރޫޒުގެ އަމާޒަކީ ފަތުރުވެރިންނަށް ވުރެ ބޮޑަށް ދިވެހިންގެ މެދުގައި މޫދު ކުޅިވަރު އާންމު ކުރުމެވެ.
" އަސްލު ވަރަށް މަދު ދިވެހިރާއްޖޭގެ ރީތިކަމާއި، މޫދު އެންޖޯއި ކޮށްލަން ނުކުންނަ ދިވެހިން. އަހަރެމެންގެ ޚިދުމަތް ދިނުމުގައި މިހަރަކާތްތެރި ވަނީ ހަމައެކަނި ދިވެހިން. އެކަމަކު މިމަސައްކަތަށް ބައެއް މީހުން ބިދޭސީން ނެރުން އެއީ ލިބޭ ގޮންޖެހުމެއް. އެއިރުން ދަސްކުރަން ބޭނުންވާ ދިވެހިންނަށް ފުރުސަތު ލިބޭގޮތް މަދުވާނެ. 99 އިންސައްތަ މޫދުގައި އުޅޭ ޒުވާނުން ތިއްބާ ބިދޭސީންނަށް ނުޖެހޭ ދޯ މި ގައުމުގައި އިންސްޓްރަކްޓަރސް އަށް ވާން ފުރުސަތުދޭން."
މޫދަށް އޮންނަ ލޯތްބެއްގެ ސަބަބުން މޫދު ކުޅިވަރުގައި ދެމިހުރި ފައިރޫޒު ބުނިގޮތުގައި ވޭތުވެދިޔަ 10 އަހަރުގައި ކޮންމެ ދުވަހަކީވެސް ތަފާތު މީހުންނާއި ބައްދަލުވާތީ ތަފާތު ދުވަހެކެވެ. ހިތާމަވެރި ހާދިސާ އެއް މިހާތަނަށް ދިމާނުވާކަމަށް ހިންހަމަޖެހުމާއި ޝުކުރުވެރިކަމާއި އެކު ވަނީ ފާހަގަކޮށްފައެވެ.
" މޫދު އެއްގޮތަކަށް ވެސް ނުފެންނަ މީހުންނާއި ފަތަން ނޭނގޭ މީހުންނާއި ވެސް ދިމާވޭ. 100 އިންސައްތަ ރައްކާތެރިކަމަށް ބަލައިގެން މަސައްކަތް ކުރަނީ. ހިތާމަވެރި ހާދިސާ އެއް ނުހިގާވޭތޯ ބެލުން އެއީ މަޖުބޫރު ކަމެއް. އެއްވެސް އެކްޓިވިޓީއެއްގައި ކަސްޓަމަރަކު އެކަނި ދޫކޮށް ނުލަން. އަބަދުވެސް ކައިރީގައި އަހަރެމެންގެ އިންސްޓްރަކްޓަރ އެއް ހުންނާނެ." ފައިރޫޒު
އިންޓަވިއު ނިންމާލަމުން ބުނީ އެންމެ ދެކެން ބޭނުން ވަނީ، އެޑިޔުކޭޝަން ސިސްޓަމްގެ ތެރެއިން މޫދު ކުޅިވަރު ސްކޫލު ކުދިންނަށް ދަސްކޮށްދިނުމުގެ ފުރުސަތު ލިބޭނެ ދުވަހެއް އައުން ކަމަށެވެ.
