ދިވެހިރާއްޖެ އަކީ ނިސްބަތުން ހިތްވަރުގަދަ އުފެއްދުންތެރި މަސައްކަތްތެރިން ދިރިއުޅެމުންދާ ޤައުމެކެވެ. ދިވެހި މަސްވެރިން މަސްވެރިކަން ކުރުމަށް ޒަމާނުއްސުރެ އެންމެ ގިނައިން ބޭނުންކުރަނީ ދިވެހިން އަމިއްލައަށް ޖަހާފައި ހުންނަ ބުޅިއެވެ. ގދ. ފަރެސްމާތޮޑާގެ މާތޮޑާ އަވަށަށް އުފަން މުޙައްމަދު މަނިކު އަކީ ބުޅިޖެހުމަށް ދެކުނުގެ ހުރިހާ އަތޮޅަކަށް މަޝްހޫރު މީހެކެވެ.
ދިވެހި ސަރުކާރުން ދޭ އާންމު ޚިދުމަތުގެ އިނާމު 1990 ވަނަ އަހަރު ލިބުނު މުޙައްމަދު މަނިކަށް އެއިނާމު ލިބުމާއިގުޅިގެން ރައީސުލްޖުމްހޫރިއްޔާގެ އޮފީހުގެ ވެބްސައިޓުގައި ޝާއިޢުކޮށްފައިވާ ލިޔުމެއްގައިވެއެވެ. "މުޙައްމަދު މަނިކުގެ ޚިދުމަތް ވަކިން ޚާއްސަގޮތެއްގައި ފާހަގަކުރަން ޖެހުނު ސަބަބަކީ، އޭނާ ޖަހާ ބުޅީގެ ފެންވަރު ރަނގަޅުކަމުން. ޖަޕާނު ބުޅިއާ އެއްފެންވަރަށް އޭނާ ބުޅިޖަހާ." އަދި ޚާއްސަ ކަމަކީ ނުހިނގޭ މީހެއްގެ ގޮތުގައި ހުރެ މިމަސައްކަތް ކުރިއަށްގެންދިއުން ކަމުގައި ފާހަނގަކޮށްފައި ވެއެވެ.
'ޒީޓައިމްސް' އިން ފަރެސްމާތޮޑާ އަށް ކުރި ދަތުރުގައި މުޙައްމަދު މަނިކު ވަނީ ވަރަށް ތަފްސީލުކޮށް ބުޅިޖެހުމުގެ މަސައްކަތް ފެށިގެން އައިގޮތް ކިޔައިދީފައެވެ. ކުޑައިރު އާމްދަނީ ހޯދުމަށް މަސައްކަތެއް ދަސްކުރުމުގެ ގޮތުން ފެށި މިމަސައްކަތް މިހާރު ކުރަނީ ޒަމާނީކޮށް ކަމަށް ވަނީ ބުނެފައެވެ.
"ކުރިން މިމަސައްކަތް ފެށިއިރު ކަރަންޓްވެސް ނޯވޭ. އެއިރު ދަގަނޑު ތަޅައިގެން ފީރުން ގާނައިގެން މަސައްކަތް ކުރީ. ޖަނަރޭޓަރު ގެނެސްގެން މަސައްކަތް ކުރުމަށް ބޭނުންވާ ޓޫލްސް އަމިއްލައަށް ތައްޔާރުކުރީ. ކުރިން ދުވާލަކަށް ޖެހި 10 ބުޅީގެ ބަދަލުގައި 100 ބުޅި އަދި މިހާރު ދުވާލަކު 1000 ބުޅިވެސް ތައްޔާރުކުރަން." މުޙައްމަދު މަނިކު ކިޔައިދިނެވެ.
މިމަސައްކަތުގައި ދިމާވާ އެންމެބޮޑު ގޮންޖެހުމަކީ ބޭނުންވާ ބައެއް ސާމާނު ދިވެހި ރާއްޖެއިން ލިބުން ދަތިވުމެވެ. މިސާލަކަށް ބުޅިޖެހުމުގައި ބޭނުންކުރާ ފަތަކީ ކުކުޅު ނޫނީ ދޫނީގެ ފަތަށްވާއިރު، އެފަތް ގަންނަން ލިބުމުގައި ބައެއްފަހަރު ދަތިތަކާއި ކުރިމަތިވެއެވެ.
"މިހާރުވެސް އެއް ސައިޒުގެ ފަތް ގަންނަން ނުލިބިގެން މިއުޅެނީ. ނަރު ހޯދަން އުދަނގޫވާފަހަރު ވެސް އާދޭ. ބުޅި ވިއްކަނީ 11 ރުފިޔާ އާއި 15 ރުފިޔާ އާއި ދެމެދުގެ އަގުތަކެއްގައި. ޖުމްލަ 5 އަގެއް މިއުޅެނީ. މަހަކު ޚަރަދު ކަނޑާފަ އެވްރެޖްކޮށް 80 ވަރަކަށް ހާސް ރުފިޔާ ލިބޭ." މުޙައްމަދު މަނިކު
އަންހެނުންގެ އެހީތެރިކަމާއިއެކު ކުރިއަށްގެންދާ މިމަސައްކަތުގައި މުޙައްމަދު މަނިކަށް އެހީތެރިވުމަށް 2 މުވައްޒަފުން ގެންގުޅެއެވެ. ދެކުނުގެ ރަށްރަށުގެ 60 އިންސައްތަ މީހުން އޭނާ ކައިރިން ބުޅި ގަންނަކަން ފާހަނގަކޮށް މުޙައްމަދު މަނިކު އިތުރަށް ބުނީ، މާލޭގެ އިތުރުން އ، ފ، ދ، އަދި ތ އަތޮޅާއި ލ އަތޮޅުގެ މީހުން ވެސް ބުޅިގަންނަކަމަށެވެ.
ބުޅިޖެހުމުގެ މަސައްކަތުގައި 47 އަހަރު ހޭދަވިއިރު އޭނާއަކީ، ވަޑާންކުރުމުގެ އިތުރަށް ވެލްޑިންގެ މަސައްކަތާއި ލިޔެލާޖެހުމުގެ މަސައްކަތްވެސް ދަންނަ އަދި އެހުރިހާ މަސައްކަތަކަށް ބޭނުންވާ އާލާތް ގެންގުޅޭމީހެކެވެ. ގދ. އަތޮޅުގައި ކުރާ ހުރިހާ މަސައްކަތެއް އޭނާގެ ގެއިން ކުރެވޭނެ ކަމަށް ހިތްހަމަޖެހުމާއި އެކު ވަނީ ފާހަގަކޮށްފައެވެ.
އިންޓަވިއު ނިންމާލުމުގެ ކުރިން ވަނީ ނުހިނގޭ މީހަކަށް ބަދަލުވިގޮތުގެ ތަފްސީލްވެސް ހިއްސާކޮށްފައެވެ.
" އުމުރުން 8 އަހަރުގައި ޕޯލިއޯ ޖެހުނީ. ވަރަށްބޮޑަށް ރަނގަޅުވި. އިތުރަށް ބޭސްކުރީމަ އަޅުގަނޑުގެ ހާލަތު ގޯސްވީ. ދަނޑިގަނޑެއްގެ އެހީގައި ހިނގައި އުޅުނިން. 10 ވަރަކަށް އަހަރު ކުރިން ޗިކަންގުންޔާ ޖެހިފައި ފައިގެ ހުޅަށް ތަދުވިގޮތަށް އެއްގޮތަކަށް ވެސް ނުހިނގޭތާ 2 އަހަރުވެއްޖެ."
ވީޑިއޯ: މުޙައްމަދު މަނިކު ބުޅިޖެހުމުގެ މަސައްކަތް ކުރިއަށްގެންދަނީ އަމިއްލަ ގޭގައި
އަމިއްލަ ރަށުގައި އަމިއްލަ ގޭގައި ބުޅިޖެހުމުގެ މަސައްކަތް ފުޅާދާއިރާއެއްގައި ކުރިއަށްގެންދާއިރު، ހިތްހަމަޖެހުމަށް މަސްވެރިކަން ވެސް ކުރާކަމަށް މުޙައްމަދު މަނިކު ބުންޏެވެ. އަދި އޭނާގެ 4 ކުދިންގެ ތެރެއިން 1 ކުއްޖަކަށް މިމަސައްކަތް ކުރަން އެނގޭކަމަށް ވަނީ ފާހަގަކޮށްފައެވެ. މުޙައްމަދު މަނިކު މިވަނީ ނުހިނގުނު ކަމުގައިވިއަސް އަމިއްލަ ރަށުގައި ހުރެގެން ރަނގަޅު އާމްދަނީ ހޯދިދާނެކަން ސާބިތުކޮށްދީފައެވެ.
