ބައިނަލްއަގްވާމީ ގޮތުން ބަލާއިރު ސިއްޙީ މައްސަލަތަކުގައި އެންމެ ގިނައިން މީހުން މަރުވަނީ ހިތުގެ ބަލިތަކާއި ގުޅިގެން ކަމަށް ރިޕޯޓްތައް ބުނެއެވެ. ކާޑިއޯ ވަސްކިއުލާ ޑިޒީސަސްގެ ސަބަބުން ލަފާކުރެވޭ ގޮތުގައި ކޮންމެ އަހަރަކު 17.9 މިލިއަން މީހުން މަރުވެއެވެ. ހާޓް އެޓޭކާއި، ސްޓްރޯކާއި، ހާޓް ފެއިލްވުން ނުވަތަ ހިތާއި ގުޅޭ މިނޫންވެސް ބަލިތައް މެދުވެރިވިޔަ ނުދިނުމަށް ދިރިއުޅުމުގެ ވައްޓަފާޅިއަށް ބަދަލު ގެނެސް ސިއްޙީ ގޮތުން ދުޅަހެޔޮ އުޅުމަކަށް މީހާ ބަދަލުވާން ޖެހޭ ކަމަށް ސިއްޙީ މާހިރުން އަބަދުވެސް ހަނދާން ކޮށްދެއެވެ.
ދުޅަހެޔޮ ހިތެއް ހޯދާނީ ކިހިނެތް؟
1. ދުޅަހެޔޮ ހިތަކަށް އެންމެ ބޭނުންތެރި އެއް ކަމަކީ ކަސްރަތެވެ. މަދުވެގެން ހަފްތާގެ ފަސްދުވަހު ކަސްރަތަށް ހިނގާލަށް ނުވަތަ ދުވެލަން ދިއުން ކަމުގައިވިޔަސް ހިތަށް އެދެވެނީ ރަނގަޅު ކަސްރަތެކެވެ. އަދި މިފަދަ ކަސްރަތަކުން ހިތަށް ލިބޭ ފައިދާގެ އިތުރުން ނަފްސާނީ ގޮތުންނާއި ޖިސްމާނީ ގޮތުންވެސް މީހާ ތާޒާކޮށްލަދެއެވެ.
2. ދުޅަހެޔޮ ހިތެއް ހޯދަން ބޭނުންނަމަ ދެން ކުރަންވީ ކަމަކީ ދުންފަތުގެ އިސްތިއުމާލު ކުރުން ހުއްޓާލުމެވެ. ސިނގިރޭޓް ބުއިމާއި ދުރުހެލިވެ މީހާ ހެލިފެލިވެ އުޅުން ގިނަ ކުރާށެވެ. ފިޒިކަލީ އެކްޓިވްކޮށް ހުރުމަށްޓަކައި ގަވާއިދުން 30-45 މިނިޓް ކޮންމެ ދުވަހަކުވެސް ކަސްރަތު ކުރާށެވެ. އަދި ހަށިގަނޑަށް ފައިދާ ހުރި ކާނާ ކެއުމަށް އާދަކުރާށެވެ.
3. ހިތުގެ ބަލި ހުންނަ މީހެއް ނަމަ ގަވާއިދުން ބޭސް ކެއުންވެސް ވަރަށް މުހިންމެވެ. އަދި ހަކުރު ބައްޔާއި، ލޭމައްޗަށް ދިއުމާއި ކޮލެސްޓްރޯލަށް ބޭސްކާނަމަ ގަވާއިދުން ބޭސް ކެއުމަށްވެސް ސަމާލުކަންދޭން ވާނެއެވެ.
4. އަމިއްލައަށް ބޭސް ބޭނުން ނުކުރުން: ޑޮކްޓަރެއްގެ އިރުޝާދާ ނުލައި އަމިއްލައަށް ބޭސްތައް ގަނެގެން ކެއުމަކީ ރަނގަޅުކަމެއް ނޫނެވެ. ހިތުގެ ބައްޔަކަށް ފަރުވާކުރާ މީހެއް ނަމަ އެއްވެސް ބޭހެއް ބޭނުން ކުރަންވާނީ ޑޮކްޓަރަށް ދެއްކުމަށްފަހު ޑޮކްޓަރު ދެއްވާ އިރުޝާދާ އެއްގޮތަށެވެ. އެހެންނޫންނަމަ ހިތާމަވެރި ގޮތެއް މެދުވެރިވުން ވެސް އެކަށީގެންވެއެވެ. ހާއްސަކޮށް އެސްޕިރިން އާއި ސްޓެޓިން ފަދަ ބޭސްތަކީ ޑޮކްޓަރެއްގެ އިރުޝާދު ނެތި އަމިއްލައަށް ގަނެގެން ބޭނުންކޮށްގެން ވާނެ ބޭސްތަކެއް ނޫންކަން އަބަދުވެސް ހަނދާން ބަހައްޓަންވާނެއެވެ.
5. ސިއްޙަތަށް ފައިދާހުރި ކާނާ ކެއުމަކީ ދުޅަހެޔޮ ހިތެއް ހޯދަން އެދޭ ނަމަ ވަރަށް މުހިން ކަމެކެވެ. ތަރުކާރީ އާއި މޭވާ އަދި ސީރިއަލް އާއި ފައިބާ އެކުލެވޭ ބާވަތްތައް ކެއުމުގައި ހިމަނަށް ވާނެއެވެ. އަދި ލޮނު ކާ މިންވަރު މަދު ކޮށްލާށެވެ. ފެޓްސްގެ ބައި އެކުލެވޭ ބާވަތްތަކާއި ދުރުވެލަންވެސް ޖެހޭނެއެވެ. އޭގެތެރޭގައި ގިނަ އަދަދަކަށް ސެޗުރޭޓެޑް ފެޓްސް އެކުލެވޭ ރަތްކުލަ ގަދަ އެއްގަމު މަސް، ޓްރާންސް ފެޓް އެކުލެވޭ ތެލުލާފައި ހުންނަ ފާސްޓް ފުޑް، ކާށިތެލާއި ކިރު ހިމެނޭ ބާވަތްތައް، ބޭކަރީގައި ތައްޔާރުކުރާ ތަކެތި، ޕެކެޓްތަކުގައި ބަނދުކޮށްފައި ހުންނަ ތައްޔާރީ ކާނާ އާއި މާޖިރިން ފަދަ ތަކެތި ހިމެނެއެވެ.
6. ހިތުގެ ދުޅަހެޔޮކަމަށް ސައިކޮލޮޖިކަލް ސްޓްރެސް ހުރަސް އަޅައެވެ. ވަޒީފާ އަދާކުރާ މާހައުލުންނާއި ގޭތެރެއިން ކުރިމަތިވާ ސައިކޮލޮޖިކަލް ސްޓްރެސް ފިލުވާލުމަށް ޔޯގާ ފަދަ ކަސްރަތެއް ކުރެވިދާނެއެވެ. ނުވަތަ ވަޒީފާގެ މާހައުލު ބަދަލުކޮށްލެވިދާނެއެވެ. އެހެން ވަޒީފާއެއް ހޯދުމާއި ކައުސިލިން ހޯދުން ފަދަ ހައްލެއްވެސް ހޯދިދާނެއެވެ.
ފަރުވާ ކުޑަނުކޮށް މި ކަންތައްތަކަށް ސަމާލުކަންދޭ ފަރާތްތަކަށް ދުޅަހެޔޮ ހިތެއް ހޯދިދާނެއެވެ. އަދި ހިތުގެ ބަލިތަކުން ރައްކާތެރިވެ ތިބުމަށް މި ކަންތައްތައް އެހީވެދޭނެއެވެ.
މަޢުލޫމާތު: އެކްސްޕްރެސް، ޑަބްލިއުއެޗްއޯ
