ދުނިޔޭގެ އެކި ކަންކޮޅުތަކުގައި ލޭ އޮހޮރުވުމާއި، ބައިބައިވުމާއި، ދެކޮޅުވެރި ޢަމަލުތައް އަބަދުވެސް ދަނީ ހިނގަމުންނެވެ. އޭގެތެރޭގައި ސިޔާސީ ފިތުނަތަކާއި، މަޤާމާއި، ނުފޫޒާއި، ޖާހަށްޓަކައި، ހަނގުރާމަ ކުރުމާއި، އެއްބަޔަކު އަނެއް ބައެއްގެ މައްޗަށް ގަދަވެގަތުމަށް މަސައްކަތްކުރުން ހިމެނެއެވެ. މިފަދަ ފިތުނަވެރި ކަމެއްގެތެރެއަށް ދުނިޔެ ވަންނަ ކޮންމެ ދުވަސްވަރެއްގައި އަޅުގަނޑުމެން ފަދަ ޖަޒީރާ ޤައުމުތަކަށް މިކަންކަމުގެ އަސަރު ފޯރިޔަ ނުދީވޭތޯ ގަދައަޅައި މަސައްކަތް ކުރަންވާނެއެވެ.
"އަޅުގަނޑުމެންގެ އެކުވެރިކަމުގެ ކިއްލާގައި ރެނދުލައި، ފުނޑުފުނޑުވެ ނޭނގިތިއްބައި އިސާހިތަކު ޤައުމުގެ އެއްބައިވަންތަކަމާއި، ކުރިއެރުމާއި، އިޤްތިސާދު ހަލާކުވެދާނެ. ފިތުނައިގެ ތޫފާނެއްގެ ތެރެއަށް ވަނުމަކީ ކުރަން ހެޔޮވާވަރުގެ ކަމެއް ނޫން."
ޤައުމު ބައިބައިވެއްޖެނަމަ، ދެން އަލުން ކުރީގެ ހާލަތަށް އެނބުރި ދިއުމީ އުނދަގޫ ކަމަކަށް ނޫނީ ނުވާނެ ކަމަށާއި، ލީބިޔާ އާއި، އިރާޤާއި، އަފްޤާނިސްތާނާއި، ސީރިޔާ އާއި ސޯމާލިޔާ ފަދަ ޤައުމުތަކަކީ އަޅުގަނޑުމެން ފަދަ ޤައުމުތަކަށް ހުރި ދިރިހުރި މިސާލުތަކެކެވެ.
" އެޤައުމުތަކުގެ ކަންތައްތައް އެބައިމީހުން އަމިއްލައަށް ހައްލު ނުކުރުމުގެ ނަތީޖާއަކަށްވީ، އަޅުވެތިކަމުގެ ނިމުމެއް ނެތް ވޭނާއި ކެކުޅުން ތަހައްމަލުކުރަން ޖެހުން. އެއީ އަރާރުން ވުމާއި، ދެކޮޅުވެރިކަމާއި، ދެބަސްވުމާއި، ޤައުމީ ސަލާމަތާއި، އާންމު މަސްލަހަތަށްވުރެ ޒާތީ މަސްލަހަތު އިސްކުރުމާއި، އިސްލާމްދީނަށް ފުރައްސާރަކޮށް މަލާމާތްކުރުމާއި، ދީނުގެ ނަމުގައި ހައްދު ފަހަނައަޅައި ދިއުމާއި، އަނިޔާވެރިވުމާއި، ނުކިޔަމަންތެރިވުމުން އުފެދޭ ފިތުނަވެރިކަމުގެ ހިތި ނަތީޖާ."
އިސްލާހު ކުރުމުގެ ނިޔަތުގައި ނަމަވެސް، އެއްބަޔަކު އަނެއް ބައެއްގެ އަބުރާއި، ޝަރަފު ނަގާލުމާއި، ސިއްރުތައް ހާމަކުރުމަކީ އޭގެ ސަބަބުން ބިމުގައި ފަސާދަ އާންމުވެދާނެ ކަންކަމެވެ. ބިންމަތީގައި ފަސާދަ އުފެދިއްޖެނަމަ މާތް ﷲ އެބައި މީހުންނަށް އުޤޫބާތް ދެއްވައެވެ. އެއީ އެބައިމީހުން މާތް ﷲ ގެ ހަޟްރަތަށް ރުޖޫއަވޭތޯ އެވެ.
މުސްލިމުން ވާންވާނީ އަބަދުވެސް އިސްލާހަށާއި، ސުލްހަވެރިކަމަށް މަސައްކަތްކުރާ ބަޔަކަށެވެ. ޤައުމީ މަސްލަހަތު ކުރިއަށް ނެރެ ޤައުމުގެ ހަމަޖެހުމާއި، ސުލްހަ މަސަލަސްކަން ދަމަހައްޓަން މަސައްކަތްކުރާ ބަޔަކަށެވެ. އަދި އެކަކު އަނެކަކަށް ރަހުމުކުރާ އޯގާވެރި މުޖުތަމައަކަށް ވާންވާނެއެވެ.
" ކަމެއް ދިމާވާއިރަށް އަތް އިސްކުރުމާއި، ހުތުރު ބަހުރުވައިން މުޚާތަބު ކޮށް، ޒާތީވެ، ހަސަދަވެރިވުމަކީ ހިތާމަހުރި ކަމެއް. އެއް މުސްލިމަކީ އަނެއް މުސްލިމެއްގެ އަޚެއް. އޭނާގެ އަޚާ އަށް އޭނާ އަނިޔާވެރި ނުވާނެ. އަދި އޭނާ އޭނާގެ އަޚާއަށް އެހީތެރި ނުވެ ދޫކޮށެއްނުލާނެ."
ނޫސް މަޖައްލާތަކާއި ޚަބަރު ފަތުރާ ވަސީލަތްތައް މެދުވެރިކޮށް ތިމާގެ މުސްލިމު އަޚާގެ އިއްޒަތާއި، އަބުރަށް އަރައިގަންނަ މީހުންނާއި، ތިމާގެ އަޚާގެ ހުރުމަތް ކަނޑާލާ އަނިޔާވެރިވެ އުޅޭ މީހުން، މާތް ނަބިއްޔާ ދޫކުރައްވާފައި ވަޑައިގެންނެވި މަތިވެރި ވަސިއްޔަތްތަކާއި މެދު ވިސްނަންޖެހެއެވެ.
މައުލޫމާތު: މިއަދުގެ ހުކުރު ޚުތުބާ
