މުސްލިމް އަޚުންނޭވެ! ހެޔޮ ބަހަކީ ޞަދަޤާތެކެވެ. އެއީ މުޖްތަމަޢަށް އޭގެ ހެޔޮ އަސަރު ކުރާލެއް ބޮޑު ކަމުންނެވެ. ހެޔޮ ބަހަކީ ރަނގަޅު ގަހަކުން ނުކުންނަ ފައިދާހުރި މޭވާއެކެވެ. އެއީ ހިނިތުންވުން ގެނެސްދޭ ކަމެކެވެ. ހެޔޮ ބަސް ބުނެ އުޅުމަކީ ވާހަކަ ދައްކާ މީހާގެ ޝަހްސިއްޔަތު އަންގައިދޭ ކަމެކެވެ. އެއީ އޭނާގެ ފޭރާމެވެ. އެއީ މީސްތަކުންގެ ހިތްތައް ހުޅުވައިދޭ ތަޅުދަނޑިއެވެ. އެއީ މާތް ﷲ ގެ ޙަޟްރަތަށް އޭނާގެ މެސެޖްތައް ގެންގޮސްދޭ ސަފީރެވެ. ހެޔޮ ބަހެއް މެނުވީ މާތް ﷲ ގެ ޙަޟްރަތަށް ނުފޯރާނެއެވެ.
" ހެޔޮ ބަހެއް ބުނުމަކީ ބޮޑު ހޭދައެއް ކުރަންޖެހޭ ކަމެއް ނޫން. އޭގައި ހިމެނޭނީ އެ ބަސް ބުނާ މީހާ އަށާއި އަޑު އަހާ މީހާ އަށް މަންފާ އާއި ލާބައެވެ. އެ ބަހުގައި ފުރައްސާރަ ކުރުމެއް، ނެތިމޮށުމެއް، ހުތުރު އެއްޗެހި ކިޔުމެއް ނުހިމެނޭނެ. ހެޔޮ ބަހަކީ މާތް ﷲ ހަނދުމަކުރުމާއި ތަހްލީލާއި ތަޙްމީދާއި ތަސްބީޙަ ކިޔުން. އެއީ ފައިދާކުރަނިވި ޢިލްމެއް ފެތުރުމާއި ހެޔޮކަންތަކަށް އަމުރުކުރުމާއި މުންކަރާތްތައް ނަހީކުރުން."
އަދި އެއީ މީސްތަކުންނަށް ނަސޭހަތް ދިނުމާއި ސީދާ މަގަށް މަގު ދެއްކުމެވެ. ހެޔޮ ބަހަކީ ހެޔޮ ގަހެއް ފަދަ އެއްޗެކެވެ. އެ ގަހުގެ ހިޔާ ބޮޑެވެ. އެ ގަހުގެ މަންޒަރު ރީއްޗެވެ. އެ ގަހުގެ ވަސް މީރެވެ. އެ ގަހުގެ މޭވާ ފޮންޏެވެ. އެ ގަހުގެ ފައިދާ ގިނަގުނަ އެވެ. އެ ގަހުގެ މޭވާ ދުވަހަކު ވެސް ހުހެއްނުވެއެވެ.
" މިފަދަ ގަސް ހެދުމަށް ރަނގަޅު ބިމަކަށް ބޭނުންވޭ. މި ރަނގަޅު ބިމަކީ މާތް ﷲ އަށް އަޅުކަން ކުރާ ޞާލިޙު މުއުމިނާގެ ނަފްސު. އެފަދަ ނަފްސެއްގެ ވެރިއަކަށް ވެވޭނީ މާތް ﷲ ގެ ޚަލްޤުތަކުންނާ އެކު ރީތިގޮތުގައި މުޢާމަލާތް ކުރާ މީހަކަށް. އަޅުގަނޑުމެންގެ ދަރިން މިފަދަ ނަފްސުތަކުގެ ވެރިބަޔަކަށް ހެދޭނީ ޢާއިލީ ރަނގަޅު ތަރުބިއްޔަތާއި، ރީތި ނަމޫނާ އާއި، މަދްރަސީ ރަނގަޅު ތަރްބިއްޔަތާއި ޞާލިޙު ރަނގަޅު ވެއްޓެއް ހޯދައިދީގެން."
މުސްލިމް އަޚުންނޭވެ! ނުބައި ބަސްތަކުގައި ހަރުދަނާ ކަމެއް ނުހުންނާނެއެވެ. އޭގެ ސަބަބުން މީސްތަކުންގެ މެދުގައި ފިތުނަފަސާދަ އުފެދޭނެއެވެ. އެފަދަ ބަސްތަކުގެ ސަބަބުން މީހުންނަށް މަގު އޮޅޭނެއެވެ. އެކަކު އަނެކަކާ ޖެހި މޫނުކެނޑޭނެ އެވެ.
ހެޔޮބަހުން އެ ބަޔަކާ މުޢާމަލާތު ކުރުން ވާޖިބު މީހުންގެ ތެރޭގައި މައިންބަފައިންވެއެވެ. އެމީހުންނާ މުޚާޠަބު ކުރާއިރު ބަސްމަގު ރީތިވާން ޖެހޭނެއެވެ. ހަމަ އެފަދައިން ދެމަފިރިންވެސް އެކަކު އަނެކަކާ މުޢާމަލާތް ކުރަންޖެހޭނީ ރީތި ބަހުންނެވެ. އެކަކު އަނެކަކު ހިތުގައި ޖައްސައި ދެމީހުންގެ ދެމެދުގައި އޮންނަންޖެހޭ ލޯތްބާއި ކުލުނު ނެތިދާ ގޮތަށް ބަސް ބުނެ އުޅެގެންނެއް ނުވާނެއެވެ. މިއީ މާތް ﷲ ކާވެނީގައި ލެއްވި މާތް މަޤްސަދު ގެއްލި ދެމަފިރިން ހަތުރުންނަށްވެ ވަރިފަށަށް އަރައިފާނެ ކަމެކެވެ. ހުރިހާ ގިންތިއެއްގެ މީހުން ހެޔޮބަހުން ވާހަކަދެއްކުމަށް ހުކުރު ޚުތުބާގައި ވަނީ ބާރުއަޅާފައެވެ.
އިންސާނާގެ ނަފްސުގެ މައްޗަށް ވެރިވެގަނެ، އޭނާ ހެއްލެނިކުރުމަށް ޝާއިޠާނާ އަބަދުވެސް މަސައްކަތް ކުރާނެތެވެ.
މައުލޫމާތު: ހުކުރު ޚުތުބާ
