ޑރ.ޖުމެއިލަތު ބޭގަމް އަކީ ސިއްޙީ ދާއިރާގައި ފާހަގަކޮށްލެވޭ ޑޮކްޓަރެކެވެ. ވޭތުވެދިޔަ 25 އަހަރުތެރޭގައި އެތައްހާސް ބަޔަކަށް ފަރުވާދެއްވާފައިވާ ނަމޫނާ ޑޮކްޓަރެކެވެ. ފަރުވާ ހޯދަން ބޭނުންވާ ފަރާތްތަކަށް ހިތްހެޔޮކަމާއި އޯގާތެރިކަމާއިއެކު ފަރުވާ ދެއްވާ ޑޮކްޓަރެކެވެ. ސިއްޙީ ދާއިރާއިން، ޢާންމު ސިއްޙަތު ކުރިއެރުވުމާއި، ސިއްޙީ ހޭލުންތެރިކަން އިތުރުކުރުމުގެ ރޮނގުން ހިތްވަރުދިނުމުގެ ޤައުމީ އިނާމު ވަނީ ލިބިވަޑައިގެންފައެވެ.

ޑރ.ޖުމެއިލަތު ބޭގަމް

ވެރިރަށް މާލެއަށް އުފަން ޑރ.ޖުމެއިލަތު ބޭގަމް އެންމެފުރަތަމަ ތަޢުލީމު ހާސިލްކުރެއްވީ އަމީނިއްޔާ ސުކޫލުންނެވެ. އެއަށްފަހު އޮސްޓްރޭލިއާގެ ޔުނިވަރސިޓީ އޮފް ޓެސްމޭނިއާއިން އެމް.ބީ.ބީ.އެސް ހާސިލްކުރެއްވިއެވެ. ސިއްޙީ ދާއިރާގައި އެންމެ ފުރަތަމަ މަސައްކަތްކުރައްވަން ފެއްޓެވީ 1995 ފެބުރުވަރީ 27ވަނަ ދުވަހު އައި.ޖީ.އެމް.އެޗްގައެވެ. އެހޮސްޕިޓަލުގެ ޚިދުމަތުގައި 3 އަހަރެއްހާ ދުވަސް ހޭދަކުރެއްވިއިރު އޭގެތެރެއިން 6 މަސްދުވަހު ސިންގަޕޫރުގައި މަސައްކަތްކުރެއްވިއެވެ. އެއަށްފަހު އަންހެނުންގެ ބަލިތަކަށް ޚާއްސަވެވަޑައިގެންނެވީ ނޭޕާލްގެ ކަތުމަންޑޫއިންނެވެ. އަންހެނުންގެ ބަލިތަކާބެހޭ ޚާއްސަ ޑޮކްޓަރެއްގެ ގޮތުގައި 2002ވަނަ އަހަރު އައި.ޖީ.އެމް.އެޗް އާއި ގުޅިވަޑައިގެންނެވި އިރު، އެހޮސްޕިޓަލުގެ ޑިޕާޓްމަންޓް އޮފް އޮބްސްޓެޓްރިކްސް އެންޑް ގައިނަކޮލޮޖީ ހިންގެވުމުގައިވެސް ޑޮކްޓަރ ޖުމެއިލާ ވަނީ އިސްދައުރެއް އަދާކުރައްވާފައެވެ. އެއަށްފަހު 2014ވަނަ އަހަރުގެ ފެބުރުވަރީ މަހުން ފެށިގެން މަސައްކަތް ކުރައްވަމުން ގެންދެވީ މެޑިކާ ހޮސްޕިޓަލްގަ އެވެ. މިހިނގާ ޖަނަވަރީ މަހުން ފެށިގެން މަސައްކަތް ކުރައްވަމުން ގެންދަވަނީ ހުޅުމާލޭ ހޮސްޕިޓަލްގެ މެޑިކަލް ޑައިރެކްޓަރެއްގެ ގޮތުގައެވެ.

Advertisement

ހޭލުންތެރިކުރުވުމަށް ގިނަގުނަ މަސައްކަތްތަކެއް ކުރެއްވި

ދިވެހިރާއްޖޭގެ އެކި ރަށްރަށުގައި ސޮސައިޓީ ފޮރ ހެލްތް އެޑިޔުކޭޝަން(ޝީ) އިން އިންތިޒާމުުކޮށްގެން ރާއްޖޭގެ އެކި ރަށްރަށުގައި ހިންގެވި މަލްޓި ސްޕެޝަލިޓީ މެޑިކަލް ކޭމްޕްތަކުގައި ޑރ.ޖުމެއިލަތު ވަނީ ބައިވެރިވެވަޑައިގެން ބަލިމީހުން ބައްލަވާ ހޭލުންތެރި ކުރެއްވުމަށް މަސައްކަތް ކުރައްވާފައެވެ.

އަދި ކެންސަރ ސޮސައިޓީ އޮފް މޯލްޑިވްސް އުފެދުނީއްސުރެ ގެންދަވަނީ ކެންސަރ ސްކްރީނިނގް ޕްރޮގްރާމްތަކުގައި ބައިވެރިވެވަޑައިގަންނަވަމުންނެވެ.

ފާހަގަކުރެވޭ އިތުރު މަސައްކަތްތައް

ޑރ.ޖުމެއިލަތު ވަނީ ކޮންސަލްޓަންޓެއްގެ ޙައިސިއްޔަތުން މިނިސްޓްރީ އޮފް ހެލްތުގެ ކޮލިޓީ އެޝުއަރެންސް އެންޑް އިމްޕްރޫވްމަންޓް ޑިވިޛަނަށް ލަފާދެއްވާފައެވެ. އަދި 2007ވަނަ އަހަރު ފެބުރުއަރީ މަހުން ފެށިގެން 7 އަހަރެއްހާ ދުވަހު މޯލްޑިވްސް ފާމަސޫޓިކަލް ބޯޑުގެ ރައީސްގެ ޙައިސިއްޔަތުން ޚިދުމަތް ކޮށްދެއްވާފައިވެއެވެ.

މޯލްޑިވިއަން މެޑިކަލް އެންޑް ޑެންޓަލް ކައުންސިލްގެ މެންބަރެއްގެ ޙައިސިއްޔަތުން އެކައުންސިލަށް މިހާރުވެސް ގެންދަވަނީ ޚިދުމަތް ކުރައްވަމުންނެވެ. އަދި މޯލްޑިވްސް ކޮލިފިކޭޝަންސް އޮތޯރިޓީގެ ހަޔަރ އެޑިއުކޭޝަން ކައުންސިލްގެ މެންބަރުކަންވެސް ދަނީ ކުރައްވަމުންނެވެ.

ރަހިމު އަދި އުރަމަތީގެ ކެންސަރު

ރާއްޖޭގައި ރަހިމު އަދި އުރަމަތީ ކެންސަރު ޢާންމު ކަމަށް ޑޮކްޓަރު ޖުމެއިލަތު ވަަނީީ ވިދާޅުވެފައެވެ.

" އަމިއްލައަށް ބެލުމަށްފަހު ގަނޑު ހުރިއްޔާ ދެއްކުން މުހިއްމު. 40 އަހަރުން މައްޗަށް ދިއުމުން މެމޮގްރާމް ހެދުން ރަނގަޅު. އަދި 40 އަހަރު ނުވިޔަސް އުދަގޫތަކެއް ނުވަތަ ޝައްކުވާ ކަމެއް ކުރިމަތިވެއްޖެނަމަ ވީހާއަވަހަކަށް ޑޮކްޓަރަކާ މަޝްވަރާ ކުރަންވާނެ. އެއިރު ޑޮކްޓަރު ކިޔައިދޭނެ ދެން ކުރިއަށްގެންދަން ޖެހޭ ފަރުވާ " ޑރ.ޖުމެއިލަތު ވިދާޅުވިއެވެ.

ޑޮކްޓަރ ވިދާޅުވީ އޯވަރިއަން ކެންސަރގައި ޢާންމުކޮށް ޢަލާމާތްތައް އެނގޭއިރު ހުންނަނީ ބޮޑުވަރުވެފައި ކަމަށެވެ.

ނިންމުން

ސިވިލްސަރވިސް ކޮމިޝަންގެ މިހާރު ރައީސް މުުހަައްްމަަދުު ނާސިހްއާއި ކައިވެނި ބައްލަވައިގެން އުޅުއްވާ ޑރ.ޖުމެއިލަތުގެ ދެ ދަރިކަލުން ތިއްބެވި އިރު ބައްޕައަކީ ޕާކިސްތާންއަށް އުފަން، ފަހުން ސްރީލަންކާގެ ރައްޔިތެކެވެ. މަންމައަކީ ދިވެއްސެކެވެ.

ނިމިދިޔަ ޑިސެންބަރުމަހު ޤައުމީ އިނާމް ލިބިވަޑައިގެންފައިވާތީ އެކަމާގުޅޭގޮތުން ސުވާލު ދެންނެވުމުން ޑރ.ޖުމެއިލަތު ވިދާޅުވީ" އަޅުގަނޑު ވަރަށް އުފާވި. އެކަމަކު މަސައްކަތްކުރީ އިނާމެއް ހޯދުމަށް ހިތަށް އަރުވައިގެނެއްނޫން. ސިއްޙީ ދާއިރާގައި މަސައްކަތްކުރާހިތުން އަބަދުވެސް މަސައްކަތްކުރަނީ. ވަރަށްގިނަ މީހުން ލަފާދިނީމަ އިނާމަށް ކުރިމަތިލީ" މިގޮތަށެވެ.

އިތުރުވަގުތު ބައިސްކަލު ދުއްވުމުގައި ހަރަކާތްތެރިވެ ވަޑައިގަންނަވާ ޑރ.ޖުމެއިލަތު އިންޓަވިއު ނިންމަވާލައްވަމުން ޒުވާނުންނަށް ދެއްވީ "ކުރިއަށް ދާން ބޭނުންވާ ދާއިރާއަކުން ކުރިއަށް ދިއުމުގެ މަގުފަހިވެފަ އެބައޮތް. އިޚްލާސްތެރިކަމާއެކު މަސައްކަތް ކުރަންވީ ކުރިއަށްދާން" މިމެސެޖެވެ.