ކޮންމެ އަހަރެއްގެ ނޮވެމްބަރު 14 އަކީ ދުނިޔޭގެ ހަކުރުބަލީގެ ދުވަހުގެ ގޮތުގައި ފާހަގަ ކުރާ ދުވަހެވެ. މިއަހަރު ފާހަގަ ކުރާ ހަރުކުބަލީގެ ދުވަހުގެ ޝިއާރަކީ، "ބްރޭކިންގ ބެރިއާސް، ބްރިޖިންގ ގެޕްސް" އެވެ. މިއީ ޑައިބެޓިކްސް އަށް ހުށަހެޅޭ ހިރާސްތައް މަދުކޮށް ހަކުރުބަލީގެ އެންމެންނަށް އެއްހަމައެއްގައި، އެކަށީގެންވާ އަގެއްގައި އެންމެ ފެންވަރު ރަނގަޅު ފަރުވާގެ ނިޒާމު ފޯރުކޮށްދިނުމަށް ބާރު އެޅުމުގެ ގޮތުން ކަނޑައަޅާފައިވާ ޝިއާރެކެވެ.
ދުނިޔޭގެ ސިއްހަތު ޖަމްއިއްޔާއިން ހަކުރުބަލީގެ ދުވަހުގެ ގޮތުގައި ހާއްސަ ދުވަހެއް ކަނޑައެޅީ 1991 ވަނަ އަހަރެވެ. އެއީ އެ ދުވަސްވަރު ބައިނަލްއަގްވާމީ ގޮތުން ކަންބޮޑުވާ މިންވަރަކަށް ހަކުރުބަލި އިތުރުވުމާއި ގުޅިގެންނެވެ.
14 ނޮވެމްބަރު އެ ދުވަހުގެ ގޮތުގައި ފާހަގަ ކުރަން ނިންމީ 1921 ވަނަ އަހަރު ޗާލްސް ބެސްޓް އާއި އެކު އިންސިއުލިން އުފެއްދި ސަރ ފްރެޑެރިކް ބެންޓިންގެ އުފަންދުވަހަކީ 14 ނޮވެމްބަރު ކަމަށްވާތީއެވެ. އެބޭފުޅުން އިންސިއުލިން އުފެއްދެވުމާއި ގުޅިގެން އޭގެ ކުރިން ހަކުރުބައްޔަކީ ވަރަށް ނުރައްކާތެރި ބައްޔެއްކަމުގައި އޮތް އޮތުން ކޮންޓްރޯލް ކުރެވޭ ބައްޔަކަށް ބަދަލުވެ ހަކުރުބަލީގެ މީހުންގެ ފަރުވާއަށް ހެޔޮ ބަދަލެއް ގެނެވުނެވެ.
ދުނިޔޭގެ ހަކުރުބަލީގެ ދުވަސް ފާހަގަ ކުރަނީ ހަރުކުބަލިން ރައްކާތެތިވުމަށް މީހުންގެ މެދުގައި ހޭލުންތެރިކަން އިތުރުކުރުމަށެވެ. އަދި ހަކުރުބަލި ޖެހިފައިވާ މީހުންގެ އާއިލާތަކާއި ސިއްހީ ހިދުމަތްދޭ ފަރާތްތަކުގެ މެދުގައި އޮންނަ ހޭލުންތެރިކަންވެސް އިތުރު ކުރުމުގެ މަގްސަދުގައެވެ. މި ދުވަސް ފާހަގަ ކުރުމުގެ އަނެއް ބޭނުމަކީ ބަލީގެ ކުރީކޮޅު ބަލި ދެނެގަނެ އަވަހަށް ފަރުވާފެށުމުގެ މުހިންކަމާއި ހަކުރުބަލީގެ ކުރީކޮޅު ދިރިއުޅުމުގެ ވައްޓަފާޅި ބަދަލުކުރުމަށް ބާރު އެޅުމުގެ ގޮތުންނެވެ.
