ނަފްސާނީ ޢިލްމު ނުވަތަ ސައިކޮލޮޖީ
ފާއިތުވި ސަތޭކަ ފަންސާހަކަށް އަހަރު ދުނިޔޭގައި އެންމެ ކުރިއަރާފައިވާ ޢިލްމުގެ ނުވަތަ ސައެންސްގެ އެއް ރޮނގަކީ ސައިކޮލޮޖީ ނުވަތަ ނަފްސާނީ ޢިލްމެވެ. ހުޅަނގުގެ ސައިކޮލޮޖީގެ ބާނީއަކީ ޖަރުމަނުގެ ޕްރޮފެސަރެއްކަމުގައިވާ ވިލްހެލްމް ވޮންޓްއެވެ.
ސައިކޮލޮޖީގެ ލެބޯޓްރީއެއް ފުރަތަމަ ގާއިމްކުރި ސައެންސްވެރިޔަކީ ވޮންޓްއެވެ. ޒަމާނީ ސައިކޮލޮޖީ ފުޅާކޮށް ތަރައްގީކުރުމުގައި ބާނީއެއްގެ ގޮތުގައި މަޝްހޫރުވެފައިވަނީ އޮސްޓްރިއާގެ ނިއުރޮލޮޖިސްޓެއް ކަމުގައިވާ ސިގްމަންޑް ފްރޮއިޑްއެވެ. ނަފްސާނީ ބަލިމީހުންނަށް ފަރުވާއެއްގެ ގޮތުގައި ތެރަޕީ ތަޢާރުފްކުރި ސައެންސްވެރިޔަކީ ފްރޮއިޑްއެވެ.
ޒަމާނީ ސައިކޮލޮޖީން ކުރާ ކަމަކީ އަހަރެމެންގެ ފިކުރާއި އިހުސާސްތައް ދެނެގަތުމެވެ. ހަމައެގޮތަށް އަހަރެމެންގެ ހިތުގެ އެންމެ ބޮޑެތި އުދާސްތަކާއި އަހަރެމެންގެ އުޅުން ދެނެގަތުމެވެ. ކުރުކޮށް ބަޔާންކުރާނަމަ ސައިކޮލޮޖީއަކީ އަހަރެމެންގެ ނަފްސުތައް ހޯދައި ދަސްކުރުމެވެ. މިއަދު އިންސާނާގެ ނަފްސަށް ނުވަތަ އޭނާގެ ހިތަށް ބޮޑުވާ ކޮންމެ ކަމެއްގެ ހައްލަކީ ސައިކޮލޮޖީއެވެ. ސައިކޮލޮޖީ އަންގައިދޭގޮތުގައި ފަރުވާ އަންނަނީ އިންސާނާގެ ނަފްސުގެ އެތެރެއިންނެވެ. ނަތީޖާއަކީ އިންސާނާގެ ނާރެހަކަށް އިންސާނާގެ ނަފްސުވުމެވެ. އޭނާއަށް އެންމެ މުހިންމު ފަރާތަކަށް އަދި އޭނާ އެންމެ އިސްކަންދޭ ފަރާތަކަށްވެސް އޭނާގެ ނަފްސުވުމެވެ. ޚުލާސާކޮށް ބަޔާންކުރާނަމަ މުޅި ކައުނުގެ ނާރެހަކަށް އިންސާނާގެ ނަފްސުވުމެވެ. މާނަޔަކީ ތިމާޔާ ކުރިމަތިވާ ކޮންމެ ބޮޑު ކަމަކަށް ފަރުވާ ހޯދުމަށްޓަކައި ތިމާގެ ނަފްސަށް ދިއުމެވެ.
ފްރޮއިޑް އުފެއްދި ތިއަރީގެ އެއް ކުންނުއަކީ އިންސާނާ، ހަލާކުވެފައިވާ ނުވަތަ ފުނޑިފައިވާ މަޚުލޫޤެއްގެ ގޮތުގައި ވުޖޫދުވުމެވެ. އޭނާގެ ވަށައިގެންވާ އާއިލާ ޖަލަކަށްވުމެވެ. މިހާލަތުން އަރައިގަތުމަށްޓަކައި ބޭނުންވަނީ ފަރުވާއެވެ. ފަރުވާ ފެށެނީ އޭނާގެ ހިތަށް ތަދުކުރާ ކޮންމެ މީހެއްގެ ކިބައިން ނުވަތަ ކޮންމެ ކަމަކުން އޭނާ މިންޖުކޮށްގެންނެވެ. އިންސާނާގެ ހިތަށް އެންމެ ތަދުކުރާ އިހުސާސެއްގެ ގޮތުގައި ބެލެނީ ޓްރޯމާއެވެ. މިއީ އޭގައި ހިތާމައާއި ބިރު އިންތިހާއަށް ޝާމިލުވާ ތަދުވުމެކެވެ.
އަހަރެމެންނާއި ޓްރޯމާކުރިމަތިވަނީ އަނެކުންނާ އަހަރެމެންނާ ދެމެދު އޮންނަ ގުޅުމުގެ ތެރެއިންނެވެ. މިސާލަކަށް ބައްޕަ ކުރާ ކަމަކުން، މަންމަ ކުރާ ކަމަކުން، ދޮންބައްޕަ ކުރާ ކަމަކުން، ދޮންމަންމަ ކުރާ ކަމަކުން، ނުވަތަ އާއިލާގެ ކޮންމެވެސް މެންބަރަކު ކުރާ ކަމަކުން ތިމާގެ ހިތަށްވާ ތަދެވެ. ހަމައެގޮތަށް ފިރިމީހާގެ ފަރާތުން ނުވަތަ އަނބިމީހާގެ ފަރާތުން ނުވަތަ ރައްޓެހިވެގެން އުޅޭ މީހާގެ ފަރާތުން ނުވަތަ ބެލެނިވެރިޔާގެ ފަރާތުން ތިމާގެ ހިތަށްވާ ތަދެވެ. ހަމައެފަދައިން ދަރިންނާއި ދޮން ދަރިންނާއި ބޭބެއިންނާއި ދައްތައިންނާއި ކޮއްކޮއިންނާއި ރަހުމަތްތެރިންގެ ފަރާތުން ތަދު އުފަންވެއެވެ. ވެރިންގެ ފަރާތުންނާއި އެކުގައި މަސައްކަތްކުރާ މީހުންނާއި މަސައްކަތްތެރިންނާއި ފަންނުވެރިންނާއި ނޯކިރީންގެ ފަރާތުންވެސް ތަދު އުފަންކުރުވައެވެ. މިނޫން މީހުންގެ ފަރާތުންވެސް ޓްރޯމާ ކުރިމަތިވެއެވެ.
ސައިކޮލޮޖީ އުފަންވުމުގެ ކުރިން ޖަޒުބާތުގެ ގޮތުން އިންސާނާއަށް ބޮޑު ކަމެއް މެދުވެރިވުމުން ނުވަތަ އޭނާގެ ހިތަށް ތަދުވުމުން އޭނާ އެނބުރުނީ އޭނާގެ ވެރި އިލާހަށް ނުވަތަ ރައްބުއަށެވެ. މިސާލަކަށް މީހަކާ ބޮޑު ހިތާމައެއް ކުރިމަތިވުމުން އެކަމުން އަރައިގަންނަން އޭނާ ފުރަތަމަ އިޚުތިޔާރުކުރީ އޭނާގެ ދީނެވެ.
ޒަމާނީ ސޮއިކޮލޮޖީ އަންގައިދެނީ ތިމާގެ ހިތަށް ކަމެއް ބޮޑުވުމުން ފުރަތަމަވެސް ސައިކިއެޓްރިސްޓަކު ނުވަތަ ސައިކޮލޮޖިސްޓަކު ނުވަތަ ކައުންސެލަރަކު، ނުވަތަ މެންޓަލް ހެލްތްގެ މާހިރެއް އިޚުތިޔާރުކުރުމަށެވެ. އެމީހުން މަސައްކަތްކުރަނީ އިންސާނާގެ ނަފްސަށް ރުޖޫއަވެގެން ފަރުވާ ހޯދުމަށެވެ. ނަތީޖާއަކީ ނަފްސާނީ ސިއްހަތުގެ (މެންޓަލް ހެލްތްގެ) ހޮސްޕިޓަލްތަކާއި ކްލިނިކްތައް ދުނިޔޭގައި އާންމުވުމެވެ. މިރާއްޖެއަކީ މިކަމުގައި އިސްތިސްނާއެއްނޫނެވެ.
ހުޅަނގުގެ ސައިކޮލޮޖީގެ ފޯކަސްއަކީ އުފަލާއި މަޖަލުގައި ތިބުމެވެ. މިޒަމާނުގެ ބަހުރުވައިން ނަމަ ފީލް ގުޑް އެވެ. އުފަލުގައި ތިބުމަށް ހުރަސްއަޅާ ކޮންމެ ކަމަކީ އެކަމަކުން މިންޖުވާންޖެހޭ ކަމެކެވެ. ދަރިފުޅަށް މަންމަ ނަސޭހަތްދިނުމުން މަންމަވަނީ ޓޮކްސިކް މީހަކަށް ބަދަލުވެއެވެ. މިކަމުން ދަރިފުޅުގެ ހިތަށް ތަދުވެދާނެތީ ޔައުނީ ނަފްސާނީ ވެދާނެތީ ސައިކޮލޮޖިސްޓެއްގެ އެހީ ހޯދަންޖެހިދެއެވެ. ތިމާ އުފަލުގައި ހުރުމަށް ހުރަސްއަޅާ މީހާ ނާސިސްޓަކަށް ބަދަލުވާ ފަހަރު އާދެއެވެ. މިފަދަ ހާލަތުގައިވެސް ތިމާ ދުއްވައިގަންނަންޖެހެނީ ކައުންސެލަރެއް ކައިރިއަށެވެ. މިއީ އަހަރެމެންގެ އަދުގެ ހާލަތެވެ.
ޒަމާނީ ސައިކޮލިޖީއާއި ޚިލާފަށް ކީރިތި ޤުރްއާން އަންގަނީ ފަރުވާއަންނީ އިންސާނާގެ ނަފްސުގެ އެތެރެއިންނޫން ކަމަށެވެ. އެކަމަކު ފަރުވާ އަންނަނީ ﷲ ގެ ޙަޟުރަތުން ކަމަށެވެ. ޝިފާއަކީ ނަފުސުން ލިބޭ އެއްޗެއްނޫންކަމާއި ޝިފާއަކީ ﷲ ދެއްވާ އެއްޗެއްކަމަށް ކީރިތި ޤުރްއާން އަންގައެވެ. މިއިން ލިބޭ ފިލާވަޅަކީ ނަފްސާނީ ބަލިމަޑުކަން ޖެހުމުން ފުރަތަމަ އެނބުރެންޖެހެނީ ﷲ އަށް ކަމެވެ.
ޤުރްއާން އަންގަނީ މުޅިން ތަފާތު ވާހަކައެކެވެ. ހިތަށް ހަމަޖެހުން ލިބެނީ ﷲ ހަނދުމަކޮށްގެންނެވެ. އުފަލުގައި ހުރެވެނީ ނުވަތަ ފީލް ގުޑް މިކަން ހާސިލުވަނީ ﷲ ހަނދުމަކޮށްގެންނެވެ. ހިތަށް ހަމަޖެހުން ހޯދުމަށްޓަކައި ޔައުނީ އުފަލުގައި ހުރުމަށްޓަކައި ކުރަންޖެހެނީ ﷲ ހަނދުމަކުރުމެވެ. މިކަންކުރުމަށްޓަކައި އަހަރެމެންނާ އެންމެ ގުޅުން ބޮޑު ފަރާތަކަށްވާންޖެހެނީ ﷲ އެވެ. އާރާއި ބާރާއި މަގާމާއި ތަނަވަސްކަމާއި މަޝްހޫރުކަމަށްވުރެ ބޮޑަށް ތިމާ ގާތްވާންޖެހެނީ ﷲ އާއެވެ. މިކަމަށް ކީރިތި ޤުރްއާން އަހަރެމެން ހޭލައްވައެވެ.
ކީރިތި ޤުރްއާން ތަކުރާރުކޮށް އަންގަނީ ﷲ އަކީ އައްސަވާ ވޮޑިގެންވާ އިލާހުކަމެވެ. ހަމައެގޮތަށް ﷲ އަކީ ބައްލަވައި ވޮޑިގެންވާ އިލާހުކަންވެސް ތަކުރާރުކޮށް އަންގައެވެ. ﷲ އަކީ ހުރިހާ ކަމެއް ދެނެވޮޑިގެންވާ އިލާހުކަންވެސް ތަކުރާރުކޮށް އަންގައެވެ. ﷲ އަކީ ޢަޒީޒްވަންތަ ޙަކީމްވަން އިލާހުކަން ތަކުރާރުކޮށް ޤުރްއާން ބުނެދެއެވެ. އަދި ﷲ އަކީ ހުރިހައި ކަމަކަށް ކުޅަދުންވަންތަ އިލާހުކަންވެސް ބުނެދެއެވެ. މިއިން އެނގި ކަށަވަރުވާކަމަކީ އަހަރެމެންގެ ހުރިހާ ކަމެއްގެ މިލްކުވެރިކަން ޔައުނީ އަހަރެމެންގެ ފުލް ކޮންޓްރޯލް އެކަލާނގެ ޒާތުފުޅުގައިވުމެވެ.
އެޑިޓަރުގެ ނޯޓް: ކިޔަވައިދެއްވުމުގައި 30 އަހަރަށްވުރެ ގިނަ ދުވަސް ހޭދަވެފައިވާ ފަޔާޒަކީ ކީރިތި ޤުރްއާނުގައި ހިމެނޭ މުހިންމު މެސެޖުތަކާއި ގުޅޭ ލިޔުންތައް އާންމުންނާއި ހަމައަށް ގެނެސްދެއްވާ، ދީނީ މުހިންމު މައުލޫތަކަށް ލިޔުންތައް ލިޔުއްވާ ބޭފުޅެކެވެ. އަދި ފަޔާޒަކީ ވިލާ ކޮލެޖްގެ ލެކްޗަރަރއެކެވެ. ދަރިވަރުންނާއި އާންމުންނަށް ބޭނުންވާނެ މުހިންމު މައުލޫމާތުތަކެއް ހިމަނުއްވައިގެން ފަޔާޒު ވަނީ ފޮތްތައް ވެސް ލިޔުއްވާފައެވެ.
