އަޅުގަނޑުމެން ކޮންމެ މީހަކީވެސް ވިސްނާ ފިކުރުކުރާ، ފެންނަ ނުރަނގަޅު ކަންކަން ރަނގަޅުކުރުމަށް ޝައުގުވެރިވާ މީހަކަށް ވާންވެއްޖެއެވެ. މުޖުތަމައުގައި ރަނގަޅުކުރަންހުރި ކަންތައްތަކަކީ ކޮބައިތޯބަލައި އެކަންތައްތައް ރަނގަޅުކުރުމަށް އިސްނަގަންޖެހެއެވެ. އެހެންމީހުންގެ ފަރާތުން ފެންނަ ނުރަނގަޅު އާދަތައް ރީތިގޮތުގައި އެމީހަކަށް ވިސްނޭގޮތަށް ކިޔައިދީ ރަނގަޅުކުރުމަށް އެހީތެރިވާންޖެހެއެވެ. މުޖުތަމައުން ކޮންމެ ދުވަހަކު ކަހަލަ ގޮތަކަށް ފެންނަ ނޭދެވޭކަމަކަށް ބަލާލަމާ ހިނގާށެވެ. ފެންފުޅި ބޯލާފަ އެހުރި ދިމާލަކަށް އުކާލާ މީހުން މަދެއް ނޫނެވެ. ބައެއްފަހަރު ފެންފުޅިން އެއްބައި ބޯލާފަ، ނޫނީ އެއްކޮށް ހުސްކޮށްފަ ފުޅި އެހުންނަ ދިމާލަކަށް އުކާލާފަ ދަނީއެވެ. ވެރިރަށް މާލެއަށް ބަލާއިރު އާންމުން ހިތްހަމަޖައްސާލުމަށްދާ ގިނަ ސަރަހައްދުތަކުގައި ޑަސްޓްބިން ބަހައްޓާފަ ހުރެއެވެ. އެ ފުޅި ޑަސްޓްބިނަށް އެޅުމަށް މާގިނަ ވަގުތެއް ހޭދަނުވާނެއެވެ.
ކެފޭ ހިންގާ ސަރަހައްދުތަކާއި މަގުމަތީގެ އިތުރުން ގޮނޑުދޮށްތަކަށްވެސް މިގޮތަށް ފުޅިތައް އުކާލާފަ ހުންނަތަން ފެނެއެވެ. މަންޒަރުވެސް ހަޑި އެވެ. މީގެ އިތުރުން އަޅުގަނޑުމެން ހަރަދަށްވެސް ބަލަން ޖެހެއެވެ. ހިލޭ ލިބޭ އެއްވެސް އެއްޗެއް ނުހުންނާނެއެވެ. ކޮންމެ އެއްޗަކީވެސް އަގެއްދީގެން ހޯދާ އެއްޗެކެވެ. އަގު ދައްކާ މީހާ ތަފާތު ވެދާނެއެވެ. ފެންފުޅީގެ އެއްބައި ބޯލުމަށްފަހު އަނެއްބައި އިސްރާފުކުރާއިރު ވިސްނާލަމާ ހިނގާށެވެ. ސާފު ބޯފެން ނުލިބޭ އެތަކެއް ހާސް ބަޔަކު ދުނިޔޭގައި އުޅެއެވެ. ސާފުބޯފެން ނުލިބުމުގެ ސަބަބުން އެކި ވައްތަރުގެ ބަލިތައް ތަހަންމަލް ކުރަމުންދާ އެތައްބަޔަކު އުޅޭއިރު، އަދި އެ ބަލިތަކުގައި އަހަރަކު އެތައްހާސް ބަޔަކު މަރުވަމުންދާއިރު މިކަމާ ވިސްނާލަމާ ހިނގާށެވެ.
SAY NO TO PLASTIC pic.twitter.com/jzLJPwz89g
— xeetimes.com (@xeetimes) December 6, 2021
މާލޭގެ ފަޅުތެރެއިން ވެސް ގިނައަދަދެއްގެ ފުޅިތައް ފެންނައިރު، ޕްލާސްޓިކަކީ އޭގެ ޒާތުގައި ފަނާވެ ނެތިދިއުމަށް ވަރަށްގިނަ ދުވަސް ހޭދަވާ އެއްޗެކެވެ. ހުސްފުޅިތައް މިގޮތަށް މޫދަށް އުކާލާއިރު ފަހަށް ވިސްނުން މުހިންމެވެ. ކަނޑުގެ ދިރުންތަކަށް ވެސް ޕްލާސްޓިކްގެ ނޭދެވޭ އަސަރު ދަނީ ކުރަމުންނެވެ. ރާއްޖޭގެ ކަނޑުތަކުން އާންމުކޮށް ފެންނަ ވެލާ އަކީ ވެސް ޕްލާސްޓިކްގެ ޝިކާރައަކަށް ވަމުންދާއެއްޗެކެވެ.
ބްރެޒިލްގެ ސްޓޭޓެއްގެ ގޮނޑުދޮށުން މަރުވެފައިވަނިކޮށް ފެނުނު 92 ވެލާގެ ތެރެއިން 50 ވެލާގެ ބަނޑުން ޕްލާސްޓިކް ފެނިފައިވާކަމަށް ރިޕޯޓްކޮށްފައިވެއެވެ. މިއީ ޕްލާސްޓިކް މޫދަށް އުކާއިރު އޭގެ އަސަރު ކަނޑުގެ ދިރުންތަކަށް ކުރާމިންވަރު ހާމަވާކަމެކެވެ. އެހެންކަމުން ޕްލާސްޓިކްގެ ސަބަބުން ކުރާ ނޭދެވޭ އަސަރާއި މެދު އެންމެންވެސް ހޭލުންތެރިވާން އެބަޖެހެއެވެ.
އަމިއްލަ ފަރުދުންގެ އިތުރަށް ޖަމްއިއްޔާތަކުން އިސްނަގައިގެން ޕްލާސްޓިކް ފުޅިތައް ނަގާ ސާފުކުރިއަސް މިއީ މިކަމަށް އޮތް ދާއިމީ ހައްލެއް ނޫނެވެ. ފަރުދީ ޒިންމާ އަދާކުރަންޖެހެއެވެ. ޕްލާސްޓިކް ފުޅި ބޭނުންކުރުން މަދުކުރުމުގެ ގޮތުން އަމިއްލަ ބިއްލޫރި ފެންފުޅިއެއް ދަބަހުގައި ނުވަތަ ސައިކަލުގެ މަޑިދަށުގައި ގެންގުޅެވިދާނެއެވެ. ނުވަތަ ޕްލާސްޓިކް ފުޅި އުކަން ޚާއްސަ ކުރެވިފައިވާ ޑަސްޓްބިންތަކަށް އުކިދާނެއެވެ. އެއީ ޕްލާސްޓިކުން ކުރާ ނޭދެވޭ އަސަރު ކުޑަކުރުމަށް ވެދެވޭ އެހީތެރިކަމެކެވެ.
ފަހަށް ވިސްނާ އެންމެ ފުރަތަމަ އަމިއްލައަށް އިސްލާހުވަމާ ހިނގާށެވެ. އެއަށްފަހު އެހެން މީހުން އިސްލާހުކުރުމަށް އަތުކުރިއޮޅާލަމާ ހިނގާށެވެ.
