ހިޔާ ޓަވަރުތަކުގެ ތެރެއިން ރަތްކުލައިގެ ޓަވަރެއްގެ 19ވަނަ ފަންގިފިލާއަށް ދިޔައީމެވެ. ލިފްޓުގައި ދިއުމަށް ހޭދަވީ ކުޑަވަގުތުކޮޅެކެވެ. އެ އެޕާޓްމެންޓަށް ވަދެވުމުން ފެނުނީ ވަރަށް ތަފާތު މަންޒަރެކެވެ. ބަދިގެ ކައިރީގައި ކުޑަދޮރުތައް ހުރިއިރު ބަދިގޭގެ ވައަތްފަރާތުގައި ހުރީ ބެލްކަންޏެވެ. ބެލްކަނީގައި ހުރެ ބޭރުބަލާލިއިރު ފެންނަންހުރި ގުދުރަތީ މަންޒަރުތައް ވަރަށް ހިތްގައިމެވެ. ދުރުން ކުޑަރަށެއްގެ ރީތި މަންޒަރު ވެސް ފެނުނެވެ.

ހިޔާ ފުލެޓުތަކުގައި ދިރިއުޅޭ މީހުންގެ ދިރިއުޅުމަށް އައި ބަދަލުތައް:

ހިޔާ ޓަވަރެއްގައި ދެކުދިންނާއެކު ދިރިއުޅޭ ދެމަފިރިއަކު 'ޒީޓައިމްސް' އަށް މައުލޫމާތު ދެމުން ވަނީ އެމީހުންގެ ދިރިއުޅުމަށް އައި ބަދަލުތައް ހިއްސާކޮށްފައެވެ.

Advertisement

" ކުރިން ނިދަމުން އައީ ކުދިންނާއެކު އެއްކޮޓަރީގައި. އެކަމަކު މިހާރު 2 ކޮޓަރިއާއި 2 ފާޚާނާ ހުންނާތީ ކުދިން ވަކި ކޮޓަރިއެއްގައި އެބަގެންގުޅެވޭ. މިއީ ދިރިއުޅުމަށް އައި ހެޔޮބަދަލެއް. އަދި ކުދިންނަށްވެސް އަމިއްލަ ކޮޓަރިއެއްގައި އުޅުމުގެ ފުރުސަތު އެބަލިބޭ. އަމިއްލަ ނަފްސަށް އިތުބާރުކުރަން ދަސްވެ އަމިއްލަ ޒިންމާ އަމިއްލައަށް ނަގަން ކުދިންނަށް ފަސޭހައިން ދަސްކޮށްދެވޭނެ"

މީގެއިތުރުން ހިޔާ ޓަވަރެއްގައި އުޅޭ އެހެން މީހަކު ބުނިގޮތުގައި އާއިލާގެ އިތުރު މީހުންނާއެކު އެއްގެއެއްގައި ދިރިއުޅުމަށްވުރެ ވަކިން ދިރިއުޅުމުގެ ފުރުސަތު ލިބުމަކީ ލިބުނު ބޮޑު ހިތްހަމަޖެހުމެކެވެ.

" ވަކިން ދިރިއުޅެންފެށީމަ ދެމަފިރިން ބޭނުންވާގޮތަކަށް ދަރިން ތަރުބިއްޔަތުކުރެވޭނެ. އާއިލާގެ އެހެން ކުދިންނާއި މީހުންނާއެކު އުޅޭކަމަށްވާނަމަ އެއީ އެހާ ފަސޭހަކަމަކަށް ނުވެދާނެ. އަދި މި ސަރަހައްދުގައި ސްކޫލެއް ނެތުމުން ގިނަ މީހުން ކުދިން ގެންދަނީ މާލޭ ސްކޫލުތަކަށް. ވަޒީފާއަށާއި ކުދިން ގޮވައިގެން ހެނދުނު މާލެގޮއްސަ ގިނަ މީހުން މިއަންނަނީ ހަވީރު. ކުރިންދާގޮތަށް ކޮފީތަކަށް ރޭގަނޑު ބޭރަށްދާތަނެއް ނުފެނޭ. ދިރިއުޅުމުގެ ވައްޓަފާޅިއަށް މިވަނީ ހެޔޮ ބަދަލު އައިސްފަ. ކޮފީއަށް އެކުރާ ޚަރަދު މަދުވެ ދަރިންނާއި އާއިލާއަށް ވަގުތު އެބަދެވޭ"

އޭނާ އިތުރަށް ފާހަގަކުރިގޮތުގައި ރޭގަނޑު 10ގެ ފަހުން އެޓަވަރުގެ ގިނަ ފަންގިފިލާތަކުން މީހެއްގެ ހިލަމެއް ވަނީ ވަރަށް މަދު ފަހަރެއްގައެވެ. "ބައެއް ފަހަރު ހީވޭ މިއީ ރޭގަނޑު ނިދަން އަންނަތަނެކޭ ވެސް" ހީލާފައި އޭނާ އިތުރަށް ބުންޏެވެ.

ހިޔާ ޓަވަރުތައް ހުރި ސަރަހައްދުގައި އެއް ފިހާރަ ހުރުން މިއީވެސް ވިޔަފާރިކުރުމުގައި ކުރިން ގެންގުޅުނު އުސޫލުތަކަށް ބަދަލުއައި ކަމެކެވެ. މި އާއިލާތައް މާލޭގައި ދިރިއުޅުނުއިރު ކަންމަތީ ފިހާރައިން ފަސޭހައިން އެއްޗެހި ގަންނަން ލިބުނަސް މިހާރު ޖެހެނީ ހަފްތާއަކަށް ނުވަތަ އެއަށްވުރެ ގިނަދުވަހަށް ވާވަރަށް އެއްފަހަރާ ވިޔަފާރި ކުރާށެވެ. އެއީ އިރުއިރުކޮޅާ ފިހާރައަށް ދިއުމަކީ ދަތިކަމަކަށް ވާތީއެވެ. މިހެންވުމުން ވިޔަފާރިކުރުމަށް ކުރާހޭދަ ކުރިއަށްވުރެ މަދުވެ ވަގުތު ސަލާމަތްވާކަމަށް ބައެއް މީހުން ވަނީ ފާހަގަކޮށްފައެވެ.

އެޕާޓްމެންޓްތަކުގެ ފިނީޝިން ނުނިންމާ ދިނުން އެއީ ބައެއް މީހުންގެ ކަންބޮޑުވުމެކެވެ. އެހެންނަމަވެސް މިކަމާ ޚިޔާލު ތަފާތު މީހުންނާވެސް ވަނީ ދިމާވެފައެވެ.

" ސޯޝަލް ހައުސިން ވެއްޖިއްޔާ ޖަހާނީ އާދައިގެ މުށި. އަދި ބަދިގެވެސް ހުންނާނީ ވަރަށް އާދައިގެ ގޮތަކަށް. ތަށިމުށި ނުޖަހާ ބަދިގެ ކަބަޑުސެޓު ނުނިންމާ ދިނުމުން ލިބުނު ފައިދާއަކީ އަމިއްލައަށް ބޭނުންވާ ފެންވަރެއްގެ އެއްޗެހި ބޭނުންކޮށްގެން ތަން ނިންމުމުގެ ފުރުސަތު ލިބުނު"

ފުލެޓު ލިބުނު ބައެއް މީހުންގެ ޝަކުވާއަކީ ނުނިންމާ ދިންއިރު 8500 ރުފިޔާ ކުލީގެ ގޮތުގައި ނެގުމެވެ.

" އެޕާޓްމެންޓް ހަވާލުކުރުމަށްފަހު ފުރަތަމަ 6 މަސް ދުވަހަށް ކުލި ނުނަގަން ނިންމުމުން އެއީ ލިބުނު ވަރަށްބޮޑު ލުޔެއް. މާލޭގައި ކުއްޔަށްދޭ ދެކޮޓަރީގެ އެޕާޓްމެންޓްތަކާ ބަލާއިރު 8500 ރުފިޔާ އެއީ ދެކޮޓަރީގެ ތަންތަނަށް ބޮޑު އަދަދެކޭ ނުބުނެވޭނެ. އެކަމަކު އެކަނިވެރިމައިންފަދަ މީހުން އުޅޭނެ އެއަދަދު ނުދެއްކިދާނެ. އެފަދަ މީހުންނަށް ލުޔެއް ލިބެން އެބަޖެހޭ. ސަބަބަކީ އެޕާޓްމެންޓް ނިންމަން އެބަހޭދަވޭ 150،000 ވަރަކަށް ރުފިޔާ. ލޯނު ނަގައިގެން ތަން ނިންމުމަށްފަހު އެވަރުގެ ކުއްޔެއް އެންމެންނަށް ނުދެއްކިދާނެ" ޚިޔާލު ފާޅުކުރި މީހަކު ބުންޏެވެ.

އެންމެބޮޑު ހިތްހަމަޖެހުމަކީ ކައިރީގައި އޮތް ބީޗް

ހަފްތާ ބަންދު ދުވަސްތަކުގައި ހިޔާ ފުލެޓު ކައިރީގައި އޮންނަ ބީޗް ސަރަހައްދުން ފެންނަމުން ދަނީ ހިތްގައިމު މަންޒަރެކެވެ. އާއިލާތަކުގެ ކުދިބޮޑު އެންމެން ހިތްހަމަޖެއްސުމަށް އެ ބީޗަށް ދާއިރު، ބައެއް މީހުން ދިޔައީ ދަރިން ގޮވައިގެން މޫދުގައި މަޖާކުރަމުންނެވެ. މަސްބާނަން ތިބި މީހުންނާއި ބޯވާނަގަން ގޮސް ތިބި މީހުން ވެސް ވަނީ އެސަރަހައްދުން ފެނިފައެވެ. އަދި ހަވީރު ސަޔަށް އިންސާފުކުރަމުން އެއްބަޔަކު ދިޔައިރު ކުދިވެރިން ތިބީ މިނިވަންކަމާއެކު ކުޅެ މަޖާކުރުމުގައެވެ.

" އަސްލު ލިބުނު ވަރަށްބޮޑު އުފަލެއް ބީޗް މިހާ ކައިރީގައި އޮތުން. އަދި އެޕާޓްމެންޓްގެ ދޮރުތައް ހުޅުވާލީމަ މިފެންނަނީ އުޑާއި މޫދު. މާލޭގައި ލިބުނު ހިތްހަމަޖެހުމެއް ނޫން މިއީ. އަދި އެޕާޓްމެންޓްތަކަށް ގުދުރަތީ އަލިކަން އެބަލިބޭ. ދުވާލު ބޭނުމެއް ނުވޭ ބޮކީގެ އަލިކަމެއް. ކަރަންޓްގެ ޚަރަދުވެސް ކުޑަވެގެންދާނެ"

ހިޔާ ސަރަހައްދަށް އަންނަ ބަދަލުތައް

ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވަނީ ހިޔާ ސަރަހައްދުގައި ގާއިމްކުރުމަށް ހަމަޖެހިފައިވާ ތަންތަނުގެ ތަފްސީލް ހާމަކޮށްދީފައެވެ. 'ޒީޓައިމްސް' އަށް މައުލޫމާތު ދެމުން އެޗްޑީސީ އިން ބުނީ ހިޔާ ޓަވަރުތަކުގެ ކައިރީގައި ހުރި މަގުތައް ހެދުމުގެ މަސައްކަތް މިހާރު ކުރިއަށްދާ ކަމަށެވެ. އަދި އެ ސަރަހައްދުގައި ދަނީ ޕާކެއް ހެދުމުގެ މަސައްކަތްވެސް ކުރަމުންނެވެ.

" ސަލާހުއްދީން ސްކޫލުގެ ނަމުގައި މިނިސްޓްރީ އޮފް އެޑިޔުކޭޝަނުން ހިންގާ ސްކޫލެއް މިސަރަހައްދުގައި ގާއިމްކުރުމަށް ވަނީ ހަމަޖެހިފައި. މި ސްކޫލުގެ ޑިޒައިން ނިމި މަސައްކަތް ދަނީ ކުރިއަށް. ސީސީޓީވީ ރޫމް ހިމެނޭގޮތަށް މެނޭޖްމެންޓް އޮފީސްތަކެއް ހިޔާ ޓަވަރުތަކުގައި ވަނީ ގާއިމްކޮށްފައި. ކޮންމެ ޓަވަރެއްގެ ތިރީގައި ކުނި އުކުމުގެ އިންތިޒާމް ވެމްކޯއާއި ގުޅިގެން ވަނީ ހަމަޖައްސާފައި" އެޗްޑީސީ އިން ވަނީ މައުލޫމާތު ދީފައެވެ.

މީގެއިތުރުން އާންމު ފާޚާނާތަކެއް 16 ޓަވަރެއްގެ ތިރީގައި ގާއިމް ކުރުމުގެ މަސައްކަތް ދަނީ ކުރިއަށެވެ. މީގެތެރެއިން ބައެއް ފާޚާނާތަކުގެ މަސައްކަތް ނިމިފައިވާއިރު މި ފާޚާނާތަކަކީ ޓަވަރުތަކުގެ ތިރީގައި ޚިދުމަތްދޭ އެކި ތަންތަނުން ޚިދުމަތް ހޯދާމީހުން ބޭނުންކުރުމަށް ހަދާ ފާޚާނާތަކެކެވެ. އަދި ސެކިއުރިޓީ ސަބަބުތަކަށްޓަކައި ހަމައެކަނި ހުއްދައޮންނަ މީހުންނަށް ކާޑު ބޭނުންކޮށްގެން ޓަވަރުތަކަށް ވަދެވޭނެ އިންތިޒާމް ހަމަޖެއްސުމުގެ މަސައްކަތް ދަނީ ކުރިއަށެވެ.

ބައެއް ވަގުތުތަކަކީ ލިފްޓަށް ބާރުބޮޑުވެ ލިފްޓް ކައިރީގައި މީހުން ތޮއްޖެހޭ ވަގުތުތަކެއް ކަމަށްވާތީ، ތޮއްޖެހުން ކުޑަކުރުމަށް ލިފްޓްކައިރީގައި އޮންނަ ހުސްޖާގަ ބޮޑުކުރުމުގެ މަސައްކަތްވެސް ދަނީ ކުރަމުންނެވެ. ހިފާ ފުލެޓު ހުންނަ ހުޅުމާލޭ ދެވަނަ ފިޔަވަހީގައި އަމިއްލަ ފަރާތަކުން އިމާރާތްކުރި މިސްކިތެއް މިހާރުވެސް އެބަހުއްޓެވެ. އަދި އިތުރު މިސްކިތެއް އިމާރާތްކުރުމަށް ވަނީ ހަމަޖެހިފައެވެ.

ނިންމުން

ހިޔާގެ ބައެއް ޓަވަރުތަކުގެ ކުޑަދޮރު ހުޅުވާލުމުން ހިރަފުސް ވަނުމުގެ މައްސަލައަށް އަވަސް މުއްދަތެއްގެތެރޭގައި ހައްލު ލިބޭނެ ކަމަށް އެތަނުގައި ދިރިއުޅޭ މީހުން އުންމީދުކުރެއެވެ. މިގޮތުން ކައިރީގައި ހުރި ވިނަރެސް ފުލެޓުތަކުގެ މަސައްކަތްތައް އެކީގައި ނިމި ހިޔާ ސަރަހައްދުގެ މަގުތަކުގެ މަސައްކަތް ނިމުމުން ހިރަފުހާއި ވައިނުސާފުވުމުގެ މައްސަލައަށް ހައްލު ލިބޭނެކަމަށް ބެލެވެއެވެ.

ރީތި އެޕާޓްމެންޓްގެ ގޮތުގައި ހިޔާ އެޕާޓްމެންޓްތައް ފެންނަނީ އެތަނަކަށް ފިޓްވާގޮތަކަށް ފަރުނީޗަރު ތައްޔާރުކޮށްގެންނެވެ. ބާޒާރުގައި ވިއްކަން ހުންނަހާ އެއްޗެއް ގަނެގެން ނުބަހައްޓަނީ އެއިރުން ޖާގަ ކުޑަވާނެތީ ކަމަށް މި ފުލެޓުތަކުގައި އުޅޭ ބައެއް މީހުން ވަނީ ބުނެފައެވެ.

ރާއްޖޭގެ އާބާދީގެ ބޮޑުބައެއް އެއް ސަރަހައްދެއްގައި އެންމެ ގިނަ އަދަދަކަށް އުޅޭނެ ތަނަކަށް ހިޔާ ފުލެޓުތައް ވެގެންދާއިރު ދިމާވާ މައްސަލަތައް މަދުކުރެވޭނީ ތަނުގައި އުޅޭ މީހުންވެސް ހެދިފައި ހުންނަ ގަވާއިދުތަކާއި އެއްގޮތަށް އަމަލުކޮށްގެންނެވެ. އަދި ކަމާގުޅުންހުރި މުއައްސަސާތަކުން ހަރުދަނާ އުސޫލުތައް ގާއިމްކޮށް، މޮނިޓަރކޮށް ދިމާވާ މައްސަލަތަކަށް އަވަސް ހައްލު ހޯދައިދީގެންނެވެ.