ސްރީލަންކާގެ ރައީސް ގޮޓާބަޔާ ރާޖަޕަކްސަ ރާއްޖެ ވަޑައިގަތުމުން، ގިނަ އަދަދެއްގެ ދިވެހިން އަދި ލަންކާގެ ރައްޔިތުންވެސް ވަނީ ނުރުހުން ފާޅުކުރަން ފަށައިފައެވެ. ސްރީލަންކާގެ އަސްކަރީ މަތިންދާބޯޓެއްގައި ރޭ ދަންވަރުގެ ވަގުތެއްގައި ގޮޓާބަޔާ ރާއްޖެ ވަޑައިގެންފައި ވަނީ، ސްރީލަންކާގެ ރައްޔިތުންގެ ތެރެއިން އެތައް ހާސް ބަޔަކު ގޮޓާބަޔާ އާއި ދެކޮޅަށް އަޑު އުފުލަނިކޮށެވެ.
ސްރީލަންކާގެ އެއާ ފޯސް އިން ނެރުނު ބަޔާނެއްގައި ބުނެފައިވަނީ މިއީ އެގައުމުގެ ޑިފެންސް މިނިސްޓްރީގެ ހުއްދައާއެކު ކަމާގުޅުންހުރި އިދާރާތަކުގެ ހުއްދަ ލިބިގެން ކުރެއްވި ދަތުރުފުޅެއް ކަމަށެވެ. މިއަދުގެ ވަގުތެއްގައި މަގާމުން އިސްތިއުފާދެއްވާނެ ކަމަށް ބެލެވުނު ގޮޓާބަޔާ ދަތުރުފުޅު ހަމަޖައްސައިދީފައި ވަނީ ގާނޫނުއަސާސީގައި ރައީސަށް ލިބޭ ބާރުތަކުގެ ތެރެއިން ކަމަށް ސްރީލަންކާގެ އެއާފޯސް އިން އާންމުކޮށްފައިވެއެވެ.
ގޮޓާބަޔާ ދަތުރުކުރި އަސްކަރީ މަތިންދާބޯޓު ރާއްޖޭގެ އެއަރޕޯޓުގައި ޖެއްސުމުގެ ހުއްދަ ދެވުނީ ކިހިނެއްތޯ ބެލުމަށް މީޑިއާތަކުން ކުރި ސުވާލުތަކަށް ރާއްޖޭގެ ކަމާގުޅުންހުރި އެއްވެސް އިދާރާއަކުން މިހާތަނަށް ޖަވާބު ދީފައެއް ނުވެއެވެ.
ސްރީލަންކާގެ އިގްތިސާދުގެ ހާލަތު މިއިން ދުވަހަކުވެސް ނުދާ މިންވަރަށް ދަށަށް ގޮސްފައިވާއިރު ސަރުކާރާ ދެކޮޅަށް އެގައުމުގެ އެތައްހާސް ބަޔަކު ދިޔައީ މަގުތަކަށް ނުކުމެ މުޒާހަރާ ކުރަމުންނެވެ. މި ހަމަނުޖެހުންތަކުގައި ބައެއް މީހުން މަރުވެ އެތައްބަޔަކު ޒަހަމްވެފައިވެއެވެ.
މަގާމުގައި ދެން ނުހުރެވޭނެކަން ޔަގީންވުމުން ގައުމު ދޫކުރައްވާ ވަޑައިގެންނެވި ގޮޓާބަޔާ ރާއްޖެ ވަޑައިގަތުމުގެ ހުއްދަ ދެއްވުމުން އެކަމާދެކޮޅަށް އަޑު އުފުލަމުންދާ ދިވެހިންގެ އެންމެ ބޮޑު ކަންބޮޑުވުމަކީ ދެގައުމުގެ ދެމެދުގައި އޮތް ޒަމާންވީ ގުޅުމަށް މިކަމުން އަސަރުކޮށްފާނެތީ އެވެ. އަދި އޭގެ އަސަރު ސްރީލަންކާގައި ދިރިއުޅޭ ދިވެހިންނަށް ކޮށްފާނެ ކަމުގެ ބިރު އޮތުމުން މިއީވެސް ދިވެހިންގެ ކަންބޮޑުވުމެކެވެ. ސްރީލަންކާ އަކީ ގިނަ އަދަދެއްގެ ދިވެހިން ދިރިއުޅޭ އަދި އެކި ބޭނުންތަކަށް ދަތުރުކުރާ ގައުމެކެވެ.
ތިރީގައި މިވަނީ ސްރީލަންކާގައި ކުރަމުންދާ މުޒާހަރާގެ ވީޑިއޯއެއް:
#BREAKING कोलंबो में श्रीलंकाई प्रधानमंत्री आवास में घुसने के लिए दीवार फांद रहे प्रदर्शनकारियों को तितर-बितर करने के लिए सैन्य कर्मियों ने आंसू गैस के गोले छोड़े।#SriLankaEconomicCrisis pic.twitter.com/EM4AULb6n6
— News Nation (@NewsNationTV) July 13, 2022
ސްރީލަންކާގެ ރައީސް، ރާއްޖެ ވަޑައިގެންފައިވާތީ އެގައުމުގައި ދަނީ ރާއްޖެއާމެދު ނުރުހުން ފާޅުކޮށް މުޒާހަރާ ކުރަމުންނެވެ. ގޮޓާބަޔާ ރާއްޖެ ވަޑައިގަތުމަށް އެންމެ ބޮޑު އެހީތެރިކަމެއް ފޯރުކޮށްދިނީ ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަމަށް މީޑިއާތަކުގައި ދަނީ ރިޕޯޓް ކުރަމުންނެވެ. އަދި ގޮޓާބަޔާ އަށް މަރުހަބާ ދެންނެވުމަށް ރައީސް ނަޝީދު އެއާޕޯޓަށް ވަޑައިގެންނެވި ކަމަށް ބުނާ ވީޑިއޯތައް ވެސް ސޯޝަލް މީޑިއާގައި ދަނީ ދައުރުވަމުންނެވެ.
ސްރީލަންކާގެ ރައްޔިތުން ކުރަމުންދާ މުޒާހަރާތަކާ ގުޅިގެން ބޮޑުވަޒީރު މަހިންދަ ރާޖަޕަކްސަ އަދި އެއާއިލާގެ އެހެން ބޭފުޅުން ވެސް ވަނީ ވަޒީރުކަމުން އިސްތިއުފާ ދެއްވާފައެވެ. ގޮޓާބަޔާ ރައީސް ކަމުގެ މަގާމުން އިސްތިއުފާދެއްވާނެ ކަމަށް އިއުލާނުކުރެއްވީ މިދިޔަ ހޮނިހިރު ދުވަހު އެގައުމުގެ އެތައް ހާސް ރައްޔިތުން ރިޔާސީ ގަނޑުވަރު ސަރަހައްދަށް ޖަމާވެ ހިންގި ހަމަނުޖެހުންތަކަށް ފަހުގައެވެ. އެއިރު ގޮޓާބަޔާ ހުންނެވީ ގަނޑުވަރު ދޫކުރައްވާ ރައްކާތެރި ތަނަކަށް ވަޑައިގެންފައެވެ.
