ލޯތްބަކީ ބުނެދޭން ނޭގޭ ފަދަ އިހުސާސެކެވެ. ލޯބީގައި ތަފާތު ވައްތަރުތައް ހުރެއެވެ. ރަދީފުގައި ވާގޮތުން ދޮންފުތު ލޯތްބާއި، ތަނުލޯބި ވެސް އޭގެތެރޭގައި ހިމެނެއެވެ. ދޮންފުތު ލޯތްބަކީ ދަރިންދެކެވާ ކަނު ލޯތްބެވެ. އަދި ތަނު ލޯތްބަކީ މީހަކު ތަނެއްގައި އުޅޭތާ ގިނަ ދުވަސްވެގެން އޭނާގެ ހިތުގައި އެތަނަކަށް ޖެހޭ ކުލުނެވެ.
ލޯތްބަކީ ކަނު އެއްޗެއް ކަމަށް ވަރަށް ގިނަ މީހުން ބުނާ އަޑު އިވެއެވެ. ކަނު އެއްޗަކަށް ލޯބިވަނީ ކީއްވެހެއްޔެވެ؟ ކަނު އެއްޗެކޭ އެބުނެވެނީ ލޯބިވުމަށްފަހު ލޯބިވާ މީހަކު ބުނާހާވާހަކައެއް ތެދުދޮގު ބެލުމެއް ނެތި ގަބޫލުކުރާތީއެވެ. ހަނދު ދައްކާފައި އެއީ އިރޭ ބުނުމުންވެސް ވާ ލޯތްބެއްގެ ސަބަބުން ގަބޫލުކުރާ މީހުން އުޅެއެވެ.
ސިޔާސީ މަސްރަހަށް ބަލާލުމުންވެސް ފެންނަނީ ތިމާ ތާއީދުކުރާ މީހަކު ކިތަންމެ ބޮޑު ދޮގެއް ހެދިއަސް އެއީ ދޮގުކަމަށް ގަބޫލުނުކޮށް އެމީހެއްގެ ވާހަކަ ދިފާއުކުރާތަނެވެ. ތާއީދުކުރާ މީހަކު ދެކެ ލޯބިވިއަސް މިއީ ފުކެއް ބޮޑުވަރެވެ.
ވަކިވަކި ފަރުދުންނަށް ބަލާއިރު މިފެންނަނީ މާވަރުގަދަ އިޝްގީ ލޯތްބެއްގެ ކަނޑުގައި ޣަރަގުވެގެންދާ މަންޒަރެވެ. ބައިވެރިޔާ ކޮންމެ ފަދަ ކަމެއް ކުރިއަސް އެއީ ކުށެއްކަމަށް ގަބޫލުނުކޮށް ބައިވެރިޔާގެ ހިމާޔަތުގައި އުޅޭ މަންޒަރެވެ. ލޯބިވިއަސް ކުށެއް ކޮށްފިނަމަ އެކަމަކަށް ނޫނެކޭ ބުނެވެންވާނެއެވެ. އަދި ލޯބިވާންވާނީ ވަކި ހައްދެއްގެތެރޭގައެވެ.
މައިންބަފައިން ވެސް ދެކޭނެ އެންމެބޮޑު އެއް ހުވަފެނަކީ ދަރިން ބޮޑުވެ ހަޔާތުގެ ރަނގަޅު ބައިވެރިއެއް ހޯދާ ކައިވެނިކޮށްގެން ހިތްހަމަޖެހޭ ދިރިއުޅުމެއް އުޅޭނެ ދުވަހެކެވެ. ކައިވެނީގެ ކުރިން އަދި ކައިވެނީގެ ފަހުންވެސް ބައެއް މީހުންގެ ފަރާތުން މިފެންނަނީ ބޭރުފުށުން ލޯބިވެގެން އުޅޭ މަންޒަރެވެ. ހިތުގެ ފުންމިނުން ލޯބިވާނަމަ ތިމާ ލޯބިވާ މީހަކު ދޫކޮށް އެހާ ފަސޭހައިން ނުދާނެތާއެވެ. ވެވޭ ކަނު ލޯތްބެއްގެ ހަގީގަތް މިއެނގެނީ ކައިވެންޏަށް ކުދިން ލިބި ވަރިއާހަމައަށް ދާފަހުންނެވެ.
ލޯބިވާއިރު، މީހާގެ ތަނަވަސްކަމާއި، ލިބިފައިވާ މަގާމާއި، ބޭރުފުށުގެ ރީތިކަމަށް ބަލައިގެން ވާނެ ފައިދާއެއް އަބަދަކު ނޯންނާނެއެވެ. އެއީ ވަގުތީ އުފަލަކަށް ވެދާނެއެވެ. ދާއިމީ އުފަލަކީ ރަނގަޅު އަޚްލާގަށް ބަލައިގެން ވެވޭ ލޯތްބެވެ.
ލޯބިވާއިރު ކަނު ލޯބި ނުވެވޭތޯ މަސައްކަތްކުރާށެވެ. ތެދުވެރި ލޯތްބެއް ވެވުމުން އޭގެ ހިތްހަމަޖެހުން މާބޮޑުވާނެއެވެ.
