ވައިގެ އުދަގޫބޮޑުވެ ހޮޑުލެވި ވަރުބަލިކުރުމަކީ ވަރަށް ގިނަ މީހުންނަށް ދިމާވާކަމެކެވެ. ވައިގެ އުދަގޫވާނަމަ ދަވިއްގަނދު މިއީ ފަސޭހައިން ބޭނުންކުރެވިދާނެ އެއްޗެކެވެ. ދަވިއްގަނދު އަވިން ހިއްކުމަށްފަހު ސައިސަމުސަލެއްހާ މިންވަރު ހަފާލައިގެން ކާށެވެ. މިގޮތަށް ހަފައިގެން ނުކެވޭނަމަ ތާފެނާފެންތައްޓަކަށް ސައިސަމުސަލެއްގެ ދަވިއްގަނދު އެޅުމަށްފަހު ބޯލާށެވެ.
ގަވާއިދުން ކެއުމުގައި ދަވިއްގަނދު ބޭނުންކުރާނަމަ ހަށިގަނޑުގައި ވައިހެދުމުގެ ފުރުސަތު ކުޑަވެއެވެ. ތިރީގައި މިވަނީ ކެއުމުގައި ދަވިއްގަނދު ބޭނުންކުރެވިދާނެ ގޮތްތަކެކެވެ.
- ސެލަޑް
ތަވައަކަށް ދަވިއްގަނދު އެޅުމަށްފަހު މަޑުގިނީގައި ޓޯސްޓްކޮށްލާށެވެ. އެއަށްފަހު ފިނިކުރަން ބަހައްޓާށެވެ. ރަނގަޅަށް ފިނިވުމުން ދަވިއްގަނދު ހިމުންކޮށްލާށެވެ. ޒައިތޫނިތެޔޮ، ލުނބޯޖޫސް، މަޑުކޮށްފަހުރި އަލުވި، މަސްދަޅުމަސް، ލޮނު އަދި މިރުސް އާއެކު ހިމުންކުރި ދަވިއްގަނދު އަޅައިގެން މޮޑެލުމަށްފަހު ކެއުމުގައި ބޭނުންކުރެވިދާނެއެވެ.
- ޕާން
ދަވިއްގަނދު ހިމުންކުރުމަށްފަހު އެ ބޭނުންކޮށްގެން ޕާންވެސް ތައްޔާރުކުރެވިދާނެއެވެ. އާންމުކޮށް ޕާން ތައްޔާރުކުރާއިރު އަޅާ ފުށާއި، އީސްޓް، ލޮނު އަދި ތެލުގެ އިތުރަށް ހިމުންކުރި ދަވިއްގަނދުކޮޅެއް އެޅުމުން ރަހަ މީރުވާނެއެވެ.
- ސޫޕް
ދަވިއްގަނދަކީ ދިވެހިން ރިހަ ކެއްކުމުގައިވެސް ބޭނުންކުރާ ބާވަތެކެވެ. މީގެއިތުރުން ތަފާތު ވައްތަރުގެ ސޫޕް ތައްޔާރުކުރާއިރު ވެސް ދަވިއްގަނދު ބޭނުންކުރެވިދާނެއެވެ.
ވިސްނަންވީ ކަންތައްތައް
ކޮންމެ ބާވަތެއްވެސް ބޭނުންކުރަންވާނީ ދުވާލަކު ވަކި މިންވަރަކަށެވެ. މިގޮތުން ދަވިއްގަނދުވެސް ބޭނުންކުރަންވާނީ ގިނަވެގެން ދުވާލަކު 1 ސައިސަމުސާ ކަމަށް ތަފާތު ލިޔުންތަކުގައި ފާހަގަކޮށްފައިވެއެވެ. ދަވިއްގަނދަކީ މިނަރަލްސް، ފައިބަރ ފަދަ މާއްދާތައް ހިމެނޭ ބާވަތެކެވެ.
މައުލޫމާތު: ފާމަސީ.އިން/ ޔޫޓިއުބް
