ސްކޫލު ދައުރު ނިންމުމަށްފަހު ކުރާނެ މަސައްކަތެއް ނެތިގެން ނުވަތަ ތައުލީމު ހާސިލުކުރާނެ ދާއިރާއެއް ނުނިންމިގެން އުޅޭ ޒުވާނުންވެސް ފެނެއެވެ. 16 އަހަރާއި 18 އަހަރާއި ދެމެދު ސްކޫލުގެ ތައުލީމް ނިމުމަކަށް އަންނައިރު ހަރުދަނާ ޒުވާނަކަށް ވުމަށް ކުރެވިދާނެ ކަންތައްތަކެއް މިރިޕޯޓްގައި ހިމަނާލާނަމެވެ.
އުނގެނުމަށް އިސްކަންދިނުން
ދިރިއުޅުމުގެ ވަގުތު އަގުހުރި ގޮތަކަށް ހޭދަކުރުމަކީ މުހިންމުކަމެކެވެ. މަތީސާނަވީ އިމްތިހާނުތަކުގެ ނަތީޖާ ލިބެންދެން އެހޭދަވާ މުއްދަތުގައި ތަފާތު ދާއިރާތަކުން ކުރު ތަމްރީންތައް ފުރިހަމަކުރުމަށް ވެސް އިސްކަންދެވިދާނެއެވެ. އެއީ ދިރިއުޅުމުގައި ކޮންމެ ހާލަތެއް ކުރިމަތިވިއަސް ތިމާއަށް ތަފާތު މަސައްކަތްތައް ކޮށްގެން ދިރިއުޅެވިދާނެ ގޮތެކެވެ.
ވިސްނާފަ ކުރިއަށް ދާނެ ދާއިރާ ނިންމުމަށްފަހު އެދާއިރާއަކުން މަތީ ތަޢުލީމް ހާސިލުކުރާށެވެ. ޕާޓްޓައިމް ވަޒީފާއެއް ނުވަތަ ހިތްވަރު ހުރިއްޔާ ފުލްޓައިމް ވަޒީފާއެއް އަދާކޮށްގެންވެސް ތަޢުލީމް ހާސިލުކުރެވިދާނެއެވެ. ގިނަ ފަހަރަށް ވަޒީފާ އަދާކުރަމުން ތަޢުލީމު އުނގެނެން ފަސޭހަވެސް މެއެވެ. އެއީ ލިބިފަހުރި ތަޖުރިބާގެ ބޭނުން ކިޔެވުމުގައި ކުރެވޭތީއެވެ.
ތަޢުލީމް ހާސިލުކުރާއިރު ލިބޭ ނަތީޖާ ދުވަހެއް ދުވަހަކަށް ރަނގަޅު ކުރުމަށް މަސައްކަތްކުރެވިދާނެއެވެ. ދިމާވާ ހާލަތެއްގެ ސަބަބުން ދަށްނަތީޖާއެއް ލިބުނަސް ހިތްވަރާއެކު މަސައްކަތްކުރާށެވެ.
ކުރަން ބޭނުންވާ ކަންތައްތައް ހާމަނުކޮށް އެކަމެއް ކުރުން
ތިމާ ކުރިއަށްދާން ބޭނުންވަނީ ވަކި ދާއިރާއަކުން ކަމަށް ބުނެ އެކަމުގެ ވާހަކަތައް އަބަދު ދެއްކުމުގެ ބަދަލުގައި އެކަމެއް އަމަލީގޮތުން ކުރާށެވެ. އެއީ އަމަލީ ގޮތުން އެކަމެއް ކުރުމުން އެލިބޭ ހިތްހަމަޖެހުން ބޮޑުވާނެތީއެވެ. އަދި ކުރަން ބޭނުންވާ ކަންތައްތައް ހާމަކުރުމުން ބައެއްފަހަރަށް އެކަމެއް ނުކުރެވުމުން އެލިބޭ ދެރައާއި ފާޑުކިޔުންތަކުން ސަލާމަތްވުމަށެވެ.
ކަމެއް ގޯސްކޮށް ކުރެވިދާނެކަމުގެ ބިރަށް ތަޖުރިބާނުކޮށް ނުހުރުން
ޒުވާން އުމުރުގައި އަމިއްލަ މަސައްކަތެއް ފަށާއިރު ގިނަފަހަރަށް އެމަސައްކަތެއް ފަށާނީ ލޯނުގެ އެހީގައި ނުވަތަ އާއިލާގެ މެންބަރުންގެ އެހީގައި ލިބޭ ފައިސާއިންނެވެ. އެމަސައްކަތަށް ބޭނުންވާ ފައިސާ އަމިއްލައަށް ނުހޯދިދާނެއެވެ. އަދި ކުރާ ކޮންމެ މަސައްކަތެއް ކާމިޔާބުވެސް ނުވެދާނެއެވެ. އެކަމަކު ކުރަން ބޭނުންވާކަމެއް ކުރުމަށް ހިތްވަރާއެކު މަސައްކަތްކުރާށެވެ. ތަޖުރިބާކުރާށެވެ. ކަންކަމުގައި ކުރި ހޯދޭނީ އަމަލީގޮތުން އެކަމެއް ތަޖުރިބާކޮށްގެންނެވެ.
އިސްލާމީ ތަރުބިއްޔަތުގައި ފައިތިލަ ސާބިތުކުރުން
އިސްލާމީ ރިވެތި ތަރުބިއްޔަތުގައި ދެމިހުރުމަށް މަސައްކަތް ކުރާށެވެ. ފުރިހަމަ މުސްލިމެއްގެ ގޮތުގައި ވުމަށް ގަދައަޅައި މަސައްކަތް ކުރާށެވެ.
