1- މާގިނައިން ތައްޔާރީކާނާ ކެއުން
ކެނެޑާގެ 19363 މީހުން ބައިވެރިކޮށްގެން 2019 ވަނަ އަހަރު ކުރި ދިރާސާއަކުން ދައްކާގޮތުގައި ކެއުމުގައި ތައްޔާރީ ކާނާ ގިނައިން ބޭނުންކުރި މީހުން ފަލަވުމުގެ ފުރުސަތު 32 އިންސައްތަ އިތުރުވެފައިވެއެވެ.
މައިކްރޯވޭވް ކޮށްގެން ވަގުތުން ކާލެވޭ ގޮތަށް ތައްޔާރުކޮށްފަ ހުންނަ ހަކުރު ގިނަ، ސަރުބީހުންނަ ތައްޔާރީކާނާގެ ސަބަބުން ސިއްހަތަށް އޭގެ ނޭދެވޭ އަސަރު ކުރެއެވެ.
2- މާގިނައިން ކެއުމުގައި ހަކުރު ބޭނުންކުރުން
ހަކުރު ގިނަ ބާވަތްތައް ކަމުގައިވާ ކޭކް، ސްޕޯޓްސް ޑްރިންކްސް، އައިސްކްރީމް، ފޮނިކޮށްފަ ހުންނަ ކޮފީ އާއި ސައި ފަދަ ތަކެތި ގިނައިން ބޭނުންކުރުމުން ފަލަވާން މެދުވެރިވެއެވެ.
ދިރާސާތަކުން ދައްކާގޮތުގައި ހަކުރު ގިނައިން ބޭނުންކުރުމަކީ ހަމައެކަނި ބަރުދަން އިތުރުވާ ކަމެއް ނޫނެވެ. އޭގެ ސަބަބުން ޓައިޕް 2 ހަކުރު ބައްޔާއި، ދިގު މުއްދަތަކަށް ސިއްހަތަށް ގެއްލުންވެއެވެ.
އެމެރިކާގައި 242،353 ކުޑަކުދިންނާއި ބޮޑެތިމީހުން ބައިވެރިކޮށްގެން ހެދި 30 ދިރާސާއިން ދައްކާގޮތުގައި ފޮނި ބުއިންތައް ބޭނުންކުރުމުން ބަރުދަން އިތުރުވެ ފަލަވުމަށް މެދުވެރިވެއެވެ. އެހެންވުމުން ދުވާލެއްގެ މައްޗަށް ބޭނުންކުރާ ހަކުރުގެ މިންވަރު މަދުކޮށްފިނަމަ މީހާގެ ބަރުދަން ލުއިވުމަށް އެހީވެއެވެ.
3- ގިނައިރު އިށީނދެގެން އިންނަނަމަ ފަލަވޭ
ބައެއްކަހަލަ ވަޒީފާތަކަކީ ގިނައިރު އިށީނދެގެން އިނދެ އަދާކުރާ ވަޒީފާ އެވެ. މިސާލަކަށް ގިނައިރު މޭޒުކައިރީގައި އިށީންނަންޖެހުން، ކާރުދުއްވުން، ޓީވީ ބަލަން ގިނައިރު އިށީނުމުން މީހާ ހެލިފެލިވެ އުޅުން މަދުވާގޮތް ވެއެވެ. އޭގެ ބަދަލުގައި ކަސްރަތު ކުރުމަށް ސަމާލުވެ ލިބޭ ހުސްވަގުތުގައި ހެލިފެލިވެ އުޅުމަށް އިސްކަން ދެވިދާނެއެވެ.
ރޭގަނޑު ކެއުމަށްފަހު ޓީވީ ބަލާލަން އިށީނުމުގެ ބަދަލުގައި ހިނގާލަން ދެވިދާނެއެވެ.
4- ސިއްހީ ހާލަތެއްގެ ސަބަބުން ފަލަވުމަށް މެދުވެރިވެދާނެ
ސިއްހީ މައްސަލައެއްގެ ސަބަބުންވެސް ފަލަވުމަށް މެދުވެރިވެދާނެއެވެ. މިސާލަކަށް ތައިރޮއިޑް ގްލޭންޑަށް ދިމާވާ ހާލަތެއްގެ ސަބަބުން ނުވަތަ ޕޮލިސިސްޓިކް އޯވަރީ ސިންޑްރޯމް އަދި ކޮންޓްރޯލް ކުރަން ދަތިވާ ވަރަށް މާގިނައިން ކެއުމަށް އާދަވުން ފަދަ ކަންތައްތަކަކީ ވެދާނެ ކަމެކެވެ. އެންމެ ރަނގަޅު ގޮތަކީ މިފަދަ ކަމަކަށް ޝައްކު ކުރެވޭނަމަ އަވަހަށް ޑޮކްޓަރެއްގެ ލަފާ ހޯދުމެވެ.
5- އެކަށީގެންވާ ވަރަށް ނިދި ނުލިބުން
ދުޅަހެޔޮ ދިރިއުޅުމަކަށް ނިދުމަކީ ވަރަށް މުހިންމު ކަމެކެވެ. އެކަށީގެންވާ ވަރަށް ނިދި ނުލިބޭނަމަ ބަރުދަން އިތުރުވާން މެދުވެރިވެއެވެ. ނިދުމުގެ ވަގުތު އިތުރުކުރުމަކީ ބަރުދަން ލުއިކުރުމަށް އެހީވާ ކަމެކެވެ. މިގޮތުން ރޭގަނޑު 7 ނޫނީ 8 ގަޑިއިރު ނިދުމަށް ސަމާލުކަން ދެވިދާނެއެވެ.
ނިދުމަށް އުދަގޫވާނަމަ ނިދުމުގެ ކުރިން ޓީވީ، ކޮމްޕިއުޓަރ، ފޯނު ބެލުން މަދުކޮށް ކެފެއިން އެކުލެވޭ ބުއިންތައް މަދުން ބޭނުންކުރުމަށް އިސްކަންދޭށެވެ.
ބަރުދަން އިތުރުވުމުން ހަށިގަނޑަށް އަންނަ ބަދަލުތައް:
- އަންހެނުންގެ ބަރުދަން އިތުރުވާނަމަ މައްސަރުކަންތައް ދިމާވުމުގައި ތަފާތުތަކެއް އައުން. ބައެއްފަހަރަށް ކައިރި ކައިރީގައި ނުވަތަ މައްސަރުކަންތައް ދިމާނުވެ ގިނަ ދުވަސް ހޭދަވުން
- ނޭވާލާން އުދަގޫވުން
- ބަނޑުހަރުވެ ފާޚާނާއަށް ދިއުމަށް އުދަގޫވުން
- އާދަޔާހިލާފަށް ބޮލުގައި ހުންނަ އިސްތަށި ފޭބުން
- މޫނު ދުޅަވެފައި ހުންނަކަމަށް ފާހަގަވުން
- ލޮލުގެ ފެނުމަށް ބައެއްފަހަރަށް އަސަރުކުރުން
- މާބޮޑަށް ވަރުބަލިވުން
- އަބަދު ބަނޑުހައިވެ ކާން ބޭނުންވުން
- ހުޅުހުޅުގައި ރިއްސުން
މައުލޫމާތު: ހެލްތްލައިން، ޔޫޓިއުބް، ހެލްތްގްރޭޑްސް ވެބްސައިޓް
