މިއަދަކީ އަންހެނުންގެ ދުވަހެވެ. ދިވެހި ރާއްޖޭގައިވެސް ނިންމުންތައް ނިންމާ މަރުހަލާގައި އަންހެނުން ތަމްސީލުވާ މިންވަރު ދަނީ ދުވަހެއް ދުވަހަކަށް އިތުރުވަމުންނެވެ. މީގެތެރޭގައި މިނިސްޓަރުންނާއި، މަޖިލިސް މެންބަރުންނާއި، ކައުންސިލްތަކުގެ މެންބަރުންގެ އިތުރަށް ސަރުކާރާއި އަމިއްލަ މުއައްސަސާތަކާއި ވިޔަފާރީގެ ދާއިރާގައި އިސްކޮށް މަސައްކަތްކުރާ އަންހެނުން ފާހަގަކުރެވެއެވެ.
1- އަންހެނުން ބާރުވެރިކުރުވުން
އަންހެނުން ބާރުވެރި ކުރުމަށް އަންހެނުން އިސްވެ ކުރާ މަސައްކަތްތައް އިތުރަށް ކުރިއެރުވުމަށް އެހީތެރިވެވިދާނެ އެވެ. އަދި ވިޔަފާރި ފުޅާކުރަން ބޭނުންވާ އަންހެނުންނަށް ފަސޭހައިން ލޯނު ލިބޭނެ އިންތިޒާމް ހަމަޖެހި މުޖުތަމައުގައި އިތުރަށް ކުރިއަށްދާނެ ފުރުސަތުތައް އަންހެނުންނަށް ހޯދައިދެވިދާނެއެވެ.
2- އަންހެނަކަށް ވީތީ ތަފާތު ނުކޮށް އެކަށޭނަ މުސާރައެއް ދިނުން
ދުނިޔޭގެ އިގްތިސާދުގައި އަންހެނުން މުހިންމު ރޯލެއް އަދާކުރެއެވެ. އެހެންނަމަވެސް އަންހެނަކަށް ވީތީ ވަކި މަސައްކަތެއް ނުކުރެވޭނެ ކަމަށް ދެކި ކުޑަ މުސާރައެއް ދިނުން ފަދަ ކަންތައް ބައެއް ޤައުމުތަކުގައި ހިނގައެވެ. އިންސާނީ ޤާބިލުކަން ދެމެހެއްޓުމާއި ހަރުދަނާކުރުމަށްވެސް ފިރިހެނުންނެކޭ އެއްގޮތަށް އަންހެނުންނަށްވެސް ވަޒީފާގެ މައިދާނުގައި ފުރުސަތުތައް ހޯދައިދެވިދާނެއެވެ.
3- އަންހެނުންގެ ލީޑަރޝިޕަށް ތާއީދުކޮށް އެހީތެރިވެދިނުން
ގައުމީ ފެންވަރުގައި އަދި މުޖުތަމައުގެ ފެންވަރުގައިވެސް ލީޑަރޝިޕްގައި އަންހެނުން އަދާކުރާ ދައުރަށް ތާއީދުކޮށް، ފާޑުކިޔާ އެކަހެރިކުރުމުގެ ބަދަލުގައި އިތުރަށް ރަނގަޅުކުރަން ހުރި ކަންތައްތައް ފާހަގަކޮށް ރަނގަޅުކުރުމަށް ބާރުއެޅިދާނެއެވެ. އާންމުގޮތެއްގައި ނިންމުންތައް ނިންމާއިރު އާއިލާއާއި މުޖުތަމައަށް ރަނގަޅަށް ބެލުމަށްފަހު އަންހެނުން ގޮތް ނިންމާކަން ފާހަގަކުރެވެއެވެ. އެއީ މުޖުތަމައާއި އާއިލާ އާއި ގުޅުންހުރި ގިނަ ކަންތައްތަކަކީ އަންހެނުން އެކަންތައްތަކުގައި ފުޅާކޮށް ޝާމިލުވެ އުޅޭ ކަންކަން ކަމަށް ވުމުން އެކަންކަމުގެ ފުރިހަމަ މައުލޫމާތު އަންހެނުންނަށް އެނގޭ މިންވަރު ބޮޑުވުމުގެ ފުރުސަތު އޮވެއެވެ.
އަންހެނުން ބާރުވެރި ކުރުމަށް ކުރެވިދާނެ އިތުރު ކަންތައްތައް:
- އަމިއްލަ ނަފްސަށް އިތުބާރުކޮށް އިހްތިރާމް ކުރުން
- އެކަށީގެންވާ ތަޢުލީމީ ފުރުސަތުތައް ހޯދުން
- އެހެން އަންހެނުން ކުރިއަރައި ދިއުމަށް އެހީތެރިވުން
- ނުވާނެކަމަށް ހީކޮށް ކަންކަމާއި ކުރިމަތިލާން ފަސްނުޖެހުން
- އަންހެން ދަރިންނަށް ނަމޫނާއަކަށްވުން
އަންހެނުންގެ ކުރިއެރުމަށް މަސައްކަތްކުރާ ފިރިހެނުން ފެނެއެވެ. ބޭނުންވަނީ އަންހެނަކަށް ވީތީ ތަފާތުނުކޮށް ކުރިއެރުމަށް ހިތްވަރުދޭނެ ބައެކެވެ.
