މިއަހަރުގެ ރަމަޟާން މަހާއި ދިމާކޮށް ހުވަދޫ މީޑިއާއިން އޮންލައިންކޮށް ކުރިއަށްގެންދިޔަ "މާލެ އޮޕްޓިކަލް ހުވަދޫ މަދަހަ ޗެލެންޖް 1444" މިއީ މުޅި ރާއްޖެއަށް ހުޅުވާލައިގެން ބޭއްވި މަދަހަ މުބާރާތެކެވެ.
100 އަށް ވުރެ ގިނަ ބައިވެރިން ވާދަކުރިއިރު މީގެތެރޭގައި ހިމެނެނީ ރާއްޖޭގެ އެކި ރަށްރަށުގެ ތަފާތު އުމުރުގެ މީހުންނެވެ. ގިނައީ ކުޑަކުދިންނެވެ. މި މަދަހަ މުބާރާތުގެ 1 ވަނަ އަށް ދިޔަ ފަރާތަށް އިނާމަކަށް ހުށަހަޅާފައިވަނީ 10 ހާސް ރުފިޔާގެ ފައިސާގެ އިނާމެކެވެ.
ޖަޖުންގެ 75 އިންސައްތަ މާރކްސް އާއި، ފޭސްބުކް ރިއެކްޝަންގެ 25 އިންސައްތަ އެއްކޮށްގެން އެންމެ ގިނަ ޕޮއިންޓް ލިބިގެން މިފަހަރުގެ މުބާރާތުން އެއްވަނަ ލިބުނީ ގއ. ކަނޑުހުޅުދޫ ދޯދި، އަސްނާ އަލީ އަށެވެ.
2 ވަނަ ލިބުނީ އިފާގަތު އިބްރާހީމް އަށެވެ.
3 ވަނަ ލިބުނީ މުހައްމަދު މުއާން މުރުތަލާ އަށެވެ.
ހުވަދޫ މީޑިއާގެ ސީއީއޯ މުހައްމަދު އަޚްތަރު ހާމަކުރިގޮތުގައި ހުވަދޫ މީޑިއާގެ މަޤްސަދާއި ތަސައްވުރު އޮތީ މުޅި ރާއްޖެ އަށެވެ. "މި މަދަހަ މުބާރާތަކީ ފެށުމެއް. ކުރިއަށް އޮތްތަނުގައި މިފަދަ ހަރަކާތްތައް މިއަށްވުރެ ރަނގަޅަށް ކުރިއަށްގެންދިއުމަށް ވަނީ ހަމަޖެހިފައި. އަންނަ އަހަރުގެ މުބާރާތް ކުރިއަށްގެންދާނީ އާންމުންގެ ފަރާތުން ލިބުނު ޚިޔާލުތަކަށް ބެލުމަށްފަހު ވަރަށް ބޮޑަށް ތައްޔާރުވެގެން. މިއީ ހީކުރި ވަރަށްވުރެ ބޮޑު ތަރުހީބެއް މުޅި ރާއްޖެއިން ލިބުނު މުބާރާތެއް". އަޚްތަރު ހިތްހަމަޖެހުމާއެކު ފާހަގަކުރިއެވެ.
މި މުބާރާތުގެ ފަޑިޔާރުންނަކީ ރާއްޖޭގެ މަޝްހޫރު ލަވަކިޔުންތެރިން ކަމުގައިވާ މުހައްމަދު އަބްދުލް ޣަނީ އަދި އިބްރާހިމް ޒައިދް އަލީ އާއި މަރްޔަމް އަޝްފާ އެވެ.
