ހުޅުމާލޭގައި ހުންނަ ޓްރީޓޮޕް ހޮސްޕިޓަލަކީ ތަފާތު ގިނަ ފަރުވާތަކެއް ޒަމާނީ ފެންވަރަށް ދިނުމުގައި ފާހަގަކުރެވޭ ހޮސްޕިޓަލެކެވެ. މި ރިޕޯޓުގައި ބަލާލަނީ މި ހޮސްޕިޓަލުގެ އެންޑޮކްރައިނޮލޮޖީ ޑިޕާޓްމަންޓުން ދެމުންދާ ފަރުވާތަކުގެ މައްޗަށެވެ. މި ޑިޕާޓްމަންޓުން ދަނީ ހަކުރުބައްޔާއި އެންޑޮކްރައިން ސިސްޓަމަށް ދިމާވާ މައްސަލަތައް ދެނެގަނެ އެ މައްސަލަތައް ހައްލުކުރުމަށް ފަރުވާ ފޯރުކޮށްދެމުންނެވެ.
ޑިޕާޓްމަންޓް އޮފް އެންޑޮކްރައިނޮލޮޖީ އިން ގުޅިގެން މަސައްކަތްކުރާ އެހެނިހެން ޑިޕާޓްމަންޓްތަކުގެ ތެރޭގައި އޮބްސްޓެޓްރިކްސް އެންޑް ގައިނޮކޮލޮޖީ (އަންހެނުންގެ ބަލިތަކާއިގުޅޭ)، ޑަރމަޓޮލޮޖީ (ހަމުގެ ބަލިތަކާއިގުޅޭ)، އަދި ނިއުޓްރިޝަން އެންޑް ޑައެޓެޓިކްސް ފަދަ ޑިޕާޓްމަންޓްތައް ހިމެނެއެވެ.
މި ޑިޕާޓްމަންޓްތަކުގެ މަޝްވަރާއާއެކު ކޮންމެ ބަލިމީހަކަށްވެސް އެބަލިމީހެއްގެ ހާލަތު ކައިރިން ދެނެގަނެ ފަރުވާދެނީ ވަރަށް ފުރިހަމައަށެވެ. ޚާއްސަ ނަތީޖާތަކެއް ކަށަވަރުކުރުމުގެގޮތުން ގިނަ ފަރާތްތަކެއްގެ މަޝްވަރާއާއެކު އެސެސްމެންޓްހަދައި ކޮންމެ ބަލިމީހަކަށް ޚާއްސަ ފަރުވާއެއް ރޭވުންތެރިކަމާއެކު ދިނުމުގެ ނަތީޖާއަކީ ބަލިމީހާއާއި ހޮސްޕިޓަލާއި ދެމެދު އިތުބާރު ގާއިމްކުރެވި ބަލިމީހާގެ ބައްޔަށް ފުރިހަމަ ލުޔެއް ލިބިގެންދިއުމެވެ.
އެންޑޮކްރައިނޮލޮޖީ ޑިޕާޓްމަންޓް އިން ދޭ ފަރުވާތަކުގެ ތެރޭގައި:
- ޓައިޕް 1 އަދި ޓައިޕް 2 ހަކުރުބަލި، މާބަނޑުދުވަސްވަރުގެ ހަކުރުބަލި އަދި ހަކުރުބަލީގެ އެހެނިހެން ބައިތައް
- ތައިރޮއިޑްގެ އުދަގޫތަކުގެ ތެރޭގައި ހިމެނޭ ތައިރޮއިޑް ދުޅަވުން، ކެންސަރު، ހައިޕޮތައިރޮއިޑިޒަމް ހިމެނޭ
- ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް)
- ފިރިހެން އަދި އަންހެނުންގެ ޖިންސީ ހޯމޯންތަކުގެ އުދަގޫތައް
- ދަރިމައިނުވުމުގެ އުދަގޫތައް
- އެޑްރިނަލް ގްލޭންޑް ޑިސްއޯޑަރސް
- ވިޓަމިންޑީ މަދުވުން
- ހައިޕަރކެލްސީމިއާ އަދި ހައިޕޯކެލްސީމިއާ
ހަކުރުބަލީގެ ފަރުވާ
ހަކުރުބައްޔަކީ ގިނަ މުއްދަތަކަށް ފަރުވާ ހޯދަންޖެހޭ ބައްޔެކެވެ. މިއީ ޕެންކްރިއާސް އިން އެކަށީގެންވާ މިންވަރަށް އިންސިއުލިން ނުއުފެދޭ ވަގުތުތަކުގައި ނުވަތަ ހަށިގަނޑުން އުފައްދާ އިންސިއުލިން ފައިދާހުރި ގޮތެއްގައި ބޭނުންނުކުރެވޭއިރު ލޭގައި ގުލްކޯޒްގެ މިންވަރު މަތިވުމެވެ. ހަކުރުބަލީގެ އެންމެ އާންމުކޮށް ފެންނަނީ ޓައިޕް 2 ޑައިބެޓީސް އެވެ.
" ހަކުރުބައްޔަށް އެކަށީގެންވާ ފުރިހަމަ ފަރުވާ ޓްރީޓޮޕުން ފޯރުކޮށްދޭ. ބަލިމީހުންނަށް މި ހޮސްޕިޓަލުގެ ތަޖުރިބާކާރަކާ މަޝްވަރާކުރެވިދާނެ. އެންމެ އެކަށީގެންވާގޮތަށް ފަރުވާ ދިނުމަށް ހަކުރުބަލީގެ ޗެކަޕް ނުވަތަ ސްކްރީނިންގ އަށް ޝައުގުވެރިވާ ފަރާތްތަކަށް ޚާއްސަ ޕެކޭޖެއް ދަނީ ފޯރުކޮށްދެމުން". ޓްރީޓޮޕް ހޮސްޕިޓަލުން މައުލޫމާތު ދިނެވެ.
ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް) އަށް ފަރުވާދިނުން
ޕީސީއޯއެސް އަކީ އަންހެނުންނަށް ދަރިމައިނުވުމަށް ދިމާވާ އެންމެ އާންމު އުދަގުލެވެ. މިކަމުގެ ސަބަބުން އާދަޔާޚިލާފަށް މޫނު ފަދަ ތަންތަނުގައި އިސްތަށި ގިނަވެ، ޕީރިއަޑް މައްސަލަތައް ދިމާވެ ބައެއްފަހަރަށް މީހާ ފަލަވާންވެސް މެދުވެރިވެއެވެ.
" ޕީސީއޯއެސް މެނޭޖްކުރުމަށް އެންމެ ފައިދާހުރި ގޮތަކީ ކޮންމެ މީހަކަށް ޚާއްސަކޮށްގެން އެމީހަކާއި ގުޅޭގޮތަށް ވަކި ފަރުވާއެއް ދިނުން. އަޅުގަނޑުމެންގެ އެންޑޮކްރައިނޮލޮޖިސްޓުންނަކީ ޕިސީއޯއެސް ތަހައްމަލު ކުރަމުންދާ މީހުންނަށް އެންމެ ގުޅޭގޮތަށް ފަރުވާ ދިނުމުގެ ތަޖުރިބާ ލިބިފައިވާ ޑޮކްޓަރުން". ޓްރީޓޮޕް އިން ހާމަކުރިއެވެ.
ޑރ. ބިނޫ ޕަރަމެސްވަރަން ޕިއްލައި
ޓްރީޓޮޕް ހޮސްޕިޓަލުގެ އެންޑޮކްރައިނޮލޮޖީ ޑިޕާޓްމަންޓްގައި މަސައްކަތް ކުރައްވާ ޑރ. ބިނޫ އަކީ ސިއްޙީ ދާއިރާގެ 23 އަހަރުގެ ތަޖުރިބާހުންނެވި ޑޮކްޓަރެކެވެ. މަސައްކަތްކުރެއްވި ޤައުމުތަކުގެތެރޭގައި އިންޑިއާ، ބްރޫނާއީ ދާރުއްސަލާމް، އޮސްޓްރޭލިއާ، އޮމާން އަދި ޔޫއޭއީ ހިމެނެއެވެ. އިނގިރޭސިވިލާތުގައި އެންޑޮކްރައިނޮލޮޖީގެ ކްލިނިކަލް އެޓޭޗްމެންޓެއް ހައްދަވައި 'ވަރވިކް' ޔުނިވަރސިޓީ އިން ހަކުރުބަލީގެ ފަރުވާއާއި ގުޅޭ ކޯހެއް ވަނީ ފުރިހަމަކުރައްވާފައެވެ. އަދި ތައިރޮއިޑް އަލްޓްރާސައުންޑްގެ ތަމްރީން ވަނީ ފުރިހަމަކުރައްވާފައެވެ. ހެއްދެވި ރިސާރޗްތަކާއި ލިޔުއްވުންތަކަށް ބަލާއިރު، އެންޑޮކްރައިނޮލޮޖީ ޑައިބެޓީސް އިން 10 ޕަބްލިކޭޝަން އަދި ޓެކްސްޓް ފޮތެއްގައި ހަކުރުބަލީގެ އެއްބާބު ލިޔުއްވައިފައިވެއެވެ.
ޓްރީޓޮޕް ހޮސްޕިޓަލުގައި ޑރ. ބިނޫ މަސައްކަތްކުރައްވާތާ 3 މަސްދުވަސް ވަނީ ވެފައެވެ.
އެންޑޮކްރައިނޮލޮޖީ އާއި ގުޅުންހުރި އެންމެ އާންމު ބަލިތަކަކީ ކޮބައިތޯ ދެންނެވުމުން ޑރ. ބިނޫ ވިދާޅުވީ ހަކުރުބަލި، ތައިރޮއިޑް އަދި ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް) ކަމަށެވެ. ހަކުރުބަލީގެ ކޮންމެ ކޭސް އަކީ ވެސް ތަފާތު ކޭސްއެއް ކަމަށާއި ފަރުވާދެނީ އެމީހަކަށް ދިމާވާ އުދަގޫތައް ވަރަށް ރަނގަޅަށް ބެލުމަށްފަހުގައިކަމަށް ވަނީ ވިދާޅުވެފައެވެ.
" އަޅުގަނޑުމެން ފަރުވާދޭ ތައިރޮއިޑްގެ ބަލިތަކުގެތެރޭގައި ތައިރޮއިޑް ކެންސަރ ވެސް ހިމެނޭ. ތައިރޮއިޑް ކެންސަރ އަކީ އެހެން ކެންސަރާއި ބަލާއިރު ތަފާތު ކެންސަރއެއް. ގިނަފަހަރަށް އޮޕަރޭޝަނުން ރަނގަޅުކުރެވޭ. އައޮޑިން ތެރަޕީ ދޭން ޖެހެނީ މަދުފަހަރެއްގައި. ރާއްޖޭގައި ދެވެން ނެތް. އޮޕަރޭޝަނަށްފަހު އައޮޑިން ތެރަޕީ ދޭން ޖެހޭނަމަ ފޮނުވަނީ ރާއްޖެއިން ބޭރަށް" ޑރ. ބިނޫ ވިދާޅުވިއެވެ.
ކޮންމެ ދުވަހަކު ކަހަލަ ގޮތަކަށް ޕީސީއޯއެސްގެ ބަލިމީހުންނަށް ދަނީ ފަރުވާދެމުންނެވެ. އެއީ އެހާވެސް އާންމުކަމެއްގެ ގޮތުގައި ފާހަގަކުރެއްވިއެވެ.
" ޑައިބެޓީސް އަދި ޕީސީއޯއެސް ބަލިމީހުންނަށް ދިރިއުޅުމުގެ އާދަކާދަތައް ބަދަލުކޮށްގެން ބަލި އިތުރަށް ބޮޑުވިޔަނުދީ ވަކިވަރެއްގައި ހިފެހެއްޓުމަށް މަސައްކަތްކުރެވިދާނެ. ބޭހުގެ އިތުރަށް ދިރިއުޅުމުގެ އާދަކާދަތަކަށް ބަދަލުގެންނަންޖެހޭ. ޚާއްސަކޮށް ޑައިޓް/ ހަށިގަނޑަށް ފައިދާހުރި ކާނާކެއުމުގައި ބޭނުންކުރުމާއި އަދި ބަރުދަން ލުއިކުރުމަށް ސަމާލުކަންދޭންޖެހޭ. ޑައިބެޓީސްގައިވެސް ޓައިޕް 2 ގައި ބަރުދަން ލުއިކުރުމުން ބަލި ކޮންޓްރޯލް ކުރުމަށް އެހީތެރިވެދޭ. އަދި ކަސްރަތު ކުރުން މުހިންމު". ޑރ. ބިނޫ
ދިވެހި ރާއްޖޭގައި ޖޫސް ބުއިން އާންމުވެފައިވާކަމަށް ކަންބޮޑުވުމާއެކު ޑޮކްޓަރ ވިދާޅުވިއެވެ. ތާޒާ މޭވާއިން ޖޫސް ގިރައިގެން ބުއި ކަމުގައިވިއަސް ގިނަ މިންވަރަކަށް ޖޫސް ބުއިމަކީ ސިއްހަތަށް ގެއްލުންހުރި ކަމެއްގެ ގޮތުގައި ފާހަގަކުރެއްވިއެވެ.
" ބަރުދަން އިތުރުވާން އެހީތެރިވެދޭ އެއްޗެއް ޖޫހަކީ. އެއަށް ހަކުރު ނޭޅި ކަމުގައިވިއަސް ބައެއް ބާވަތްތަކުގެ މޭވާ އަކީ ހަކުރު ހިމެނޭއެއްޗެއް. ޖޫހުގެ ބަދަލުގައި ތާޒާ މޭވާ ކެއުމުގައި ބޭނުންކުރޭ". އޮބިސިޓީ ނުވަތަ އެކަށީގެންވާ ބަރުދަނަށްވުރެ ފަލަވުން މިއީވެސް ރާއްޖޭގައި އާންމުކަމެއްގެ ގޮތުގައި ފާހަގަކުރެއްވިއެވެ.
" ޚާއްސަކޮށް ކުޑަކުދިންގެ މެދުގައި އޮބިސިޓީ އާންމު. ވަރަށް ގިނަ ބެލެނިވެރިން ކުދިންނަށް ކާންދޭ ބިސްކޯދު އަދި ކުކީސް. މިއީ ވަރަށް ގިނައިން ކެލަރީ ހިމެނޭ ދެބާވަތް އަދި ކާބޯހައިޑްރޭޓްސް ވެސް. އޮބިސިޓީގެ ސަބަބުން ކުއްޖާ އެހުށަހެޅެނީ ކުރިމަގުގައި އިތުރު ބަލިތަކަށް. އެތައްޔާރުކުރެވެނީ ކުރިމަގުގެ ބަލިމީހެއް. މީހުން ދެކޭގޮތުގައި ކުޑައިރު ބޭނުން މިންވަރަކަށް ކޮންމެ އެއްޗެއްވެސް ކާން ދެވިދާނެ. އައި އެކުދިން ބޮޑުވީމަ ކާއެއްޗިއްސާމެދު ވިސްނާނީ. އެއީ ރަނގަޅު ގޮތެއް ނޫން. ބަލިޖެހެން ފަށާ ވަރަށް ކުޑައިރުއްސުރެވެސް". ޑރ. ބިނޫ ވިދާޅުވިއެވެ.
ހޯމޯން އާއި ގުޅުންހުރި ކަންކަމުގައި ނުވަތަ އެންޑޮކްރައިނޮލޮޖީ އާއި ގުޅުންހުރި ބަލިތަކުގައި ޑޮކްޓަރ ބިނޫ މިދެއްކެވި ވާހަކަތަކަށް ސަމާލުކަން ދެއްވާ އެކަށީގެންވާ ފަރުވާ ހޯދުން މުހިންމެވެ.
ޓްރީޓޮޕް ހޮސްޕިޓަލުންދޭ ފަރުވާއާއި ގުޅޭގޮތުން އިތުރު މައުލޫމާތު ސާފުކުރައްވަން ބޭނުންނަމަ މި ނަންބަރަށް 3351610 ގުޅައިގެން ނުވަތަ އީމެއިލް މެދުވެރިކޮށް [email protected] މައުލޫމާތު ސާފުކުރެވިދާނެއެވެ.
