ހުޅުމާލެ ފޭސް 2 ގައި 40،000 ވަރަކަށް މީހުން ދިރިއުޅެމުން އަންނައިރު މިއީ ތަފާތު ވާހަކައެކެވެ. އެހާމެ ބިރުވެރި އަދި އަޚުލާގު ގޯސް ބައެއްގެ ވާހަކަތަކެކެވެ.
ވީކިހިނެއް؟
ހިޔާ ފުލެޓުގައި އުޅޭ އަންހެނެކެވެ. އެއަންހެންމީހާ ކުރާ ކަމަކީ އެސަރަހައްދުގައި އުޅޭ ފިރިހެނުންނާ ތަފާތު ގޮތްގޮތަށް ވާހަކަދައްކައި އޭނަ ދިރިއުޅޭ އެޕާޓްމެންޓަށް ދިއުމަށް ދަޢުވަތު ދެނީއެވެ. ކާކުކަން ނޭނގޭއިރު ވެސް މި އަންހެން މީހާގެ އަވާގައި ޖެހި އޭނަގެ އެޕާޓްމެންޓަށް ފިރިހެނުންތަކެއް ގޮސްފައިވާކަން ވަނީ އެނގިފައެވެ.
ހަނދާން ނުނެތޭނެ ކަންތައްތަކެއް!
އެޕާޓްމެންޓަށް ދިއުމަށްފަހު އެ ހިނގާ ކަންތައްތަކުގެ ސަބަބުން ދެން އެ އަންހެންމީހާ ފަށަނީ އެއްކަލަ ފިރިހެނުން ބްލެކްމެއިލް ކުރުމަށެވެ. މިގޮތުން ފިރިހެނުންގެ ފޮޓޯތައް ލީކުކޮށްލާނެ ކަމުގެ ބިރުދައްކާ ކަމުގައިވެއެވެ. އަދި ބައެއްފަހަރަށް އެފިރިހެނުންގެ ފޮޓޯއާއި ވީޑިއޯ ނެގުމަށް އެއަންހެންމީހާއަށް އެހީތެރިވާ އެހެން ފިރިހެނުން އުޅޭކަމަށް ވަނީ މައުލޫމާތު ލިބިފައެވެ.
އަންހެންމީހާގެ ޖާދޫގައި ޖެހުނު މީހެއްގެ ދުލުން ކަންވީގޮތް:
ހިޔާ ސަރަހައްދުގައި އުޅޭ ހަސަން (އަސްލު ނަމެއް ނޫން) އެއްރެއަކު ގެއަށް ދިޔަ މަގުމަތީ ބަޔަކު އޭނާ ހުއްޓުވިއެވެ. އަދި ބިރުދައްކައިގެން ގެންދިޔައީ އޭޓީއެމް އަށް ކަމުގައިވެއެވެ. ގެންގޮސް އޭނާގެ އެކައުންޓްގައި ހުރި ރުފިޔާ ނެގިއެވެ. އެމައްސަލަ ފުލުހަށް ހުށަހެޅިއެވެ. އެކަމަކު އޭނާ ވަނީ ފަހުން މައްސަލަ ނަގައިފައެވެ.
"އެކައުންޓްގައި ހުރި ހުރިހާ ފައިސާއެއް ދޭން އެދުނީ. އެފައިސާ ދިނީ ބިރުދެއްކުމުން އިތުރުގޮތެއް ނެތިގެން". ހަސަން މައުލޫމާތުދިނެވެ.
ފައިސާ ފޭރޭ މައްސަލަތައް ފުލުހަށް ހުށަހެޅުމަށްފަހު އަނބުރާ ނަގަނީ މިފައިސާ ފޭރުނު އަސްލު ސަބަބު ފަޅާއެރުމުން ކަމުގައިވެއެވެ. މިގޮތުން ހިޔާ ސަރަހައްދަކީ ގިނަ އަދަދެއްގެ ކެމެރާ ހަރުކޮށްފައި ހުންނަ ތަނަކަށްވުމުން އަންހެން މީހާ އާއި އެކު އޭނާގެ އެޕާޓްމެންޓަށް ދާ މީހުންވެސް ދަނެގަތުމަކީ އުދަގޫ ކަމެއް ނޫނެވެ. މިކަމަށް ސަމާލުވާން އެބަޖެހެއެވެ. ފެންނަހާ މީހެއްގެ އަވާގައި ޖެހި ތިމާގެ އަބުރާއި އިއްޒަތް ވެއްޔާއި މޮޑެވި ދާއިރުވެސް ނުވިސްނޭ މީހުން އުޅެއެވެ. ވީޑިއޯ ލީކު ކޮށްލާނެ ކަމުގެ ބިރަށް އަތުގައި ހުރި ހުރިހާ ފައިސާއެއްދީ، އަތްމަތި ދަތިވެ އާއިލާއަށް އެކަމުގެ އަސަރު ކުރާއިރުވެސް އިސްލާހުވާން ނޭނގޭ މީހުން މިމުޖުތަމައުގައި އުޅުމަކީ ދެރަކަމެކެވެ. އަދި މިއީ ވިސްނާ އިސްލާހުކުރަން ޖެހިފައިވާ ކަމެކެވެ.
ކިޔުންތެރިންގެ ހިޔާލު
އަންތަރީސްޑް
ކޮމެންޓްސް ބަންދުކުރެވިފައި