ކޮންމެ ގައުމެއްގައިވެސް މީޑިއާ އަކީ މުހިންމު ދައުރެއް އަދާކުރާ ބާރެކެވެ. ހިޔާލުފާޅުކުރުމުގެ މިނިވަންކަމުގެ ތެރެއިން ވަކި މިންގަނޑެއް ހިފެހެއްޓިފައި އޮވެ، ވަކި ހުދޫދެއްގެ ތެރެއިން މީޑިއާއިން އާންމުންނަށް މައުލޫމާތު ފޯރުކޮށްދިނުމަކީވެސް މުޖުތަމައުގެ އެއްބައިވަންތަކަމާއި ހަމަޖެހުމަށް މުހިންމު ކަމެކެވެ. މީޑިއާ ދާއިރާގައި އަހުލާގު ބައްޓަންކުރަންވީ ގޮތާއި މުއާމަލާތް ކުރުމަށް ބޭނުންވާ ހުނަރާއި މައުލޫމާތު ފޯރުކޮށްދިނުމަށް ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) އާއި އިންފޮމޭޝަން ކޮމިޝަނަރުގެ އޮފީސް (އައިކޮމް) އިން އިސްނަގައިގެން ހާއްސަ ވޯކްޝޮޕަކާއި ޕެނަލް ޑިސްކަޝަނެއް ބާއްވަން ވަނީ ހަމަޖެހިފައެވެ.
އޮގަސްޓް 7، 2024 ގައި ބާއްވަން ހަމަޖެހިފައިވާ މި ވޯކްޝޮޕަކީ "މީޑިއާ އެތިކްސް" އާއި ގުޅޭ ގޮތުން ތަޖުރިބާކާރު ބޭފުޅުން މައުލޫމާތު ދެއްވުމަށް ހަމަޖެހިފައިވާ ވޯކްޝޮޕެކެވެ. އެގޮތުން ދިވެހިރާއްޖޭގެ ގައުމީ ޔުނިވަސިޓީގެ ފެކަލްޓީ އޮފް އާޓްސްގެ ސީނިއާ ލެކްޗަރަރ ޝެއިހް އަބުދުالله މުހައްމަދު އާއި މީޑީއާ ދާއިރާގެ ތަޖުރިބާކާރު، އަލީ ޝާމިން އާއި އެމްއެމްއޭގެ މީޑިއާ ކޮމިއުނިކޭޝަންސް މެނޭޖަރ މުހައްމަދު ނާސިހު އަދި އިންފޮމޭޝަން ކޮމިޝަނަރުގެ އޮފީހުގެ ސެކްރެޓަރީ ޖެނެރަލް އިދްރީސް އިސްމާއީލް، މި ވޯކްޝޮޕްގެ ބައިވެރިންނަށް މައުލޫމާތު ހިއްސާ ކުރައްވާނެ އެވެ.
ދިވެހިރާއްޖޭގެ އިސްލާމިކް ޔުނިވަރސިޓީ އިން މައުލޫމާތު ދެއްވާ ގޮތުގައި، މި ވޯކްޝޮޕާއި ޕެނަލް ޑިސްކަޝަން ބޭއްވުމުގެ މަގުސަދަކީ މީޑިއާ ދާއިރާގައި އަޚުލާގު ބައްޓަންކުރަންވީ ގޮތާއި މުއާމަލާތްކުރުމަށް ބޭނުންވާ ހުނަރާއި މައުލޫމާތު ފޯރުކޮށްދިނުން ކަމަށެވެ. މި ވޯކްޝޮޕްގައި އިސްލާމީ ނަޒަރަކުން މީޑިއާގެ އަޚުލާޤިއްޔަތަށް ބަލާލުމާއިއެކު މައުލޫމާތު ހޯދުމާއި ލިބިގަތުމުގެ ޤާނޫނަށް އަލިއަޅުވާލެވޭނެއެވެ.
މި ވޯކްޝޮޕް ކުރިއަށްދާނީ 7 އޮގަސްޓް 2024 ގެ ހެނދުނު 9:00 އިން 12:00 އަށެވެ. އަދި ޕެނަލް ޑިސްކަޝަން ކުރިއަށްދާނީ ހަމަ އެދުވަހު 13:00 އިން 14:00 އަށެވެ.
މި ވޯކްޝޮޕްގެ ތެރެއިން ކުރިޔަށް ގެންދަން ހަމަޖެހިފައިވާ ޕެނަލް ޑިސްކަޝަންގައި މައުލޫމާތު ދެއްވާނީ އިންފޮމޭޝަން ކޮމިޝަނަރ އަހުމަދު އާހިދު ރަޝީދު، ބްރޮޑްކާސްޓިންގ ކޮމިޝަނުގެ ރައީސާ މަރިޔަމް ވަހީދާ، އިސްލާމިކް ޔުނިވަސިޓީގެ ޑެޕިއުޓީ ވައިސް ޗާންސެލަރ އަހުމަދު އަމީން މުހައްމަދު އާއި ހައިކޯޓުގެ އިންފޮމޭޝަން ކޮމިޝަނަރު އަމީން ފައިސަލް އެވެ.
އިސްލާމިކް ޔުނިވާސިޓީގެ ހޯލުގައި ބޭއްވުމަށް ހަމަޖެހިފައިވާ މި ވޯކްޝޮޕްގައި ސަރުކާރުގެ ވުޒާރާތަކާއި އިދާރާތަކުގެ އިންފޮމޭޝަން އޮފިސަރުންނާއި މިޑިއާގެ ދާއިރާގައި ހަރަކާތްތެރިވާ ނޫސްވެރިންނާއި ނޫސްވެރިކަމަށް ޝައުޤުވެރިކަން ހުންނަ ފަރާތަތަކަށް ބައިވެރިވުމުގެ ފުރުސަތު އެބައޮތެވެ.
ވޯކްޝޮޕްގެ އިތުރުން ބާއްވާ ޕެނަލް ޑިސްކަޝަންގައި އިޖުތިމާއީ ހަމަޖެހުން ޤާއިމުކުރުމަށްޓަކައި ތަޢުލީމީ، މީޑިއާގެ މުހިއްމު ކަމުގެ މައްޗަށް ޕެނަލިސްޓުން ވާހަކަދައްކަވާނެއެވެ. އަދި އޭގެ އިތުރުން ނޫސްވެރިކަމުގެ ދާއިރާއިން މަތީ ތަޢުލީމަށް ރާއްޖޭގައި ހުރި ފުރުސަތުތަކުގެ މައުލޫމާތުވެސް މި ޕެނަލް ޑިސްކަޝަންއިން ލިބިގެންދާނެއެވެ.
ދިވެހިރާއްޖޭގެ އިސްލާމިކް ޔުނިވަރސިޓީގެ ކުއްލިއްޔާ އޮފް އިސްލާމިކް ރިވީލްޑް ނޮލެޖް އެންޑް ހިޔުމަން ސައިންސަސްގެ ފަރާތުން އިސްނަގައިގެން ކުރިއަށްގެންދާ މި ވޯކްޝޮޕްގައި ބައިވެރިވާން ބޭނުންފުޅުވާނަމަ ވޯކްޝޮޕް އެޕްލިކޭޝަން ލިންކް ބޭނުންކުރައްވައިގެން ފޯމް ކުރިހަމަކުރުމަށް އައިޔޫއެމްއިން އެދެއެވެ.
ދިވެހިރާއްޖޭގެ އިސްލާމީ ޔުނިވާސީޓީއަކީ މީޑިއާ ދާއިރާގެ ތަޖުރިބާކާރު މީހުން އުފެއްދުމަށް މީޑިއާއަށް ޚާއްސަކޮށްގެން 2018 ވަނަ އަހަރުން ފެށިގެން މާސްޓަރސް އޮފް އާޓްސް އިން ޖާނަލިޒަމް އެންޑް މީޑިއާ ކޮމިއުނިކޭޝަންސް ކޯސް މިވަގުތު ރާއްޖޭގައި ހިންގާ ހަމައެކަނި ޔުނިވާސިޓީއެވެ.
