ހުޅުމާލެ ފަޅުތެރޭގައި އޮތް "ބްލޫވޭގާ" ނަމަކަށް ކިޔާ ސަފާރީއެއްގައި އަލިފާން ރޯވެ ބޭނުންނުކުރެވޭ ވަރަށް ވަނީ އަނދައިފައެވެ.
ވެމްކޯ ޖެޓީ ސަރަހައްދުގައި ސަފާރީތައް އަޅާ ސަރަހައްދުގައި އޮތް މި ސަފާރީގައި އަލިފާން ރޯވިކަމުގެ ރިޕޯޓް ލިބިފައިވަނީ ރޭ ދަންވަރު 3:42 ގައި ކަމަށް އެމްއެންޑީއެފް އިން ވަނީ މައުލޫމާތު ދީފައެވެ.
" މިހާދިސާގެ މައުލޫމާތު ލިބުމާއެކު ފަޔަރ ފައިޓަރުން ވަނީ އެ ސަރައްހައްދަށް ގޮސް އަލިފާން ނިއްވުމުގެ މަސައްކަތް ފަށާފަ. އަދިވެސް އެކީގައި ނުނިވޭ". އަލިފާނުގެ ހާދިސާ ހިނގިތާ 7 ގަޑިއިރުފަހުން މީޑިއާ ގުރޫޕޫގައި ހިއްސާކުރި މެސެޖުުގައި އެމްއެންޑީއެފްއިން ފާހަގަކޮށްފައިވެއެވެ.
އަލިފާނުގެ ހާދިސާ ހިނގިއިރު ސަފާރީގައި ތިބި 12 ފަޅުވެރިން ވަނީ ކައިރީގައި އޮތް ޑައިވިންގ ދޯންޏަކަށް އަރައިފައިކަމަށާއި، އޭގެ ތެރޭގައި ހިމެނެނީ ސްރީލަންކާ، ބަންގްލަދޭޝް އަދި އިންޑިއާއަށް ނިސްބަތްވާ 5 ބިދޭސީންނާއި 7 ދިވެހިންނެވެ. ސަފާރީގައި ރޯވިއިރު އޭގައި ހުރީ ޑައިވިންގ ކުރުމަށް ބޭނުންކުރާ ސާމާނު ކަމަށް ސަފާރީގެ ކެޕްޓަން އާއި ހަވާލާދީ އެމްއެންޑީއެފް އިން ވަނީ ހާމަކޮށްފައެވެ.
މިހާދިސާގައި އެއްވެސް މީހަކަށް އަނިޔާއެއް ލިބިފައިވާކަމުގެ މައުލޫމާތެއް ނުލިބެއެވެ. އެހެންނަމަވެސް ސަފާރީ ވަނީ ރޯވުމުގެ ސަބަބުން ވަރަށް ބޮޑަށް ހަލާކުވެފައެވެ.
