އައްޑޫ ސިޓީގައި މިހާރު ކުރިއަށްދާ ބޮޑީބިލްޑިންގ މުބާރާތުގައި ދެޖިންސް މަސްހުނިކޮށް އެގެނެސްދިން އައިޓަމްތަކަކީ މުޖުތަމައުގެ އާންމު މިންގަނޑުތަކާއި ޚިލާފު 100 އިންސައްތަ މުސްލިމް ޤައުމެއްގައި ކޮށްގެންވާނެ ކަމެއް ނޫންކަމަށް ބުނެ އެ މުބާރާތް ކުރިއަށްގެންދާތީ ސޯޝަލް މީޑިއާގައި ގިނަ ބަޔަކު ދަނީ ނުރުހުން ފާޅުކުރަމުންނެވެ.
މި ނޮވެންބަރުމަހުގެ 5 އިން 11 އަށް ކުރިއަށްގެންދާ ދުނިޔޭގެ 15 ވަނަ ބޮޑީ ބިލްޑިންގ ޗެމްޕިއަންޝިޕް މިހާރުން މިހާރަށް ހުއްޓާލުމަށްވެސް އެއްބަޔަކު ދަނީ ގޮވާލަމުންނެވެ. އާންމުންގެ ނުރުހުން އަމާޒުވެފައިވަނިކޮށް ސޯޝަލް މީޑިއާގައި ކުރި ޕޯސްޓެއްގައި އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސަޢީދު ވިދާޅުވީ " ބަރަހަނާ މަންޒަރުތައް ދައްކާ ހަފްލާތައް ބޭއްވުމަކީ މުސްލިމުން ކޮށްގެންވާނެ ކަމެއް ނޫން. ޤައުމުގެ އިޖުތިމާޢީ ކަރާމާތު ނަގަހައްޓައި އިސްލާމީ ސަޤާފަތު ރައްކާތެރި ކުރަންޖެހޭ. ޤުރުއާން ބާވައިލެއްވުނީ ހިދާޔަތެއްގެ ގޮތުގައި". މިނިސްޓަރ ޝަހީމްގެ ޕޯސްޓުގައި ވެއެވެ.
ބޮޑީބިލްޑިންގ މުބާރާތް ކީރިތި ޤުރުއާނުން ފެށުމަށްފަހު އެމުބާރާތުގެ ތެރެއިން ބަރަހަނާ މަންޒަރުތައް ފެންނަ ވީޑިއޯތައް އާންމުވުމުންވެސް ގިނަބަޔަކު ވަނީ ކަންބޮޑުވުން ފާޅުކޮށްފައެވެ.
" އިސްލާމީ ވަހުދަތު ފުނޑުފުނޑުވާފަދަ ކަންކަން ކުރުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން. މިފަދަ ކަންކަން ކުރާއިރު ހުއްޓުވަންޖެހޭ" އާންމުންގެ މީހަކު ކުރި ކޮމެންޓެއްގައި ވެއެވެ.
ނިމިދިޔަ އޮކްޓޯބަރުމަހުގެ 30 ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ކުރެއްވި ޓްވީޓެއްގައި ވިދާޅުވެފައިވަނީ ފިރިހެނަކުވިޔަސް، އަންހެނަކުވިޔަސް މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން ތިމާއަށް ނުވަތަ ތިމާގެ ދީނާއި ޤައުމަށް ލިބޭނެ ހަޤީޤީ ރީތި ނަމެއް އުފަލެއް ކާމިޔާބީއެއް ނެތް ކަމަށެވެ.
ރައީސް މިގޮތަށް އެއިރު ވިދާޅުވީ މެކްސިކޯގައި ކުރިއަށްގެންދާ މިސް ޔުނިވަރސް މުބާރާތުގައި ދިވެއްސަކު ބައިވެރިވުމާއި ދެކޮޅަށް މިނިސްޓްރީ އޮފް ޔޫތް އެންޑް އެމްޕަވަރމަންޓް އިންފޮމޭޝަން އެންޑް އާޓްސް އިން ބަޔާން ނެރުނު ދުވަހުގައެވެ. ދިވެހިންގެ ދީނާއި އަޤީދާއާއި ސަޤާފަތާއި ނުގުޅޭ ހަރަކާތްތަކާއި މުބާރާތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރާކާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫންކަމަށް މިނިސްޓްރީގެ ބަޔާނުގައި އެއިރު ބުނެފައިވެއެވެ. މިނިސްޓްރީއިން ބަޔާން ނެރުނު ދުވަހުވެސް ގިނަ ބަޔަކު ވަނީ ރާއްޖޭގައި ކުރިއަށްގެންދާ ބޮޑީބިލްޑިންގ މުބާރާތްތަކުގައި ވެސް އާންމު އިޖުތިމާޢީ މިންގަނޑާއި ޚިލާފު މަންޒަރު ފެންނަކަމަށް ބުނެ ދެން އެފަދަ މުބާރާތެއް ރާއްޖޭގައި ކުރިއަށްގެންދިއުމުގެ ފުރުސަތު ނުދިނުމަށް އެދި އަޑުއުފުލައިފައެވެ.
ރާއްޖޭގެ އިތުރުން އެހެނިހެން ޤައުމުތަކުގެ ބައިވެރިން ހިމެނޭ ގޮތަށް ކުރިއަށްގެންދާ ބޮޑީ ބިލްޑިންގ މުބާރާތުގައި ދެޖިންސު މަސްހުނިވާގޮތަށް ނިވާކަންކުޑަކޮށްތިބި މަންޒަރު ދައްކުވައިދޭ ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ. އެކަމަކު ރަސްމީކޮށް އަދި ގުޅުންހުރި މުއައްސަސާއަކުން އެމައްސަލަ ބަލަމުންދާކަން ހާމަކޮށްފައިނުވެއެވެ.
