މެލޭޝިއާގައި މިރޭ ހިނގި ކާރު އެކްސިޑެންޓެއްގައި ދިވެހި ދަރިވަރަކު ނިޔާވެއްޖެއެވެ. މި އެކްސިޑެންޓުގައި ނިޔާވީ އައްޑޫ ސިޓީ ހިތަދޫ މާރިޝް، 21 އަހަރުގެ އާމިނާ އިމިލީ ނާޒިމް ކަމަށް ވަނީ މައުލޫމާތު ލިބިފައެވެ. މި އެކްސިޑެންޓާއި ގުޅޭ އިތުރު މައުލޫމާތެއް އަދި ސަރުކާރުގެ މުއައްސަސާތަކުން ހާމައެއް ނުކުރެއެވެ.
މެލޭޝިއާގައި ކިޔަވަން ހުންނަ މި ދަރިވަރު އެކްސިޑެންޓްވީ ޝޮޕިން މޯލަކަށް ދިއުމަށްފަހު އެނބުރި ގެއަށް ދިޔަ މަގުމަތީގައި ކަމަށް ވަނީ ނޫސްތަކުގައި ރިޕޯޓްކޮށްފައެވެ. އެކްސިޑެންޓް ހިނގިއިރު އެކާރުގައި އެހެން ދިވެއްސެއްވެސް އިންކަމަށް ވެއެވެ.
ހައިވޭގައި ދަތުރު ކުރަމުންދިޔައިރު އެހެން ކާރަކާ މުޑިއަރައި ހިނގި މި އެކްސިޑެންޓްގެ ފޮޓޯތަކުން ފެންނަގޮތުގައި ކާރު އޮތީ ފުރޮޅާލާފައެވެ.
މެލޭޝިއާގައި ގިނަ އަދަދެއްގެ ދިވެހި ދަރިވަރުން ދަނީ ތަޢުލީމު ހާސިލުކުރަމުންނެވެ.
މި އެކްސިޑެންޓުގައި ނިޔާވި ދަރިވަރުގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރު ކުރައްވާ އާއިލާއަށް ކެތްތެރިކަން ދެއްވާށިއެވެ. އާމީން
