'ޒީޓައިމްސް' ފޭސްބުކް ޕޭޖް މެދުވެރިކޮށް ކުރިއަށްގެންދެވުނު ޚިޔާލު ހޯދުމުގައި ބޮޑު ތަފާތަކުން ކުރީގައި އުޅުއްވަނީ ޑރ.މުޙައްމަދު މުޢިއްޒު އެވެ. މާލޭ ސިޓީ މޭޔަރު ކަމަށް އެންމެ ރަނގަޅު ކެންޑިޑޭޓަކީ ކޮބައިތޯ ބެލުމަށް މި އެޕްރީލް މަހުގެ 6 ވަނަ ދުވަހުން 8 ވަނަ ދުވަހުގެ ނިޔަލަށް ކުރިއަށް ގެންދެވުނު ޚިޔާލު ހޯދުމުގައި، 383 ޚިޔާލު ލިބިފައިވެއެވެ.

" ގިނަ އަދަދެއްގެ މީހުން ޚިޔާލު ހޯދުމުގެ ޕޯސްޓް އެކި ޕޭޖުތަކަށް ހިއްސާކުރުމަށްފަހު އެ ޕޯސްޓަށް ޚިޔާލު ފާޅުކޮށްފައިވޭ. އެހެންނަމަވެސް 'ޒީޓައިމްސް' އިން ބަލާފައިވާނީ ހަމައެކަނި ޒީޓައިމްސް ފޭސްބުކް ޕޭޖުގައި ޖަހާފައިހުރި ޕޯސްޓަށް ފޮނުވާފައިވާ ޚިޔާލުތަކަށް. އަދަދު ގުނާފައިވާނީ 3 ކެންޑިޑޭޓުންގެ ކެންޑިޑޭޓް ނަންބަރު ނުވަތަ ނަން ޖެހުމަށްފަހު ފޮނުވާފައިވާ ޚިޔާލުތަކަށް. އަދި ތަކުރާރުކޮށް އެކަކު ނަމުގައި ފޮނުވާފައިވާ ޚިޔާލުތައް ހިމަނާފައިނުވާނެ"

ޚިޔާލު ހޯދުމުގެ ނަތީޖާ ދައްކާގޮތް

Advertisement

ޚިޔާލު ހޯދުމުގެ ނަތީޖާ އަށް ބަލާއިރު ކެންޑިޑޭޓް ނަންބަރު 1 ޑރ. މުޙައްމަދު މުއިއްޒަށް ތާއީދުކޮށްފައިވަނީ 244 މީހުންނެވެ. ކެންޑިޑޭޓް ނަންބަރު 2 އަލްއުސްތާޛު އަލްހާން ފަހުމީ އަށް ތާއީދުކޮށްފައިވަނީ 4 މީހުން އަދި ކެންޑިޑޭޓް ނަންބަރު 3 އަލްއުސްތާޛު އަނަސް ޢަބްދުއްސައްތާރަށް ތާއީދުކޮށްފައިވަނީ 73 މީހުންނެވެ.

ކިޔުންތެރިންގެ ޝުޢޫރުތައް

'ޒީޓައިމްސް' އިން އިސްކަންދީފައިވާނީ ހާމަކަންބޮޑު ގޮތެއްގައި ޚިޔާލު ހޯދުން ކުރިއަށްގެންދާށެވެ. އާންމުކޮށް ފެންނާނެގޮތަށް 3 ދުވަހަށް ހުޅުވާލެވުނު ފުރުސަތުގައި ތިން ކެންޑިޑޭޓުންނާއި ގުޅޭގޮތުން ވަނީ ތަފާތު ޚިޔާލުތަކެއް ލިބިފައެވެ. މިގޮތުން ސަރުކާރު ވިސްނުމާ ދެކޮޅު މީހަކު ހޮވައިގެން ލިބޭނެ މޮޅެއް ނެތް ކަމަށް އަޙްމަދު ހަސަން ބުނެފައިވާއިރު، ކެހިވެރި ފަތިހަކަށް ލިބޭނެ ވޯޓެއް ނެތްކަމަށާއި، ތިލަފަތަށް ވޯޓުދިނުމުގެ ކުރިން ވިސްނުމަށް މުޙައްމަދު އަލީ ފާހަގަކޮށްފައިވެއެވެ. އަދި ޑރ.މުޢިއްޒު ވަރުގެ މީހެއް ނެތް ކަމަށް މޫމިނާ ހަސަން ބުނެފައިވެއެވެ.

ލޯކަލް ކައުންސިލް އިންތިޚާބުގައި އެންމެ ގިނަ އަދަދެއްގެ މީހުން އިންތިޒާރުކުރަމުން މިދަނީ ނަތީޖާ އަންނާނެ ގޮތަކަށްކަން ޔަގީނެވެ. މާދަމާ އިންތިޚާބު ކުރިއަށްގެންދިއުމަށް ހަމަޖެހިފައިވާއިރު އާދީއްތަދުވަހު ނަތީޖާ ލިބޭނެ ކަމަށް އުންމީދު ކުރެވެއެވެ. 'ޒީޓައިމްސް' އިން ކުރިއަށްގެންދިޔަ ޚިޔާލު ހޯދުމުގެ ނަތީޖާ މިގޮތަށް ދެއްކިކަމުގައިވިއަސް، މާލޭ މޭޔަރު ހޮވުމުގެ ވާދަވެރި އިންތިޚާބުގެ ނަތީޖާ އަންނާނެގޮތަކަށް އިންތިޒާރުކޮށްލަމާ ހިގާށެވެ.

ޒީޓައިމްސް ފޭސްބުކް ޕޭޖް https://www.facebook.com/xeetimes/