އަޅުގަނޑު ކުޑައިރު، 1970ގެ އަހަރުތަކުގައި، ރަށުގައި އުޅޭ އުމުރުން ދުވަސްވީ މީހުން ދީ އުޅޭ ނަސޭހަތެއް އޮވެއެވެ. އެއީ ހެލިފެލިވެ އުޅުމުގެ މުހިންމު ކަމުގެ ވާހަކައެވެ. ޚާއްސަކޮށް މާބަނޑު އަންހެނުން ހެލިފެލިވެ އުޅުމުގެ މުހިންމު ކަމުގެ ވާހަކައެވެ. އަދި ވަކިން ޚާއްސަކޮށް މިކަމާގުޅޭގޮތުން އަޅުގަނޑުގެ މަންމަ ރައްޓެހިންނަށް ނަސޭހަތެއްގެ ގޮތުން ހިއްސާކުރާ ވާހަކައެއްވެސް ހަނދާން އެބަހުއްޓެވެ. އެއީ، އޭރު ހަވާދު ފުނޑަން ބޭނުންކުރާ ފޮއި މާބަނޑުމީހުން ދުވާލަކު ދެތިން ފަހަރު އުފުލާ އުޅުމުގެ މުހިންމު ކަމުގެ ވާހަކައެވެ. އަޅުގަނޑު ހަނދާން ބަލި ނޫންނަމަ އޭރު އައްޑުއަތޮޅު ހިތަދޫއިން ފަލަމީހުން އެއްގޮތަކަށްވެސް ނުފެނެއެވެ.
މިކިޔާދެވުނީ އެޒަމާނުގެ ވާހަކައެވެ. ނަމަވެސް، ޒަމާން މިހާރު މިވަނީ ބަދަލުވެފައެވެ. އަޅުގަނޑުމެން ރިހައެއް ކައްކާލަން މިހާރު ހަވާދުކޮޅެއް ފުނޑާކަށްވެސް ނުޖެހެއެވެ. ގަރުދިޔަ ތެއްޔެއް އުދަން އަލިފާން އަންދަން ދަރު ހޮވަން ވަލަށް ދާކަށްވެސް ނުޖެހެއެވެ. އެޒަމާނުގެ ރަސްކަލުންފަދަ މަތީފަންތީގެ މީހުން ކާންކަމުދިޔަ ކާނާތައް އާންމުގޮތެއްގައި މިހާރު އަޅުގަނޑުމެންނަށް ލިބެއެވެ. އަނގަޔަށް މީރު އެތަކެތީގައި ހަކުރާއި ކެލޮރީގިނަ ތަފާތު ވައްތަރު ވައްތަރުގެ ތައްޔާރީ ކާނާ މިހާރު މިވަނީ އާންމުވެފައެވެ. ހަމައެހެންމެ، އެއްތަނުން އަނެއްތަނަށް ދަތުރުފަތުރު ކުރަން ސައިކަލު، ކާރު، ލޯންޗް އަދި މަތިންދާބޯޓުގެ ބޭނުން ހިފުން މިވަނީ އާންމު ވެފައެވެ. ޓީވީ އަދި މޮބައިލް ފޯނު ބޭނުން ކުރުން އާންމުވެފައި ވާއިރު އަޅުގަނޑުމެން މިހާރު ހެލިފެލިވެ އުޅޭވަރު މިވަނީ ނިހާޔަތަށް ކުޑަވެފައެވެ.
ނޭގުމެއްގެތެރޭގައި ނަމަވެސް، ހިކިކޮށް ތިބުމާއި އިދިކޮޅަށް މުޖުތަމައުގައި ކުރެވެމުން އައި "ހަނގުރާމައެއް" މިހާރު މިވަނީ ކާމިޔާބު ވެފައި ކަމަށްވެސް ބެލިދާނެއެވެ. އެހެންކަމުން، ހިކިމީހުން މިހާރު އަޅުގަނޑުމެންގެ މާހައުލުން ފެނުމަކީ ހައިރާންވާން ޖެހޭ ކަމެކޭ ވެސް ހިތަށް އަރާފަހަރު އާދެއެވެ.
ފަލަވުމާއި ބެހޭގޮތުން ދާދިފަހުން އެމެރިކާގެ އަލަބާމާ ޔުނިވަރސިޓީގައި ކުރެވުނު ދިރާސާއެއްގެ ތަފްސީލު ހިއްސާކޮށްލާނަމެވެ. ދިރާސާގައި ކުރެވުނު މައިގަނޑު ސުވާލަކީ ފަލަވުމަކީ ވާރުތަވާ ކަމެއްބާއެވެ؟ މިގޮތުން މީދާތައް ބޭނުން ކޮށްގެން ކުރެވުނު މިދިރާސާގައި ފަލަމީދަލަށް ލިބޭ ދަރިންވެސް ފަލަތޯ ނުވަތަ ނޫންތޯ ތަހްލީލް ކުރެވުނެވެ. ދިރާސާގެ ނަތީޖާ ދެއްކިގޮތުގައި ފަލަ އަދި ހެލިފެލިވުން ކުޑަ މީދާތަކަށް ލިބޭ ދަރިންވެސް ފަލައެވެ. އަދި މިފަދަ މީދާތައް ފަލަވާ މިންވަރު އެއްޖީލުން އަނެއްޖީލަށް ނިސްބަތުން ބޮޑުވަމުން އައި ކަންވެސް ދިރާސާވެރިންނަށް ފާހަގަ ކުރެވުނެވެ. މިކަމަށް ހެކިދޭ ގިނަގުނަ އެހެން ދިރާސާތަކާއި ހެކިވެސް އެބަހުއްޓެވެ.
މިކަމާއި ގުޅޭގޮތުން ސައިންސްވެރިންގެ ފަހުގެ ވިސްނުންތަކުން ހާމަވަނީ ދަރިއަކު މަންމައެއްގެ ބަނޑުތެރޭގައި ބޮޑުވަމުން އަންނަ ދުވަސްވަރު އެމައިމީހާ ކައިބޮއެ އުޅޭ ގޮތާއި ހެލިފެލިވުމުގައި ގެންގުޅޭ ވައްޓަފާޅިއަކީ އެދަރިފުޅުގެ އުމުރަށް ދެމިގެންދާ ފަދަ ގޮތަކަށް އޭގެ އަސަރު ދަރިފުޅަށް ކުރާކަމެއް ކަމުގައެވެ. މިގޮތުން، މައެއްގެ ހަށިގަނޑުގައި ހުންނަ ސަރުބީގެ މިންވަރާއި އެމައިމީހާ ހެލިފެލިވެ އުޅޭމިންވަރާއި އެމައިމީހާއަށް ލިބޭ ދަރިންނާއި އަދި ކުރިއަށް އަންނާނެ ޖީލުތަކުގައި އެދަރިންނަށް ލިބޭނެ ދަރިންގެ ގައިގައި ހުންނާނެ ބަރުދަނުގެ މިންވަރާއި ގާތް ގުޅުމެއް ވާކަމަށް ކަމާބެހޭ ތަޖުރިބާކާރުން ގަބޫލު ކުރެއެވެ. ފަހަކަށް އައިސް މުޖްތަމައުގައި ފަލަމީހުން ނިސްބަތުން ގިނަވަމުންދާ ކަމުގެ މައިގަނޑު އެއް ސަބަބަކީ މިއެވެ.
މާބަނޑު މީހަކު ހެލިފެލިވެ އުޅޭ އުޅުމުގައި އޭނާ ކުރާމަސައްކަތުގެ ސަބަބުން ކާތަކެތިން ލިއްބައިދޭ ހަކަތަ ހަށިގަނޑުގެ ތަފާތު ހިސާބުތަކަށް އެންމެ އެދެވޭ ގޮތަށް ވާސިލުކޮށްދޭން ބާރު އަޅައެވެ. މިއާއި ހިލާފަށް ހެލިފެލިވެ އުޅުން ދަށްވުމުން އެހަކަތައިގެ އަސަރުތައް އާދަޔާ ހިލާފަށް ބޮޑަށް ދަރިފުޅަށް ފޯރައެވެ. ނަތީޖާއަކަށްވަނީ ދަރިފުޅު މައިމީހާގެ ބަނޑުގައި އޮވެގެން އާދަޔާ ހިލާފަށް ބޮޑުވުމެވެ. މީގެ ނަތީޖާއަކަށް ވަނީ ދަރިފުޅުގެ މުޅި އުމުރަށް އޭނާ ފަލަވުމާއި ހަކުރުބަލިފަދަ ބަލިތަކަށް މަގު ފަހިވުމެވެ. އަދި މިއީ އެއްޖީލުން އަނެއް ޖީލަށް ވާރުތަވާ ކަމެއްކަންވެސް ފާހަގަ ކުރެވެއެވެ.
މިކަމާއިގުޅޭ ސީދާ ތަފްސީލު ދިރާސާތަކެއް ރާއްޖޭގައި ހެދިފައި ނެތަސް ދުނިޔޭގެ އެހެންކަންކޮޅުތަކުގައި ކުރެވިފައިވާ ދިރާސާތަކުން މިކަމަށް ހެކިދެއެވެ. މިސާލަކަށް 1956 އާއި 2010 ވަނައަހަރާއި ދެމެދު އެމެރިކާގައި އަންހެނުން ޓީވީ ކުރިމަތީގައި ވަގުތު ހޭދަކުރި މިންވަރު ދެގުނައަށް ވަނީ ބޮޑުވެފައެވެ. އަދި ނިސްބަތުން ބަލާއިރު އެމެރިކާގައި ދިރިއުޅޭ ފަލައަންހެނުން ސިއްހަތަށް ފައިދާކުރަނިވި ކަސްރަތެއް ފަދަ ކަމެއް އެކުލެވޭ ހެލިފެލިވުމެއްގައި މަޝްއޫލު ވަނީ އަހަރަކު އެންމެ އެއްގަޑި އިރު ކަމަށް ފާހަގަ ކުރެވެއެވެ. ތަފާސްހިސާބުތަކުން ދައްކާގޮތުން 1970 ގެ ފަހުން އެމެރިކާގައި މައިންނަށް ލިބޭ ދަރިންގެ ސައިޒު ބޮޑުކަމުން ގުދުރަތީ ގޮތުން ވިހަން އުނދަގޫވެ ބަނޑު ފަޅައިގެން ވިއްސަން ޖެހޭ އަދަދު ވަނީ ނިހާޔަތަށް ބޮޑުވެފައެއެވެ.
ކުރީގައިވެސް ފާހަގަ ކުރެވުނު ފަދައިން ފާއިތުވި ފަންސާހަކަށް އަހަރުތެރޭގައި އިންސާނުންގެ ކެއުމުގެ ވައްޓަފާޅިއަށާއި އަދި ހެލިފެލިވެ އުޅޭ މިންވަރަށް ބޮޑު ބަދަލުކެއް ވަނީ އައިސްފައެވެ. ހުދު އަޅުގަނޑުމެންގެ ރާއްޖެއަށް ބެލިކަމުގައިވިއަސް މިކަން ދޭހަވެއެވެ. އޭރުގެ އަންހެންވެރިންގެ ދިރިއުޅުމުގައިވެސް ހެލިފެލިވެ އުޅުން އެއީ އާންމު ކަމެކެވެ. ދަރުހޮވަން ވަލަށްގޮސް އުޅުމާއި، ގޭގެ މަސައްކަތް ކުރުމާއި ދަރިން ބަލައިބޮޑުކުރުމުގައި ތަފާތު ގޮތްގޮތަށް ގިނަގިނައިން ހެލިފެލިވެ އުޅެން ޖެހެއެވެ. ފިރިހެންވެރިންގެ ދިރިއުޅުމަށް ބެލިއަސް މިކަން އޭރު އޮތީ މިފަދަ ހަމައެއްގައެވެ. މިސާލަކަށް ފަލިދޯނީގައި ކުރެވުނު މަސްވެރިކަމާއި ގެދޮރު ބިނާކުރުމުގައި އޭރު ފިރިހެންވެރިންގެ ހެލިފެލިވުމުގެ މިންވަރު މިހާރަށްވުރެން އެތައް ގުނައެއް ބޮޑެވެ.
އެހެންކަމުން، ރާއްޖޭގައިވެސް އެއްދުވަހުން އަނެއްދުވަހަށް ފަލަމީހުން ގިނަވަމުންދާ ކަމީ ގަބޫލުކުރަން ޖެހޭ ހަގީގަތެކެވެ. މީގެ ސަބަބުން ނޭދެވޭ އެތައް ބައިވަރު ސިއްހީ މައްސަލަތަކެއް ދިވެހިންނަށް ކުރިމަތި ވެއެވެ. އަދި ގިނަ ގޮތްގޮތުން ދިރިއުޅުމުގައި ހިތާމަތަކާއި ކުރިމަތިލާން އަޅުގަނޑުމެން ދިވެހިންނަށްވެސް މިހާރު ވަނީ ޖެހިފައެވެ. މިއީ އަޅުގަނޑުމެން ފުންކޮށް ވިސްނަން ޖެހޭ ނުކުތާއެއްކަން ކަށަވަރެވެ. ހާއްސަކޮށް މާބަނޑު އަންހެނުން މިކަމާއިމެދު ދުރާލާ ވިސްނުމަކީ ވަރަށް މުހިންމު ކަމެކެވެ.
ނޯޓް: މިއީ ޕްރޮފެސަރ ޑރ.ހަސަން އުގެއިލް ލިޔުއްވައިފައިވާ އަދި ހަވީރުގައި ޝާއިޢުކޮށްފައިވާ ލިޔުމެކެވެ.
