ހުޅުމާލޭގައި ހުންނަ ރަށު މާރުކޭޓަކީ ބަލާބެލުމަށް ވަރަށް ރީތިކޮށް ހަދާފަ ހުންނަ ސާފުތާހިރު މާރުކޭޓެކެވެ. ގިނަ އަދަދެއްގެ އަންހެނުންނާއި ފިރިހެނުން ވެސް މާރުކޭޓު ގޮޅިތަކުގައި އެއްޗެހި ވިއްކުމުގައި ހަރަކާތްތެރިވާއިރު، މި މާރުކޭޓަކީ މާލޭގެ ދަތުރުވެރިންގެ މާރުކޭޓަށްވުރެ ތަފާތު ގިނަ ބާވަތްތައް ތާޒާކަމާއެކު ލިބެންހުރި މާރުކޭޓެކެވެ.
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މައުލޫމާތުދޭގޮތުގައި ރަށު މާރުކޭޓުގައި 62 ގޮޅި ހުރިއިރު އޭގެތެރެއިން 53 ގޮޅި ޚާއްސަ ކޮށްފައިވަނީ ތާޒާ ކަނޑުމަހާއި، ކެއުމަށް ބޭނުންކުރާ ބާވަތްތައް ވިއްކުމަށެވެ.
އަދި 9 ގޮޅި އަކީ ކުދި އަދި މެދުފަންތީގެ އެހެނިހެން ވިޔަފާރި ހިންގުމަށް ދޫކޮށްފައިވާ ގޮޅިތަކެވެ.
ވިއްކޭ ބާވަތްތަކާއި ވިއްކުމުގައި އަމަލުކުރަންޖެހޭ ގޮތް
- ވިއްކާ ބާވަތްތައް ހުންނަންވާނީ ކަނޑާ ސާފުކޮށްފައި ވަކި ފިނިހޫނު މިނެއްގައި ތާޒާކަމަށް އަސަރު ނުކުރާގޮތަށެވެ.
- ގޮޅިތެރޭގައި މަސް އަދި އެހެނިހެން ތަކެތި ކަނޑާ ސާފުކޮށްހެދުމަކީ މަނާކަމެކެވެ.
- މޭވާ އާއި ތަރުކާރީ، ފަލަމަޑީގެ ބާވަތްތައް ހުންނަންވާނީ ދޮވެ ސާފުކުރެވިފައެވެ. އަދި ކުނިވެފަ ހުންނަ އެއްވެސް ބާވަތެއް ނުބެހެއްޓޭނެއެވެ.
- ފަޅާފައި ހުންނަ މޭވާ އާއި ތަރުކާރީ އަދި ފަލަމަޑީގެ ބާވަތްތައް ހުންނަންވާނީ ރަނގަޅަށް ބަންދުކޮށްފަ އަދި ނޭދެވޭ އަސަރު ނުކުރާނެ ގޮތަކަށެވެ.
- ގޮޅިތަކުގައި ވިއްކާ ބާވަތްތައް ގެންގުޅުމާއި ވިއްކުމުގައި އަމަލު ކުރަންވާނީ ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ ގަވާއިދު " ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަނޑުތައް ބަޔާންކުރާ ގަވާއިދު" ގައި ބަޔާންކޮށްފައިވާ މިންގަނޑުތަކާއި އެއްގޮތަށެވެ.
ފަންނުވެރިންގެ އުފެއްދުންތަކުގެ ގޮޅި
މިއީ ދިވެހި ފަންނުވެރިންގެ އުފެއްދުންތަކަށް ޚާއްސަ 3 ގޮޅި އެވެ. މި ގޮޅިތައް ހިންގުމަށްޓަކައި ބިޒްނަސް ސެންޓަރ ކޯޕަރޭޝަން (ބީސީސީ) އާއި ވަނީ ހަވާލުކޮށްފައެވެ.
ސްވެނިއަރ ގޮޅި
މިގޮޅީގައި ވިއްކޭ ބާވަތްތަކުގެ ތެރޭގައި ދިވެހިން އުފައްދާ ތަކެތީގެ ތެރޭގައި ހިމެނޭ، ކުރެހުންތައް، އެމްބްރޮއިޑަރީގެ އުފެއްދުންތައް، ހުރިހާ ވައްތަރެއްގެ ސްވެނިއަރގެ ބާވަތްތައް ހިމެނެއެވެ.
ދެވަނަ ފަހަރަށް ބޭނުންކުރެވޭ ތަކެތީގެ ގޮޅި
މިއީ ގޭގައި މަސައްކަތްކުރާ ފަރާތްތަކާއި، ކުދި އަދި މެދުފަންތީގެ ވިޔަފާރިކުރާ ފަރާތްތަކަށް ޚާއްސަކޮށް ދެވަނަ ފަހަރަށް ބޭނުންކުރެވޭ ތަކެތި ނުވަތަ 'ސެކަންޑް ހޭންޑް' މުދާ ވިއްކުމަށް ޚާއްސަކޮށްފައިވާ 2 ގޮޅިއެވެ.
މިގޮޅީގައި ވިއްކުމަށް ހުއްދަ ދޫކޮށްފައިވާ 3 ކެޓަގަރީގައި ހިމެނެނީ، ކަރަންޓްސާމާނު، ގޭގައި ހިފާގެންގުޅޭ ސާމާނު އަދި ފޮތްފަދަ ތަކެއްޗެވެ. ޒީނަތްތެރިވުމަށް ބޭނުންކުރާތަކެތީގެ އިތުރަށް ދުވަސްވީ ސަގާފަތާއި ތާރީޚާއި ގުޅުންހުރި ތަކެތި ވެސް ވިއްކުމަށް ވަނީ ހަމަޖެހިފައެވެ.
ދިރޭތަކެއްޗަށް ދޭ ކާނާ ވިއްކާ ގޮޅި
މިއީ އޮޅުކޮށްގެން ގެންގުޅޭ އެކި ބާވަތުގެ ޖަނަވާރަށް ކާންދޭތަކެތި އަދި އެއާއި ގުޅުންހުރި ތަކެއްޗާއި ދިރޭ މަސް ވިއްކުމަށް ކަނޑައަޅާފައިވާ ގޮޅިއެވެ.
އިމްޕޯޓް މުދާ ވިއްކުމަށް ހާއްސަކޮށްފައިވާ 2 ގޮޅި
މި ގޮޅިތަކުގައި ރާއްޖެ އެތެރެކުރާ ޕެކެޓް، ދަޅު، ފުޅި އަދި ކަޕްގައި ބަންދުކޮށްފައި ހުންނަ ކާބޯތަކެތި ވިއްކޭނެއެވެ. ހެދިކާގެ އިތުރަށް ހަނޑޫ ހަކުރު، ފުށް ވެސް ވިއްކޭނެއެވެ. އެކަމަކު ހަނޑޫ ފަދަ ބާވަތްތައް ހުންނަންވާނީ 1 ކިލޯ އަށް ވުރެ ގިނަ ނުވާނެހެން ޕެކެޓްގަ ބަންދުކޮށްފައެވެ.
ކޮވިޑްގެ ހާލަތާއި ގުޅިގެން ދިމާވެފައިވާ ކަންބޮޑުވުންތައް
ކޮވިޑްގެ ހާލަތު ގޯސްވެ މާލެ ސަރަހައްދު ފުރަބަންދު ކުރިއިރު ހުޅުމާލޭގެ މި މާރުކޭޓުގެ ވިޔަފާރި ވެސް ވަނީ ހުއްޓުމަކަށް އައިސްފައެވެ. މަދު ގަޑިތަކެއްގައި ބައެއް ގޮޅިތައް ހުޅުވިކަމުގައިވިއަސް ވިޔަފާރި އަށް އެއިރު ލިބުނު ގެއްލުމުން ވިޔަފާރިވެރިން އުޅެނީ އަރައި ނުގަނެވިގެންނެވެ.
'ޒީޓައިމްސް' އިން ކުރި ސުވާލުތަކަށް ޖަވާބުދެމުން މާރުކޭޓު ގޮޅި ހިންގަމުން އަންނަ ބައެއް މީހުން ބުނީ ކޮވިޑްގެ ހާލަތުގައި ގޮޅީގެ ކުލީގެ ގޮތުގައި ދައްކަންޖެހޭ އަގު ބޮޑުކަމަށެވެ. އަދި ދިވެހިންގެ އަތްމަތި ދަތި ދުވަސްވަރެއްގައި އަގު ކުޑަކޮށްދިނުމަކީ އެމީހުންގެ އެދުމެކެވެ. މިހާރު ކުލީގެ ގޮތުގައި ދައްކަންޖެހެނީ މަހަކު 3500 ރުފިޔާ އެވެ.
ދިވެހިންގެ އަތްތެރި މަސައްކަތްތައް ދައްކުވައިދޭ ތަކެތި ވިއްކުމަށް ޚާއްސަކޮށްފައިވާ ގޮޅިއާއި ހަވާލުވެހުރި މީހަކު މައުލޫމާތުދިންގޮތުގައި އެގޮޅީގައި ހުރީ ރާއްޖޭގެ އެކި ރަށްރަށުގެ މީހުންގެ އުފެއްދުންތަކެވެ. ދިވެހި ތުނޑު ކުނަލުގެ އިތުރަށް ލިޔެލާޖެހި ތަފާތު ބާވަތްތައް ހުރިއިރު މިތަކެތީގެ ޑިމާންޑް އެހާ ރަނގަޅެއް ނޫނެވެ. ކޮވިޑްގެ ހާލަތާއި ގުޅިގެން ހުޅުމާލޭގެ ގެސްޓްހައުސްތަކަށް ފަތުރުވެރިންނަށް ނާދެވި ގިނަދުވަސްތަކެއް ހޭދަވުން މިއީ މިފަދަ ތަކެތި ނުވިކޭ އެއްސަބަބު ކަމަށް ވެދާނެއެވެ. މާރުކޭޓު ގޮޅީގައި ހުރެ ގިނަދުވަސްވެ ތަކެތީގެ ކޮލިޓީއަށް އަސަރުކޮށްފައިވާ މަންޒަރު ވަނީ ފެނިފައެވެ. ހުޅުމާލޭގެ ގެސްޓްހައުސްތަކަށް ގިނަ އަދަދެއްގެ ފަތުރުވެރިން އަންނަން ފަށައިފައިވާއިރު މިތަކެތި ވިއްކާ މީހުންގެ އުންމީދަކީ ވިޔަފާރި މިހާރަށްވުރެ ރަނގަޅުވުމެވެ.
ނިންމުން
ހުޅުމާލޭގެ އާބާދީ ދުވަހެއް ދުވަހަކަށް އިތުރުވަމުންދާއިރު، ހުޅުމާލޭގައި ހަމައެކަނި ހުރި ލޯކަލް މާރުކޭޓުކަމުގައިވާ 'ރަށު މާރުކޭޓު' ވެގެންދާނީ ކުރިއަށްއޮތްތާގައި ވަރަށްގިނަ އަދަދެއްގެ މީހުން ވިޔަފާރިކުރާ މާރުކޭޓެއްގެ ގޮތުގައި ކަމަށް ބެލެވެއެވެ. މި މާރުކޭޓުގެ ގޮޅިތައް ހުޅުވިފައި ހުންނާނީ ކޮންމެ ދުވަހެއްގެ ހެނދުނު 06:00 އިން ރޭގަނޑު 23:00 އަށެވެ. މި ނޫން ވަގުތުތަކުގައި ވިޔަފާރި ކުރުމަކީ މަނާކަމެކެވެ.
މާރުކޭޓުގައި އެއްވެސް މައްސަލައެއް ދިމާވެއްޖެނަމަ އެމައްސަލައެއް އެޗްޑީސީގެ ސަމާލުކަމަށް ގެނައުމަށް އެކޯޕަރޭޝަނުން ވަނީ އެދިފައެވެ.
