އަހަރެން އަނެއްކާވެސް ވާހަކަދެއްކީމެވެ. އެކޮޅުން އަޑު އިވެނީ ގިސްލަ ގިސްލާފައި ރޯއަޑެވެ. އަހަރެން އަހާލީމެވެ. ތީ ކޮންބޭފުޅެއް؟ 'އަހަރެން މިހޯދަނީ އަހަރެންގެ ދަރިފުޅު ނާޒިމް. އަހަރެން ބޭނުންވަނީ އެދަރިފުޅު ކޮބައިތޯ ބަލަން'.... އެހިސާބަށް ވާހަކަ ދިޔަތަނާ ނާޒިމްގެ ލޯ ތޮޅެލިތަން ފެނުނެވެ. އަހަރެންގެ ހިތް އަވަސްވާން ފެށިއެވެ. ކުއްލިއަކަށް ނާޒިމް އެނދުން ފައިބަން މަސައްކަތް ކުރިއެވެ. އަހަރެންގެ އަތުން ފޯނު ވެއްޓުނެވެ. އޭރުވެސް ފޯނުން ހަލޯ އޭ ކިޔާއަޑު އިވެއެވެ.

އަހަރެންގެ ސަމާލުކަން ހުރީ ނާޒިމް އާއި ދިމާލަށެވެ. ބާރު ބާރަށް ނަރުސް ކުއްޖާއަށް ގޮވާލީމެވެ. ނާޒިމްގެ ހަޅޭކުގެ އަޑުން މުޅި ހޮސްޕިޓަލު ގުގުމާލިއެވެ. ނަރުސް ކުއްޖާ ފެނުމާއެކު ނާޒިމް އިތުރަށް ރުޅިގަދަވާން ފެށިއެވެ. ކަލޭމެން ތިއުޅެނީ އަހަރެން މަރާލަންތަ؟ މިހެން ބުނެފައި ނާޒިމްގެ އަތުގައި ގުޅާފައި އިން އައިވީ ނައްޓާލަން މަސައްކަތް ކުރިއެވެ. އަހަރެންނާއި ނަރުސް ކުއްޖާއަށް ވެސް ނުހިފެހެއްޓިގެން އިތުރު  ދެނަރުހުންވެގެން ނާޒިމް މައިތިރި ކުރެވުނީ ވަރަށް ހާލުންނެވެ. އިރުގަނޑެއްފަހުން އަނެއްކާވެސް ނާޒިމްއަށް ނިދިއްޖެއެވެ. އިރުކޮޅެއްވީތަނާ ބައްޕަ އައިސްވަނެވެ. ބައްޕަގެ މޫނުމަތިން ފެންނަނީ ކަންބޮޑުވުމުގެ އަސަރުތަކެވެ. ބައްޕަ އައުމުން އަހަރެން ގެއަށް ދިއުމަށް އަވަސްވެގަތީމެވެ. 4 ކުދިން ގޮވައިގެން މަންމަ އުޅޭނެ ހާލެއްވެސް ނޭނގެއެވެ.

އަހަރެންގޮސް ގެއަށް ވަނުމާއެކު ކުދިން އެއްފަހަރާ "ބައްޕަ ކޮބާތަ. ބައްޕައަށް ކިހިނެއްވީތަ އަޅެ.... މިހެން އެހުމުން އަހަރެންނަށް ދޭނެ ޖަވާބެއް ނޭނގިފައި ހުރެވުނެވެ. އަހަރެންގެ މޫނުމަތީގައި ހުރި ހާސްކަން ފޮރުވަން މަސައްކަތް ކުރިނަމަވެސް އެކުދިންގެ ބައްޕައަށް ވަރަށް ބޮޑު ކަމެއްވެގެން އުޅޭކަން އިހުސާސްވެއްޖެއެވެ. އަހަރެންގެ ހިތުތެރޭގައި އުތުރި އަރަމުންދާ އުދާސްތައް ފޮރުވަން މަސައްކަތް ކުރިނަމަވެސް އަހަރެންގެ ޒަމީރު އެކަމަކަށް ތަނެއް ނުދެއެވެ. ނާޒިމްގެ ހަގުދަރިފުޅު އަލްޔާ ފެނިފައި އަހަރެންނަށް ރޮވެން ފެށުނެވެ. "ބައްޕީ ބައްޕީ" ކިޔާފައި ރޯއަޑު އިވެމުންދާއިރު އެއަޑު އަހަން އަހަރެންނަށް ކެތްކުރަން ދަތިވިއެވެ. އެކުޑަ މައުސޫމު ކުއްޖާއަށް މިއަދު ވިސްނޭނީ ކޮންއެއްޗެއްބާއެވެ.

Advertisement

ފާޚާނާއަށް ވަދެ ފެންވަރާލައިގެން އައިސް އަހަރެން މަސައްކަތް ކުރީ އަލްޔާ ލޮއްސާށެވެ. އިރުގެ ދޯދިތައް އިރުއޮއްސުމާދިމާލަށް ދަތުރުކުރަމުންދާ ރީތި މަންޒަރު ފެންނަމުން ދިޔަނަމަވެސް އަހަރެންގެ ހަޔާތް ފެންނަމުން ދަނީ ބަނަ ބޯކަޅުވިލާގަނޑެއް ފަދައިންނެވެ. ޚިޔާލުތަކެއްގެ ތެރެއަށް ގެއްލިފައި ހުއްޓާ މަންމަ އައިސް އަހަރެންނަށް ކާން ގޮވިއެވެ. އަދި އަހަރެންގެ މޫނުމަތިން ފެންނަމުންދާ ހާސްކަމުގެ ސަބަބުން މަންމަ އައިސް ފިރުމާލާފައި ބުނެލިއެވެ. "ދަރިފުޅާއެވެ. ދެރަނުވާށެވެ. ދުނިޔެއަކީ އިމްތިހާނެކެވެ. އެކި ދުވަހު ދައްކާނީ އެކި ކުލައެވެ. ކެތްތެރިންނާއެކު ﷲ ވޮޑިގެންވެއެވެ. ދަރިފުޅާމެދު މީހަކު ގޯސްކޮށް ކަންތައް ކުރިކަމުގައި ވީނަމަވެސް ދަރިފުޅު ކައިރިއަށް އެހީއަކަށް އެދިގެން މީހަކު އައި ކަމުގައި ވަނީނަމަ އެކަމަށް އިންކާރު ނުކުރާށެވެ. މަންމަ ނެތް ދުނިޔެއެއްގައިވެސް ދަރިފުޅު މި 4 ކުދިން ބަލާށެވެ. މަންމަގެ އެ ނަސޭހަތްތައް އަޑުއަހާފައި އަހަރެންގެ ލޮލުން ކަރުނަ ފާއްދާލިއެވެ.

ހަގީގަތުގައިވެސް އަހަރެންގެ މަންމައަކީ ކެތްތެރި މީހެކެވެ. އެހާމެ އޯގާތެރި ހިތްހެޔޮ މީހެކެވެ. ދެމައިން ވާހަކައިގައި ތިއްބާ އަހަރެންގެ ހަގު ދަރިފުޅު އައިސް ބުނެފިއެވެ. "މަންމާ އަލްޔާ ކޮއްކޮއާއި ހާޒިމް ކޮއްކޮގެ މަންމައަކީ މީގެފަހުން އަޅުގަނޑުމެންގެ މަންމަ ދެއްތޯ"؟ އަހަރެންނަށް އަހާލެވުނެވެ. ކިހިނެއްވީ ދަރިފުޅާ.. އަހަރެން މީ ހަމަ ތިހުރިހާ ކުދިންގެވެސް މަންމައޭ.... އަނެއްކާވެސް އަހަރެންގެ ހަގު ދަރިފުޅު ނާއިލް ބުނެލިއެވެ. "ހާޒިމް ކޮއްކޮ ބުނީ އެކުދިންގެ މަންމަ އަކީ ވަރަށް ގޯސް މަންމައެކޯ... ގޯސް މަންމައިން ތިބޭނެތަ މަންމާ." އަހަރެން ވާހަކަ އޮޅުވާލަން މަސައްކަތް ކުރީމެވެ. އަދި ހުރިހާ ކުދިން ނަމާދުކޮށްލަން ދިއުމަށް ބުނެލާފައި އަހަރެން އަވަސްވެގަތީ އަލްޔާއަށް ކާންދިނުމަށް ފަހު ހޮސްޕިޓަލަށް ދިއުމަށެވެ.

ހޮސްޕިޓަލަށް ދިއުމަށްޓަކައި ގެއިން ނުކުތުމަށް ހިގައިގަތްތަނާ ފޯނު ރިންގްވާން ފެށިއެވެ. ފޯނު ކުރަނީ ހޮސްޕިޓަލުންނެވެ. ފޯނުނަގާފައި ހަލޯ އޭ ބުނެ ނުނިމި އުޅެނިކޮށް އިވުނީ "ސަހާ ވަރަށް އަވަހަށް" މިހެން ބުނި އަޑު އިވިފައި ފޯނު ކެނޑިއްޖެއެވެ. ދުން ޖަހާފައި ހޮސްޕިޓަލަށް ވަން އިރު ކަމަކުދާކަށް ނެތެވެ. ނާޒިމްގެ މުޅި ގައި އެހުރީ ލޭކޮށާލާފައި ހުރި ކުކުޅެއް ހެންނެވެ. އެމަންޒަރު ފެނިފައި އަހަރެންނަށް ރޮއިގަނެވުނެވެ. ޑޮކްޓަރވެސް ހުރީ ހަދާނެގޮތް ހުސްވެފައެވެ. މުޅި މީހާ ގައިގައި އަމިއްލައަށް ވަކި އަޅާގޮސް އެވަނީ ލޭކޮށާލާފައެވެ. ނާޒިމަށް ވަމުންދާގޮތް ފެނިފައި އަހަރެން ބިރުގަންނަން ފެށިއެވެ. އަހަރެން ދިއުމުން ބައްޕަވެސް ދެރަވެފައި ރޯން ފެށިއެވެ. "ދަރިފުޅާ ސަހާ.. ބައްޕައަށް ހީވަނީ ނާޒިމަށް މިވާގޮތެއް ބަލަން ހޮސްޕިޓަލުގައި ބޭއްވުމަށްވުރެ ގެއަށް ގެންގޮސްގެން ފަރުވާކުރުން މާރަނގަޅު ވާނެހެން..." އެހިސާބަށް ބުނިތަނާ އަހަރެންނަށް ބުނެވުނެވެ. "ގޭގައި ފަރުވާ ކުރާނީ ކާކު" ... " ފަންޑިތަ ހަދާ މީހަކު ގެނެސްގެން ނާޒިމަށް ފަރުވާ ކުރަން ބައްޕައަށް ވަރަށް ފެނޭ".... އަހަރެން ވަގުތުން އެކަމާ ދެކޮޅުހެދީމެވެ. އަދި ވަރަށް ނުރުހުންވެފައި ބައްޕައާއި ދިމާލަށް ބުނީމެވެ. "ބައްޕާ ފަންޑިތަ ހަދައިގެން ކިހިނެއް ރަނގަޅުކުރާނީ ސިކުނޑީގެ ބައްޔެއް" އަހަރެންނަށް ލަފާކުރެވޭ ގޮތުގައި ނާޒިމް އެވަނީ ސިކުނޑީގެ ބައްޔަކަށް ފަރުވާ ކުރަން ޖެހިފައެވެ. ފަންޑިތަ އަކީ އަހަރެން ގަބޫލު ކުރާ އެއްޗަކަށް ނުވާތީ އެކަމަށް އިންކާރު ކުރީމެވެ. އަހަރެންނާއި ބައްޕަ ވާހަކައިގައި ތިއްބާ ޑޮކްޓަރ އައިސް ވަނެވެ. އަދި ނާޒިމްއަށް ވަމުންދާގޮތް މޮނީޓަރ ކުރަމުންދާ ވާހަކައާއި އިތުރު ޓެސްޓުތައް ހެދުމަށް ބޭނުންވާކަމަށް ބުންޏެވެ. މިހާރު ނާޒިމަށް އެވަނީ ނިދާ އިންޖެކްޝަން ޖަހައިގެން ނިންދަވާފައެވެ.

ބައްޕަ ގެއަށް ދުރުވުމުން އަހަރެންވެސް ހޮސްޕިޓަލުގައި ނިދާލެވޭތޯ މަސައްކަތް ކުރީމެވެ. ރަނގަޅަށް ނުނިދޭތާ ދެރޭ ވެއްޖެއެވެ. ނާޒިމްގެ ގައިގެ ހަލާކުވެފައިވާ ހިސާބުގައި ކްރީމެއް އުގުޅާފައި އިތުރު ދެބޭހެއްވެސް ދިނެވެ. ނާޒިމަށް މިރޭ އެއޮތީ ވަރަށް ރަނގަޅަށް ނިދިފައެވެ. ނާޒިމްގެ ކުދިން ނާޒިމަށް ވީނުވީއެއް ނޭނގިގެން އަބަދުވެސް ޝަކުވާ ކުރާތީ އެކުދިންނަށް ދޭނެ ޖަވާބަކާއި މެދު އަހަރެން ވިސްނީމެވެ. އަހަރެންގެ ހިތުތެރޭގައި ޖަވާބު ނުލިބި އެތަކެއް ސުވާލުތަކެއް ފުނި ޖެހިފައި އެބަހުއްޓެވެ. ނާޒިމްގެ މަންމަވީ ތަނަކާއި ނާޒިމަށް މިހެން ދިމާވި ސަބަބެއްވެސް އޮޅުން ފިލާވަރެއް ނޫނެވެ. ނާޒިމްގެ ހާލު ފެނިފައި ކޮންމެ އިންސާނަކަށްވެސް އަސަރު ކުރާނެއެވެ. މިކަހަލަ ވިސްނުން ތަކެއްގެ ތެރޭގައި އިންދާ އަހަރެންނަށް ނިދުނު އިރެއްވެސް ނޭނގެއެވެ. ހޭލެވުނީ ކުޑަދޮރުން އިރުގެ ދޯދިތައް އައިސް ކޮޓަރިތެރެއަށް ފާއްދާލުމުންނެވެ. ގަޑި ބަލާލިއިރު 6 ގަޑި ތިރީސް ވަނީއެވެ.

މާގިނަ އިރުތަކެއް ނުވެ ޑޮކްޓަރ އައިސް ވަނެވެ. އޭރުވެސް ނާޒިމް އޮތީ ގަދަ ނިދީގައެވެ. ނާޒިމް ނިދާލާފައި އޮންނައިރުވެސް އެ މޫނުމަތިން ފެންނަނީ މާޔޫސް ކަމުގެ ކުލަވަރެވެ. އެފަކީރު އެހާލުގައި އުޅޭތާ ވީދުވަހެއްވެސް ނޭނގޭތާއެވެ. ޑޮކްޓަރ ބަލާފައި ނާޒިމްގެ އިތުރު ބްލަޑް ޓެސްޓްތަކެއް ހެދުމަށް ސާންޕަލް ނެގިއެވެ. އަދި ނާޒިމްގެ ސިކުނޑިއަށް ވަރަށް ބޮޑަށް އަސަރުކޮށްފައިވާ ކަމުގެ ނިޝާން ތައް ފެންނަމުންދާ ވާހަކަ ބުނެލިއެވެ. ނާޒިމްގެ މިބައްޔަކީ ކޮބައިކަން ދެނެގަންނަން އުދަގޫވާ ބައެއް ސަބަބުތަކެއް ހުރި ކަމަށް ޑޮކްޓަރވެސް ފާހަގަކުރިއެވެ. ނާޒިމަށް ވަމުންދާ ގޮތް ފެނިގައި ޑޮކްޓަރުންވެސް ކަންބޮޑުވާން ފަށައިފިއެވެ. ނަމަވެސް ޑޮކްޓަރ އަހަރެންނަށް ވަރަށް ހިތްވަރުދެއެވެ.

ނާޒިމް ނުހޭލާތީ ބޭރަށް ނިކުމެލަން ދޮރު ހުޅުވާލިތަނާ ކުއްލިއަކަށް ލަމްހާ އައިސް އަހަރެންގެ ގައިގާ ބައްދާލިއެވެ. ބުނާނެ އެއްޗެއް ނޭނގިފައި އަހަރެން ހުރީ އާޝޯޚުވެފައެވެ. " އަވަހަށް ސަހާއާއި ބައްދަލު ކުރުމަށް ކެތް މަދުވެގެން މިއައީ.. އަހަރެން ރަށަށް މިއައީ ރޭ ދަންވަރު.. ލަމްހާ ބުނެލިއެވެ. ލަމްހާ އެއައީ އޮސްޓްރޭލިއާގައި އުޅުމަށް ފަހުއެވެ. ދެމީހުން ވާހަކަގައި ތިއްބާ ޑޮކްޓަރ ގޮވާލިއަޑަށް އަވަސް އަވަހަށް ރޫމަށް ވަނީމެވެ. ނާޒިމް އޮތީ ލޯ ހުޅުވައިގެންނެވެ. ނަމަވެސް މާބޮޑު ވާހަކައެއް ނުދައްކައެވެ. އަހަރެން ފެނުމާއެކު އަތުގައި ހިފާލާފައި އެއްޗެއް ބުނަން މަސައްކަތް ކުރިއެވެ. ބުނަންއުޅޭ އެއްޗެއް އަހަރެންނަށް ސާފުވާ ގޮތް ނުވުމުން ކައިރިއަށް ޖެހިލާފައި ވާހަކަ ދައްކަން ފެށީމެވެ. "ކޮބާ އަހަރެންގެ ކުދިން... " ނާޒިމަށް ހަމައެކަނި ބުނެވުނީ އެންމެ ބަހެކެވެ. އަނެއްކާވެސް ރޮވެން ފެށިއެވެ.

ލަމްހާ ހުރީ ވާނުވާ ނޭނގިފައެވެ. ލަމްހާ އައުމުން އަހަރެންގެ ހިތަށް އިތުރު ހިތްހަމަޖެހުމެއް ލިބުނެވެ. ނާޒިމް އަނެއްކާވެސް ވާހަކަދައްކަން މަސައްކަތް ކުރިއެވެ. "ސަހާ އަހަރެން އެކަނިކޮށްލާފައި ނުދޭ.. އަހަރެންގެ ހަގު އަނބި އަހަރެންނަށް ދިންވަރުގެ އަނިޔާއެއް ނުދޭތި ޕްލީޒް.. ހެޔޮނުވާނެ... ނާޒިމަށް ރީއްޗަށް ވާހަކަދެއްކެން ފެށުމުން އަހަރެންގެ ހިތަށް ކުޑަ ހިތްހަމަޖެހުމެއް ލިބެން ފެށިއެވެ. އެހެންނަމަވެސް އަދިވެސް ނާޒިމްގެ އަސްލު ބަލި ދެނެގަނެވިފައި ނުވާތީ އެކަމާ ވަރަށް ކަންބޮޑުވެއެވެ. އަހަރެން ބޭނުންވަނީ ނާޒިމަށް ފަރުވާލިބި ނާޒިމްގެ ކުދިންނަށް ނާޒިމް ފެންނާނެ ވަގުތެކެވެ. އެކުދިން އަބަދުވެސް ނާޒިމް ހޯދަން ރޮއެވެ. އަދި ޚާއްސަކޮށް އަލްޔާއެވެ.

ރީތިކޮށް ވާހަކަދައްކާލާފައި ނާޒިމް އަނެއްކާވެސް ހަޅޭލަވަން ފެށިއެވެ. މިފަހަރު އެހެން އަޑަކުންނެވެ. ވަރަށް ބިރުވެރި އަޑަކުންނެވެ. އަހަރެންގެ މުޅި ގައިން ހީބިހި ނަގައިގެން ދިޔައެވެ. އެވަގުތަކީ ބައްޕައާއި ބައްޕަގެ އިތުރު ރައްޓެއްވެސް އައި ވަގުތެކެވެ. ބައްޕަގެ ރައްޓެހި ކުޑަތުއްތުބެ ނާޒިމަށް ވަމުންދާގޮތް ފެނިފައި ސުވާލު ކުރަން ފެށިއެވެ. " ނާޒިމް ކިހިނެއް ވަނީ. " ނާޒިމް ޖަވާބުގައި ބުނެލިއެވެ. ބޭބެ ތިއައީ އަހަރެން ބަލާ ދޯ. އެކުއްޖާ ކޮބާތަ.. އޭނަ އަހަރެންގެ ގެއަށްވެސް ހާދަ ގެއްލުމެއް ދީފިއޭ.... ދެންމެވެސް އެކުއްޖާ މިތާ ހުރި އައިސްފަ ބުނި ދެން އަހަރެން ދެން މިބަލިން ރަނގަޅެއް ނުވާނެއޯ...އެއީ ތެދެއްތަ ބޭބޭ.....  ނާޒިމް އެދައްކަނީ ކޮން ވާހަކައެއްކަން އަހަރެންނަށް ދޭހަ ނުވެގެން ބައްޕަގެ ރައްޓެހި ކުޑަތުއްތުބެ އާއި ސުވާލުކޮށްލީމެވެ. ކުޑަތުއްތުބެ ވަރަށް ވިސްނަން އިދެފައި ވާހަކަ ދެއްކިއެވެ. "ސަހާ... ނާޒިމު އެދައްކަނީ އޭނައަށް ގެއްލުންދިން ކުއްޖާގެ ވާހަކަ. އަހަރެންނަށް ހަމަ އެކަނި އެނގޭ އެއްޗަކީ އޭނާގެ ސިފަ ކިޔާދެން. ހަގީގަތުގައި ނާޒިމް މިތަނުގައި ބާއްވައިގެން ލިބޭނެ މާބޮޑު ފަރުވާލެއް ނެތް. މިކަމުގައި އަހަރެން ބުނާނީ ފަރުވާ ހޯދުމަށް ނާޒިމް ގެއަށް ގެންދިއުމަށް..... ކުޑަތުއްތުބެގެ ވާހަކަ އެހިސާބަށް ދިޔަތަނާ ނާޒިމުގެ އަގައިން ފޮނުތަކެއް އަރުވާފައި އަނެއްކާވެސް ހަޅޭލަވަން ފެށިއެވެ. މައްޗަށް ބަލަން އޮވެ ހޭންފެށިއެވެ...... އިރުގަނޑެއްވަންދެން މައްޗަށް ބަލަން އޮންނަށް ފެށުމުން އަހަރެން ބިރުގަންނަން ފެށިއެވެ. އަދި ކުޑަތުއްތުބެއާއި ދިމާލަށް ބުނެލިއެވެ. " ބޭބޭ އަހަރެންގޭގެ ބެލްކަނީގައި ހުންނަ މާގަސްދޮށަށް ގޮސްލާފައި އަންނަން ދޭބަލަ އެތަނުގައި އެކުއްޖާ އެބައިން އަހަރެންގެ އިންތިޒާރުގައި...... އެހިސާބުން އަހަރެން ހަގީގަތުގައިވެސް ބިރުގަންނަން ފެށިއެވެ. ނާޒިމުމެންގެ ބެލްކަނީގައި ހުންނަ މާގަހަކީ ވަރަށް މީރުވަސް ދުވާ މަލެއް އަޅާ ގަހެކެވެ.

 ކުޑަތުއްތުބޭ ވަގުތުން ފެންތައްޓެއް ނަގާފައި ކިޔަވަން ފެށިއެވެ. އަދި ފެންތަށި ކިޔަވާ ނިމުމަށްފަހު ނާޒިމުގެ ގަޔަށް ބުރުއްސާލިއެވެ. އިރުކޮޅެއްނުވެ ނާޒިމް ވާހަކަދައްކަން ފެށިއެވެ. "ސަހާ ކޮބާ އަހަރެންގެ ކުދިން. ކޮންއިރަކު އަހަރެން މިތަނަށް ގެނައީ.. މީ ހޮސްޕިޓަލެއްނު... ކޮންއިރަކު އަހަރެން ބަލިވީ.. ނާޒިމް ވާހަކަ ދެއްކިލެއް ތާޒާ ކަމާއި ރީތިކަމުން އަހަރެން ހުރީ ބުނާނެ އެއްޗެއްވެސް ނޭނގިފައެވެ. މީގެ ކުޑަ އިރުކޮޅެއް ކުރިން ނާޒިމް ފެނުނީ މުޅިން ތަފާތު ސިފައެއްގައެވެ. މިހާރު ނާޒިމްގެ މޫނުމަތިން ބަލީގެ އެއްވެސް އަސަރެއް ފެންނަން ނެތުމުން ހޮސްޕިޓަލުގެ ހުރިހާ އެންމެންވެސް ތިބީ ހައިރާންވެ އަންތަރީސްވެފައެވެ.

ނުނިމޭ...