ދުނިޔޭގެ ސަމާލުކަން ހުއްޓިފައިވަނީ ކޮވިޑް-19 ގެ އާ ވޭރިއަންޓް 'އޮމިކްރޯންގެ' ބިރަށެވެ. ކޮވިޑް-19 ޕެންޑަމިކާއި އެކު ބަންދުކޮށްފައިވާ ބޯޑަރުތައް ބައެއް ޤައުމުތަކުން ހުޅުވާލަން ފަށާފައިވަނީ އަދި ކިރިޔާއެވެ. އެ ގައުމުތަކުން ބޯޑަރު ހުޅުވާލިތަނާ އަނެއްކާވެސް ބަންދުކުރަން ޖެހޭވަރު ކަމެއް މެދުވެރިވީ އެވެ. އޮމިކްރޯން ވޭރިއަންޓުގެ ސަބަބުން މިހާތަނަށް 30 ވަރަކަށް ގައުމުން ވަނީ ބޯޑަރުތައް ބަންދުކޮށްފައެވެ. މީގެތެރެއިން ބައެއް ގައުމުތަކުން ބޯޑަރު ބަންދުކުރީ ބައެއް ގައުމުތަކުން އެތެރެ ނުވެވޭ ގޮތަށެވެ. ޗައިނާ، މޮރޮކޯ، ޖަޕާން އިން ވަނީ އެއްވެސް ގައުމަކުން އެގައުމަށް ދަތުރު ނުކުރެވޭހެން ބޯޑަރު ބަންދުކޮށްފައެވެ. އިސްރާއީލުންވެސް ވަނީ އެގައުމުގެ ރައްޔިތުން ފިޔަވާ އެހެން އެއްވެސް ބަޔަކަށް އެގައުމަށް އެތެރެ ނުވެވޭހެން ބޯޑަރުތައް ބަނދުކޮށްފައެވެ. އެގައުމުގެ ރައްޔިތުންގެ ވެކްސިން ފުރިހަމަ ކޮށްފައިވީ ނަމަވެސް ބޭރުގައުމަކުން އެތެރެވާނަމަ ކަރަންޓީނު ވާންޖެހެއެވެ.
މީގެ އިތުރުން އެންގޯލާ، އޮސްޓްރޭލިއާ، ބްރެޒިލް، ކެނެޑާ، މިސްރު، ފިޖީ، ފްރާންސް، ޖާމަނީ، އިންޑޮނޭޝިއާ، އިޓަލީ، ކުވޭތް، ދިވެހިރާއްޖެ، މަލްޓާ، ނެދަލޭންޑްސް، ނިއުޒިލޭޏްޑް، އޮމާން، ޕާކިސްތާން، ފިލިޕީންސް، ރަޝިއާ، ރުވަންޑާ، ސައުދީއަރަބިއްޔާ، ސިންގަޕޫރ، ސްރީލަންކާ، ތައިލޭންޑް، ތުރުކީ، އިނގިރޭސިވިލާތް، ޔޫއޭއީ އަދި އެމެރިކާއިން ވަނީ ދެކުނު އެފްރިކާގެ ޤައުމުތުން ފްލައިޓްތަކަށް ނާދެވޭހެން ވަގުތީ ގޮތުން ބޯޑަރުތައް ބަންދުކޮށްފައެވެ.
މިފަހަރު ދުނިޔޭން ކަންބޮޑުވެގެން މިއުޅޭ ނުރައްކާތެރި އާ ވެރިއަންޓެއް އުޅޭކަން އެނގުނީ ދެކުނު އެފްރިކާގެ 'ޓިސްވަނީ ޔުނިވާސިޓީ އޮފް ޓެކްނޮލޮޖީ'ގެ ގިނައަދަދެއްގެ ކުދިންތަކެއް އެއްފަހަރާ ބަލިވާން ފެށުމުންނެވެ. ކުރިން އަންދާޒާވެސް ކުރެވިފައި ނުވާ މިންވަރަކަށް އެ ޔުނިވާސިޓީގެ ދަރިވަރުންގެ ކިބައިން ކޮވިޑް ބަލި ފެންނަން ފެށުމުން ބައެއް އިމްތިހާނުތައް ފަސްކުރިއެވެ. އަދި އެސަރަހައްދުގެ މީހުން، ވަކިން ޚާއްސަކޮށް ޒުވާނުން ވެކްސިން ފުރިހަމަ ކުރުމަށް ޚާއްސަ ސަމާލުކަމެއް ދޭން އެންގިއެވެ. ދެކުނު އެފްރިކާގެ ސަރުކާރުން ވަނީ އެގައުމުގައި ބަލި ކޮންޓްރޯލު ކުރުމަށް އާ ފިޔަވަޅުތައް އަޅަން ފަށާފައެވެ. އެގައުމު ރައްޔިތުންގެ ތެރެއިން ގިނަބަޔަކު މާސްކު އަޅަން ހަނދާން ނައްތާލާފައިވަނިކޮށް އަނެއްކާވެސް މާސްކްއެޅުން މަޖުބޫރުކޮށް ރައްކާތެރިކަމުގެ ފިޔަވަޅުތައް އަޅަން ފަށައިފިއެވެ.
މިހާތަނަށް އޮމިކްރޯންގެ ކޭސްތައް ފެނިފައިވާކަމަށް ރިޕޯޓްކޮށްފައިވާ ގައުމުތަކަކީ ދެކުނު އެފްރިކާ، އޮސްޓްރޭލިއާ، އޮސްޓްރިއާ، ބެލްޖިއަމް، ބޮސްޓްވާނާ، ޑެންމާކް، ޗެކްރިޕަބްލިކް، އިސްރާއީލް، އިޓަލީ، ޖަޕާން، ނެދަލޭންޑްސް، ޕޯޗުގަލް، ސްޕެއިން، ސްވިޑަން އަދި އިނގިރޭސިވިލާތެވެ.
ދުނިޔޭގެ ސިއްހަތު ޖަމްއިއްޔާއިން އޮމިކްރޯން ކަނޑައަޅާފައިވަނީ ކަންބޮޑުވާހާ މިންވަރަށް ހަކުވިކަމާއެކު ފެތުރެމުން އަންނަ ވޭރިއަންޓެއްގެ ގޮތުގައެވެ. އަދި އޭގެ ރިސްކުތައްވެސް ދެނެގަނެވިފައި ނުވާ ވޭރިއަންޓެއްގެ ގޮތުގައެވެ. މިހާތަނަށް ބެލި ބެލުންތަކުން އެނގޭގޮތުގައި އޮމިކްރޯން ވޭރިއަންޓުން ކުރިން ކޮވިޑް ޖެހިފައިވާ މީހުންނަށްވެސް ބަލި ޖައްސައެވެ. މިއީ މިހާރުދޭ ވެކްސިންތަކަށް ގުޑާ ވޭރިއަންޓެއްތޯ ދެނެގަތުމަށްވެސް ހަފްތާތަކެއް ނަގާނެ ކަމަށް ދުނިޔޭގެ ސިއްހަތު ޖަމްއިއްޔާއިން ބުނެއެވެ.
ބައެއް ތަޖުރިބާކާރުން އުންމީދު ކުރާގޮތުގައި މިހާރު ކޮވިޑާއި ދެކޮޅަށް ދެވޭ ވެކްސިންތަކުން މި ވޭރިއަންޓް ބަލިކޮށްލެވޭނެއެވެ. އަދި ބަލީގައި ސީރިއަސްވާ މިންވަރު ކުޑަކޮށްދީ ބަލިޖެހިގެން މަރުވުމުގެ ފުރުސަތު ކުޑަކޮށްދޭނެއެވެ. އާ ވޭރިއަންޓް އެންމެ ހަލުވިކަމާއެކު ފެތުރެމުން އަންނަނީ ސައުތު އެފްރިކާގެ އެންމެބޮޑު ސިޓީ ޖޮހޮނަސްބާގް ގުއެންޓެން ޕްރޮވިންސްގައެވެ. އެންމެ ފުރަތަމަ އާ ވޭރިއަންޓްގައި ކޮވިޑް ޖެހިގެން ރިޕޯޓް ކުރަމުން އަންނަނީ ޒުވާނުންނެވެ. އެހެންނަމަވެސް ވެކްސިން ނުޖަހާ ތިބި އުމުރުން ދުވަސްވީ މީހުންނަށް މި ވޭރިއަންޓްގެ އަސަރު ކުރަން ފަށައިފިނަމަ އެގައުމުގެ ކަންކަން ވަރަށް ސީރިއަސް ހާލަތަކަށް އަންނާނެ ކަމަށް ބެލެވެއެވެ.
ދެކުނު އެފްރިކާގައި 18 އަހަރުން މަތީގެ މީހުންގެ ތެރެއިން ވެކްސިން ޖަހާފައިވަނީ 41 އިންސައްތަ މީހުންނެވެ. އޮމިކްރޯން ފެތުރޭ ސްޕީޑާއިމެދު ދެކުނު އެފްރިކާއަށް ވެސް ކުއްލި ޝޮކެއް ލިބިފައިވާއިރު އާ ވޭރިއަންޓެއް ފެނިގެން އުޅޭކަން ދުނިޔޭގެ ސިއްހަތު ޖަމްއިއްޔާއަށް އެންގީ ނޮވެންބަރު 23 ގައެވެ.
