ބަރުދަން ލުއިކުރުމަށް އެކި މީހުން އެކި އުކުޅުތައް ބޭނުން ކުރެއެވެ. ގިނަފަހަރަށް އޮންނަނީ ބޭނުންވާ ދުވެލީގައި ބަރުދަން ލުއިނުވާކަމުގެ ކަންބޮޑުވުމެވެ. އަދި ބަރުދަން ލުއިކުރަން ކުރާ މަސައްކަތް ކާމިޔާބު ނުވެގެން އަނެއްކާވެސް ކުރީގެ އާދަތަކަށް އެނބުރިދާ މީހުންވެސް މަދެއް ނޫނެވެ. އަވަހަށް ބަރުދަން ލުއިކުރުމަށް ބޭނުންވޭ ހެއްޔެވެ. މިއޮތީ ބަރުދަން ލުއިކުރުން އަވަސްކޮށްދޭނެ 8 ކަމެކެވެ. އަޖުމަ ބަލާލަބަލާށެވެ.
1. ގިނައިން ޕްރޮޓީން އެކުލެވޭ ނާސްތާއެއް ނެގުން
ހެނދުނުގެ ނާސްތާއަކީ ގިނަ އަދަދަކަށް އޭގައި ޕްރޮޓީންސް އެކުލެވޭ ނާސްތާއަކަށް ހަދާށެވެ. އޭރުން ދުވަހުގެ އެހެން ގަޑިތަކުގައި ކެއުމާއި ދުރުކޮށްދީ ހަށިގަނޑަށް އެތެރެވާ ކެލޮރީގެ މިންވަރު ދަށްކޮށްދޭން އެހީއަކަށް ވެއެވެ. ޕްރޮޓީންސް އެކުލެވޭ ބާވަތްތަކުގެ ތެރޭގައި ކުކުޅުބިހާއި، އެއްގަމު މަހާއި ކަނޑުމަސް އަދި ކަނޑުމަހުގެ ބާވަތްތަކާއި، ތަރުކާރީ ތޮޅި ފަދަ ތަކެތި ހިމެނެއެވެ.
2. ހަކުރު ހުންނަ ބުއިންތަކާއި މޭވާ ޖޫހާއި ދުރުހެލިވުން
ހަކުރު ހުންނަ ބުއިންތަކަކީ ބަރުދަން ލުއިކުރަން މަސައްކަތް ކުރާއިރު އެއްގޮތަކަށްވެސް ބޭނުން ކުރުން ރަނގަޅު ބުއިންތަކެއް ނޫނެވެ. އެފަދަ ބުއިންތަކުން ބަރުދަން ލުއި ކުރުމަށް ކުރާ މަސައްކަތަށް ހުރަސްއެޅެއެވެ. ވީމާ އަވަހަށް ބަރުދަން ލުއިކުރުމަށް ބޭނުންވާނަމަ މޭވާ ޖޫސްތަކާއި ހަކުރު އެކެލެވޭ ބުއިންތައް އެއްކޮށް ހުއްޓާލަން ޖެހެއެވެ.
3. ކޮންމެ މީލްއެއްގެ ކުރިން ފެން ބުއިން
ދިރާސާއަކުން ދައްކާގޮތުގައި ކެއުމުގެ ކުރިން ފެންބުއިމަކީ ކެލޮރީސް އެތެރެވާ މިންވަރު ދަށްކޮށްދޭ ކަމެކެވެ. ފެންބޮއެގެން ކާންފަށައިފިނަމަ ކެވޭ މިންވަރު މަދުވެ ހަށިގަނޑަށް އެތެރެވާ ކެލޮރީސް މަދުވާނަމަ މިއީ ބަރުދަން އެއްވަރެއްގައި ހިފެހެއްޓުމަށް ފަސޭހަވާނެ ގޮތެކެވެ. އަވަހަށް ހިކެންބޭނުންވާ ނަމަ މިއީވެސް ބޭނުން ކުރެވިދާނެ އުކުޅެކެވެ.
4. ބަރުދަން ލުއިކުރަން އެހީވެދޭ ކާނާ އިހްތިޔާރުކުރުން
ކާއެއްޗެހި އިހްތިޔާރު ކުރާއިރު ބަލަންވާނީ ބަރުދަން ލުއިކުރުމަށް އެހީވެދޭ ކާނާއަކީ ކޮބައިތޯއެވެ. ބައެއް ކާނާއަކީ ބަރުދަން ލުއި ކުރުމަށް އެހީވެދޭ ކާނާއެވެ. ބަރުދަން ލުއިކުރުމަށް އެހީވެދޭ ބައެއް ކާނާގެ ތެރޭގައި ބްރައުން ބިސް، ސްޕިނެޗް، ކޭލް، ބްރޮކޮލީ، ކޮލީފްލާވާ، ކެބެޖް، ސަލްމަން، ޗިކަން ބްރެސްޓް، ފެނުކެއްކި އަލުވި، ކަނޑުމަސް، ބީންސް، އެވަކާޑޯ، އެޕަލްސިޑާ ވިނެގާ، ގްރޭޕް ފުރުޓް، ޗިއާ ސީޑް އަދި ބަދަން ހިމެނެއެވެ.
5. ކޮފީ ނުވަތަ ސައި ބުއިން
ކެފެއިން އަކީ މެޓަބޮލިޒަމްރޭޓް އިތުރުކޮށްދޭ އެއްޗެއް ކަމަށް ހޯދުންތަކުން ދައްކައެވެ. އެހެންކަމުން އަވަހަށް ބަރުދަން ލުއިކުރަން ބޭނުންވާ މީހަކަށް މެޓަބޮލިޒަމް ބޫސްޓް ކުރުމަކީ ވެސް މުހިންމު ކަމެކެވެ. ކެފެއިން އަކީ މިކަމަށް އޮތް ބޮޑު އެހީއެކެވެ.
6. ޕްރޮސެސްޓް ކާނާގެ ބަދަލުގައި ހޯލް ފުޑް ބޭނުން ކުރުން
މިސާލަކަށް ބްރައުން ބްރެޑް، ރަތް ހަނޑޫ ކަހަލަ ބާވަތްތަކަކީ ސިއްހަތަށް ވަރަށް ފައިދާހުރި ބާވަތްތަކެކެވެ. އަދި ކުޑައެތިކޮޅަކުން ބަނޑުފުރެއެވެ. ވީމާ ތައްޔާރީ ކާނާ ފަދައިން ގިނައިން ކެވިދާނެ ކަމުގެ ބިރެއްވެސް ނެތެވެ. އަވަހަށް ހިކެން ބޭނުންވާނަމަ މިފަދަ ކެއުންތަކާ ރައްޓެހިވާށެވެ.
7. ލަސްލަހުން ކެއުން
ކެއިން ބުއިމުގައި އަވަސް އަރުވާލައިގެން އުޅޭނަމަ ބަރުދަން އިތުރުވުމަށް މަގުފަހިވެއެވެ. ލަސްލަހުން ކާނަމަ މީހާ އަވަހަށް ފުރޭހެން ހީވާނެއެވެ. އަދި ބަރުދަން ލުއިކޮށްދޭ ހޯމޯންސްތައް މަސައްކަތްކުރާ މިންވަރު އިތުރުވާން ފަށާނެއެވެ.
8. ކޮލިޓީ ރަނގަޅު ނިދި ލިބުން
ބައިވަރު ސަބަބުތަކަށްޓައި ނިންޖަކީ ވަރަށް މުހިންމު ކަމެކެވެ. ރަނގަޅަށް ނުނިދުމަކީ ބަރުދަން އިތުރުވުމަށް އޮތް އެންމެބޮޑު އެއް ސަބަބެވެ. އަވަހަށް ހިކެން މަސައްކަތް ކުރާއިރު އަރާމު ނިންޖެއް ނިދާލެވޭތޯ ބަލާށެވެ.
