ވަށައިގެން ފެންނަނީ އެކި އުމުރުފުރައިގެ މީހުންނެވެ. ބިޔަގަސްތަކުގެ ކައިރީގައި ބަހައްޓާފައި ހުރި ގޮޑިތަކުގައި އެއްބަޔަކު އިށީދެގެން ތިބިއިރު، ކުދިވެރިން ދުވެ ފުމެ މަޖާކުރުމުގައި އުޅެއެވެ. ދުޅަހެޔޮ ސިއްޙަތަކަށް ކަސްރަތުކުރުމުގައި ބައެއް މީހުން ބުރަކޮށް އުޅުނުއިރު، ބައިސްކަލާއި ސްކޫޓަރ ދުއްވުމުގައި ގިނަ އަދަދެއްގެ ކުދިން އުޅުނު މަންޒަރު ވަނީ ފެނިފައެވެ.

އުފަންދުވަހާއި ގްރެޖުއޭޝަން ފޮޓޯފަދަ ފޮޓޯ ޝޫޓްތައް ނެގުމުގައި ބައެއް މީހުން އުޅުނުއިރު، އެކިއުމުރުގެ ކުދިންތައް ތެމި ފޯރި ނަގަނީއެވެ. މިއީ ހުޅުމާލޭގައި ހުންނަ ސެންޓްރަލް ޕާކަށް ޒިޔާރަތްކުރުމުން ފެނުނު މަންޒަރުތަކެވެ. ފެންނަ ކޮންމެ މަންޒަރަކުން ވެސް އުފާވެރިކަން އިހުސާސްވެއެވެ. މިއީ ވެރިރަށް މާލެ ސަރަހައްދުގައި އޮތް އެންމެ ބޮޑު ޕާކެވެ. މި ޕާކަށް އިތުރު ފުރިހަމަކަމެއް ގެނެސްދިނީ މި ނޮވެންބަރު މަހު ހުޅުވި އިންޓަރެކްޓިވް ވޯޓަރ ފައުންޓެއިން (ފައްވާރު) ގެ ސަބަބުންނެވެ.

ސެންޓްރަލް ޕާކުގައި ހުރި ފައްވާރަކީ، މިއުޒިކާއި ލައިޓާއި އެއްވަރަށް ފެންގަނޑުގެ ހަރަކާތްތައް ޕްރޮގްރާމް ކުރެވިފައިވާ ޖުމްލަ 20 ހާސް އަކަފޫޓުގެ ޖާގައެއްގައި ހަދާފައިވާ ވަރަށް ހިތްގައިމު ފައްވާރެކެވެ.

Advertisement

" ހަރަކާތްކުރުމުގެތެރޭގައި ފެން 15 މީޓަރާއި ހަމައަށް ހިއްލޭނެ. މިވަގުތު ފައްވާރު ހުޅުވުމަށް ހަމަޖެހިފައިވަނީ ހުކުރު އަދި ހޮނިހިރު ދެދުވަހު ހަވީރު 4:00 އިން 5:45 އަށް. ބުރާސްފަތި، ހުކުރު، ހޮނިހިރު މި ތިންދުވަހު ރޭގަނޑު 8:00 އިން 10:00 އަށް. ސަރުކާރު ބަންދު ދުވަސްތަކުގައި ވެސް ހަވީރު އަދި ރޭގަނޑު ހުޅުވުމަށް ވަނީ ހަމަޖެހިފައި" ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މައުލޫމާތު ދިނެވެ.

ފައްވާރު ބޭނުންކުރުމުގައި ސަމާލުކަންދޭންވީ ކަންތައްތައް

• ވެއްޔާއެކު އެ ސަރަހައްދަށް ނޭރުން.
• އެކި ލަވަތަކުގައި ފެނުގެ ޕްރެޝަރު ތަފާތު ވާނެކަން.
• ބެލެނިވެރިން ކުޑަކުދިންނަށް ސަމާލުވުން.
• މި ސަރަހައްދަށް ކުނި ނޭޅުން.

އެކި އުމުރުފުރައިގެ ކުދިން ފައްވާރުން އަންނަމުންދިޔަ ފެނާ ތެމެމުންދިޔައިރު އެކުދިންގެ ބެލެނިވެރިން ދުރުގައި މަންޒަރު ބަލަންތިބިތަން ވަނީ ފެނިފައެވެ. ޕްރެޝަރުގައި ފެން އަންނައިރު ކުދިންނަށް ލިބިދާނެ ގެއްލުމަކަށް ސަމާލުކަން ދިނުމަކީ ވަރަށް މުހިންމުކަމެކެވެ.

ފައްވާރު ހުޅުވާފައި ހުންނަ ގަޑިތަކުގައި އެޗްޑީސީގެ ސުޕަވައިޒަރުން ޕާކު ސަރަހައްދު ބެލެހެއްޓުމަށް ހަރަކާތްތެރިވާނެއެވެ. އަދި ފައްވާރު ބޭނުންކުރުމާގުޅޭ މައުލޫމާތު ހިމެނޭ ބޯޑެއް ވަރަށް އަވަހަށް އެ ސަރަހައްދުގައި ހަރުކުރާނެކަމަށް އެޗްޑީސީ އިން ވަނީ މައުލޫމާތު ދީފައެވެ.

ފައްވާރަށް އޮތް ތަރުހީބު ފެނިގެންދަނީ ހުޅުވިފައި ހުންނަ ހުރިހާ ގަޑިއެއްގައި ވެސް އެސަރަހައްދު ފުރާލާފައިވާ މީހުންގެ އަދަދު ފެނުމުންނެވެ. ވަކި އުމުރުފުރައެއް ނެތެވެ. އެ ހިތްގައިމު މަންޒަރުން އުފާވެރިކަން ބައެއް މީހުން ހޯދަނީ ކުދިވެރިންނާއެކު ތެމިގެންނެވެ. އަނެއް ބަޔަކު ފަހަށް ރައްކާކުރާ ފޮޓޯ އާއި ވީޑިއޯނެގުމުގައެވެ.

" ފައްވާރު ދުރުން ފެނުނަސް އުފާވޭ. އެހާވެސް ރީތި އެކިކުލަތަކުން މިއުޒިކާއި އެއްވަރަށް ފެންގަނޑު ހަރަކާތްކުރާއިރު. ދަރިފުޅު ބޭނުންވޭ ހުޅުވިފައި ހުންނަ ކޮންމެ ދުވަހަކު އަންނަން. މިއީ މާލޭގެ ކުދި ތަންތަނުގައި ތޮއްޖެހިގެން ދިރިއުޅޭ އާއިލާތަކަށް އެމީހުންގެ ކުދިންނަށް އުފާވެރިކަމެއް ހިލޭ ހޯދައިދެވޭނެ ރަނގަޅު ފުރުސަތެއް." ދަރިފުޅު ތެމެން ހުރިއިރު އެމަންޒަރު އުފަލާއެކު ބަލަންހުރި ބެލެނިވެރިއަކު އޭނާގެ ޚިޔާލު ފާޅުކުރިއެވެ.

ޖުމްލަ 8 ހެކްޓަރު ބޮޑުމިނުގައި ހުންނަ ސެންޓްރަލް ޕާކު ބަހާލާފައިވަނީ 4 ޒޯނަކަށެވެ.

1 ރެކްރިއޭޝަން ޒޯން: ސްކޭޓް ޕާކް، އެކްސަސައިޒް ޕްލެޓްފޯމް، ކްލައިމްބިންގ ވޯލް

2 އިންޓެރެކްޓިވް ޒޯން: ސީސޯ ޕާކް، އެކްސްޓެންޑެޑް ވިއުންގ ޕްލެޓްފޯމް

3 ފައުންޓެއިން ޒޯން: އިންޓަރެކްޓިވް ވޯޓަރ ފައުންޓެއިން

4 ލެޝަރ ޒޯން: ޕާތުވޭ ގާޑަންސް

ހުޅުމާލެ އަކީ ރާއްޖޭގެ އެހެނިހެން ރަށްރަށާއި ބަލާއިރު ދުރު ރާސްތާ ޕްލޭނެއްގެ ދަށުން ތަރައްގީކުރަމުން އަންނަ ސިޓީއެކެވެ. އާއިލާ އާއި ރަހުމަތްތެރިންނާއެކު ހިތްފަސޭހަ މާހައުލެއްގައި އުފާވެރި ވަގުތުތަކެއް ހޭދަކުރުމަށް ފަސޭހައިން ބޭނުންކުރެވޭނެ ގޮތަކަށް ހުސް ޖާގަތަކެއް ހުޅުމާލޭގެ އެކި ސަރަހައްދުގައި އެބަހުއްޓެވެ. ހުޅުމާލޭގެ އާބާދީ ބޮޑުއަދަދަކުން އިތުރުވަމުންދާއިރު، އާންމުކޮށް ހުޅުވާލެވިފައިވާ ސަރަހައްދުތަކުގައި ބަހައްޓާފައި ހުރި ތަކެއްޗަށް ގެއްލުން ނުވާނެ ގޮތަކަށް އެތަކެތި ބޭނުންކުރުމަށް ސަމާލުކަން ދިނުމަކީ ވަރަށް މުހިންމު ކަމެކެވެ.

ޕާކުގައި ކައިބޮއެ ހަދާއިރު، ކުނިއެޅުމަށް ޑަސްޓްބިންތައް ބޭނުންކޮށް އެންމެންގެ ރައްކާތެރިކަމާއި ސާފުތާހިރު ކަމަށް އިސްކަން ދިނުމަކީ ކޮންމެހެން ކުރަންޖެހޭ ކަމެކެވެ. ފައްވާރު ފަދަ ރީތި ތަންތަނުގެ ބޭނުން ގިނަ ދުވަހަށް ކުރެވޭނީ އެބޭނުންކުރާ ބަޔަކު ސަމާލުކަން ދިން މިންވަރަކުންނެވެ.