ގިނަ މައިންބަފައިންނަކީ އެންމެ ކުޑައިރުއްސުރެ ވަރަށް ލޯބިން ދަރިން ގެންގުޅެ ބޮޑުކުރާ ބައެކެވެ. އެހެންނަމަވެސް ހިތާމައަކީ އުމުރުން ދުވަސްވީ މައިންބަފައިންނަށް ދޭންޖެހޭ ލޯތްބާއި އަޅާލުން ބައެއް ދަރިންގެ ފަރާތުން ނުލިބުމެވެ. އަޅާލުމާއި ލޯބި އެންމެ ބޭނުންވާ ދުވަހު ހިތްދަތި ދިރިއުޅުމެއް އުޅެންޖެހޭތީ ލޮލުން ކަރުނަފައިބާ މަންޒަރަކީ ހާދަ ހިތްދަތި މަންޒަރެކެވެ.
ނަމޫނާ ދައްކަމާ
ވަރަށްގިނައިން މީހުން ބުނާއަޑު އިވެއެވެ. ގިނަފަހަރަށް ދަރިން ކަންތައް ކުރާނީ އެދަރިންނަށް ފެންނަ މަންޒަރާއި އެއްގޮތަށެވެ. މައިންބަފައިންނަށް ކަމޭހިތާ މަންޒަރު މިއަދުގެ ކުޑަކުދީންނަށް އެކުދިންގެ މައިންބަފައިންގެ ފަރާތުން ނުފެންނަނަމަ، މާދަމާ އެކުދިންގެ ފުށުންވެސް ފެންނާނީ އެފަދަ މަންޒަރަކަށްވުން އެކަށީގެންވެއެވެ. ތިމާގެ މައިންބަފައިންނަށް ބޭނުންވާ އަޅާލުން ދީގެން ދަރިންނަށް ނަމޫނާ ދައްކާށެވެ. އެއިރުން އުމުރުން ދުވަސްވާ ދުވަހަކުން އެކުދިންގެ ފުށުން އިރާދަކުރެއްވިއްޔާ ތިބާ ބޭނުންވާފަދަ އަޅާލުމާއި ލޯބި ލިބުން އެކަށީގެންވެއެވެ.
ރަނގަޅު ތަރުބިއްޔަތު
ދަރިން އުފަންވަނީ ސާފު ފިޠުރަތުގެ މަތީގައެވެ. އެދަރީންނަށް ރަނގަޅު ތަރުބިއްޔަތެއް ދިނުމަށް އިސްކަންދޭންޖެހެއެވެ. އިސްލާމްދީނުގައި ކަންކަން އޮންނަގޮތް ރަނގަޅަށް ބުނެދީ ދީނާއިމެދު ހޭލުންތެރިކަން އުފައްދަންޖެހެއެވެ. ދަރިންގެ ފަރާތުން ނޭދެވޭ މަންޒަރުތައް ގިނަފަހަރަށް ފެންނަނީ ދެވޭ ތަރުބިއްޔަތަކުން ނޫނީ އަޅާލުން ބޭނުންވާ ވަރަށް ނުދެވޭތީކަމަށްވުން އެކަށީގެންވެއެވެ.
އިހްތިރާމް ކުރަމާ
މައިމީހާ 9 މަސްވަންދެން އެއުފުލި ބުރައާއި ވޭން އަދި ވިހެއުމުގައި އެ އެޅި ވޭނަކީ އިހްސާސް ކުރަން އަދި ދުލުން ބުނަން ފަސޭހަކަމެއް ނޫނެވެ. އެކަން އިހްސާސްކުރެވޭނީ ތިބާއަށް އަމިއްލަ ދަރިން ލިބުނު ދުވަހަކުންނެވެ. މައިމީހާ އެއުފުލި ވޭނުގެ އަގު ތިބާ މުޅި އުމުރު ހޭދަކޮށްގެން ވެސް އަދާ ނުކުރެވޭނެކަމީ އިސްލާމްދީން އަންގައިދޭ މަތިވެރި ހަގީގަތެކެވެ. އެހެންވުމުން މައިމީހާއަށް އަދި ޖުމްލަކޮށް މަންމައާއި ބައްޕައަށް އިހްތިރާމް ކުރާށެވެ. އެމީހުން ހިތުގައިޖެހޭ ފަދަ ކަންތައް ނުކުރާށެވެ.
ވަގުތު ހުސްކުރަމާ
ތިބާގެ ބިޒީ ދިރިއުޅުމުގައި މައިންބަފައިންނާއެކު އެއް ސުފުރާއެއްގައި ކާލެވުނީ އެންމެފަހުން ކޮންއިރަކުތޯ އެވެ؟ ނޫނީ އެ މައިންބަފައިން ގޮވައިގެން ހިނގާލަންދިއުން ނުވަތަ މައިންބަފައިން ހިތްހަމަޖެހޭފަދަ ވަގުތުކޮޅެއް ހޭދަކުރެވުނީ އެންމެފަހުން ކޮންއިރަކުތޯ އެވެ؟ އަދި ތިބާ އަމިއްލައަށް ހޯދާ ފައިސާއިން އެ މައިންބަފައިން ހިތްހަމަޖެހޭފަދަ ހަދިޔާއެއް ގަނެދެވުނީ ކޮންއިރަކުތޯއެވެ؟ އަމިއްލަ ނަފްސާ މިސުވާލުތައް ކުރުމަށްފަހު އިސްލާހުކުރަންޖެހޭކަން ގަބޫލުކުރެވޭނަމަ މިވަގުތުން ފެށިގެން އިސްލާހުވަމާ ހިގާށެވެ. ކިތަންމެ ބިޒީކޮށް އުޅެންޖެހުނަސް މައިންބަފައިންނަށް ވަގުތުދޭށެވެ.
މައިންބަފައިންނަށް ހެޔޮކޮށް ހިތުމަށް އިސްލާމް ދީން ވަނީ ބާރު އަޅާފައެވެ. އަދި މައިންބަފައިންނަށް ހެޔޮކޮށްހިތުން ވަނީ ދެމިގެންދާ ކަމެއްގެ ގޮތުގައި ލައްވަވާފައެވެ. މައިންބަފައިން މަރުވި ކަމުގައިވިޔަސް އެމައިންބަފައިންނަށްޓަކައި ދަރީންނަށް ހެޔޮކޮށް ހިތޭނެއެވެ. މިގޮތުން މަރުވެދިޔަ މައިންބަފައިންނަށްޓަކައި ހެޔޮދުއާކޮށްދީ، ސަދަގާތް ކުރެވިދާނެއެވެ. އަދި މައިންބަފައިންނަކީ ދުނިޔެމަތީގައި ލެއްވި ރަހްމަތެއްކަން ދަންނާށެވެ.
