2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހެވެ. އެއިރު އަދި ގަޑިން ހެނދުނު 9 ނުޖަހާނެއެވެ. އަޅުގަނޑު ދިޔައީ ބޭބެއެއްގެ ގެއަށް އެއްޗެއް ހަވާލު ކުރާށެވެ. އެއިރު އެ ސަރަހައްދަށް ކޮންމެވެސް ވަރަކަށް ވަނީ ރާޅު އަރާފައެވެ. ގެއަށް އައިއިރު ގޭގައި އެވަގުތު ސައިބޯން އިން ބޮޑުބޭބެ (ރަށުގެ ކަތީބު) އަށް އެމައުލޫމާތު ދިނީމެވެ. ކަތީބު އަވަސްވެގަތީ އޮފީހަށް ގޮސް ވެގެން އުޅޭގޮތެއް ބެލުމަށެވެ.
ރަށުގައި ދިރިއުޅޭ ގެ ހުންނަނީ މޫދު ކައިރީގައި ދެ ގެ ދޫކޮށްފައެވެ. އެއިރު އެސަރަހައްދަކަށް އަދި ރާޅުގެ އަސަރު ނުކުރެއެވެ. ގޭގެ އެންމެންވެސް އަވަހަށް ދިޔައީ މޫދު ބަލާލާ ވެގެން އުޅޭގޮތެއް ބެލުމަށެވެ. އަޅުގަނޑުމެން ބަލަންތިއްބާ ފުރަތަމަ ފެނުނީ މޫދުގެ ލޮނުގަނޑު ހިކުނުތަނެވެ. ވަރަށް ދުރުން މުރަކަތައްވެސް ރީއްޗަށް ފެންނަން ހުއްޓެވެ. ކުޑައިރުކޮޅެއް ނުވަނީސް ދެން ފެނުނީ ބޮޑު ރާޅެއް އަންނަ މަންޒަރެވެ. އެންމެންވެސް ދުއްވައިގަތީ އެއްގަމާ ދިމާލަށެވެ. މުޅި ސަރަހައްދު އެއްކޮށް ރާޅުއަރާ ފެންބޮޑުވިއެވެ. ބައެއް ގޭގެއަށް ވެސް ގެއްލުން ލިބުނެވެ. އެވަގުތު ރަށުގެ ގިނަ މީހުން ގެންދިޔައީ ސްކޫލު ސަރަހައްދަށެވެ. އެއީވެސް މޫދު ކައިރީގައި ހުރި ތަނަކަށް ވާތީ ސްކޫލު ގޯތިތެރޭގެ ބޮޑު ސަރަހައްދެއް އޮތީ ކަކުލާ ހަމައަށް ފެން ބޮޑުވެފައެވެ. އެވަގުތު އަޅުގަނޑުވެސް ބެލީ ކްލާސްތަކުން ގޮނޑި ގެނެސް އުމުރުން ދުވަސްވީ މީހުންނާއި ކުޑަކުދިންނަށް އެހީތެރިކަން ފޯރުކޮށްދެވޭތޯއެވެ. ބައެއް މީހުން ބިރުން ރުއި މަންޒަރުވެސް ފެނުނެވެ. އެކަމަކު ކޮންމެ މީހަކުވެސް ބެލީ އެކަކު އަނެކަކަށް އެހީތެރިކަން ފޯރުކޮށްދެވޭތޯއެވެ. މިއީ އެދުވަހު އަޅުގަނޑަށް ފެނުނު މަންޒަރެވެ.
ރާއްޖޭގައި އެއްބައިވަންތަކަމުގެ ދުވަސް ފާހަގަކުރަމުން ދަނީ 2004 ވަނަ އަހަރު ޑިސެންބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީގެ ހިތާމަވެރި ކާރިސާއާ ގުޅިގެން ރާއްޖޭގެ ރައްޔިތުން ދައްކުވައިދިން އެކުވެރިކަމާއި އަޚްވަންތަކަމާއި، ޤައުމީ އެއްބައިވަންތަކަމުގެ މަތިވެރި ގުޅުމުގެ ހަނދާންތައް އާކުރުމަށެވެ.
ސުނާމީގެ ކާރިސާ އަށް 17 އަހަރު ފުރުނުއިރު އެދުވަހުގެ ހިތި ހަނދާންތަކަކީ ދުވަހަކުވެސް ފޮހެވޭނެ ހަނދާންތަކެއް ނޫނެވެ. ބަލަން ތިއްބާ ލޯބިވާ މައިންބަފައިންނާއި އާއިލާގެ މެންބަރުން ރާޅާއެކު ދަމައިގަނެ މިދުނިޔެ ދޫކޮށްދިޔަ މަންޒަރަކީ އެފަދަ ހިތާމައެއް ތަހައްމަލުކުރި ފަރާތްތަކުގެ ހިތި ހަނދާންތައް އާވާ ދުވަހެކެވެ. މިއަދުވެސް އެ ހަނދާންތައް އާއިލާތަކުން ކިޔައިދެނީ ފުން އަސަރާއެކުގައެވެ.
މިފަދަ ދުވަހެއް ފާހަގަކުރާއިރު އެންމެ ބޮޑު އިސްކަމެއް ދޭންވީ އެކަކު އަނެކަކަށް އެހީތެރިކަން ފޯރުކޮށްދިނުމަށެވެ. އަޅުގަނޑުމެންގެ ތެރޭގައި އުފެދިފައިވާ އެއްބައިވަންތަކަމާއި އަޚްވަންތަކަމުގެ ގުޅުމަށް ބުރޫއަރާފަދަ އެއްވެސް ކަމެއް ނުކުރުމަށް އަޒުމް ކަނޑައަޅަންޖެހެއެވެ.
ސުނާމީގައި ރާޅު އަރައިގެން އަންނަ މަންޒަރު
ސުނާމީގައި ދިވެހިރާއްޖެއިން 82 މީހުން ނިޔާވެ 26 މީހުން ގެއްލުނުއިރު، ގިނަ ރަށްތަކަކަށް ވަނީ ބޮޑެތި ގެއްލުންތަކެއް ލިބިފައެވެ. އެންމެބޮޑު ގެއްލުމެއް ލިބުނު ރަށްތަކުގެތެރޭގައި ތ.ވިލުފުށި އަދި މ. ކޮޅުފުށި އަދި ރ. ކަނދޮޅުދޫ ހިމެނެއެވެ. ބައެއް ރަށްރަށުގެ ގެތައް ހަލާކުވެ ވަގުތީ ހިޔާތަކުގައި 12000 އެއްހާ މީހުން އެތައް ދުވަހަކަށް އުޅެންޖެހުނެވެ. ތ.ވިލުފުށި އަލުން މީހުން އުޅެވޭ ގޮތަށް އާބާދުކުރިއިރު، ކަނދޮޅުދޫ މީހުން ވަޒަންވެރިވެގެން ދިރިއުޅެނީ ދުވާފަރުގައެވެ.
ރިސޯޓުތަކަށް ބޮޑެތި ގެއްލުންތަކެއް ލިބުނުއިރު ފަތުރުވެރިކަން ދުވަސްކޮޅަކަށް ހުއްޓުމަކަށް އައެވެ. ސުނާމީގައި ޖުމްލަ 230،000 މީހުން އެކި ގައުމުތަކުން މަރުވެފައިވާކަމަށް ރިޕޯޓް ކޮށްފައިވެއެވެ.
ސުނާމީއަކީ އެމަންޒަރު ފެނި އޭގެ ހިތި ތަޖުރިބާ ކުރަންޖެހުނު ކޮންމެ މީހަކަށް ހިތްދަތި ހަނދާނެކެވެ. ސުނާމީ ކާރިސާގައި މިދުނިޔެ ދޫކުރި އަޚުންނާއި އުޚްތުންގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރު ކުރައްވާށި އެވެ. އާމީން
