1. ކޭލް
ކޭލް އަކީ ކެއުންތަކާއި ބުއިންތަކުގައި ހިމަނަން ވަރަށް ރަނގަޅު ފަތެކެވެ. އޭގައި އެކުލެވޭ ވިޓަމިންތަކުގެ ތެރޭގައި، ވިޓަމިން އޭ، ވިޓަމިން ސީ، ވިޓަމިން ކޭ އަދި ވިޓަމިން ބީ 6 ހިމެނެއެވެ. މީގެ އިތުރުން ކެލްސިއަމް އަދި މެގްނީޒިއަމްވެސް ގިނަ އަދަދަކަށް އެކުލެވެއެވެ.
ކޭލް އަކީ އެކި ކަހަލަ ޖޫސްތަކާއި ސެލެޑްތަކުގައި ވަރަށް އާންމުކޮށް ބޭނުންކުރާ ބާވަތެކެވެ. ފަތް ރޯކޮށް ހުންނައިރު އޭގައި ހިތިރަހައެއް ހުރިނަމަވެސް ޖޫސްތަކުގައި އެހެން ބާވަތްތަކާއި އެކު މުގުރާލުމުން ހިތިރަހައެއް ނުހުންނާނެއެވެ. އަދި ކައްކައިގެން ކާއިރުވެސް ހިތި ރަހައެއް ނުލާނެއެވެ.
2. ސްޕިނެޗް (ބޯވެލިފަތް)
މިއީ ރާއްޖޭގައި ފަސޭހައިން ހެދޭ ފަތެކެވެ. އެމެރިކާގެ އެގްރިކަލްޗަރ ޑިޕާޓްމެންޓުން ބުނާ ގޮތުގައި 180 ގްރާމްގެ ފެނުކެއްކި ސްޕިނެޗް ފަތްތައްޓެއް ކައިފިނަމަ 6.43 މިލިގްރާމްގެ އަޔަން ހަށިގަނޑަށް ލިއްބައިދެއެވެ. އެއީ ދުވާލެއްގެ މައްޗަށް ހަށިގަނޑަށް ބޭނުންވާ އަޔަން ނުވަތަ ދަގަނޑުގެ ބައިގެ ގާތްގަނޑަކަށް ތިން ބައިކުޅަ އެއްބައެވެ.
3. ކޮޕީ ފަތް (ކޮލާޑް ގްރީންސް)
ކޮޕީފަތަކީ ރާއްޖޭގައި ވަރަށް އާންމުކޮށް ހައްދާ ބާވަތެކެވެ. އަބަދުވެސް ބާޒާރުން ލިބެން ހުރެއެވެ. ކޮޕީފަތަކީ ވިޓަމިން އޭ، ވިޓަމިން ސީ އަދި ވިޓަމިން ބީ އިން މުއްސަނދިވެފައިވާ ފަތެކެވެ. މިއީ ސެލެޑްތަކަށް ތައްޔާރުކުރާއިރު ހިމަނާލަން ވަރަށް ރަނގަޅު ފަތެކެވެ. އަދި މެންދުރާއި ރޭގަނޑުގެ ކެއުމުގައި ހިމަނައިގެން ކާލަންވެސް ރަނގަޅު ފަތެކެވެ. މިއީ ކައްކައިގެންވެސް ކާލަން މީރު ފަތެކެވެ. ޕްރޮސްޓްރޭޓް ކެންސަރާއި އުރަމަތީގެ ކެންސަރާއި ރަހިމުގެ ދޮރަށްޖެހޭ ކެންސަރުން ރައްކާތެރިވުމަށް މިއީ އެންމެ ރަނގަޅު ފަތެވެ. މި ފަތް ކެއުމުގައި ހިމަނާނަމަ ކެންސަރުން ރައްކާތެރިވުމާއި އަދި ހަށިގަނޑަށް ގެއްލުންދޭ ބެކްޓީރިއާއާއި ވައިރަސްތަކާއި ދެކޮޅަށް މަސައްކަތް ކުރުމުގެ ކުޅަދާނަކަން މިފަތުގައި ހިމެނޭ މާއްދާތަކުގައި އެކުލެވޭ ކަމަށް ދިރާސާތަކުން ދައްކައެވެ. ކޮޕީ ފަތުގައި ގިނައަދަދަކަށް ފޮލިކް އެސިޑްވެސް ހިމެނޭތީ މިއީ މާބަނޑު ދުވަސްވަރު ކެއުމުގައި ހިމަނަން ވަރަށް މުހިންމު ފަތެކެވެ. ފޮލިކް އެސިޑަކީ ބަނޑުގައިވާ ދަރިފުޅު އައިބުތަކުން ރައްކާތެރިކޮށްދޭ މާއްދާއެވެ. އަދި ނާރުގެ ދުޅަހެޔޮކަމާއި ހިތުގެ ދުޅަހެޔޮކަމަށްވެސް މުހިންމު މާއްދާއެކެވެ.
4. ޗާޑް
މިފަތަކީ ވެސް ވިޓަމިން އޭ އާއި ސީ ގިނަ އަދަދަކަށް ހިމެނޭ ފަތެކެވެ. އަދި ފައިބާއާއި ޕޮޓޭސިއަމްވެސް މިފަތުގައި ހިމެނެއެވެ. އެކި ބާވަތްތަކުގެ ސެލެޑްގައި ހިމަނައިގެންނާއި ކައްކައިގެންވެސް ކެވޭ މި ފަތަކީ ލޭގެ ޕްރެޝަރ ދަށްކޮށްދޭ ފަތެއް ކަމަށް ދިރާސާތަކުން ދައްކައެވެ. އަދި ކަސްރަތު ކުރާއިރު ބޭނުންވާ އޮކްސިޖަންގެ މިންވަރުވެސް ދަށްކޮށްދެއެވެ. ކުޅިވަރުތަކުގައި އުޅޭއިރު ބުންވަރު އިތުރުކޮށްދެއެވެ. އަދި ކެންސަރާއި ދެކޮޅަށްވެސް މަސައްކަތްކޮށްދެއެވެ. ދުވާލަކަށް ހަށިގަނޑަށް ބޭނުންވާ ވިޓަމިންއޭގެ މިންވަރުގެ 44 ޕަސެންޓް މީގެ ފަތް ޖޯޑަކުން ލިބެއެވެ. އަދި ދުވާލަކަށް ހަށިގަނޑަށް ބޭނުންވާ ކެލްސިއަމްގެ މިންވަރުގެ 18 ޕަސެންޓް ކެލްސިއަމް ލިބެއެވެ. ފަލަވުމާއި ހަކުރުބައްޔާއި ހިތުގެ ބަލިތަކުން ދުރުހެލިވުމަށް މި ފަތް އެހީވެދެއެވެ.
5. ލެޓިއުސް
ދަނބުކުލައާއި ފެހިކުލައިގައި ހުންނަ މިފަތަކީ ގިނަ އަދަދަކަށް ވިޓަމިން އޭ އެކުލެވޭ ބާވަތެކެވެ. ސެލްޑްތަކުގައި އާންމުކޮށް ހިމަނާ މިފަތަކީ ސެލެޑަށް ރީތިކަން ގެނެސްދޭ ރަހަމީރު ފަތެކެވެ.
6. އަރުގުލާ
ލެޓިއުސްކާން ފޫހިވެއްޖެނަމަ މިފަތް ހޯދާށެވެ. މިއީ ކެލަރީ މަދު ފެންގިނަ ފަތެކެވެ. 90 ޕަސެޓް ފެން އެކުލެވޭ މި ފަތަކީ ރަހަ މީރު ކާލަން ފަސޭހަ ފަތެކެވެ. ޑީހައިޑްރޭޓް ވިޔަ ނުދީ ހަށިގަނޑު ހިފަހައްޓާލަދޭ މި ފަތަކީ ރާއްޖޭގެ ބާޒާރުންވެސް ލިބެން ހުންނަ ފަތެކެވެ.
ކެއުމުގައި މިފަދަ ފަތްތައް ހިމެނުމުން ބަލިތަކުން ރައްކާތެރިކޮށްދީ ދުޅަހެޔޮ ސިއްހަތެއްގައި ހުރުމަށް ބޮޑު ބާރަކަށް ވެއެވެ.
މައުލޫމާތާއި ފޮޓޯތައް ނެގީ: ކެކްމެޑިސިން
