ދުނިޔެއަށް އުފަންވާއިރު ބައެއް މީހުންނަކީ ހުރިހާ ގުނަވަންތަކެއް އެންމެފުރިހަމަވެފައިވާ ބައެއް ނޫނެވެ. އަދި މިފަދަ ދެރަގޮތެއް ދިމާވިކަމުގައިވިއަސް ހިތްވަރާއެކު ދިރިއުޅޭ މީހުން އެބަތިއްބެވެ. މިއީވެސް އެފަދަ ނަމޫނާ މީހެކެވެ.
މިހާރު އުމުރުން 25 އަހަރުގެ ޒޫލީ އަކީ އުފަންވިއިރުވެސް ހަތަރެސްފައި ނެތް މީހެކެވެ. 'ޓެޓްރާ އެމެލިއާ ސިންޑްރަމް' ގެ ސަބަބުން މައިމީހާގެ ބަނޑުގައި އޮތްއިރު ހަތަރެސްފައި ނުއުފެދުނީ ކަމަށް ރިޕޯޓްތަކުގައި ފާހަގަކޮށްފައިވެއެވެ. ޒޫލީގެ އުމުރުން އެންމެ 2 އަހަރުގައި ބައްޕަ އަމިއްލައަށް މަރުވިކަމުގައިވިއަސް އޭނާގެ މަންމަ ދިޔައީ 6 ކުދިން ބެލުމުގެ ޒިންމާ އަދާކުރަމުންނެވެ. ކޮލަމްބިއާ އަކީ ނުކުޅެދުންތެރިކަން ހުންނަ ކުދިންނަށް އެއްވެސް އެލަވަންސެއް ދޭ ގައުމެއް ނޫންކަމަށް ވަނީ ބުނެފައެވެ.
ޒޫލީގެ މަންމަ ދެކޭގޮތުގައި ހަތަރެސްފައި ނެތަސް އަމިއްލަ ކަންކަން ޒޫލީއަށް ކުރެވޭނެއެވެ. އެހެންވެ ވަނީ ޒޫލީއަށް އަމިއްލައަށް ހުރިހާކަމެއް ކުރަން ދަސްކޮށްދީފައެވެ. ޒޫލީއަށް ކުރަން އެނގޭ ކަންތައްތަކުގެ ލިސްޓް ކިޔައިދެމުން ބުނީ ކުޑައިރުއްސުރެ އަމިއްލައަށް ދަތްއުނގުޅައި ހެނދުން ބަދަލުކުރަން އެނގޭ ކަމަށެވެ.
ޒޫލީ ބޮޑުވެގެން އައިއިރު ބުލީގެ ޝިކާރައަކަށްވިއެވެ. މިގޮތުން އޭލިއަންގެ ނަމުން އޭނާއަށް ގޮވާ ސްކޫލަށް ގެންދާ ކާއެތިކޮޅުވެސް އެހެން ކުދިން ކެއުމަށްފަހު ޖެއްސުން ކުރި ކަމަށް ވަނީ ބުނެފައެވެ.
" އަހަރެންގެ ހިތަށްއަރާ ހެނދުނު ހޭލާއިރު އެހެން ކުދިންނެކޭ އެއްގޮތަށް ހަތަރެސްފައި ހުންނާނެ ނަމައޭ. އަހަރެންނަށް އެއްވެސް ރަހުމަތްތެރިއެއްވެސް ނުލިބޭ ސްކޫލުގައި. މަންމަ ދިޔައީ އަހަރެންނަށް ހިތްވަރުދެމުން ދިރިއުޅުމައިގެން ކުރިއަށްދާން" ކުޑައިރުގެ ހަނދާން އާކުރަމުން ބުންޏެވެ.
ކެލިފޯނިއާ ގައި ދިރިއުޅެމުން އަންނަ ޒޫލީ އޭނާގެ ހުރިހާ ކަމެއް މިހާރު ކުރަނީ އަމިއްލައަށެވެ. ކެއުން ކަމުގައިވިއަސް، މޭކަޕްކުރުން ކަމުގައިވިއަސް ކުރަނީ އޭނާ އަމިއްލައަށެވެ. އަދި އެހެން މީހުންނަށްވެސް އެހީތެރިކަން ފޯރުކޮށްދެއެވެ. މިގޮތުން އޭނާގެ ދައްތަގެ ކައިވެނި ޕާޓީއާއި ދިމާކޮށް މޫނުގެ ހަންގަނޑު ރީތިކުރުމަށް މޫނުގައި ޚާއްސައެއްޗެއް ހާކާ މަންޒަރުގެ އިތުރުން ދައްތަގެ ނިޔަފަތިތައް ރީތިކޮށްދޭ މަންޒަރު ވީޑިއޯ އިން ވަނީ ފެނިފައެވެ.
" އަހަރެންގެ ކޮއްކޮ ހުއްޓާ ކީއްކުރަން އަހަރެން ސެލޫންއަށް ރުފިޔާ ޚަރަދުކޮށްފައި ދާންވީ. އަހަރެން ކޮއްކޮހާ މޮޅަށް އެހެން މީހަކަށް ނިޔަފަތި ރީތި ނުކުރެވޭނެ" ޒޫލީގެ ދައްތަ ބުނެފައިވެއެވެ.
ޒޫލީ ބުނިގޮތުގައި އޭނާގެ ދެއަތާއި ދެފައި ނެތް ކަމުގައިވިއަސް ހިތެއް އެބައޮތެވެ. ދައްތަގެ ކައިވެނި ޕާޓީގެ ތައްޔާރީތަކުގައި ފުރޮޅުލީ ގޮނޑިއެއްގައި އިށީދެއިނދެގެން ހިނިތުންވުމާއެކު ދިޔައީ ބައިވެރިވަމުންނެވެ. އަދި ޒޫލީ ވަނީ ކައިވެނީގެ ހަފްލާއަށް ދައްތަގެ މޭކަޕްވެސް ކޮށްދިނުމުގެ އިތުރަށް އޭނާގެ އަމިއްލަ މޭކަޕްވެސް ކޮށްފައެވެ.
"އަހަރެން ވަރަށް އުފާވެފަ މިހިރީ. އަހަރެން ދައްތަގެ ކައިވެނީގެ ހަފްލާގައި މިގޮތަށް ބައިވެރިވެވުނީމަ" ޒޫލީ ބުންޏެވެ.
އޭނާ އިތުރަށް ފާހަގަކޮށްފައިވާ ގޮތުގައި ދިރިއުޅުމާއިމެދު ހިތްހަމަޖެހެއެވެ. އަދި އޭނާއަށް އެހެން މީހެއްގެ ލޯތްބެއް ބޭނުމެއް ނުވެއެވެ. ބޭނުންވަނީ އޭނާ އަމިއްލައަށް އަމިއްލަ ނަފްސުދެކެ ލޯބިވާށެވެ. އާއިލާގެ ފަރާތުން އޭނާއަށް ލިބޭ އެއްބާރުލުމާއިމެދު އުފާވާ ކަމަށް ވަނީ ބުނެފައެވެ.
ހުސްވަގުތު ހޭދަކުރަނީ ރީތި މަންޒަރުތައް ކުރެހުމުގައެވެ. އަނގައިން ފިހިގަނޑުގައި ހިފަހައްޓައިގެން ކުރަހާ މަންޒަރު ފެނި މީހަކު އަޖައިބުވެދާނެއެވެ. އެހާވެސް ރީއްޗެވެ. އާމްދަނީ ހޯދުމަށްޓަކައި ދަނީ އޭނަގެ ކުރެހުންތައް ވިއްކަމުންނެވެ. ޒޫލީ ދަނީ ތަފާތު ބައްދަލުވުންތަކުގައި އެހެން މީހުންނަށް ހިތްވަރެއްގެ ގޮތުގައި 'މޯޓިވޭޝަނަލް ސްޕީކަރ' އެއްގެ ގޮތުގައި ވާހަކަދައްކަމުންނެވެ.
ޒޫލީގެ ދިރިއުޅުމަށް ބަލާއިރު މިހާރު ފެންނަނީ ދިރިއުޅުމުގައި އޭނާއަށް މެދުވެރިވިގޮތާއިމެދު ހިތްހަމަޖެހި އުފާވެރިކަމާއެކު އެހެން މީހުންނަށް އެހީތެރިވެދީ ދިރިއުޅުމައިގެން ކުރިއަށްދާ މަންޒަރެވެ.
މައުލޫމާތު ނަގާފައިވަނީ: ޔޫޓިއުބް، ސީބީއެސް، ލިޓިލްތިންގްސް
